منظور وساڻ ته هاڻ سياسي خواب به ڏسڻ ڇڏي ڏنا!

7 صوبائي ۽ 3 قومي تڪن تي مشتمل ضلعي خيرپور جي 12 لک ووٽرن مان اڪثريتي ووٽرن ماضيءَ ۾ پاڪستان پيپلزپارٽي يا مسلم ليگ فنڪشنل کي ووٽ ڏنا. ماضيءَ جي اليڪشنز کي ڏسجي ٿو ته اِنهن ٻنهي پارٽين ۾ سخت مقابلا ٿيندا رهيا آهن ۽ ٻنهي پارٽين جي ڪارڪنن ۾ مسلسل ڇڪتاڻ پڻ رهندي آئي آهي جنهن ڪري ڪيتريون ئي پولنگ اسٽيشنون حساس پڻ قرار ڏنيون وينديون آهن. باوجود سخت حفاظتي اپائن جي اهڙين چونڊ سرگرمين ۾ قيمتي انساني جانيون پڻ ضايع ٿينديون رهيون آهن. ٻنهي پارٽين ۾ ڇڪتاڻ پنهنجي جاءِ تي پر پ پ ۾ جيلاني ۽ وساڻ خاندانن ۾ به پارٽيءَ اندر سخت ٽگ آف وار پڻ هلندي رهي آهي. اهو چونڊن ۾ ٽڪيٽن جي ورهاست وارو معاملو هجي يا ضلعي ۾ ايس ايس پي، ڊپٽي ڪمشنر يا ايڪسيئن جي مقرري جو مسئلو هجي. وساڻ هائوس توڙي جيلاني هائوسز وچ ۾ سرد جنگ ڇڙهيل ئي هوندي آهي ۽ ٻئي سياسي خاندان پنهنجي فرمانبردار ڊپٽي ڪمشنر کي ترجيح ڏيندا آهن جنهن ڪري اڪثر ڊپٽي ڪمشنر 6 مهينن بعد تبديل ٿيندا رهندا آهن جنهن سان ضلعي جو ڪاروهنوار متاثر رهندو آهي ۽ ماڻهن جي ڪمن ڪارين ۾ رولڙا پئجندا رهندا آهن. گذريل ڪجهه هفتن کان ذيلي تنظيمن جي عهدن جي مقرري جي نوٽيفڪيشن جي حوالي سان جيلاني هائوس خيرپور ۾ سرگرميون تيز آهن جنهن ڪري باوجود خيرپور جي سخت سرد موسم جي جيلاني هائوس خيرپور ۾ پ پ جي ڪارڪنن جا هشام لڳل هجن ٿا. ضلعي، تعلقي ۽ يوسي سطح تي جوڙيل يونٽن جي عهدن واري مقرري لاءِ نوجوان عهدا حاصل ڪرڻ لاءِ پيپلزپارٽي جي مرڪزي اطلاعات سيڪريٽري ڊاڪٽر نفيسه شاهه کي منٿون ڪندي نظر اچن ٿا۔ پيپلزپارٽي جي سياسي حلقن ۾ پڻ اهي ڳالهيون گردش ۾ آهن ته ذيلي تنظيمن جي عهدن جو نوٽيفڪيشن تعطل جو شڪار ٿيڻ ڪري ڪارڪنن ۾ مايوسي سان گڏ عدم دلچسپي پڻ نظر اچي ٿي. وساڻ هائوس خيرپور جنهن جي مهنداري سينئر سياستدان منظور وساڻ ڪندو پيو اچي گذريل چونڊن ۾ سندس نامزدگي فارم رد ٿيڻ سبب سندس انٽري سنڌ اسيمبلي ۾ نه ٿي سگهي جنهن جي جاءِ تي منور وساڻ جيڪو سندس ڪورنگ اميدوار هو ڪاميابي ماڻي اسيمبلي فلور تي پهتو آهي. پ پ جو سينيئر سياستدان منظور وساڻ اهڙي سياسي بي دخلي سبب پنهنجي ووٽرن کان ته پري ٿي ويو آهي پر سياسي خواب ڏسڻ پڻ بند ڪري ڇڏيا اٿس. وساڻ هائوس سان وابسته نواب وساڻ جنهن کي نئين تڪ ڪنگري ۾ شڪست ملي جنهن شڪست نه قبولي آهي ۽ پاڻ مٿان ٿيل حملي جو ڪيس پڻ راشد شاهه راشدي مٿان هلي رهيو آهي جنهن ڪيس جي شنوائين ۾ سرگرم آهي. جڏهن ته نواب وساڻ جي سياسي سرگرمين ۾ پڻ سرد مهري اچي وئي آهي پر وساڻ هائوس سان تعلق رکندڙ منور وساڻ پنهنجي تڪ ۾ سرگرم نظر اچي ٿو. جڏهن ته منظور وساڻ جو پٽ بئريسٽر هالار وساڻ پڻ پنهنجي تعليم مڪمل ڪري ڪوٽڏيجي تڪ ۾ سياسي طور سرگرم ٿي ويو آهي جنهن لاءِ اهڙيون ڳالهيون خيرپور جي سياسي حلقن ۾ ٻڌجن ٿيون ته منور وساڻ واري سيٽ تي هالار وساڻ کي آندو ويندو. جڏهن ته پ پ جي مرڪزي اطلاعات سيڪريٽري ڊاڪٽر نفيسه شاهه جنهن هڪ لک کان وڌيڪ ووٽ کڻي خيرپور ضلعي جي چونڊ تاريخ ۾ نئين تاريخ لکي آهي سا پڻ هر هفتي خيرپور ۾ سياسي طور انتهائي متحرڪ نظر اچي ٿي. ۽ ڪوٽڏيجي تعلقي ۾ پنهنجو ووٽ بينڪ برقرار رکڻ لاءِ ڪوششن ۾ آهي. جنهن ڪري ڪوٽڏيجي تعلقي ۾ تعزيتن جي پروگرامن، توڙي سياسي سماجي گڏجاڻين جو سلسلو تيز ڪري ڏنو اٿائين. ڊاڪٽر نفيسه شاهه انهن علائقن ڏانهن پڻ وڌيڪ ڌيان ڏئي پئي جتان جون پولنگون هن هارايون هيون. تازو ٺيڙهي ۾ ڪرڪيٽ ٽورنامينٽ ڪرائڻ ۽ ٻين صحت مند سرگرمين ۾ ٺيڙهي سندس سياسي مورچو بڻيل نظر اچي ٿو. پ پ جي مخصوص سيٽ تي چونڊيل ايم اين اي مهرين ڀٽو ۽ سندس وَرُ جاويد شاهه جيلاني پڻ سياسي طور سرگرم آهن. ڏاڏا شاهه هائوس تي ڪارڪن ڦيرا ڏيندي پڻ نظر اچن ٿا. ڪنگري ۽ گمبٽ تعلقن ۾ هي سياسي جوڙو پڻ پنهنجو ووٽ بينڪ برقرار رکڻ لاءِ انتهائي سرگرم آهي. خيرپور جي سياسي افق جي راڻيپور جي جيلانين جو ستارو هميشه چمڪندو رهيو آهي پر تازين چونڊن بعد ف ليگ جي صدرالدين شاهه کي شڪست ڏيڻ بعد پارٽي ۾ راڻيپور جي سيدن جي اثر رسوخ ۾ اضافو ٿيو آهي. هن خاندان کي هڪ صوبائي سيٽ پڻ مليل آهي 7 موجوده سنڌ سرڪار ۾ پڻ پيار علي شاهه کي ذميواريون ملڻ جا امڪان نظر اچن ٿا. جڏهن ته گمبٽ جي نعيم کرل کي هڪ ڀيرو ٻيهر پڻ سيٽ کٽڻ جي باوجود ڪا اهم ذميواري نه ملي سگهي آهي. هوڏانهن ف ليگ جيڪا ضلعي ۾ پ پ کان پوءِ اهم سياسي ڌر ليکجي ٿي. ف ليگ جيتوڻيڪ پ پ جي ڀيٽ ۾ ايتري منظم ۽ سرگرم نه رهي آهي. ف ليگ پنهنجي روايتي سياسي سُڀاءَ ۾ ڊرائنگ رومز تائين محدود آهي، ف ليگ ڪارڪنن مٿان لاتعداد ڪيس مڙهي کين وفاداريون تبديل ڪرڻ لاءِ ڌمڪايو ۽ هيسايو پيو وڃي. ناري سان وابسته ف ليگ ڪارڪن فقير خادم آرادين مٿان 100 کان وڌيڪ ڪيس داخل ڪرايا ويا آهن جڏهن ته ف ليگ قيادت پاران کيس ڪابه قانوني ۽ اخلاقي مدد نه پئي ڏني وڃي. خادم آرادين جو چوڻ آهي ته اِهي ڪيس وساڻ هائوس جي ڊرائنگ رومز ۾ ترتيب ڏنا وڃن ٿا جن کي وانگارو پوليس داخل ڪندي رهي ٿي. ف ليگ جو مرڪزي اڳواڻ سيد صدرالدين شاهه پنهنجي پٽ اسماعيل شاهه راشدي سميت چونڊن ۾ هارائجڻ بعد مسلسل غائب آهي. ڪارڪنن ۽ ووٽرن سان صدرالدين شاهه جو اهڙو رويو روايتي هوندو آهي. ف ليگ لاءِ خيرپور ۾ اِهو پن تاثر جڙيل آهي ته ف ليگ صرف چونڊن ۾ نظر ايندي آهي باقي عرصو سندن سرگرميون ڪي خاص ناهن هونديون. خيرپور جي سياسي ۾ سيد غوث علي شاهه جو ڪردار پڻ هميشه پنهنجي اهميت جو حامل رهندو آيو آهي جڏهن ته چونڊن ۾ کيس مسلسل شڪست ملڻ ۽ صحت جي مامرن سبب موجوده صورتحال ۾ غوث هائوس سياسي طور تي ويران بڻيل آهي. جڏهن ته غوث علي شاهه خيرپور کان ٻاهر رهڻ کي ترجيح ڏئي رهيو آهي ۽ سندس سياسي جانشينن ۾ پڻ عدم دلچسپي جو عنصر ڏنو وڃي ٿو. خيرپور جنهن کي پ پ جو سياسي قلعو پڻ سڏيو وڃي ٿو جنهن جو سياسي وايو منڊل ۾ وقتي لاها چاڙها به ايندا رهيا آهن تنهن هوندي موجوده سياسي سرگرمين ۾ پ پ ايم اين اي ۽ ايم پي اي پ پ جي هن سياسي قلعي ۾ مضبوط ڪرڻ لاءِ سرگرم عمل آهن ۽ سندس سياسي حريف ڊرائنگ رومز ۾ ويهي سياسي ڪچهرين ۾ مصروف آهن.