سنڌ جي تعليمي بورڊز کي گرانٽ نه ملي، مالي گھوٽالي جو شڪار

حيدرآباد(بيورو رپورٽ) سنڌ جا تعليمي بورڊ سرڪارپارن گرانٽ نه ملڻ سبب مالي گهوٽالي جو شڪار ٿي ويا آهن. مليل ڄاڻ موجب سنڌ سرڪار پاران گذريل سال 2017ع ۾ تعليمي ايمرجنسي جي سلسلي ۾ صوبي اندر پرائمري کان انٽر تائين مفت تعليم فراهم ڪرڻ واري پاليسي بعد سنڌ جي ڪراچي، حيدرآباد، ميرپورخاص، سکر ۽ لاڙڪاڻي تعليمي بورڊن کي شاگردن کان داخلا ۽ امتحاني فارمن جي مد ۾ فيون نه وٺڻ جو نوٽيفڪيشن جاري ڪيو ويو هو، جڏهن ته حڪومت طرفان بورڊن کي مالي معاملا هلائڻ لاءِ خاص مالي گرانٽون جاري ڪرڻ جو پڻ اعلان ڪيو ويو هو، جنهن بعد حڪومت تعليمي بورڊن کي گهربل گرانٽ وقت تي جاري نه ڪري سگهي آهي، اهڙي صورتحال ۾ سنڌ جا پنج ئي تعليمي بورڊ شديد مالي گهوٽالي جي ور چڙهي ويا آهن، پنجن ئي تعليمي بورڊن ۾ ڪم ڪندڙ بورڊن جي چيئرمينن، امتحانن واري ڪنٽرولرن سميت هزارين ملازم پگهارن ۽ رٽائرڊ ملازم پينشن سميت ٻين مراعتن کان محروم ٿيڻ جو خدشو پيدا ٿي پيو آهي، سمورن تعليمي بورڊن جا اڪائونٽ خزاني کان خالي ٿي چڪا آهن، هن وقت بورڊن جي اڪائونٽن ۾ ڪروڙن جي رقم بدران صرف ڪجھ لک رپيا موجود آهن، جيڪڏهن سنڌ سرڪار فوري طور تعليمي بورڊن کي مالي گرانٽ جاري نه ڪئي ته حيدرآباد تعليمي بورڊ سميت سمورن بورڊن جي ملازمن کي هلندڙ ڊسمبر جي مهيني جي پگهار توڙي پينشن نه ملي سگهندي، اهڙي صورتحال ۾ تعليمي بورڊن ۾ ڪم ڪندڙ هزارين ملازم سخت پريشان ٿي ويا آهن.