گهوٽڪي: يوسي عمر ڊهو جو چيئرمين ڪير ٿيندو؟ چونڊ سڀاڻي ٿيندي

گهوٽڪي (رپورٽر)گهوٽڪي جي عمر ڊهو يوسي جو چيئرمين ڪير ٿيندو، سڀاڻي رٿيل چونڊ ۾ پ پ اميدوار جو آزاد اميدوار سان زبردست مقابلي جو امڪان ظاهر ڪيو پيو وڃـي، 10هزار کان وڌيڪ ووٽر پنهنجي ووٽ جو حق استعمال ڪندا
گهوٽڪي جي يونين ڪائونسل عمر ڊهو جي چيئرمين جي خالي ٿيل سيٽ تي ننڍي چونڊ سڀاڻي آچر تي ٿي رهي آهي، امڪان ظاهر ڪيو پيو وڃي ته يوسي چيئرمين جي چونڊ دوران پ پ اميدوار ڄام دلاور لکڻ ۽ آزاد اميدوار ڄام راشد لکڻ وچ ۾ زبردست مقابلو ٿي سگهي ٿو.
ڊسٽرڪٽ اليڪشن ڪمشنر گهوٽڪي امين بشير قريشي موجب ننڍي چونڊ لاء 9 پولنگ اسٽيشنون ۽ 32 پولنگ اسٽيشن بوٿ قائم ڪري 79 ڄڻن کي پولنگ عملي طور مقرر ڪيو ويو آهي، چونڊ دوران 10 هزار537 ووٽر پنهنجي ووٽ جو حق استعمال ڪندا، جنهن ۾ 6205 مرد ۽ 4332 عورت ووٽرز شامل آهن
چونڊ دوران سڪيورٽي لاء 180 پوليس اهلڪار ۽ 40 رينجرز اهلڪار مقرر ڪيا ويا، 7 ايس ايڇ اوز ۽ هڪ ڊي ايس پي چونڊ دوران سڪيورٽي صورتحال جي نگراني ڪندا.
ياد رهي ته ڄاڻايل يوسي جو چيئرمين ڄام منظور لکڻ ڪجهه مهينا اڳ پنهنجي عهدي تان استعيفا ڏني هئي، جنهن سبب خالي پيل سيٽ تي ٻيهر چونڊ ڪرائي پئي وڃي