وزيراعظم پاران سنڌ ۾ گيس بحران بابت رپورٽ رد، جاچ جو حڪم

اسلام آباد (رپورٽ: ايم بي سومرو) وزيراعظم عمران خان سنڌ ۾ ٿيل گئس بحران بابت رپورٽ کي رد ڪندي پيٽرليم وزارت جي سيڪريٽري کي ٻيهر جاچ ڪرڻ جو حڪم ڏيندي 28 ڊسمبر تائين رپورٽ پيش ڪرڻ جي هدايت ڪئي آهي، وزيراعظم عمران خان جي صدارت ۾ ڪابينا جي توانائي بابت ڪاميٽي جو اجلاس ٿيو.وزيراعظم کي توانائي جي شعبي ۾ بجلي ۽ گئس پيداوار جي صورتحال بابت تفصيلي بريفنگ ڏني وئي. وزيراعظم کي ايندڙ ڇھن مهينن ۾ گئس ۽ بجلي جي متوقع طلب ۽ موجود وسيلن بابت آگاھ ڪيو ويو. اجلاس کي سوئي سدرن ۽ سوئي ناردرن ڪمپنين جي گئس جي لوڊشيڊنگ جي پلان بابت به بريفنگ ڏني وئي. اجلاس کي ٻڌايو ويو ته گرمي پد گھٽجڻ ڪري گئس جي طلب ۾ اضافو ٿي ويو آهي پر گئس جي گهريلو صارفين، ڪمرشل ۽ لوڊشيڊنگ کان آجي صنعتن کي هلندڙ سياري دوران گئس جي فراهمي کي يقيني بڻايو ويندو. اجلاس کي اهو به ٻڌايو ويو ته سي اين جي، ڪيپٽو بجلي گھرن لاءِ گئس لوڊشيڊنگ گھٽائڻ لاءِ به قدم کنيا ويا آهن. اجلاس ۾ تيل جي امپورٽ جي مامري تي به غور ڪيو ويو. اجلاس ۾ فيصلو ڪيو ويو ته فرنس آئل جي وڌيڪ امپورٽ تي فوري طور پابندي لاڳو ڪئي وڃي. وزيراعظم هدايت ڪئي ته تيل صاف ڪندڙن سان مشاورت ڪري موجوده سهولتن ۽ اضافي فرنيس آئل جي ايڪسپورٽ بابت پلان تيار ڪيو وڃي. اجلاس ۾ اهو به فيصلو ڪيو ويو ته ملڪ اندر موجود يوريا جي اسٽاڪ ۽ قيمتن بابت اقتصادي رابطن واري ڪاميٽي کي ايندڙ اجلاس ۾ بريفنگ ڏني ويندي. توانائي ڪاميٽي بجلي سپلاءِ ڪندڙ سمورين ڪمپنين کان بجلي جي سپلاءِ، لائين لاسز ۽ بلن جي وصولين ۽ بقايائن بابت ماهوار رپورٽ طلب ڪري ورتي آهي. ڪابينا ڪاميٽيءَ پيٽروليم واري وزارت کي گئس لاسز بابت جوڙيل پلان پيش ڪرڻ جي هدايت ڪئي. وزير اعظم هدايت ڪئي ته متبادل توناني بابت پاليسي کي جنوري جي آخر تائين حتمي شڪل ڏني وڃي. تواني واري شعبي اندر انتظامي معاملن کي حل ڪرڻ لاءَ رابطن کي وڌيڪ بهتر ڪرڻ جي ضرورت تي زور ڀريو آهي. وزيراعظم بجلي ۽ گئس جي ملڪ اندر گھرج بابت وقت سر ۽ درست ڪاٿو لڳائڻ جي ضرورت تي زور ڏنو ته جيئن توانائي جي شعبي ۾ بنا رڪاوٽ جي توانائي جي رسد يقيني بڻائي سگھجي. ذريعن موجب وزيراعظم سوئي سدرن ۽ سوئي ناردرن جا نوان بورڊ جلد جوڙڻ جي هدايت ڪئي. وزيراعظم ملڪ ، خاص طور تي سنڌ اندر پيدا ٿيل گئس بحران بابت فيڪٽ فائينڊنگ رپورٽ کي رد ڪري ڇڏيو. وزيراعظم سيڪريٽري پيٽروليم کي گئس بحران بابت ٻيهر انڪوائري ڪرڻ جي هدايت ڪئي آهي. وزيراعظم سيڪريٽري پيٽروليم کي سفارشون پيش ڪرڻ جي هدايت ڪندي چيو آهي ته رپورٽ ۾ گئس بحران جي ذميوارن جو تعين ڪيو وڃي. جيڪا رپورٽ پيش ڪئي وئي آهي ان ۾ ذميوارن جو تعين ٿيل نه آهي.