نوشهرو جي عدالت پاران گندو پاڻي ڇوڙ ڪرڻ جو معاملو ٽائون ڪميٽي حوالي

نوشهروفيروز(رپورٽر) مٺياڻي جي رهواسي غلام عباس سولنگي سول فيملي جج ۽ مئجسٽريٽ غلام محمد ميتلي جي عدالت ۾ پبلڪ انٽريسٽ CRPC 133 تحت واٽر ڪورس ۾ گندو پاڻي ڇوڙ ڪرڻ واري درخواست تي فيصلو ڏيندي معاملو ٽائون ڪاميٽي مٺياڻي حوالي ڪري ڇڏيو. درخواست گذار عدالت ۾ چيئرمين ٽائون ڪاميٽي مٺياڻي محمد بخش چانڊيو، انجنيئر ايريگيشن سب ڊويزن نوشهروفيروز، انجنيئر پبلڪ هيلٿ، ٽائون ڪاميٽي نوشهروفيروز، ڳوٺاڻن غلام علي، منظور علي سولنگي، روشن علي سميت 12 ڄڻن کي پٽيشن ۾ ذميوار قرار ڏيندي موقف اختيار ڪيو ته ٽائون ڪاميٽي مٺياڻي سميت مٿين سرڪاري ادارن پاران ڳوٺ موليڏنو سولنگي جو گندو پاڻي لکين رپين جي لاڳت سان ٺاهيل واٽر ڪورس ۾ ڇوڙ ڪيو وڃي ٿو. گندو پاڻي ڇوڙ ڪرڻ جي ڪري علائقي ۾ انيڪ بيماريون جنم وٺي رهيون آهن.