نبي سرروڊ(ن پ ا) نبي سر ۾ رولو ڪتن جو آزار برقرار آهي، انتظاميا پاران ڪتا مار مهم شروع نه ڪرڻ سبب رهواسين ۾ ڏهڪاءُ پکڙيل آهي. رهواسين پنهنجي اخبار کي ٻڌايو ته رولو ڪتن هڪ هفتي اندر ٻڪرين جا ڪيترائي ڦر ماري ڇڏيا آهن، ڊپ آهي ته ڪٿي ٻارڙن کي به زخمي نه ڪري وجهن.

ميرپورخاص (بيورو رپورٽ) ميرپورخاص پريس ڪلب جي چونڊ جي حوالي سان جنرل باڊي جو اجلاس راشد سليم جي صدارت هيٺ ٿيو. اجلاس ۾ آفتاب قادري، ابوبڪر رند، عاطف بلوچ، عزيز خان، سليم آزاد، سيد محمدخالد، محمد صالح اوٺو، شاهد ڪيهر، واحد پهلواني، شاهد خاصخيلي، صديق ساگر، شيرمحمد ملڪاڻي، نجيب سانڀري، شوڪت پنهور ۽ ٻيا شريڪ ٿيا. اجلاس ۾ گذريل ڪاروائي ۽ سال 2018 جي خرچن جي منظوري ڏني وئي. اجلاس ۾ موجوده باڊي جو مُدو پورو ٿيڻ تي پريس ڪلب جي نئين باڊي جي چونڊ جي حوالي سان مشورو وٺڻ تي سينئر صحافين پاران صدارت لاءِ راشد سليم، نائب صدر شوڪت پنهور، جنرل سيڪريٽري آفتاب قادري، خزانچي ابوبڪررند جڏهن ته جوائنٽ سيڪريٽري لاءِ عزيز خان جا نالا تجويز ڪيا ويا ۽ چونڊ لاءِ خواهشمند اُميدوارن جي کي پئنل پيش ڪرڻ جو چيو ويو ڪوبه پئنل يا اُميدوار سامهون نه اچڻ تي اجلاس ۾ اڪثريت راءِ سان تجويز ڪيل نالن کي بنا مقابلي ڪامياب ٿيڻ جو اعلان ڪيو ويو.

جهڏو ( ن پ ا) ايڪسائيز پوليس ڳجھي اطلاع موجب ڪارروائي ڪري موٽرسائيڪل سوار جوابدار کي 3 ڪلو چرس سميت گرفتار ڪري ورتو. ايڪسائيز پوليس ڊگھڙي جهڏي ۾ سبزي منڊي وٽ ڪارروائي ڪندي جوابدار سليمان سميجو کي 3 ڪلو چرس سميت گرفتار ڪري ڊگهڙي منتقل ڪري ڇڏيو آهي. رابطو ڪرڻ تي ايڪسائيز ڊگهڙي جي انچارج مير رضوان ٽالپر چيو ته ڳجهي اطلاع تي اسان جهڏو سبزي منڊي وٽ ڪاروائي ڪئي ۽ جوابدار کي منشيات سميت ھٿ ڪري ورتو آھي. اھڙي ڪارروائي بعد جوابدار مٿان ڪيس پڻ داخل ڪيو ويو آھي.

کڏڙو(پ ن ا)سانگھڙ نوابشاھ مين روڊ بس اسٽاپ وٽ تيز رفتار ڪار جي ٽڪر ۾ پورھيت ڏيا رام ڀيل سخت زخمي ٿي پيو زخمي کي ڳڻتي جوڳي حالت ۾ نوابشاھ اسپتال نيو ويو ۔ ڪار ۽ موٽر سائيڪل تباھ ٿي ويا

جهڏو(رپورٽر) جهڏو ڀرسان ڏيئي ٿاڻي جي حد ۾ چورين ۽ ڦرن جو آزار وڌي ويو آهي ڏيئي شهر ۽ ڀرپاسي جي ڳوٺن ڳوٺ ملڪ بهاول، سانگي فراهو، ڳوٺ پير بخش چان ڊيو، ڳوٺ هاشم وگهامل، ديھ ڪپوري، ديھ ڪامارو، سميت ٻين علائقن ۾ چوريون روز جو معمول بڻيل آهن گذريل رات ڳوٺاڻن شاهد علي ۽ ڀيمون ڪولهي جون ٻڪريون چوري ٿي ويون ان کان پهرين شاهد جروار جي ڀلوڙ مينهن، ملڪ اشرف جون ٻه ٻڪريون، غريب پورهيت سومار ڀيل جون ٻه ٻڪريون، جڏهن ته خادم علي شاھ چيڪ پوسٽ وٽ شهري نياز ميمڻ جي موٽرسائيڪل ڦر ڪئي وئي ۽ ساڳي جڳھ تان ڳوٺاڻي دادو ٿيٻو کان موٽر سائيڪل ڦر ڪئي وئي چوري ۽ ڦرن جي ودندڙ واقعن خلاف علائقي جي سياسي سماجي حلقن ملڪ اشرف، مظهر حسين، رميش ڪمار، احمد نواز ۽ ٻين چيو ته پوليس جي نااهلي سبب علائقي ۾ چورين جو آزار ودي ويو آهي چوريون ۽ ڦرون روز جو معمول بڻيل آهن جنهن سبب علائقي واسي سخت پريشان بڻيل آهن متاثر ڳوٺاڻا فرياد کڻي ٿاڻي تي وڃن ٿا ته پوليس انهن جي مدد ڪرڻ بدران پاٿاريدارن جا ڏس ڏئي موٽائي ڇڏي ٿي ۽ پاٿاريدار ڀنگ وٺي چوري واپس ڪرائن ٿا انهي دندي ۾ پوليس ملوث آهي هنن ايس ايس پي بدين کان مطالبو ڪيو ته ڏيئي ۽ ڀرپاسي ودندڙ بدامني جو نوٽيس وٺي علائقي ۾ امن بحال ڪرايو وڃي.

ڇاڇرو(ن پ ا) ڇاڇري ويجهو ڳوٺ آلڻاآباد ۾ پاڻي جي بحران ۽ ڳوٺ ڀرسان گذريل پنج سال کان ڪنٽينر ۾ نمائش طور لڳل آر او پلانٽ نه هلائڻ تي ڳوٺاڻن جو احتجاجي مظاهرو ڌرڻو،ڳوٺاڻن مٺن سميجو،رحمت الله،عبدالشڪور سميجو،رمضان،ارباب علي،حبيب الله سميجو ۽ ڌانهيندي چيو ته ڳوٺ جي هڪ هزار آبادي خريد ڪري مٺو پاڻي استعمال ڪري رهئي آهي.

،پاڻي جي بحران سبب چوپايو مال اڃ وڳي مري رهيو آهي،ڳوٺ ۾ پنج سال اڳ آر او پلانٽ جي اسڪيم ڏني وئي جيڪا ڪنٽينر اندر قيمتي مشينگيري سڙي تباہ ٿي رهئي آهي،صرف نمائش طور ڪنٽينر ۾ آهي،اسان غريب ڳوٺاڻا سخت مشڪلاتن کي منهن ڏئي رهيا آهيو،اسان ڪيترائي ڀيرا شڪايتون ڪيون پر پنج سال جي عرصي ۾ اڄ ڏينهن تائين ڪوبه نوٽيس نه ورتو ويو آهي،اسان مجبور ٿي احتجاج ڪري رهيا آهيو،ڳوٺاڻن چيو ته چونڊيل نمائندا به اسان جي هن معاملي تي ڪو به توجه نٿا ڏين پوءِ اهڙي اسڪيم ڏيڻ جو فائدو ڪهڙو،ڳوٺاڻن چيو ته اسان جي گهرن پاڻي جو هڪ ڦڙو به نه آهي،ڳوٺاڻن سنڌ جي وڏي وزير سيد مراد علي شاهه سميت ٻين اعلا اختيارين کي اپيل ڪندي چيو معاملي جو نوٽيس وٺي آر او پلانٽ هلايو وڃي،پاڻي جي بحران سميت اسان سخت مشڪلاتن کي منهن ڏئي رهيا آهيو….. ڇاڇرو رپورٽ سومار راهمون 03343159016

سامارو (ن پ ا) سامارو لڳ ديھ ڊابو ۾ ڳوٺ ٽائون چيئرمين رفيق قائمخاني ۾ سامارو ٿاڻي تي داخل چوري ڪيس ۾ پيش ڪيل جوابدار همير دل کي پوليس تي گم ڪرڻ جو الزام لڳايو آھي ان سلسلي ڳوٺ جي چڱي مڙس   ۽  ٽائون چيئرمين ڳوٺ جي چڱي مڙس رفيق احمد قائمخاني ميڊيا سان ڳالهائيندي چيو ته منهنجي هاري تي چوري جو ڪوڙو ڪيس داخل ٿيو تنهن باوجود  اسان هاري  همير دل کي سامارو پوليس حوالي ڪيو جنهن کي  پوليس گرفتاري ظاهر ڪرڻ بدران لاتعلق بڻيل آھي ۽ پوليس ٻڌائي ٿي ته جوابدار ٿاڻي تان فرار ٿي ويو آھي.

ڪچي پل رپورٽ ذاڪر حسين کوسو ڪچي پل يوسي ڍوري جي ڳوٺ محمد پريل کوسو جو گرلس ۽ بوائز پرائمري اسڪول 2012کان بند پيل ٻئي اسڪول بند هئڻ ڪري سوين شاگرد ۽ شاگردياڻيون تعليم کان محروم تعليم کاتو خاموش تماشائي بڻيل اسڪول م مقرر ٿيل استاد ۽ ماسترياڻيون گهر ويٺي پگهارون کڻڻ لڳيون والدين م ڳڻتي جي لهر نوٽيس وٺڻ جو مطالبو ڳوٺ جو اسڪول بند هئڻ ڪري اسان جا ٻارڙا تعليم جهڙي زيور کان محروم آهن .

سرڪار نوٺيس وٺي اسڪول کولرائي ڳوٺاڻا

جهڏو (رپورٽ: سريش ڪمار) جھڏو عوامي تحريڪ ضلعي ميرپورخاص جي جنرل سيڪريٽري ايڊوڪيٽ لياقت ميمڻ جي سي ڊي موٽر سائيڪل نامعلوم چور گهر ٻاهران ڪاهي فرار ٿي ويا. ان سلسلي ۾ عوامي تحريڪ اڳواڻ ايڊوڪيٽ ممتاز کوسو ميڊيا سان ڳالهائيندي چيو ته جهڏو توڙي ڀرپاسي ۾ چورين جي وارداتن ۾ اضافو ٿي رهيو آهي جنهن سبب ماڻھون راتيون جاڳڻ تي مجبور آهن عوام جو جان مال محفوظ ناهي پوليس کي گهرجي ته چوري جي وارداتن ۾ ملوث ڏوهارين خلاف ڪاوائي ڪري علائقي ۾ امن بحال ڪرايو وڃي

سيتارو(رپورٽر)سيتاروڊ جي مُکُ شاهي بازار دڪان کي شارٽ سرڪٽ سبب باهه لڳي وئي جنهن سبب دڪان ۾ پيل لکين روپين جو سامان سڙي رک ٿي ويو ، دڪاندار مدد جي اپيل ڪئي آهي .باهه سبب دڪان ۾ موٽر وائيڊنگ جون تارون،موٽر،واشنگ مشين،پکا،سولر ٽارچ ۽ ٻيو سامان سڙي رک ٿي ويو . متاثر دڪاندار زاهد حسين ميمڻ ٻڌايو ته رات ٻارهين وڳي بجلي ايندي آھي ممڪن آھي ته ان مان باھ لڳي هجي پر حيرت آھي ته بازار ۾ چوڪيدار مقر ٿيل آھي جنهن کي به ڪا خبر نه پئي جيڪو بر وقت اطلاع ڏي ۽ وڌيڪ ٿيندڙ نقصان بچائي سگهي ها .هن چيو ته 20 لکن جو نقصان ٿيو آھي سرڪار کي اپيل آهي ته مدد ڪئي وڃي .