واشنگٽن (ٽيڪ نيوز) آمريڪا جي انصاف کاتي ٻن چيني هيڪرز تي ڳجھن ادارن سان مبينا رابطن جا الزام هنيا آهن. انصاف کاتي موجب چيني هيڪر چين جي هيڪنگ گروپ اي پي ٽي 10 سان تعلق رکن ٿا، جن آمريڪا جي ناسا، نيوي ۽ توانائي کاتي سميت 45 ڪمپنين جي ڄاڻ چوري ڪري جاسوسي ڪئي. انصاف کاتي جي نائب آمريڪي وزير روڊ روسنسٽائن موجب اهو برداشت جوڳو نه آهي ته اسان چين جا سائبر ڏوهه وائکا ڪندا رهون. اي پي ٽي 10 گروپ هڪ سافٽ ويئر استعمال ڪري ڪمپيوٽر نيٽ ورڪس تائين رسائي حاصل ڪندي ڊيٽا چوري ڪري ٿو. هن چين کان سڀني غيرقانوني سائبر ڪاررواين کي ترت روڪڻ جو مطالبو ڪيو.
آمريڪي نيوي اختيارين موجب چيني گروپ آمريڪي نيوي جي هڪ لک ميمبرن جي ذاتي، ڪاروباري ۽ ٻي ڊيٽا سوين گيگا بائٽس ۾ چوري ڪئي آهي. الزام هيٺ آيل چيني زو هوا ۽ زهانگ شِلنگ کي ڪمپيوٽر مان ڄاڻ چوري جي سازش تحت 5 سال ۽ وائر فراڊ جي مد ۾ 20 سال ۽ ٻيا 3 سال سزا تجويز ڪئي وئي آهي.
