شاهپور جهانيان (ن پ ا) شاهپورجهانيان ۾ علي بابا اليون ڪرڪيٽ ٽيم المهراڻ اليون کي شڪست ڏئي “شھيد صدام حسين ڏاهري ميموريل ڪرڪيٽ ڪپ ٽورنامينٽ ” جو فائنل کٽي ورتو. شاهپورجهانيان جي النور ڪرڪيٽ گرائونڊ تي شھيد صدام حسين ڏاهري جي ياد ۾ ڪرايل ڪرڪيٽ ڪپ ٽورنامينٽ جي فائنل مئچ علي بابا اليون ۽ المهراڻ اليون وچ ۾ ٿي. علي بابا ٽيم ٽاس کٽڻ بعد پهرين بئٽنگ ڪئي ۽ مقرر 10 اوورز ۾ 9 وڪيٽن جي نقصان تي المهراڻ ٽيم کي 183 رنس جو ٽارگيٽ ڏنو. مليل ٽارگيٽ پورو ڪرڻ جي ڪوشش ۾ المهراڻ ڪرڪيٽ ٽيم جي ڪپتان ربنواز گُل مسلسل 3 چوڪا هڻي هيٽرڪ ڪئي پر مجموعي طور تي ٽيم ڪو ٻوٽو نه ٻاري سگهي. اهڙي ريت المهراڻ ڪرڪيٽ ٽيم جا سمورا رانديگر 167 رنسن تي پويلين ڀيڙا ٿي ويا. ٽورنامينٽ ڪميٽي طرفان ڪامياب ٽيم جي ڪپتان فداحسين ڏاهري ۽ رنر ٽيم جي ڪپتان ربنواز گل ڏاهري کي انعامن سان نوازيو، اهڙي ريت ٻين رانديگرن کي به بهترين راند کيڏڻ تي انعام ڏنا ويا.

حيدرآباد (رپورٽ: فيض کوسو)حيدرآباد جي ضلعي انتظاميا سال 2018ع ۾به پوليو جا ڦڙا پيارڻ کان انڪاري 2هزار خاندانن کي راضي ڪرڻ ۾ ناڪام رهي، ڦڙا پيئڻ کان قاصر ٻارن جي والدين کي راضي ڪرڻ لاءِ نئين سال ۾ نئين حڪمت عملي جوڙي مخلتف ادارن کان مدد وٺڻ جو فيصلو، هدف ۾ به ٽي هزار ٻارن جي گهٽتائي. حيدرآباد جي ضلعي انتظاميا پاران سال 2018ع جي دوران ٽي لک 36 هزار ٻارن کي پوليو جا ڦڙا پيارڻ جو هدف مقرر ڪيو ويو هو، جنهن ۾ سال 2019ع جي لاءِ گهٽتائي آڻي اهو هدف 3 لک 32 هزار 263 مقرر ڪيو ويو آهي. گذريل سال دوران 3 هزار ٻارن کي پوليو جون ٽيمون ڳولڻ ۾ ناڪام رهيون، جڏهن ته ضلعي انتظاميا جون ٽيمون پوليو جا ڦڙا پيارڻ کان انڪاري 2 هزار خاندانن کي سڄي سال دوران راضي ڪرڻ ۾ پڻ ناڪام رهيون، ان سلسلي ۾ضلعي انتظاميا اهڙن خاندانن کي راضي ڪرڻ لاءِ چئمبر آف ڪامرس، پوليس ۽ ٻين ادارن کان مدد وٺڻ جو فيصلو ڪيو آهي، ضلعي انتظاميا پاران پوليو مهم جي لاءِ ضلعي جي 54 يونين ڪائونسلن ۾ هڪ هزار موبائيل ٽيمون، 117 فڪسڊ ٽيمون ۽ 23 ٽرانزٽ ٽيمون جوڙيون آهن، جنهن ۾ 890 ليڊي هيلٿ ورڪرس به شامل هونديون. پوليو مهم لاءِ 11 تعلقا سپروائيزر ۽ 83 يونين ڪائونسل ميڊيڪل آفيسر پنهنجون خدمتون سرانجام ڏيندا. ان سلسلي ۾ ڊپٽي ڪمشنر حيدرآباد سيد اعجاز علي شاه جي صدارت هيٺ هڪ اجلاس به ٿيو، جنهن ۾ ٻڌايو ويو ته ايندڙ سال 21 جنوري کان پوليو مهم شروع ٿيندي، جنهن ۾ مقرر ڪيل حدف وارن ٻارن کي پوليو جا ڦڙا پياريا ويندا. گڏجاڻي ۾ چيو ويو ته ايندڙ مهم دوران سو سيڪڙو نتيجا حاصل ڪرڻ لاءِ پنهنجي ٻارن کي پوليو کان بچاءِ جا ڦڙا پيارڻ کان انڪار ڪندڙ والدين کي راضي ڪرڻ لاءِ وڌ کان وڌ ڪوشش ڪئي ويندي، ان سلسلي ۾ چيمبر آف ڪامرس جي نمائندي کي اپيل ڪئي وئي ته سندن ادارو پوليو جي خاتمي جي لاءِ ضلعي انتظاميا سان سهڪار ڪري. پوليو جي ٽيمن کي سيڪيورٽي فراهم ڪرڻ جي لاءِ ضلعي پوليس جي انتظاميا کي هدايت ڪئي وئي ته شهر جي ٽرانزٽ پوائنٽس تي مستقل طور پوليس مقرر ڪئي وڃي، ته جيئن شهر مان ايندڙ ويندڙ ٻارن کي به پوليو جا ڦڙا پياري سگهجن، ٻئي طرف ڊي ايڇ او حيدرآباد ڊاڪٽر نسرين ميمڻ پنهنجي اخبار سان ڳالهائيندي ٻڌايو ته گذريل سال جي حدف ۾ ٽي هزار ٻار اهڙا هئا، جيڪي پنهنجي مستقل پتي تي نه پئي رهيا، ان ڪري هو پوليو جا ڦڙا پيئڻ کان رهجي ويا، جڏهن ته 2000 ٻار اهڙن خاندانن جا آهن، جن پوليو کان بچاءِ جا ڦڙا نه پيتا، هاڻي انهن کي راضي ڪرڻ لاءِ نئين حڪمت عملي جوڙي وئي آهي.

سانگهڙ ن پ ا) سانگهڙ ڀرسان گهر جي ڀت ڪرڻ سبب هڪ عورت ۽ ٻار فوت ٿي ويا. ڳوٺ گهندڻ ۾ ڳوٺاڻي پير بخش چانگ جي گهر ۾ صبح ساڻ ورانڊي جي ڀِت ڪري پئي، جنهن جي نتيجي ۾ 25 ورهين جي پوپري، 9 ورهين جو گلستان ۽ 5 سالن گلشن فوت ٿي ويا، جڏهن ته نينگر گلزار کي انتهائي ڳڻتي جوڳي حالت ۾ نواب شاهه اسپتلا منتقل ڪيو ويو آهي. واقعي کانپوءِ علائق ۾ سوڳ واري لهر پکڙجي وئي، جڏهن ته ڳوٺاڻي پير بخش جي گهر ۾ قيامت صغريٰ جهڙا منظر برپا ٿي ويا.

شڪارپور(رپورٽ: وحيد بروھي) پيپلزپارٽي شڪارپور ضلعي ۾ اختلاف، ڌڙابندي جو شڪار، پ پ ضلعي صدر ايم اين اي مير عابد ڀيو ۽ ايم پي اي امتياز احمد شيخ وچ ۾ پ پ يوٿ ونگ ۾ من پسند ماڻهن کي عهدا ڏيڻ تان اختلاف شروع ٿيا جڏهن ته آغا سراج دراني ۽ ڪماريو ڀائرن ۾ اليڪشن ۾ مڪمل طور مدد نه ڪرڻ ڪري اختلافن جا چئوٻول پڻ هلندڙ هئا جيڪي هن ڀيري شهيد راڻي بينظير ڀٽو جي ورسي ۾ شرڪت ڪرڻ دوران پڌرا ٿي چڪا آهن، ٻنهي اڳواڻن پاران ڌار ڌار ڪيمپون قائم ڪيون ويون جيڪي سڄو ڏينهن جيالن کان خالي رهيون، جڏهن ته امتياز احمد شيخ ۽ عابد ڀيو ڌار ڌار پينافيلڪس ٺهرايا جن تي هنن رڳو پنهنجون پنهنجون الڳ تصويرون لڳايون، جنهن بعد ٻئي اڳواڻ الڳ گاڏيون سجائي پنهنجي بنگلن تان جٿن جي صورت ۾ ڳڙهي خدا بخش ويا، ٻئي پاسي شڪارپور پ پ ضلعي جنرل سيڪريٽري ذوالفقار ڪماريو پڻ شڪارپور هائوس تي پهچي امتياز شيخ سان گڏ ڪيمپ تي پهتو هو جڏهن ته آغا سراج دراني ڳڙهي ياسين مان جيالن جي جٿي سان الڳ ڳڙهي خدا بخش لاءِ روانو ٿيو، شڪارپور ضلعي اندر پ پ اڳواڻن ۾ عام عام چونڊن کان اڳ ٽڪيٽن ۽ چونڊن کان بعد هڪٻئي جي تڪن تي مدد نه ڪرڻ ۽ تازو يوٿ چونڊن ۾ من پسند ماڻهن کي سليڪٽ ڪرڻ تان اختلاف شروع ٿيا هئا، ياد رهي ته هڪ سال اڳ امتياز شيخ جي پ پ ۾ اچڻ ۽ کيس ٽڪيٽ ڏيڻ تان آغا تيمور پٺاڻ پ پ ڇڏي چڪو آهي.

پير جوڳوٺ (رپورٽ: بلاول جوڻيجو) صوفي راڳي سيد موٽڻ شاهه بيماري جي بستري ڀيڙو ٿيويو آهي، غربت سبب علاج ڪرائڻ کان به لاچار آهي. ان سلسلي ۾ سنڌ جو مشهور صوفي راڳي “مان جوئي آهيان سوئي آهيان” “گھنڊ کول ديدار ويکائو مين آيا مک ويکڻ” مشهور ڪلام چئي شهرت جي بلندين تائين پهچندڙ سيد موٽڻ شاهه گذريل 4 سالن کان وٺي بيماري ڪري هن ڳائڻ ڇڏي ڏنو آهي. سيد موٽڻ شاهه جي پٽ پنهنجي اخبار کي ٻڌايو ته کيس باٿ روم تائين سهارو ڏئي آندو وڃي ٿو. هن چيو ته بابا جي سخت بيمار ٿيڻ ڪري سخت پريشان آهيون ۽ مسڪين ٿي وڃڻ ڪري هن جو علاج به نه ٿا ڪرائي سگھون.
موٽڻ شاهه سنڌي، اردو، پشتو، سرائڪي، فارسي ٻولين ۾ گيت ڳايا
پير جوڳوٺ: سنڌ جي مشهور صوفي راڳي سيد موٽڻ شاهه پنجن ٻولين سنڌي، اردو، پڇتو، سرائڪي، فارسي زبانن ۾ گيت ڳايا جيڪي اڄ به مشهور آهن. صوفي راڳي سيد موٽڻ شاهه کي ننڍپڻ کان ئي ڳائڻ جو شوق هو جيڪو مقامي سطح تي ٿيندڙ محفلن ۾ شريڪ ٿيندو هو ۽ بعد ۾ مشهور صوفي راڳي استاد غلام حسين خاصخيلي کان سکيا وٺي راڳ جي دنيا ۾ باقائدي پير پاتو.
صوفي راڳي موٽڻ شاهه لطيف ايوارڊ سميت ڪيترائي اعزاز ماڻي چڪو
پير جوڳوٺ: راڳ جي دنيا مڃتا ماڻيندڙ مشهور صوفي راڳي سيد موٽڻ شاهه ڪيترائي ايوارڊ ماڻيا آهن جن ۾ وڏو وزير ايوارڊ، گورنر ايوارڊ، شاهه عبداللطيف ڀٽائي ايوارڊ، سچل ايوارڊ ۽ ٻيا ڪيترائي ايوارڊ ماڻيا جيڪي هن وقت گھر جي ميز تي سجايل آهن، ايوارڊن جي باري ۾ پڇيل جي سوال جي جواب ۾ سيد موٽڻ شاهه نماڻي آواز ۾ چوي ٿو ته اهي مليل ايوارڊ منهنجي زندگي جو ته حصو ضرور آهن پر اهي پيٽ جي بک اجھائي نه ٿا سگھن انهن ايوارڊن کي ڏسي اکين ۾ لڙڪ لڙي ايندا آهن.

محرابپور (ن پ ا) ٽائون ڪاميٽي جو پيرسن ملازم اجرت نه ملڻ ڪري دربدر ٿي ويو، ٽائون ڪميٽي چيئرمين جي بنگلي آڏو احتجاج دوران ملازمن پيرسن کي ڌڪا ڏئي موٽائي ڇڏيو، پيرسن چيو آهي ته ٻن مهينن کان پگهارون بند ڪري جيئڻ جنجال بڻايو ويو آهي.
ملازم غوث بخش سومرو قرآن شريف کڻي ٽائون ڪاميٽي جي چيئرمين فاروق احمد لوڌي جي بنگلي آڏو احتجاج ڪيو ۽ نعريبازي ڪئي، جنهن بعد پريس ڪلب ۾ ميڊيا سان ڳالهائيندي پيرسن غوث بخش سومرو دانهيو ته مان گذريل 11 سالن کان ڊيلي ويجز تي بيلدار طور ڪم ڪري رهيو آهيان پر پورهيت دشمن چيئرمين من پسند ماڻهن کي رشوت عيوض پڪو ڪرايو پر منهنجي لاءِ ڪجهه به نه ڪيو.
پيرسن الزام هنيو ته ٽائون ڪميٽي چيئرمين جي حڪم تي ڪلارڪ ٻن مهينن کان منهنجي پگهار بند ڪري ڇڏي آهي، پگهار وٺڻ لاءِ چيئرمين جي بنگلي تي ويس پر سندس واٺن ڌڪا ڏئي موٽائي ڇڏيو،
پيرسن ملازم دانهيو ته ٻن مهينن کان پگهارون نه ملڻ ڪري منهنجا ٻچا بکون ڪاٽي رهيا آهن، اسپتال ۾ داخل بيمار گهرواري جو علاج رڪجي ويو آهي، معاملي جو نوٽيس وٺي فوري طور پڪو ڪرائي رڪيل پگهارون جاري ڪيون وڃن.

حيدرآباد(رپورٽ:فيض کوسو)حيدرآباد ۾ وڏن ماڻهن جو ڪلب جيم خانه، صدر جاويد جوڻيجي جي انتقال کانپوءِ انتظامي طور ايڊهاڪ بنياد تي هلندڙ، ڪلب جا انتظامي معاملا وقتي صدر ۽ وقتي سيڪريٽري جي حوالي ٿي ويا، مستقل سيڪريٽري اڍائي سالن کان آفيس کي تالو لڳائي ڪنڊائتو ٿي ويو، جڏهن ته اسٽي آرڊر هجڻ ڪري ڪلب جي انتظامي ۽ مينيجنگ ڪاميٽي جي چونڊ گذريل پنجن سالن نه ٿي سگهي،
مليل ڄاڻ موجب 2013ع ۾ جيم خاني جي ٿيل چونڊ ۾ سيڪريٽري جي عهدي تي حاجي نثار ميمڻ ۽ صدر جي عهدي تي مرحوم جاويد جوڻيجو ڪامياب ٿيا هئا،جن جي اختلافن کانپوءِ نثار جوڻيجو سيڪريٽري جي آفيس ڇڏي ڪنڊائتو ٿي ويو هو، سندس ان عمل کانپوءِ مينجنگ ڪاميٽي وقتي طور ساجد ڀٽو کي سيڪريٽري مقرر ڪيو هو، جيڪو هاڻي ڪلب جا معاملا سنڀالي ٿو، جڏهن ته جاويد جوڻيجي جي انتقال سبب صدر وارو عهدو نائب صدر جي حوالي ٿي ويو آهي، جيم خانا ڪلب جي ذريعن موجب بينڪن ۾ مالي معاملن جي ڏي وٺ جي حوالي سان ٽن عهديدارن جون صحيحون هلن ٿيون، جن ۾ صدر، سيڪريٽري ۽ خزانچي شامل هجن ٿا، هن وقت ڪلب جو نه ته ڪل وقتي صدر آهي ۽ نه ئي ڪل وقتي سيڪريٽري موجود آهي،جنهن سبب ڪلب جي مالي معاملن جي حوالي سان انيڪ سوال اٿي پيا آهن.
ڪلب جي چونڊيل سيڪريٽري حاجي نثار ميمڻ جو چوڻ آهي ته هو مرحوم جاويد جوڻيجي سان اختلافن جي ڪري اڍائي سال اڳ ڪلب جي سيڪريٽري جي آفيس خالي ڪري چڪو آهي، جنهن کانپوءِ هن سيڪريٽري جي عهدي تي ڪا به چونڊ ناهي ٿي سگهي، هن چيو ته جيم خاني جي آئين مطابق وقتي سيڪريٽري جي ڪا به گنجائش موجود ناهي، ان جي باوجود ڪلب جا معاملا وقتي سيڪريٽري جي حوالي آهن،
جيم خانا جي وقتي سيڪريٽري ساجد ڀٽو جو چوڻ آهي ته کيس مينيجنگ ڪاميٽي وقتي سيڪريٽري مقرر ڪيو هو، ان ڪري هو مالي معاملن سميت ڪلب جي سمورن انتظامي مسئلن کي به ڏسي رهيو آهي
هوڏانهن معلوم ٿيو آهي ته ڪلب جي پنجن ميمبرن عارف پاشا، غلام حسين ميمڻ، الهڏتو شر، مرحوم ڊاڪٽر انور لغاري ۽ غلام سرور قريشي جيم خانا ڪلب کي آئين پٽاندر نه هلائڻ ۽ اضافي ميمبر شپ ڪرڻ واري معاملي خلاف سنڌ هاِءِ ڪورٽ سرڪٽ بينچ حيدرآباد ۾ پٽيشن داخل ڪئي هئي، جنهن عدالت ڪلب جي چونڊن جي حوالي سان به اسٽي آرڊر جاري ڪري ڇڏيو، جنهن سبب پنجن سالن کان ڪلب جي انتظامي ۽ مينيجنگ ڪاميٽي جي چونڊ نه ٿي سگهي آهي، انهي ڪري ڪلب ۾ انتظامي حوالي سان پڻ وڏا سوال اٿي رهيا آهن.
پنهنجي اخبار پاران رابطو ڪرڻ تي ڪلب جي خزانچي ڊاڪٽر شمس شيخ ٻڌايو ته ڪلب معمول موجب هلي رهيو آهي ۽ سمورا ڪم آئين پٽاندر ٿي رهيا آهن، ڪلب پنهنجي ڪل وقتي سيڪريٽري جي ٽن ميٽنگن ۾ نه اچڻ جي ڪري هن کي هٽائي ڇڏيو هو، جنهن کانپوءِ مينجنگ ڪاميٽي ۾ سڀ کان وڌيڪ ووٽ کڻندڙ ميمبر ساجد ڀٽو کي وقتي سيڪريٽري مقرر ڪيو ويو هو، جيڪو بينڪ جي چيڪن تي به صحيح ڪرڻ جو مجاز آهي،
ڪلب جي سيڪريٽري طور چونڊيل حاجي نثار جو چوڻ هو ته هو جلدي ڪلب جي پيٽرن ان چيف سان ملاقات ڪري، کيس صورتحال ڪري آگاهي ڏيندو ۽ ان جي صلاح جي روشني ۾ هو پنهنجون وڌيڪ سرگرميون شروع ڪندو، ڪلب جي هڪ ميمبر عارف پاشا ٻڌايو ته ڪلب جي آئين ۾ وقتي سيڪريٽري جي ڪا به گنجائش ناهي ۽ صدر جي فوت ٿيڻ سبب ڪلب جا مالي معاملا ضرور مونجهاري جو شڪار ٿيندا.
جاويد جوڻيجي جي روايتي مخالف ڊاڪٽر هادي بخش جتوئي چونڊن ۾ سرگرم نه ٿيڻ جو فيصلو ڪري ورتو
حيدرآباد:جيم خاني ڪلب جي صدر مرحوم جاويد جوڻيجي جي روايتي حريف ڊاڪٽر هادي بخش جتوئي هاڻي ڪلب جي چونڊن ۾ سرگرم نه ٿيڻ جو فيصلو ڪري ورتو آهي. جيم خانا ڪلب جي چونڊن ۾ بنهه سرگرم رهندڙ ۽ مرحوم جاويد جوڻيجي جي روايتي حريف ڊاڪٽر هادي بخش جتوئي جو چوڻ آهي ته مڙس جي مرڻ کانپوءِ بيواه به هلندي رهندي آهي ۽ جيم خانا جو ڪاروهنوار به هلي پيو، هن چيو ته هاڻي هو جيم خانا جي چونڊن ۾ حصو نه وٺندو ۽ پنهنجي ٻني ٻاري جي ڪم ۾ مصروف ٿي ويو آهي.

گهوٽڪي(ن پ ا) گهوٽڪي ڀرسان ڏينگڙو واه تان وڻن جي وڍي جاري آپباشي جي عملي جي نگراني ۾ وڻ وڍيا پيا وڄن ڳوٺاڻن جو الزام، گهوٽڪي ڀرسان ڏينگڙو واھ جي آرڊي 46 وٽان سري عام ڏينهن ڏٺي جو واھ جي ڪپر تان ٻٻر جا وڻ وڍيا پيا وڃن ڳوٺاڻن غلام محمد کوسو امان الله کوسو صحافين سان ڳالهندي چيو ته آبپاشي عملدار داروغي امان الله سومري جي موجودگي ۾ ڏينگڙو واهه جي ڪپرن تي موجود ٻٻر جي وڻن جي واڍي ڪرائي پئي وڃي. آبپاشي انجنيئر چيو آهي ته وڻن جي واڍي ڪندڙن خلاف ڪارورائي ڪئي ويندي ۽ جيڪي آبپاشي عملدار ملوث آهن، اُنهن کي به بخش نه ڪيو ويندو.

ڪوٽڙي: اجلاس ۾ آراضي سان تعلق رکندڙ عورت ميمبر سلطان گنڀير ڪم نه ٿيڻ تي گيت ڳائيندي پنهنجي شڪايت رڪارڊ ڪرائي ته ادا تون ڪير آھين اسان کي توهان سيوهڻ مان ڇو گهرايو الله الله ، هو هو اسان کي اجلاس ۾ ڇو گهرايو ويو ،ڇو گهرايو ويو، اسان جا مسئلا حل ناهن ٿيندا ته اجلاس ۾ ڇو گهرايو ويو،اجلاس ۾ عورت ميمبر چيو ته 52 ڪروڙ .32 لک ڪيڏانهن ويا ڪٿي خرچ ٿيا اسان کي اجلاس ۾ ڇو گهرايو ويو،عورت ميمبر چيو ته اسان کي اجلاس ۾ پاڻي جي بوتل ملي ٿي پر چانھ جو ڪوپ ملي ناهي سگهيو، جنهن تي ٽاڪڙو مچي ويو.

ڪراچي (شوبز نيوز) ننڍي کنڊ جي سدابهار گلوڪار محمد رفيع جي اڄ 93 سالگرهه ملهائي پئي وڃي. 24 ڊسمبر 1924ع تي ڀارتي پنجاب امرتسر ۾ جنم وٺندڙ محمد رفيع پنهنجي پهرين پرفارمنس 13 سالن جي عمر ۾ ڏني، جڏهن ته هن بالي ووڊ ۾ پلي بيڪ سنگر طور 1944ع ۾پنهنجي ڪيريرئر جي شروعات ڪئي، جڏهن ته هن آل انڊيا ريڊيو تي پڻ ڳايو. محمد رفيع ننڍي کنڊ جي وڏين ٻولين، پنجابي، اردو، مراٺي، سنڌي. هنڌي ۽ ٻين ٻولين ۾ گيت ڳايا. شروعاتي ڪيريئر دوران هن بالي ووڊ جي ڪيترن ئي هدايتڪارن سان گڏ ڪم ڪيو، جڏهن ته بالي ووڊ جي هر ڪامياب فلم ۾ سندس گيت شامل ڪيا ويندا هئا. محمد رفيع ڀارت ۾ رڪارڊ 68 فلم فيئر ايوارڊن سان گڏ ڀارت جو قومي ايوارڊ ۽ پدما شري ڀوشن پڻ ماڻيو، جڏهن ته هن 55 ورهين جي عمر ۾ 31 جولاءِ 1980ع تي لاڏاڻو ڪري ويو.

پنوعاقل:( رپورٽ :نديم بوزدار ) ايس ايس پي سکر اسد رضا شاھ ”پنھنجي اخبار“ ۾ پنو عاقل ۾ ٿيل جرڳي بابت خبر جو نوٽيس وٺي وڏيري ڪريم بخش کي گرفتار ڪرڻ جو حڪم ڏنو جڏھن تھ پوليس وڏيري خلاف ايف آءِ آر داخل ڪري ورتي، ھوڏانھن بااثر وڏيري پاران سياسي دٻاءُ استعمال ڪرائي فريادي ڌر مٿان پڻ جوابي ايف آءِ آر داخل ڪرائي ڇڏي، ان ڏس ۾ ڳوٺ ڪريم بخش واگهو ۾ پ پ اڳواڻ ضلعي ڪائونسل سکر جي ميمبر ۽ ڳوٺ جي وڏيري ٻج ڀاڻ جي واپاري حاجي ڪريم بخش واگهو پنهنجي ڳوٺ جي هاري غلام محمد واگهو جي معصوم پٽ 8 سالن جي نينگر جواد احمد واگهو تي پنهنجي 6 سالن جي ڀائٽي تقوى ڌيءَ عبدالقادر سان ڪارنهن الزام مڙهيندي ڪارنهن معاملي جو جرڳو ڪيو.
وڏيري ڪاري ڌر تي 5 لک روپيا ڏنڊ مڙهيندي سندس ڀائٽي 7 سالن جي نينگري شمائلا ڌيءَ عطامحمد سڱ چٽي ۾رکندي پنهنجي 14 سالن جي ڀائٽي انيس احمد واگهو پٽ عبدالقادر سان زبردستي ڳوٺ جي مولوي گل محمد واگھو هٿان نڪاح ڪرائي ورتو آهي ،.
ڪارنهن الزام هيٺ آيل ڌر غلام محمد واگهو ميڊيا آڏو ڪلام پاڪ کڻي ٻارن ٻچن سميت احتجاج ڪندي چيو ته وڏيري اسان سان ظلم ڪيو آهي اسان بي گناه آهيون الزام بي بنياد آهي ، چيف جسٽس آف پاڪستان ،وزيراعظم پاڪستان آءِجي سنڌ ،ڊي آءِ جي سکر،ايس ايس پي سکر کان مطالبو ٿو ڪيان ته مونکي انصاف ڏنو وڃي، سنڱ چٽي ۾ آيل معصوم نينگري شمائلا ڌيءَ عطا محمد جو نڪاح وڏيري جي مسجد جي پيش امام گل محمد واگهو پڙهايو سنڱ چٽيءَ ۾ آيل 7سالن جي معصوم نينگري دانهون ڪندي ميڊيا سان ڳالهائيندي چيو ته وڏيرو ظالم آهي مان وڏيري جي گهر ۾ نه ويندس،
ٻئي پاسي پنهنجي اخبار جي ويب تي سڀ کان پهرين خبر نشر ٿيڻ بعد ايس ايس پي سکر اسد رضا شاھ ۾ ٿيل جرڳي جو نوٽيس وٺندي ڪينٽ ٿاڻي جي ايس ايڇ او کي بروقت ايف آئي آر داخل ڪرڻ جو حڪم ڏئي ڇڏيو آهي ۽ ڊي ايس پي پنوعاقل لياقت علي عباسي کي به واقعي واري هنڌ تي پهچڻ جو حڪم ڏنو.
ايس ايس پي سکر اسد رضا شاھ جو وڌيڪ چوڻ هو ته جرڳو ڪندڙن خلاف قانون موجب سخت ڪاروائي ڪئي ويندي.

پنوعاقل (رپورٽ: مرتضيٰ ڊيهو/نديم بوزدار ) ڪارنهن معاملي جي مبينا جرڳي دوران وڏيري طرفان نينگر کي نينگري سان ڪارو قرار ڏئي هڪ ٻي نينگري جو پنهنجي ڀائيٽي سان زبردستي نڪاح ڪرائڻ جو انڪشاف ٿيو آهي. متاثر ڌر انصاف جي اپيل ڪندي چيو آهي ته وڏيري الزام پاڻ هنيو ۽ فيصلو به پاڻ پنهنجي ئي حق ۾ ڪيو آهي.
ڳوٺ ڪريم بخش واگهو ۾ گذريل ڏينهن ڪارنهن معاملي جو جرڳو وڏيري ڪريم بخش واگهو جي سرپئنچي ۾ ٿيو، جنهن دوران پورهيت جي 8 سالن جي پٽ جواد تي وڏيري جِي 6 سالن جِي ڀائيٽِي سان ڪارنهن جو الزام مڙهيو ويو.
جرڳي دوران الزام ثابت ٿيڻ تي نينگر واري ڌر تي سڱ چٽي ۽ 5 لک رپيا ڏنڊ جي فتويٰ جاري ڪندي سندن 7 سالن جي نينگري شمائله جو وڏيري جي 14 سالن جي ڀائيٽَي انيس واگهو سان زبردستي نڪاح ڪرايو ويو.
پنهنجي اخبار پاران رابطو ڪرڻ تي متاثر ڌر چيو ته نينگر تي ڪارنهن جو ڪوڙو الزام لڳائي جرڳو ڪيو ويو ۽ وڏيري سڱ چٽي جو فيصلو ڪري وڏو ظلم ڪيو آهي، هنن چيو ته وڏيري الزام پاڻ هنيو ۽ فيصلو به پاڻ پنهنجي حق ۾ ڪيو آهي.
متاثر ڌر سنڌ سرڪار سميت اعليٰ اختيارين کان جرڳي جو نوٽيس وٺندي انصاف جي اپيل ڪئي آهي.
نينگري شمائلا جي پيءُ جو چوڻ آهي ته وڏيري جرڳي دوران زبردستي نڪاح ڪرايو، پر خوف کان ڪنهن کي نه ٻڌايو. هن مطالبو ڪيو آهي ته وڏيري خلاف ڪارروائي ڪري کين تحفط فراهم ڪيو وڃي.
پنهنجي اخبار پاران رابطو ڪرڻ تي وڏيري ڪريم بخش واگهو جرڳي جي تردي ڪري ڇڏي.
وڏيري موقف اختيار ڪيو ته منهنجي خلاف سازش ڪئي پئي وڃي، جرڳي جي آڙ ۾ پيسا وٺڻ لاءِ بيلڪ ميل ڪيو پيو وڃي

ڪڙيو گهنور (ن پ ا ) 10ڪڙيو گهنور ۾ ذهني توازن وڃائي ويٺل نوجوان کي وارثن 10 ورهين کان زنجيرن ۾ قيد ڪري رکيو ،سندس حالت انتهائي خراب آهي ، سندس وارثن سرڪار ۽ سرندي وارن کان علاج ۾ مدد جي اپيل ڪئي آهي
ڪڙيو گهنور باءِ باس روڊ تي جهوپڙي اڏي ويٺل 80 ورهين جو اکين کان نابين علي بخش ماڇي ذهني توازن وڃائي ويٺل پٽ عبدالجبار جو وس آهر علاج ڪرايو پر فرق نه پوڻ تي انهن نوجوان کي زنجيرن ۾ ٻڌڻ کي ئي بهتر سمجهيو . نوجوان عبدالجبار اڄ به کلي آسمان هيٺان هر تتي ٿڌي کي برداشت ڪندو نظر اچي ٿو هو لوهي سنگهرن ۾ ٻڌل آهي سندس حالت ڏسڻ سان انسانيت جو ڪنڌ شرم وچان جهڪي پوي ٿو نوجوان جي حالت حيوانن کان به بدتر آهي نوجوان جي والد اکين کان نابين علي بخشجو چوڻ آهي ته سندس پٽ جو ذهني تواز صحيح ناهي گهر جو اله تله وڪرو ڪري پٽ جو علاج ڪرايم پر ٽڪي جو فائدو نه ٿيو هن وس وارن کي اپيل ڪندي چيو ته نوجوان جو علاج ڪرايو وڃي ته جئين هو زندگي پڇاڙڪن ڏينهن ۾ سندس خدمت ڪري سگهي.