ڏاھلي ويجھو اسڪول 3 سالن کان بند، رھواسين جو عدالت وڃڻ جو اعلان

عمرڪوٽ (ن پ ا) ڏاھلي تعلقي جي ڳوٺ ڪٻڙي جو پرائمري اسڪول بند پيل آھي پر تعليم کاتي جي عملدار اسڪول کولرائڻ لاءِ ڪو بھ قدم نھ کنيو ۽ نھ ئي ٻارڙن جي تعليم متاثر ٿيڻ جو نوٽيس ورتو ويو. انڪري ڳوٺاڻن مسئلي جي حل لاء قانوني جدوجھد ڪرڻ جو فيصلو ڪري ورتو آھي. رھواسي حاجي عبدالرئوف راھمون ڇاڇرو پريس ڪلب پهچي ميڊيا کي ٻڌايو ته تاريخي ڳوٺ ڪٻڙي جو 54 سال پراڻو پرائمري اسڪول ٽن سالن کان بند پيل آھي، جنھن سبب سوين شاگردن جو مستقبل داءَ تي لڳل آھي، جڏھن تھ استاد  عباس راھمون اسڪول رڪارڊ ۽ جي آر رجسٽر گم ڪري ڇڏيو آھي. ھن چيو تھ تعليم کاتو خاموش بڻيل آھي، ڊائريڪٽر پرائمري اسڪولز ميرپورخاص سان ملاقات ڪري جاچ جو مطالبو ڪنداسين، بھتر موٽ نھ ملي تھ عدالت جو رخ ڪيو ويندو. ڳوٺاڻن تعليم واري وزير، سيڪريٽري تعليم ۽ وس وارن کان نوٽيس وٺي بند پيل اسڪول کولرائڻ جو مطالبو پڻ ڪيو.