شھدادڪوٽ ( ن پ ا) شھدادڪوٽ لڳ ٻالڪ پاڻيءَ جي تلاءُ ۾ ٻڏي فوت ٿي ويو. ڳوٺ عطر چانڊيو ۾ 2 سالن جو چنگيز چانڊيو راند ڪندي پير ترڪڻ سبب تلاءُ ۾ ٻڏي ويو. مقامي ماڻهن ٻالڪ کي بيهوشي واري حالت ۾ اسپتال منتقل ڪيو، جتي ڊاڪٽرن فوت ٿيڻ جي تصديق ڪئي. فوتي ٻالڪ جي گهر ۾ ڪهرام متل آهي، جڏهن ته سندس امڙ کي بيهوشي جا دورا پئجي رهيا هئا.
قبو سعيد خان ۾ نينگر واٽر ۾ ٻڏي فوت
قبو سعيد خان (ن پ ا) قبو سعيد خان ويجهو نينگر واٽر ڪورس ۾ ڪري ٻڏي فوت، ڳوٺ الاهي بخش کوسو ۾ 4 سالن جو سلطان کوسو گهر آڏو راند ڪندي واٽر ڪورس ۾ ڪري پيو. مقامي ماڻهن نينگر کي واٽر ڪورس مان بيهوشي واري حالت ۾ ڪڍي اسپتال منتقل پئي ڪيو ته هن رستي ۾ ئي دم ڏئي ڇڏيو.اسپتال انتظاميا ضروري ڪارروائي کانپوءِ لاش وارثن حوالي ڪري ڇڏيو، نينگر جو لاش گهر پهچڻ تي ڪهرام مچي ويو، جڏهن ته سندس امڙ کي بيهوشي جا دورا پئجي رهيا هئا.
پکي شهر ۾ به سردي کي منهن ڏيڻ لاءَ گرم ڪپڙن جي وڪري ۾ واڌ
مختلف ڳوٺ کان ماڻهو لنڊي جا گرم ڪپڙا خريد ڪرڻ لاءِ شهر اچن ٿا
پکو ( ن پ ا) سردي جي لهر ۾ واڌ کانپوءِ ٻين شهرن وانگر پکي شهر ۾ به گرم ڪپڙن توڙي ڊرائي فروٽ جي وڪري ۾واڌ اچي وئي آهي .شهر ۾ مختلف هنڌن تي لنڊي جا گرم ڪپڙا وڪرو ڪيا پيا وڃن .اسٽالن تي گرم کٿا،لويون، جوتا جيڪيٽ ، جوراب ، ڪوٽ، مفلر ۽ ٻيا گرم ڪپڙا رکيا ويا آھن ، اسٽالن تي سج اڀرڻ سان ئي علائقي جي ڪيترن ڳوٺن يارو ديرو، گهوگهاري،ديدڙ، چانڊو وليج نور محمد مغيري يار محمد علي محمد ورک، ڳوٺ سميت ٻين ڳوٺن جا ماڻھون پھچي گرم ڪپڙن جي خريداري ڪن ٿا . سيزن جو فائدو وٺندي گرم ڪپڙا وڪرو ڪندڙن به قيمتن ۾ واڌ ڪري ڇڏي آهي . گرم ڪپڙا خريد ڪندڙن جي عبدالجبار، سلطان،سليم،وسيم،ستار مغيري،زاهد خشڪ، محمد وسيم ، ممتاز، ۽ ٻين دانهون ڪندي ٻڌايو ته شهر جي مڙني علائقن ۾ افغاني پٺاڻن جي لوڌ پهچي وئي آهي لنڊي جا سوئيٽر ،جيڪٽ، ٽوپلا ، جوراب، پراڻا جوتا ۽ ٻئي سامان جا اگهه وڌائي ڇڏيا آهن . شهر ۾ مڱ، لاهوري گجرون ، توڙي سوپ به وڪرو ٿي رهيو .
وارهه ۾ بائيو ميٽرڪ سسٽم باوجود استاد نٿا اچن ، ڪيترائي اسڪول بند
ڪيترائي گرلس اسڪول به ٽيچرز نه اچڻ سبب بند ، بائيو ميٽرڪ سسٽم تي سوال اٿڻ لڳا
وارهه (رپورٽر) وارهه تعلقي اندر قائم 234بوائز پرائمري اسڪولن مان اڌ کان گهڻا اسڪول استادن جي نه اچڻ سبب بند پيل آهن ۽ استاد گهر ويٺي پگهارون کڻي رهيا آهن .بائيو ميٽرڪ سسٽم باوجود استاد اسڪولن ۾ نٿا اچن . تعلقي جي يوسي ميرپور يوسي حمل يوسي نورآباد، ڪلر ، آباد ۽ وارهه يوسي جا ڪيترائي اسڪول بند پيل آھن جڏھن ته هلندڙ اسڪولن اندر به استادن هڪ ٻئي جي سهولت خاطر ڊيوٽي جا وارا ٺاهي ڇڏيا آھن جن تحت اڌ استاد ڊيوٽي ڪندا. بائيو ميٽرڪ سسٽم ذريعي استادن کان فنگر پرنٽس وٺندڙ آفيسر هر هفتي ۾ هڪ ڀيرو وزٽ تي ويندو آھي ۽ ان ڏينهن ڪيترائي استاد اڳواٽ موڪل لکي رکي ڇڏيندا آھن ۽ ٻيا استاد لکيل درخواست ڏيکاري ڇڏيندا آهن . تعلقي جي بند پيل اسڪولن ۾ خير محمد ٻرڙو، عبدالرزاق چانڊيو شفيع محمد ڇٽو ،عبدالوارث ٽوٽاڻي، عمران آباد ڪوٽ ،سرور دري ماڇي ، مجيب گورگيج ،انورآباد ،حسين آباد محمد خان مغل سميت ڪيترائي اسڪول شامل آھن جڏھن ته گرلس پرائمري اسڪولن جي حالت پڻ ڳڻتي جوڳي آهي . تعلقي اندر 54 گرلس پرائمري اسڪولن مان 28 اسڪولن بند هجڻ جو انڪسشاف ٿيو آهي .