چوهڙ جمالي ( رپورٽ:حميدالله ميمڻ ) لاڙ شگر مل آبادگارن کي ڏينهن جا تارا ڏيکاري ڇڏيا. سجاول ضلعي جي آبادگارن جا رهيل ڪروڙين روپيه کين ادا نه ٿي سگهيا، عدالت ۾ ڪيس ٻڌڻي هيٺ هئڻ سبب هلندڙ سال لاڙ شگر مل ڪريشينگ سيزن جي شروعات نه ڪئي، جنهن جي ڪري آبادگارن جا ڪروڙين رپيا ٻڏڻ جو خدشو وڌي ويو آهي، مالي خساري جو شڪار آبادگارن چيف جسٽس کان نوٽيس وٺڻ جو مطالبو ڪيو آهي. خبر موجب، سجاول ضلعي ۾ واقع لاڙ شگر مل گذريل سال جي ڪريشنگ سيزن دوران آبادگارن کان ڪمند 130 رپيا في ڪمند تي خريد ڪيو، جڏھن ته عدالت ۽ سنڌ حڪومت جي فرق جي لاڳو ڪيل 30 رپين سميت مقامي آبادگارن جا ڪروڙين رپيا هڙپ ٿي ويا، جيڪي اڃا تائين کين نه ملي سگهيا آهن. سجاول جي آبادگارن جا رهتن جي مد ۾ لاڙ شگر مل تي ڪروڙين رپيا آهن. هلندڙ سال لاڙ شگر جي ڪريشنگ سيزن جي شروعات نه ڪرڻ سبب غريب آبادگارن جا رهيل ڪروڙين رپيه هڙپ ٿيڻ جو خدشو وڌي ويو آھي. سجاول ضلعي جي آبادگارن مقبول اوٺو، سانوڻ گبول، عبدالحڪيم جمالي، ڀٽو لاشاري ۽ ٻين ٻڌايو ته لاڙ شگر مل جي انتظاميه 2 سال گذرڻ باوجود 130 رپيا في مڻ جي اگھه ۽ ان جي فرق جا 30 رپيه اڃان تائين ادا نه ڪيا آھن، جنهن سبب پريشاني ۾ ورتل آهيون. آبادگارن چيو ته شگر مل انتظاميا احتجاج ڪرڻ تي دٻائڻ جي ڪوشش ڪري رهي آهي، جيڪو ظلم آهي. هنن چيف جسٽس آف پاڪستان کان معاملي جو نوٽيس وٺي رهيل پئسا ڏيارڻ جي گهر ڪئي آهي.

سجاول (رپورٽر) سجاول ۾ معذور ڪوٽا تحت نوڪرين لاء درخواستون ڏيندڙ سجاول جي 500 معذورن مان چئن ڄڻن جي نالن جي منظوري ڏني وئي آهي. عدالتي حڪم تي معذور ڪوٽا تي عمل ڪري اپاھج ۽ بي سھارا ماڻھن کي سرڪاري نوڪريون ڏيڻ لاء چيف سيڪريٽري پاران ضلعن جي ڊي سيز کي درخواستون وٺي تفصيل موڪلڻ جون ھدايتون ڪيون ويون ھيون. ان ڏس ۾ رھجي ويل معذورن حسن ميربحر , اقبال, رشيد ۽ ٻين چيو آهي ته جيڪڏهن ضلعي ۾ صرف 4 جايون خالي ھيون ته پوءِ 500 کان وڌيڪ معذورن کان انٽرويو ڇو ورتا ويا ھنن چيو ته ضلعي ۾ وڌيڪ جايون خالي آهن انٽرويو پاس ڪندڙ معذورن کي آرڊر ڏئي محتاجي کان بچايو وڃي.

چوهڙ جمالي(رپورٽ: حميدالله ميمڻ) چوهڙ جمالي لڳ روڊ موري جي پل جي مرمت جو ڪم مڪمل نه ٿيڻ خلاف ڳوٺاڻن احتجاجي مظاهرو ڪري ڌرڻو هنيو. ڳوٺاڻن بابو اوٺو، پپو جمالي، جمعون خان کوسو، سيد نظير شاھ لڪياري، نصرالله جمالي ۽ ٻين جي اڳواڻي ۾ روڊ موري کان ڪيٽي کوسا ڏانهن ويندڙ روڊ تي ڌرڻو هنيو، جنهن دوران نعريبازي ڪئي وئي. ان موقعي تي مظاهرين دانهيو ته دڙو بئراج جي آر ڊي 164 تي قائم روڊ موري پل ٽٽي تباهه ٿي وئي هئي، ٺيڪيدار پل جو ڪم اڌ ۾ڇڏي غائب ٿي ويو آهي. هنن دانهيو ته پل جو ڪم اڌ ۾ رهيل هئڻ سبب ڪنهن به وقت حادثو پيش اچي سگهي ٿو، نوٽيس ورتو وڃي.