گھوٽڪي ۾ ڀڙڪيل بدامني جي باھ

ڪراچي سميت سنڌ جي اڪثر وڏن توڙي ننڍن شھرن ۾ ھڪ دفعو ٻيھر بدامني جي باھ ڀڙڪي اٿي آھي، دھشتگردي جي واقعن کان ويندي اغوا، ڦر ۽ ڌاڙن سميت چوري چڪاري جي وارداتن ۾ رڪارڊ اضافو ڏسڻ ۾ اچي رھيو آھي. ڪراچي جيڪو سنڌ جو گادي وارو شھر هئڻ سان گڏ ملڪ جي معيشت ۾ ڪرنگھي واري حيثيت رکي ٿو ۽ ان سان گڏ سڄي ملڪ جو امن امان پڻ ان ئي شھر سان سلھاڙيل آھي، ماضي ۾ ڏٺو اھو ويو آھي ته جڏھن به ڪراچي جون حالتون خراب ٿيون آھن ته ان جو فوري اثر سڄي ملڪ جي امن امان واري صورتحال تي پيو آھي. ٻيو وري رپئي جي قدر گھٽجڻ سان گڏ ملڪي معيشت کي ڪاپاري نقصان پھتو آھي. ويجهي تاريخ جا ورق اسان اٿلائينداسين ته مٿي ذڪر ڪيل سموريون ڳالھيون سچ ثابت ٿينديون. تازو ٿوري وقت ۾ ڪراچي اندر جيڪي دھشتگردي جون وارداتون پيش آيون آھن انهن وارداتن ملڪ جي ھر باشندي سان گڏ عالمي برادري کي حيران ۽ پريشان ڪري ڇڏيو آھي ۽ کين اھو سوچڻ تي مجبور ڪيو آھي ته آخر اوچتو ھن شھر کي ڇا ٿي ويو آھي،جو ھڪ دفعو ٻيھر ماڻھن کي رت سان وھنجاريو پيو وڃي!!؟؟ ڪراچي ۾ لانڍي ۾ بلاسٽ کانپوء پوش علائقي ڊفينس ۾ چين جي سفارت خاني تي دھشتگردن جي حملي، جوھر جي پرفيوم چوڪ وٽ متحده قومي موومينٽ جي محفل ميلاد تي ڪريڪر حملي ۽ پاڪ سرزمين پارٽي جي ٻن ڪارڪنن جي قتل کان ويندي متحده جي اڳوڻي ايم اين اي سيد علي رضا عابدي جي گھر آڏو قتل ۽ جوابدارن جي آساني سان فرار ٿي وڃڻ وارن واقعن ھڪ ته پوليس توڙي سيڪيورٽي ادارن جي ڪارڪردگي کي سواليا نشان بڻائي ڇڏيو آھي، ٻيو وري ڪراچي ۾ رھندڙ ھر امن پسند شھري جي ڳڻتي وڌائي ڇڏي آهي، شھر ۾ ٿوري عرصي ۾ ھڪ ٻئي پٺيان ٿيل دھشتگردي جي واقعن سبب روشنين واري شھر جي فضا ھڪ دفعو وري اداس ٿي وئي آھي ۽ ماڻهن جي من ۾ خوف ۽ حراس پکڙجي ويو آھي. شھر جي خراب ٿيل صورتحال کانپوء ھر ماڻهو پاڻ کي غير محفوظ سمجهڻ لڳو آھي، جنهن جو صوبائي توڙي وفاقي حڪومتن ۽ ملڪ جي سيڪيورٽي ادارن کي فوري طور تي نوٽيس وٺڻ گھرجي. ڪراچي کان پوء اسان سنڌ جي ٻئي وڏي شھر حيدرآباد تي نظر وجھندا سين ته اتي به ڪاري ورا ڪک نظر ايندا. پوليس جي ڪارڪردگي زيرو لڳي پئي آھي، هوائن واري شھر جي امن کي به ڪو نانگ سراپي ويو آھي، اتي به ڦر، ڌاڙا، قتل ۽ غارت جا واقعا روز جو معمول بڻيل آهن. ٻيو وري تشدد ٿيل ٻوري بند لاش ملڻ جو ھڪ اڻ کٽ سلسلو شروع ٿي ويو آھي, جنھن سبب اتي به امن واري فضا زخمي ٿيل نظر اچي رھي آھي پر تنهن ھوندي به پوليس پياري پنهنجي روايتي سستي جو مظاھرو ڪندي پراڻي رٽيل بيان تي بيٺي آھي ته صورتحال ڪنٽرول ۾ آھي، جوابدار جلد گرفتار ٿيندا!! حيدرآباد کان پوء اسين خيرپور، نوشھروفيروز، سکر، شڪارپور، قمبر، شھدادڪوٽ ۽ ڪشمورـ ڪندڪوٽ سميت سنڌ جي اڪثر ضلعن ۾ بدامني جي باھ ٻرندي ڏسندا سين ڪٿي به ماروئڙن کي سک جو ساھ کڻندي نه پيا ڏسون. چوريون، ڌاڙا، اغوا، ڪارو ڪاري ۽ قبيلائي جھيڙن سميت ٻين معمولي مسئلن تي ماڻهن کي ڍورن وانگر ڪٺو ۽ جھرڪين جيان ماريو پيو وڃي ۽ درجنين ماڻهن کي ڀنگ لاءِ اغوا ڪيو ويو آھي، پر خبر ناھي ته ڪھڙي مجبوري سبب حڪومت ان ايڏي وڏي حساس معاملي تي خاموش ويٺل آھي. جھڙي طرح مٿي ذڪر ڪيل ڪراچي سميت سنڌ جي ٻين ضلعن ۾ بدامني جي باھ ڀڙڪيل آھي، بلڪل اھڙي ئي طرح سنڌ جي آخري ضلعي گھوٽڪي جي عوام جو به ساھ مُٺ ۾ ٿيل آھي. ضلعي جي ننڍي وڏي شھر ۽ واھڻ وسندين ۾ چورن ۽ بدمعاشن باھ ٻاري ڇڏي آهي ۽ ڏوھارين کي ڊگھو رسو مليل آھي جنهن جي دل ڪري گھر لتاڙيندا وتن، کانئن ڪير به چوڻ ۽ پڇڻ وارو ناھي. اھا رات يا ڏينهن خالي ناھي جنھن ڏينهن رات ڪا واردات نه ٿيندي ھجي، ٿوري عرصي ۾ گھوٽڪي ضلعي ۾ لڱ ڪانڊاريندڙ واقعا پيش آيا آھن جنهن ۾ عادلپور جي نوجوان ساجد ڪلوڙ کي قتل ڪري سندس سسي ڌڙ کان ڌار ڪئي وئي جيڪا ھن وقت تائين ھٿ اچي نه سگھي آھي ۽ نه وري ڏيڍ مھينو گذري وڃڻ باوجود ڪو ھڪ به جوابدار گرفتار ٿي سگهيو آھي. جڏھن ته ان واقعي تي ڄڻ پوليس جي لاٽري کلي پئي آھي ۽ ان ڪيس جي آڙ ۾ سوين ماڻهن جي ٻڌ ڇوڙ ڪري لکين رپيا ڪمايا ويا آھن، جيڪو سلسلو ھلندڙ آھي. پوليس مقتول ساجد ڪلوڙ جا قاتل جيڪي پڪڙيا جڳ ڏٺا پر الٽو وري پوليس متاثر خاندان جي ڦٽن تي لوڻ ٻرڪڻ لاء ھڪ اڻ ڄاتل شخص جي تمام پراڻي منڍي ھٿ ڪري ان کي ساجد ڪلوڙ جي منڍي قرار ڏئي وارثن وٽ کڻي وئي جيڪا مقتول ساجد ڪلوڙ جي وارثن وصول ڪرڻ کان انڪار ڪري ڇڏيو. ان کان علاوه خانپور مھر ۾ برادري جي جھيڙي جي آڙ ۾ ھڪ معصوم ٻارڙي غلام محمد مھر جو ڳلو ڪپي قتل ڪيو ويو، اغوا واردات دوران ھڪ پوليس اھلڪار کي شھيد ڪيو ويو جن جا به قاتل پوليس گرفتار ڪري نه سگھي آھي. ان کان علاوه ضلعي جي مختلف شھرن ۾ معصوم ٻارڙن سان جنسي ڏاڍائي ڪري ان جون وڊيوز ٺاھڻ وارا گروهه به سرگرم ٿيل آھن، جڏهن ته قانون جا رکوالا وري انھن ويڊيوز ذريعي متاثر ٻارڙن جي وارثن کي بليڪ ميل ڪري انهن کان ڳري رقم وصول ڪري رهيا آهن. اھڙي قسم جا واقعا رپورٽ پڻ ٿي چڪا آھن پر اختيارين جي ڪن تي ڪا به جونءِ نٿي چري، پوليس جي اعليٰ عملدارن سان گڏ چونڊيل نمائندا به چپ جو روزو رکي ويٺل آھن جيڪا ڳالهھ اذيت ڏيندڙ آھي، پوليس جو ڪردار سدائين مشڪوڪ رھيو آھي پر چونڊيل نمائندا جن کي عوام ووٽ ڏئي ايوانن تائين پھچايو آھي اھي به عوام جي مسئلن تي خاموش ويٺل آھن، سواءِ اوٻاوڙو مان پي ٽي آء جي چونڊيل ايم پي اي شھريار شرجي، جنهن گھوٽڪي ۾ ٿيندڙ قھر تي سنڌ اسيمبلي ۾ آواز اٿاريو آھي، جنهن جي به رڙين ۽ دانهن کي واڳ ڌڻين موٽ ناھي ڏني!! عوام جي جان ۽ مال جي تحفظ جي ذميواري رياست جي ھوندي آھي، پوليس سميت سيڪورٽي ادارن کي ڪروڙين رپين جي بجيٽ ڏني وڃي ٿي، جنهن جي موٽ ۾ انهن ادارن جي ڪارڪردگي به ڪا تسلي ڏيندڙ ناھي، ھي اوچتو جيڪا ڪراچي سميت سڄي سنڌ جي امن امان واري صورتحال بگڙجي وئي آھي، ان کي باريڪ بيني سان ڏسي خاص قدم کنيا وڃن ۽ سيد علي رضا عابدي سميت گھوٽڪي جي ساجد ڪلوڙ ۽ ٻين بينگاھ ماڻھن جي قاتلن کي گرفتار ڪري صوبي ۾ امن امان جي صورتحال کي يقيني بڻايو وڃي جيئن عوام سک جو ساھ کڻي سگھي…………..