اسلام آباد (رپورٽر) مني لانڊرنگ اسڪينڊل ۾ گرفتار اومني گروپ جي عبدالغني مجيد ۽ انور مجيد سُپريم ڪورٽ ۾ جواب جمع ڪرائيندي جي آءِ ٽي جي الزامن کي رد ڪري ڇڏيو. جواب ۾ عدالت کي استدعا ڪئي وئي آهي ته جي آءِ ٽي رپورٽ ۾ لڳايل الزامن کي رد ڪيو وڃي، جي آءِ ٽي وٽ اهڙو ڪوبه بنيادي اختيار نه آهي جو معاملو نيب ڏانهن موڪلڻ جي سفارش ڪري، تنهن ڪري جي آءِ ٽي جي ڪنهن به سفارش جي منظوري ڏيڻ بنيادي حقن جي ڀڃڪڙي هوندو. جواب ۾ عبدالغني مجيد ۽ انور مجيد چيو ته جي آءِ ٽي جن 294 ماڻهن جا بيان رڪارڊ ڪيا، اُنهن جا نالا ظاهر نه ڪيا ويا آهن، جڏهن ته جنهن رڪارڊ جو جائزو ورتو ويو، اُن کي به رپورٽ ۾ شامل نه ڪيو ويو آهي. اسان بيڏوهي آهيون.
عبدالغني ۽ انور مجيد جي آءِ ٽي جي الزامن کي رد ڪري ڇڏيو
جي آءِ ٽي 294 ماڻهن جا بيان رڪارڊ ڪيا، رپورٽ ۾ انهن جا نالا نه آهن: سُپريم ڪورٽ ۾ جواب
رڪارڊ به رپوٽ ۾ شامل نه آهي، جي آءِ ٽي جي سفارش منظور ڪرڻ بنيادي حقن جي ڀڃڪڙي هوندي: جواب
عمران کي مڙهڻو ئي هو ته کيس حڪومت ڪرڻ سيکاريو وڃي ها
پي ٽي آءِ کان حڪومت نه هلندي، اهو ئي ڪندا، جيڪو ڪري رهيا آهن: وڏو وزير
گهوٽڪي ( ن پ ا) سنڌ جي وڏي وزير مراد علي شاهه چيو آهي ته سنڌ جي عوام سان دشمني ڪئي پئي وڃي، جيڪڏهن عمران خان کي مڙهڻو هو ته کيس حڪومت ڪرڻ به سيکاريو وڃي ها.
خانڳڙهه ۾ پارٽي جلسي کي خطاب ڪندي مراد علي شاهه وزيراعظم عمران خان سميت وفاقي سرڪار کي تنقيد جو نشانو بڻايو، وڏي وزير چيو ته پي ٽي آءِ جي حڪومت سئو ڏينهن يا جيترا به ڏينهن رهي، انهن کان ڪجهه به نه ٿيندو، اهي حڪومت نه ٿا ڪري سگهن، اهو ئي ڪري سگهن ٿا، جيڪو ڪجهه ڪري رهيا آهن.
مراد علي شاهه چيو ته وفاقي سرڪار ٻن ٽن مهينن ۾ پنهنجو ڪم ظاهر ڪري ڇڏيو، عمران خان کي ملڪ تي مڙهڻو هو ته کيس حڪومت ڪرڻ به سيکاريو ها، کيس پنهنجي گهرواري ياد ڏياريندي آهي ته هو وزيراعظم آهي ۽ پيرڻي کي چئو ته عمران کي ٻڌائي ته حڪومت ڪيئن ٿيندي آهي.
سنڌ جي وڏي وزير چيو ته سنڌ جي عوام سان دشمني ڪئي پئي وڃي، رڳو پيپلزپارٽي ئي عوام جي خدمت ڪندي.
جعلي اڪائونٽس ۽ مني لانڊرنگ ڪيس سومر تي ٻڌڻي لاءِ مقرر
چيف جسٽس جي سربراهي ۾ سپريم ڪورٽ جي 2 رڪني بينچ ٻڌڻي ڪندي
اسلام آباد ( ن پ ا ) سپريم ڪورٽ ۾ جعلي بينڪ اڪائونٽس ۽ مني لانڊرنگ ڪيس ايندڙ سومر تي ٻڌڻي لاءِ مقرر ڪندي اڳوڻي صدر آصف زرداري سميت نوٽيس جاري ڪيا ويا.
سپريم ڪورٽ ۾ جعلي بينڪ اڪائونٽس ۽ مني لانڊرنگ ڪيس جي ٻڌڻي چيف جسٽس ميان ثاقب نثار ۽ جسٽس اعجاز الاحسن تي ٻڌل سپريم ڪورٽ جي 2 رڪني بينچ 31 ڊسمبر سومر ڏينهن ڪندي.
سپريم ڪورٽ اڳوڻي صدر آصف زرداري، سندس ڀيڻ فريال ٽالپر، بحريه ٽائون جي سربراهه ملڪ رياض، زين ملڪ، انور مجيد، عبدالغني مجيد، نمر مجيد ۽ ٻين کي نوٽيس جاري ڪري ڇڏيا، اٽارني جنرل، جي آءِ ٽي سربراهه ۽ ميمبرن، پراسيڪيوٽر جنرل نيب، آءِ جي سنڌ، آءِ جي جيلز کي به نوٽيس جاري ڪيا ويا.
لاڏلي جي ڦاٽل دهلن للڪاريو آھي، مقابلو ڪبو:آصف زرداري
بلاول منهنجو ۽ بينظير جو پٽ آهي، انکي ڪيئن ڊيڄاريندئو؟ : ڳڙهي خدا بخش ۾ خطاب
ڳڙهي خدا بخش ڀٽو ( رپورٽر) اڳوڻي صدر آصف علي زرداري چيو آهي ته لاڏلي جي ڦاٽل دهلن ٻيهر للڪاريو آهي، سازشن جو مقابلو ڪنداسين، ڳڙهي خدا بخش ڀٽو ۾ شهيد بينظير ڀٽو جي ورسي جي موقعي تي جلسي کي خطاب ڪندي آصف علي زرداري چيو ته اسان ڪيسن کان نه اڳ ڊناسين نه هاڻي ڊڄنداسين، اڄ لاڏلي جي ڦاٽل دهلن اسان کي ٻيهر للڪاريو آهي، هن چيو ته جمهور ي طريقي سان اليڪشن کٽي ٻيهر واپس اينداسين، حڪومت ۾ اچي پاڪستان ۽ معيشت کي سنڀالينداسين، هن چيو ته بلاول منهنجو ۽ بينظير جو پٽ آهي، انکي ڪيئن ڊيڄاريندئو، اسان پهرين به سازشن جو مقابلو ڪيو ۽ هاڻي به ڪنداسين، جيالا لاڏلي جي ظلمن کي منهن ڏيڻ جي طاقت رکن ٿا، هن حڪمرانن تي تنقيد ڪندي چيو ته جيڪو ڪم ڪرڻ ڄاڻيندو آهي ان لاءِ 100 ڏينهن گهڻا آهن، اسان 100 ڏينهن ۾ مشرف کي گهر پهچايو، هنن حڪمرانن کي ٽي وي تي بڪواس ڪرڻ کانسواءِ ڪجهه ناهي ايندو، پاڙيسري ملڪن کان تمام گهڻي مدد ملڻ باوجود هنن کان ملڪ نٿو سنڀالجي، هو نه ڏسي سگهن ٿا، نه ٻڌن ٿا، هن چيو ته هو جيڪو عمل ڪندا انهن کي اهڙلو ئي جواب ڏينداسين.
پ پ قيادت جو اي سي ايل ۾ نالو شامل ڪرڻ بدمعاشي آهي: ترجمان
پرويز مشرف جو نالو اي سي ايل ۾ ناهي، آصف زرداري جو نالو شامل ڪيو ويو: عامر پراچا
پي ٽي آءِ انتقام کي احتساب پئي ڪوٺي، ڪيس کي منهن ڏينداسين
ڪراچي (م ڊ) اڳوڻي صدر آصف علي زرداري جي ترجمان جو نالو اي سي ايل ۾ شامل ڪرڻ تي رد عمل اچي ويو، ترجمان آصف علي زرداري چيو آهي ته عدالتي فيصلي کان پهرين نالو اي سي ايل ۾ شامل ڪرڻ بدمعاشي آهي، پرويز مشرف جو نالو اي سي ايل ۾ ناهي، آصف زرداري جو شامل ڪيو ويو، ترجمان آصف زرداري عامر فدا پراچا جو چوڻ هو ته پي ٽي آءِ انتقام کي ڪرپشن خلاف ڪارروائي قرار ڏئي رهي آهي، آصف زرداري ملڪ کان ٻاهر نه پيو وڃي، ڪيسن کي منهن ڏينداسين
ريلوي جي زمين تي هائوسنگ سوسائٽيز ٺاهڻ تي پابندي لاڳو
سپريم ڪورٽ رائل پام ڪلب لاهور جي انتظاميا کي ٽوڙي ڇڏيو
رائل پام وارا ايترا بااثر آهن جو اڌ ملڪ انهن جي ڳالهه مڃندو آهي: چيف جسٽس
لاهور( م ڊ ) سپريم ڪورٽ ريلوي جي زمين تي هائوسنگ سوسائٽيز ٺاهڻ تي پابندي لڳائي ڇڏي، لاهور جي رائل پام ڪلب جي انتظاميه کي ٽوڙي سمورو رڪارڊ تحويل ۾ وٺڻ جو به حڪم ڏئي ڇڏيو.
سپريم ڪورٽ لاهور رجسٽري ۾ چيف جسٽس پاڪستان جي سربراهي ۾ 3 رڪني بينچ ريلوي جي زمين ليز تي ڏيڻ خلاف پاڻمرادو نوٽيس جي ٻڌڻي ڪئي، عدالت رائل پام بابت لاهور هاءِ ڪورٽ جي سمورن حڪمن کي غير اثرائتو ڪندي حڪم ڏنو ته ريلوي بابت ڪو به رڪارڊ پام ڪلب مان ٻاهر نه ويندو.
سپريم ڪورٽ رائل پام لاهور جي انتظاميه کي ٽوڙي فرگوسن چارٽرڊ ڪمپني کي ڪلب جي نئين انتظاميه قرار ڏئي ڇڏيو ۽ ان کي سمورو ريڪارڊ فوري طور پنهنجي قبضي ۾ وٺڻ جو حڪم ڏنو.
بي بي جي فلسفي آڌار ذهني مريضن جو مقابلو ڪبو:آصف زرداري
شدت پسندن ۽ دهشتگردن خلاف اسان جي جدوجهد جاري رهندي
اسلام آباد (رپورٽر) اڳوڻي صدر آصف علي زرداري چيو آهي ته بي بي جي فلسفي تحت عدم برداشت جو شڪار ذهني بيمارن سان مقابلو ڪندا رهنداسين، آصف علي زرداري شهيد بينظير ڀٽو کي ورسي جي موقعي تي خراب تحسين پيش ڪيو، آصف علي زرداري جاري ڪيل هڪ پيغام ۾ چيو آهي ته آئين، جمهوريت ۽ انساني آزادي لاءِ بي بي جي فلسفي تي عمل ڪندا رهنداسين، شدت پسندن ۽ دهشتگردن خلاف جدوجهد جاري رهندي، پيغام ۾ سندس وڌيڪ چوڻ هو ته خودمختيار ۽ بااختيار پارليامينٽ جي اصول تي ثابت قدمي سان انهن عنصرن جو مقابلو ڪندا رهنداسين جيڪي پارليامينٽ کي ڪمزور ڪڻ چاهين ٿا، پيپلزپارٽي ڪمزور طبقن جي حقن جو تحفظ ڪندي رهندي.
پشاور: وحشي صفت نوجوان پنھنجي والد، 3 ڀائرن ۽ چاچي کي قتل ڪرڻ بعد آپگھات ڪري ڇڏيو
واردات بعد نوجوان آپگھات ڪري ڇڏيو، جوابدار ذهني مريض هو، جاچ ڪريون پيا: پوليس
پشاور (م ڊ) پشاور ۾ نوجوان پٽ ۽ ڀائرن سميت 5 گهرڀاتين کي قتل ڪري آپگهات ڪري ڇڏيو، ٿڪال واري علائقي ۾ هڪ نوجوان گوليون هڻي پنهنجي پيءُ، ٽن ڀائرن ۽ چاچي کي قتل ڪري ڇڏيو، جنهن کانپوءِ جوابدار پنهنجي زندگي جو به انت آندو، پوليس واقعي واري هنڌ پهچي لاش ضروري ڪارروائي لاءِ اسپتال پهچايا، واقعي بابت پوليس جو چوڻ آهي ته نوجوان ذهني مريض هو، جنهن پنهنجي 5 گهرڀاتين کي قتل ڪرڻ بعد پاڻ به آگهات ڪيو آهي، واقعي جي وڌيڪ جاچ ڪئي پئي وڃي.
علي عابدي جي قتل ۾ استعمال ٿيل پسٽل پهرين به استعمال ٿيو
10 ڊسمبر تي ساڳي پسٽل سان نوجوان احتشام کي نشانو بڻايو ويو: راجا عمر خطاب
ڪراچي ( م ڊ ) علي رضا عابدي جي قتل ڪيس ۾ اهم اڳڀرائي ٿي آهي، سندس قتل ۾ استعمال ڪيل هڪ پسٽل سان ڪجهه ڏينهن اڳ هڪ نوجوان کي به قتل ڪيو ويو هو، سي ٽي ڊي انچارج راجا عمر خطاب چيو آهي ته مارجي ويل نوجوان جو واسطو ڪنهن سياسي جماعت سان نه هو.
علي رضا عابدي جي قتل ۾ استعمال ٿيل 2 پسٽل جي فارينزڪ رپورٽ اچي وئي، رپورٽ جي حوالي سان ٻڌائيندي سي ٽي ڊي انچارج راجا عمر خطاب چيو ته علي رضا عابدي تي حملي ۾ استعمال ٿيل ٻن مان هڪ پسٽل 10 ڊسمبر تي ڪارروائي ۾ استعمال ڪيو ويو هو.
راجا عمر خطاب موجب 30 بور واري ان پسٽل سان 10 ڊسمبر تي لياقت آباد ۾ نوجوان احتشام کي قتل ڪيو ويو، جنهن کي 3 گوليون هنيون ويون هيون، احتشام جي وارثن موجب سندس ڪنهن به سياسي جماعت سان واسطو نه هو،
انچارج سي ٽي ڊي جو چوڻ هو ته جنهن پسٽل سان احتشام کي نشانو بڻايو هو، ان پسٽل مان ئي علي رضا عابدي تي گهڻيون گوليون فائر ڪيون ويون، حملي ۾ 2 پسٽل استعمال ڪيا ويا، ٻئي پسٽل مان رڳو هڪ گولي هلائي وئي، جنهن جي گولي ڪنهن به ٻئي واقعي سان ميچ ناهي ٿي.
راجا عمر خطاب جو وڌيڪ چوڻ هو ته علي رضا عابدي تي حملي وقت هٿياربند جي هٿن ۾ پسٽل هئا.
جيڪا ڳالهه نيب عدالت کي ڪرڻ گهرجي اها پي ٽي آءِ وارا پيا ڪن : عابدي جو آخري ٽوئيٽ
عابدي عام چونڊن کان اڳ پ پ ۾ شامل ٿيڻ وارو هو: سعيد غني
ڪراچي: اڳوڻي ايم اين اي علي رضا عابدي قتل ٿيڻ کان ڪجھه ڪلاڪ اڳ 5 لڳي 57 منٽن تي پنهنجي زندگي جو آخري ٽويٽ ڪيو، پي ٽي آءِ اڳواڻن جي پريس ڪانفرنس جي ردعمل ۾ ٽوئيٽ ڪندي علي رضا عابدي لکيو هو ته پي ٽي آءِ وارن پريس ڪانفرنس ۾ ڪا به نئين ڳالهه نه ڪئي، پريس ڪانفرنس ۾ ڪنٽينر واريون ڳالهيون ورجايون ويون. پي ٽي آءِ وارا گذريل 5 سالن کان ساڳيون ڳالهيون ڪن پيا، صرف نئين شيءِ اها آهي ته جيڪي ڳالهيون نيب عدالت کي ڪرڻ گهرجن، اهي هي پيا ڪن.
ٻئي طرف صوبائي وزير سعيد غني انڪشاف ڪندي چيو آهي ته علي رضا عابدي 2018 جي چونڊن کان اڳ پ پ پ ۾ شامل ٿيڻ وارو هو، سماجي رابطن واري ويب سائيٽ ٽوئيٽر تي علي رضا عابدي جي آصف علي زرداري سان گڏ نڪتل تصوير شيئر ڪندي سعيد غني لکيو ته علي رضا سٺو دوست هو، هن سان ڪافي ميٽنگس ٿيون، جن ميٽنگس کي سندس خواهش موجب راز ۾ رکيو ويو هو. هن چيو ته علي رضا عابدي پ پ ۾ شامل ٿيڻ وارو هو
جي آءِ ٽي رپورٽ رياستي ناڪامي سمجهڻ لاءِ ڪافي آهن: عمران خان
خبر پئي ته ملڪ ڪيئن غريب ٿيندو آهي، اڃا به لٽيرن جو دفاع ڪندڙن تي حيرت آهي
اسلام آباد (م ڊ) وزيراعظم عمران خان چيو آهي ته پاناما ۽ جعلي اڪائونٽس بابت جي آءِ ٽي رپورٽون رياست جي ناڪامي کي سمجهڻ لاءِ اهم دستاويز آهن، عمران خان ٽوئيٽس ڪندي چيو آهي ته پاناما ۽ جعلي اڪائونٽس بابت جي آءِ ٽي رپورٽس ٻڌائين ٿيون ته رياستون ڪيئن ناڪام ٿينديون آهن، رپورٽن مان خبر پوي ٿي ته ملڪ ڪيئن غريب ۽ قرضي ۾ ٻڏندو آهي، جي آءِ ٽي رپورٽس سامهون اچڻ باوجود لٽيرن جو دفاع ڪندڙن تي حيرت آهي.
نوازشريف کي اڊيالا جيل کان ڪوٽ لکپت جيل منتقل ڪيو ويو
نوازشريف کي ڪوٽ لکپت جيل جي بي ڪلاس روم ۾ رکيو ويندو: گهرو سيڪريٽري
اسلام آباد ( م ڊ ) العزيزيه ريفرنس ۾ گرفتار نوازشريف کي اڊيالا جيل کان ڪوٽ لکپت جيل منتقل ڪيو ويو، ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو.
نيب ٽيم صبح ڌاري اڊيالا جيل پهتي، جتان روڊ ذريعي نوازشريف کي ايئرپورٽ پهچائڻ بعد خصوصي جهاز ذريعي لاهور پهچايو ويو، جنهن بعد اڳوڻي وزيراعظم کي ڪوٽ لکپت جيل منتقل ڪيو ويو
پنجاب جي گهرو سيڪريٽري جو چوڻ آهي ته ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو آهي، جنهن ۾ ٽي وي، هنڌ بسترو، ڪمبل، هيٽر، ڪرسي ۽ ميز رکرائي وئي آهي، کيس هڪ خدمتگار ۽ گهران ماني گهرائڻ جي سهولت به هوندي.
گهرو سيڪريٽري جو وڌيڪ چوڻ هو ته صوبي ۾ امن خراب ڪندڙن کي سختي سان منهن ڏنو ويندو، ڀڃ ڊاهه ڪندڙن خلاف دهشتگردي جا ڪيس داخل ڪيا ويندا، امن امان جي حوالي سان ڪشمنر ۽ آر پي کي خصوصي هدايتون جاري ڪيون ويون آهن.
نواز انتقام کي منهن ڏنو، عمران خان جو وارو آهي: مريم اورنگزيب
اليڪشن چور حڪومت ميڊيا تي ڪنٽرول چاهي ٿي، سينسرشپ مڙھي وئي آهي
اسلام آباد (رپورٽر) مسلم ليگ ن جي ترجمان مريم اورنگزيب چيو آهي ته نوازشريف انتقامي سياست کي منهن ڌئي رهيو آهي،هاڻي عمران خان جي حساب جو وارو اچي ويو آهي، ن ليگ ترجمان مريم اونگزيب وفاقي وزير فواد چوڌري جي بيان جي رد عمل ۾ چيو آهي ته الحمدالله نوازشريف خلاف هڪ رپئي جي ڪرپشن يا ڪميشن ثابت نه ٿي، اڍائي سالن جي سخت احتساب باوجود نيب نوازشريف خلاف ڪرپشن ثابت نه ڪري سگهيو، نه وري پنهنجي الزامن جو ڪو ثبوت ڏئي سگهيو آهي، اڄ عمران خان جا ڪوڙا الزام بي نقاب ٿي ويا.
ن ليگ ترجمان جو چوڻ هو ته فواد صاحب اوهان ٻين تي الزام لڳائڻ بدران عليمه باجي جو حساب ڏيو،جهانگير ترين جي لٽيل رقم پاڪستان واپس آڻيو، فيصلو اچڻ کانپوءِ حڪومتي ٽيم بوکلاهٽ جو شڪار آهي ته نوازشريف خلاف ڪرپشن ثابت نه ٿي سگهي، هاڻي عمران خان جي احتساب جو وقت اچي ويو آهي ۽ عمران عليمه باجي جي نالي ٺاهيل بي نامي ملڪيت جو جواب ڏي، نوازشريف 165 پيشيون ڀوڳي تاريخ رقم ڪئي، هاڻي عمران خان جي جواب ڏيڻ جو وقت آهي. مريم اورنگزيب جو چوڻ هو ته اليڪشن چور حڪمرانن ميڊيا ۾ بدترين سينسرشپ لاڳو ڪئي آهي،حڪومت ميڊيا جا فنڊ روڪي ميڊيا تي ڪنٽرول ڪرڻ چاهي ٿي.
”نواز شريف کي ڪوٽ لکپت جيل ۾ رکيو وڃي“ عدالت جو حڪم
عدالت نواز طرفان اڊيالا جيل کان ڪوٽ لکپت جيل منتقل ڪرڻ واري درخواست منظور ڪئي
اسلام آباد (رپورٽر) اسلام آباد جي احتساب عدالت نواز شريف کي اڊيالا کان ڪوٽ لکپت جيل منتقل ڪرڻ جو حڪم ڏئي ڇڏيو. نواز شريف کي العزيزيه ريفرنس ۾ سزا ملڻ بعد وڪيل خواجه حارث طرفان نواز شريف کي اڊيالا کان ڪوٽ لکپت جيل منتقل ڪرڻ لاءِ درخواست داخل ڪئي. عدالت درخواست منظور ڪندي نواز شريف کي لاهور جي ڪوٽ لکپت جيل ۾ رکڻ جو هڪم ڏئي ڇڏيو.
هر شخص کي لڳي ٿو ته مان ئي سڀ کان وڏو آهيان: ڪائره
جي آءِ ٽي رپورٽ جون ڳالهيون ته وزير به ڪندا رهيا آهن: پ پ اڳواڻ
لاهور(م ڊ ) پيپلزپارٽي جي مرڪزي اڳواڻ قمر زمان ڪائره چيو آهي ته هر شخص کي لڳي ٿو ته مان ئي سڀني کان وڏو آهيان ۽ مسئلي جو حل هُن وٽ آهي، پر مسئلن جو حل رڳو آئين تي عمل ڪرڻ ۾ آهي.
سپريم ڪور لاهور رجسٽري ٻاهران ميڊيا سان ڳالهائيندي قمر زمان ڪائره چيو ته جي آءِ ٽي رپورٽ ۾ اسان لاءِ ڪجهه به نئون ناهي، رپورٽ جون ڪيتريون ئي ڳالهيون اسان وزيرن کان به ٻڌيون، عدالتي پابندي باوجود جي آءِ ٽي رپورٽ ميڊيا تي آئي.
هن چيو ته اسان ٻڌائينداسين ته جي آءِ ٽي جي رپورٽ پهريان ڪٿي ڪٿي ڏيکاري وئي، سياسي ماڻهن سان گڏجي اها رپورٽنگ ڪئي وئي، جي آءِ ٽي