دمشق (انٽرنيشنل ڊيسڪ) گڏيل عرب امارات 7 ورهين بعد گهرو ويڙهه سبب تباهه ٿيل ملڪ شام جي راڄڌاني دمشق ۾ پنهنجو سفارتخانو ٻيهر کولي رهيو آهي.
پرڏيهي ميڊيا موجب 2011 ۾ شامي تڪرار شروع ٿيڻ تي گڏيل بند ڪيل سفارتخانو عرب امارات ٻيهر کولڻ جون تياريون مڪمل ڪري ورتيون آهن، جنهن جو باضابطه اعلان ترت ڪيو ويندو.
هوڏانهن شامي حڪومت جي سڌ سماءَ واري وزير جو چوڻ هو ته اماراتي سفارتخانو کلڻ جا قدم صدر بشار الاسد جو مخالف عرب رياستن سان سفارتي لاڳاپا وڌائڻ جو هڪ قدم آهي.
ٻي پاسي گڏيل عرب امارات سفارتخانو کولڻ بابت باضابطه بيان جاري ناهي ڪيو، پر شام جي اطلاعات کاتي جي تقريب ۾ سفارتخانو ٻيهر کولڻ بابت صحافين کي ٻڌايو ويو.

ميڪسيڪو سٽي (دلچسپ نيوز) ميڪسيڪو ۾ هر سال جيان هن سال به مورين جو ميلو ملهايو ويو. رياست اوڪساڪا ۾ مورين سان ٺهيل مجمسن جو 121هون ساليانو ميلو ڪوٺايو ويو. ميلي ۾ مقامي آرٽسٽن مورين سان ٺهيل فن پاره پيش ڪيا. مورين سان تيار ڪيل منفرد ۽ دلفريب مجسما ڏسي ماڻهو اچرج ۾ پئجي ويا. مورين سان ٺهيل مجسمن کي نهايت صفائي ۽ نفاست سان عظيم انسانن، اهم جڳهن ۽ جانورن جي شڪليون ڏنيون ويون.
. ان دلچسپ ميلي جي شروعات آمريڪا ۾ موري جو وڪرو وڌائڻ لاءِ هڪ سئو سال اڳ ڪئي وئي هئي، اهو ميلو هاڻي هڪ ٻي روايت جي شڪل اختيار ڪري ويو آهي.

لنڊن(م ڊ) برطانوي گهرو وزير ساجد نويد چيو آهي ته پاڪستا سان تعلق رکندڙ مرد برطانيا ۾ ڏوهه ۾ملوث آهن. هڪ انٽرويو ۾ هن چيو ته اِها ڳالهه واضح آهي ته تازن ڏوهن ۾ پاڪستان ڄاول مردن جي ملوث جو انگ وڌيڪ آهي ۽ جيڪڏهن اسان رڳو حساس معاملو هئڻ جي ڪري ان امڪان کي رد ڪيون ٿا ته اِها ڳالهه غلط هوندي. هن چيو ته پاڪستاني پس منظر رکندڙ ماڻهو جيڪڏهن گينگ ۾ ملوث هوندا آهن ته انهن جا ثقافتي سبب ٿي سگهن ٿا.

 قنڌار ( م ڊ ) ڪراچي ۾ چيني قونصل خاني تي حملي جو ماسٽر مائينڊ اسلم اڇو افغانستان ڌماڪي ۾ ساٿين سميت مارجي ويو آهي. پرڏيهي ميڊيا جي رپورٽن موجب گذريل مهيني پابندي مڙهيل تنظيم بي ايل اي ڪراچي ۾ قونصل خاني تي حملو ڪيو هو، جنهن وقت حملو ڪيو ويو، ان وقت حملي جو ماسٽر مائينڊ اسلم اڇو ڀارت جي هڪ اسپتال ۾ علاج هيٺ آهي، پر هاڻي اطلاع مليا آهن ته هو افغانستان ڌماڪي ۾ مارجي ويو آهي. رپورٽن موجب قنڌار ۾ بي ايل اي ڪمانڊر اسلم اڇو جي گهر ٻاهران آپگهاتي ڌماڪو ٿيو آهي، جنهن جي نتيجي ۾ اسلم اڇو، ڪريم مري، روستو تاجو ۽ فريد سميت 7 ڄڻا مارجي ويا ۽ 3 زخمي ٿي پيا، حملي وقت اسلم اڇو دوستن سان گڏ گهر کان ٻاهر ويٺل هو ۽ آپگهاتي حملي جي ور چڙهي ويو.

پيوبلا (انٽرنيشنل ڊيسڪ) ڏکڻ آمريڪي ملڪ ميڪسيڪو جي رياست پيوبلا جي عورت گورنر هيليڪاپٽر هيٺ ڪرڻ سبب مڙس سميت فوت ٿي وئي.
رياست جي پهرين عورت گورنر ٿيڻ جو اعزاز ماڻيندڙ مارٿا ايريڪا الونسو ان حادثي کان صرف 10 ڏينهن اڳ 14 ڊسمبر تي گورنر مقرر ٿي هئي. سندس ڄمار 45 ورهيه هئي.
مارتا ۽ سندس ور رافيل مورينو ويلي روساس جو تعلق نيشنل ايڪشن پارٽي سان هو. رافيل مورينو ويلي به سال 2011 کان 2017 تائين رياست پيوبلا جو گورنر رهي چڪو آهي، هاڻي سينيٽر طور خدمتون نڀائي رهيو هو.
هوڏانهن ميڪسيڪن صدر حادثي تي ڏک جو اظهار ڪندي پريس ڪانفرنس ۾ چيو ته هيليڪاپٽر اڏام جي 10 منٽن بعد ڪري تباهه ٿي ويو.

مين هٽن (دلچسپ نيوز) چوندا هن ته ڀاڳ ڏئي ڀيڙو ته ڀاڳ مان سيرو، اهڙو ئي واقعو آمريڪا ۾ پيش آيو آهي. آمريڪي ريسٽورنٽ ۾ هڪ همراهه سي فوڊ کائيندي سچو موتي لڌو آهي. رِڪ اينٽوش نالي همراهه شهر هڪ مشهور سامونڊي غذا واري هوٽل ۾ مانجهاندي لاءِ کاڌو گهرايو، جنهن کي کائيندي سندس وات ۾ سچو موتي اچي ويو. جنهن بعد هوٽل جي باورچي تصديق ڪندي چيو ته اهو سچو موتي آهي، جيڪو ڪاري نقطي سبب وڌيڪ ناياب ٿي ويو آهي. رِڪ اينٽوش ان موتي کي کپائڻ جو ڪو ارادو نٿو رکي ۽ هو موتي کي خوش نصيبي جي نشاني طور پاڻ وٽ رکڻ چاهي ٿو.

ڪابل (ا ڊ) افغانستان جي گادي واري هنڌ ڪابل جي حڪومتي ڪمپائونڊ تي ٿيل حملي ۾ مارجي ويلن انگ وڌي 43 ٿي ويو آهي. مارجي ويلن ۾ پوليس اهلڪارن سان گڏ عام شهري به شامل آهن. اختيارين موجب حملي جي ذميواري اڃان تائين ڪنهن به ناهي قبولي ، جڏهن ته 20 کان وڌيڪ شهري مارجي ويا آهن. افغان فورسز جي جوابي ڪارروائي ۾ 4 حملو ڪندڙ پڻ مارجي ويا آهن. حملي کانپوءِ عمارت ۾ ڦاٿل 350 ڄڻن کي پڻ صحي سلامت ڪڍيو ويو آهي، جڏهن ته رات آخر تائين علائقي ۾ سرچ آپريشن مڪمل ڪيو ويو. گذريل ڏينهن افغانستان جي عوامي معاملن واري وزارت تي دهشتگردن پاران حملو ڪري ڏنو جنهن ۾ مارجي ويلن جو هاڻي تائين انگ 43 ٻڌايو پيو وڃي.

بيجنگ(م ڊ) پرڏيهي وزير شاهه محمود قريشي چيني هم منصب سان ملاقات ڪئي جنهن ۾ ٻطرفن لاڳاپن تي ڳالهيون ڪيون ويون. پرڏيهي وزير شاهه محمود قريشي 4 ملڪي دوري جي ٽئين مرحلي ۾ بيجنگ پهچي ويو جتي هوائي اڏي تي چين جي پرڏيهي وزارت جي اعليٰ اختيارين استقبال ڪيو، پرڏيهي وزير شاهه محمود قريشي بيجنگ ۾ چيني هم منصب وانگ اي سان ملاقات ڪئي جنهن ۾ ٻطرفن لاڳاپن ۽ خطي ۾ رابطن جي هٿي سميت ٻين اهم معاملن تي ڳالهيون ڪيون ويون. پرڏيهي وزير شاهه محمود قريشي چيني هم منصب وانگ اي سان ملاقات دوران وزير اعظم پاڪستان عمران خان طرفان چيني قيادت جي لاءِ پيغام ڏنو.