پبلڪ اسڪول ۽ بوائز ڪاليج 13 سال گذرڻ باوجود مڪمل نه ٿيا

ٽنڊو محمد خان: ضلعي جو ايجوڪيشن ورڪس کاتو گذريل 10 سالن دوران 6 سو ڪروڙ روپيا خرچ ڪرڻ باوجود تدريسي عمارتون مڪمل ڪرائڻ ۾ ناڪام ٿي ويو آهي، جنهن ۾ ٽنڊو محمد خان ضلعي جو ميگا پروجيڪٽ پبلڪ اسڪول 13 سال گذرڻ باوجود مڪمل نه ٿي سگهيو، جنهن تي هن وقت تائين 50 ڪروڙ کان وڌيڪ رقم خرچ ٿي چڪي آهي پر لاڳاپيل اختيارين جي مجرماڻي سستي ۽ لاپرواهين جي ڪري تعليم جي حوالي سان انتهائي غيرمعمولي منصوبو رولڙي جو شڪار آهي، جڏهن ته ڀٽ ڌڻي جي تڙ ڏاڏي حضرت شاھ عبدالڪريم بلڙي واري جي شهر ۾ بوائز ڪاليج جو ڪم به 13 سالن گذرڻ باوجود پورو ناهي ٿي سگهيو. ساڳي ريت ٽنڊو غلام حيدر تعلقي ۾ ايجوڪيشن ورڪس کاتي پاران تعمير ڪرايل گورنمينٽ بوائز ڪاليج جي بلڊنگ وارو ڪم تعليم کاتي جي بي ڌياني ۽ ڪرپشن سبب هيل تائين شروع ٿي نه سگهيو آهي.