اسڪولن ۾ فرنيچر ۽ ٻيون سهولتون اڻلڀ

ٽنڊو محمد خان: گذريل 13 سالن جي عرصي ۾ ضلعي جي 300 کان وڌيڪ اسڪولن لاءِ سرپ سرپ 1، سرپ 2 ۽ سرپ 3 جي نالي تي هر اسڪول جي چوديواري، باٿ روم، پانيءَ جي ٽينڪس ۽ ٻين سهولتن لاءِ 2 ارب رُپيا جاري ٿي چڪا آهن، پر حقيقت ۾ انهن اسڪولن ۾ اهڙي قسم جون شاگردن لاءِ ڪي به سهولتون نظر نه اچي رهيون آهن. ان حوالي سان ملندڙ ڄاڻ موجب ٽنڊو محمد خان، بلڙي شاھ ڪريم ۽ ٽنڊو غلام حيدر تعلقن جي مختلف ڳوٺن علي محمد مير بحر ، گاماڻي خاصخيلي ، لاکاٽ ، ملاڪاتيار ، علي محمد اعواڻ ، شيخ ڀرڪيو، گهرام وساڻ ۽ ستر موري سوڌو مختلف علائقن جي ڪيترن ئي اسڪولن ۾ بنيادي سهولتون اڻلڀ آهن. جڏهن ته ٽنڊو محمد خان جي يونين ڪائونسل ٽنڊو سائينداد جي ڳوٺ علي محمد اعواڻ ۾ تعليم جي حوالي سان ايمرجنسي لاڳو ٿيل آهي، پر اڃا تائين هن اسڪول ۾ مستقبل جا معمار فرنيچر کانسواءِ تعليم پرائڻ تي مجبور آهن. حيرت جهڙي ڳالهه آهي ته اسڪول ۾ پڙهائي حاصل ڪرڻ لاءِ ايندڙ شاگردن لاءِ رڳو هڪ استاد مقرر ٿيل آهي. جيڪو پنهنجي وِت ۽ وس آهر شاگردن کي سمورا نصاب مضمون پڙهائڻ جي ڪوشش ڪندو رهي ٿو.