بالي ووڊ شهزادين ڪترينا ۽ دپيڪا پاڻ ۾ ٺاهه ڪري ورتو

ممبئي(شوبز نيوز) بالي ووڊ فلم انڊسٽري جي وڏين اداڪارائن دپيڪا پڊوڪون ۽ ڪترينا ڪيف پاڻ ۾ هلندڙ اختلاف وساري ماضي جو حصو بڻائي ڇڏيا آهن. دپيڪا ۽ ڪترينا وچ ۾ رنبير ڪپور جي معاملي تان اختلاف هلندڙ هئا، پر دپيڪا پڊوڪون ۽ رنوير سنگهه پاران شادي کانپوءِ اهي سڀ معاملا ماضي جو حصو بڻجي ويا آهن. ڪترينا پاران دپيڪا ۽ رنوير سنگهه جي شادي دعوت ۾ شرڪت پڻ ڪئي، جنهن دوران ڪترينا دپيڪا ۽ رنوير کي مبارڪون ڏنيون. گذريل ڏينهن ڀارتي ميڊيا کي انٽرويو ڏيندي دپيڪا پڊوڪون چيو ته هن ڪترينا سان امن قائم ڪري ورتو آهي، ڪترينا لاءِ هڪ اداڪاره طور وڏي عزت آهي، ڪترينا منهنجي ۽ رنوير جي شادي جي دعوت ۾آئي جنهن لاءِ اسان سندس ٿورائتا آهيون. دپيڪا پڊوڪون ۽ ڪترينا وچ ۾ اختلاف رنبير ڪپور جي معاملي تان هئا، رنبير ڪپور دپيڪا پڊوڪون سان لاڳاپا رکيا هئا، جنهن دوران اوچتو هن ڪترينا ڪيف سان رهڻ شروع ڪري ڏنو، جڏهن ته گذريل سال ڪترينا ۽ رنبير ڪپور وچ ۾ به عليحدگي ٿي وئي.