گهوٽڪي ضلعي جا اڪثر ٿاڻا ۽ چوڪيون غير محفوظ،ڪچي توڙي پڪي جي اڪثر ٿاڻن جي حالت خراب،نه ديوارون نه ئي لاڪپ!

ميرپورماٿيلو (رپورٽ: برڪت ميراڻي )ضلعي گھوٽڪي اندر عوام جي جان ۽ مال جي حفاظت لاء قائم اڪثر پوليس ٿاڻا ۽ چوڪيون غير محفوظ بڻيل، عمارتون زبون ٿي ويون،ٿاڻن ۾ جوابدارن کي رکڻ لاءِ لاڪپ ئي موجود ناھي، ڪيترن ٿاڻن کي چوديواري موجود ناھي اڪثر ٿاڻا فاريسٽ ،تعليم کاتي، ايريگشن جي عمارتن تي قبضا ڪري قائم ڪيا ويا آھن.
گھوٽڪي ضلعي ۾ قائم 20 کان وڌيڪ پوليس ٿاڻا غير محفوظ بڻيل آھن ضلعي جي ڪچي توڙي پڪي جي اڪثر ٿاڻن جي حالت انتھائي خراب عمارتون زبون بڻيل آھن ضلعي گھوٽڪي جا ٽي سٽي ٿاڻن ڏھرڪي ،ميرپورماٿيلو ،گھوٽڪي کي ڪجھ سال اڳ ماڊل ٿاڻن ۾ تبديل ڪيو ويو جتي جي عمارتن جي مرمت ڪرائي انھن کي جديد ماڊل ٿاڻن ۾ تبديل ڪيو ويو آھي .
ضلعي جا رائونتي، جروار، يارو لنڊ ،عادلپور ، اوٻاوڙو ، ريتي ـ،کينجھو ۽ ٻين ٿاڻن جون عمارتون پراڻيون زبون بڻيل آھن ،جن جي سالن کان مرمت ناھي ڪرائي وئي انھن ما ڪجھ ٿاڻن اندر جوابدار کي رکڻ لاءِلاڪپ موجود ناھي ،ڪچو ٻنڊي ٽو ، کينجھو ،ٻيلو ميرپور ٿاڻن کي چوديواري موجود ناھي، جنھن جي ڪري ڪنھن وقت به اڻ وڻندڙ واقعو پيش اچي سگھي ٿو .
ضلعي گھوٽڪي جا ڪجھ ٿاڻا ۽ چوڪيون مختلف سرڪاري کاتن جي عمارتن تي قبضو ڪري انھن ۾ نفري ويھاري وئي آھي گھوٽڪي جو بي سيڪشن ٿاڻو اين ايچ اي جي عمارت ۾ قائم ٿيل آھي ٻيلو ميرپورٿاڻي جو سمورو عملو فاريسٽ کاتي جي عمارت تي قابض بڻيل آھي ان کان علاوه ڪچو ٻنڊي ٽو اسڪول اندر قائم ٿيل آھي گيمڙو ٿاڻو يونين ڪائونسل جي عمارت تي قبضو ڪري اتي پوليس ويھاري وئي آھي
جروار ٿاڻي جي حيات پتافي چوڪي پڻ اسڪول اندر قبضو ڪري قائم ڪئي وئي آھي رائونتي جي پوليس پڪٽ فون لانڊي ايريگشن جي عمارت ۾ قائم ٿيل آھي ضلعي اندر پوليس ٿاڻن جي عمارتن جي زبون حالي جي ڪري ٿاڻن ۾ پيل سرڪاري ھٿيار، ڪيس پراپرٽي، ڪاعذات ،مالخاني ۾ پيل سرڪاري اسلحو به غير محفوظ بڻيل آھن
ميرپورماٿيلو : گھوٽڪي ٿاڻن کي مليل پوليس موبائلون کٽارا بڻيل آھن، ڪچو ٻنڊي ون وٽ پوليس موبائِيل موجود ناھي،کينجھو ٿاڻي کي مليل خراب بيٺل آھي ،ساڳي طرح يارو لنڊ ،جروار ،ڪچو ٻنڊي ٽو ،کينجھو ٿاڻن کي مليل پوليس موبائيل اڪثر خراب ھجڻ سبب ٿاڻن کي خانا پوري لاء مھيا ڪيون ويون آھن پوليس موبائيل خراب ٿيڻ جي صورت ۾ مرمت لاء ڪو به سرڪاري فنڊ نه ٿو ڏنو وڃي،