پنوعاقل: تعلقي اسپتال ۾ مختلف ويڪسين سميت سهولتن جي کوٽ

پنوعاقل ( ن پ ا) تعلقي اسپتال ۾ ڪتي جي چڪ ۽ نانگ جي ڪکڻ جي ويڪسين اڻ لڀ ۽ سهولتن جي کوٽ سبب مريض ۽ وارث دربدر ٿيڻ تي مجبور آهن، اسپتال جي ايمرجنسي لاءِ مقرر ڊاڪٽر پنهنجي ڊيوٽي ڏيڻ بدران ڪلينڪون هلائي ٻنهي هٿن سان رڳو پيسا ڪمائڻ ۾ رڌل آهن.
تعلقي اسپتال ۾ مهانگو دوائون غريبن کي ڏيڻ بدران کين خريد ڪرڻ تي مجبور ڪيو پيو وڃي، صفائي سٿرائي جو نظام به ناقص هئڻ ڪري مريض توڙي وارث سخت پريشانين کي منهن ڏئي رهيا آهن، الٽرا سائونڊ لاءِ گائنوڪولاجسٽ به مقرر ڪرڻ بدران سيکڙاٽ ڊاڪٽر مقرر ڪري عوام جي جانين سان کيڏڻ جو سلسلو جاري آهي، سيڪيورٽي مسئلن سبب ڪيتريون ئي موٽرسائيڪلون اسپتال مان چوري ٿي چڪيون آهن.
ايم ايس اسماعيل عباسي چيو ته ڪتي جي چڪ کان بچاءُ سميت ٻين انجيڪشن جي فراهمي لاءِ اختيارين کي لکيو ويو آهي، سياسي سماجي تنظيمن جو چوڻ آهي ته جيڪڏهن مريضن کي بهتر سهولتون نه ڏنيون ويون ته احتجاجي تحريڪ هلائي ويندي