اسين سڀ ڀٽو آهيون،مرڻ قبول ڪنداسين پر جهڪنداسين نه:اعتزاز احسن

لاڙڪاڻو:اعتزاز احسن چيو ته شهيد ذوالفقار علي ڀٽو ڇا ڏوهه ڪيو ان جو ڏوهه اِهو هو ته هن غريبن کي مٽيءَ مان ڪڍي انهن کي چُمي ڏئي سڌي طريقي سان بيهڻ جو طريقو ڏنو ۽ غريبن جي اندر احساس محڪومي کي ختم ڪيو، شهيد ڀٽو وڏن جاگيرن کي ختم ڪيو، 1972 ۽ 1977 ۾ غريبن ماڻهن ۽ هارين کي مفت زمينون ۽ گهر ڏنا جيڪو ڪم شهيد ڀٽو ڪيو، شهيد ڀٽو آمريڪي استعمال خلاف اسلامي بلاڪ لاءِ لاهور ۾ ڪانفرنس سڏائي اسلامي ملڪن کي گڏ ڪيو. هن چيو ته شهيد محترمه بينظير ڀٽو عورتن جون عزتون محفوظ بڻائي کين مستقبل ۽ تعليم ڏيڻ چاهيندي هئي، ، هاڻي ٽئين نسل بلاول ڀٽو زرداري جي هٿ ۾ انقلاب جو جهنڊو آهي جنهن ۾ اقليت، روزگار ۽ خوشحالي جو رنگ آهي، بلاول ان جهنڊي کي کڻي اڳتي وڌندو ۽ اسان ان جي پويان هونداسين ۽ اسان سڀ ڀٽو آهيون.مرڻ قبول ڪنداسيم پر جهڪنداسين نه،
اڳوڻي وزيراعظم يوسف رضا گيلاني چيو ته اڄ ان هستي شهيد محترمه بينظير ڀٽو کي خراج پيش ڪرڻ آيا آهيون جنهن هن ملڪ، جمهوريت، هارين، عورتن ۽ انساني حقن لاءِ جدوجهد ڪئي، پاڪستان جي لاءِ ڀٽو خاندان جو بي انتها قربانيون آهن. هن چيو ته پيپلز پارٽي ملڪ کي آئين ۽ ميزائل ٽيڪنالاجي ڏنو جيڪي تاريخي ڪم آهن، جيڪڏهن اهي شيون نه هجن ها ته شايد هن ملڪ کي قائم ڪرڻ مشڪل بڻجي ها. هن چيو ته شهيد محترمه بينظير ڀٽو بين الاقوامي طور تي پنهنجا واسطا استعمال ڪري ڊڪٽيٽر کان وردي لهرائي جنهن ڪري اڄ ملڪ ۾ انڌي ۽ ٻوڙي جمهوريت آهي. جيڪڏهن نوجوانن جو ڪو ليڊر آهي ته اهو بلاول ڀٽو زرداري آهي. هن چيو ته اڄ جيڪڏهن محترمه بينظير ڀٽو هجي ها ته شايد هي حالتون اسان کي ڏسڻيون نه پون ها ۽ ملڪ معاشي طور بهتر حالتن ۾ هجي ها.
قمرالزمان قائره چيو ته اڄ اسين ڳڙهي خدابخش ڀٽو ۾ شهيد محترمه بينظير ڀٽو جي ورسي ۾ شريڪ آهيون، هتان اسين حوصلو، همٿ حاصل ڪري ان فلسفي جو عزم ورجائيندا آهيون جنهن تي هلي پيپلز پارٽي جي اڳواڻن ۽ ڪارڪنن قربانيون ڏنيون جيڪو سفر اڄ به جاري آهي عوام کي جيسيتائين پنهنجا حق نه ملندا اِهو سفر جاري رهندو، هي آسان سفر نه آهي، هن ملڪ اندر ڪيتريون ئي سياسي پارٽيون ٺاهيون ويون ۽ ڪيتريون ئي پارٽيون رات جي وقت ۾ ٺاهيون ويون جيڪي اقتدار جا بکيا آهن ۽ اهي اقتدار ۾ اچي موجون ڪري هليا ويندا آهن پر پيپلز پارٽي ان کي ذميواري سمجهي عوام جي خدمت ڪندي آهي. هن چيو ته هي جعلي اڪائونٽن جو حساب نه پر بلاول کان سندس جي والد ۽ ناني جي ورتل واٽ جي سزا طور حساب ورتو پيو وڃي. هن چيو ته اسان رت ڏينداسين پر شهيدن جو رستو نه ڇڏينداسين، هي تڪليفون نيون تڪليفون نه آهن، اسان ماضي ۾ به ڪامياب ٿياسين. هن چيو ته بلاول ڀٽو زرداري شهيدن جو علم کڻي نڪتو آهي عوام ان جو ساٿ ڏئي ان کان سواءِ ٻيو ڪو به رستو نه آهي ۽ رستي ۾ صرف روشني ئي روشني آهي.
پيپلز پارٽي سنڌ جي صدر نثار احمد کهڙو چيو ته هنن سوچيو ته پيپلز پارٽي کي ڪيئن ختم ڪريون ۽ ضياءَ الحق به سوچيو ته شهيد ذوالفقار علي ڀٽو کي ختم ڪنداسين ته پيپلز پارٽي ختم ٿي ويندي پر پارٽي ڪارڪنن جيل ويا، ڪوڙا کاڌا، تڪليفون سٺيون ۽ محترمه پارٽي جون واڳون سنڀاليون پر اسان کان محترمه کي به کسيو ويو، محترمه جي شهادت کي يارنهن سال ٿي ويا آهن پر هر سال اسان پنهنجي پارٽي کي مضبوط ڪندا رهندا آهيون. هن چيو ته پيپلز پارٽي جي قيادت مٿان الزام لڳائي اهي سوچن پيا ته عوام اسان کي ڇڏي ڏيندو پر عوام جلسن جلوسن ۾ ايندا ۽ جيلن ۾ به ويندا پر بلاول ڀٽو زرداري جو ساٿ نڀائيندا. هن چيو ته وزيراعظم کي سندس گهر واري ياد ڏياريندو آهي ته هو وزيراعظم آهي هو جڏهن کان آيو آهي هو اسان کان اسان جي ماني کسي رهيو آهي ۽ مهانگائي جي چڪي ۾ پيسائي رهيو آهي، هن گئس، بجلي ۽ زندگي مهانگي ڪري ڇڏي آهي. هن چيو ته اسان چيو ته ٿا ته بي آءِ ايس پي پروگرام کي وڌايو ته هو ڪڪڙن ۽ ڪڪڙين ۽ انڊن جي ڳالهه ڪري رهيو آهي ۽ چوي پيو ته ڪوڙ ڳالهائڻ بهتر ڳالهه آهي اهڙو وزيراعظم شهيد محترمه بينظير ڀٽو ۽ شهيد ذوالفقار علي ڀٽو جو ڇا مقابلو ڪندو،