خيرپور ميونسپل ڪاميٽي اجلاس ۾ ڪائونسلرن شڪايتن جا انبار لڳائي ڇڏيا

خيرپور (رپورٽر)خيرپور ميونسپل ڪميٽي خيرپور جو هڪ اهم اجلاس چيئرمين سيد امجد علي شاهه جيلاني جي صدارت هيٺ ٿيو. اجلاس ۾ وائيس چيئرمين يار محمد ڦلپوٽو سميت مختلف وارڊن جي ڪائونسلرن عبدالوهاب سومرو، محمد جمن سهتو، محمدعلي انصاري، وجيهه الدين حيدر، سعيد احمد ابڙو ۽ ٻين شرڪت ڪئي. اجلاس ۾ مختلف وارڊن جي ڪائونسلرن سيد امجد علي شاهه اڳيان شڪايتن جا انبار لڳائي ڇڏيا ۽ چيو ته شهر ۾ گندگيءَ جا ڍير لڳل آهن ۽ گٽرن جو گندو پاڻي روڊن، رستن ۽ گهٽين ۾ بيٺل آهي جنهن ڪري سندن وارڊن جا رهواسي بار بار کين اهڙيون شڪايتون ڪن ٿا پر ميونسپل کاتي جو عملو سندن هڪ به نه پيو ٻڌي. هنن سيد امجد علي شاهه اڳيان گهر ڪئي ته ميونسپل ڪميٽي جي عملي جو قبلو درست ڪيو وڃي ۽ کين مختلف وارڊن جي صفائي سٿرائي واري معاملي ۾ پابند بڻايو وڃي. ان موقعي تي سيد امجد علي شاهه ڪائونسلرن کي مخاطب ٿيندي چيو ته هو مختلف وارڊن ۾ صفائي سٿرائي جي معاملي ۾ عملي کي پابند بڻائيندو ۽ غفلت ڪندڙن خلاف ڪاروائي ڪئي ويندي. بعد ۾ صحافين جي سوالن جا جواب ڏيندي سيد امجد علي شاهه جيلاني چيو ته ميونسپل ڪميٽي خيرپور ۾ وائيٽ ڪالر ملازمن پاران پنهنجي فرضن ۾ ڪوتاهي ڪرڻ تي سندن خلاف ڪاروائيون جاري آهن فرض نه ادا ڪندڙ ملازمن جون پگهارون پڻ بند ڪيون ويون آهن.