قبو سعيد خان (ن پ ا) قبي سعيد خان ۾ مينگل لائنز شاهه ڀٽائي ٽيم کي 61 رنسن تان شڪست ڏئي ٽي 10 ڪرڪيٽ ليگ کٽي ورتي.
فائنل مقابلي ۾ مينگل لائين زٽيم ٽاس کٽي پهرين بيٽنگ جو فيصلو ڪيو، پهرين کيڏندي مينگل لائنز مقرر 10 اوررن ۾ 121 رنسون ٺاهيون. جنهن ۾ پرويز بروهي 44 ۽ بابن کرل 24 رنسون ٺاهيون. شاھ ڀٽائي طرفان نادر کوسي 3 رانديگرن کي آئوٽ ڪيو .
جواب ۾ شاھ ڀٽائي جي 60 رنسن تي آل آئوٽ ٿي وئي، مينگل لائينز طرفان سلمان مينگل شاندار بالنگ جو مظاهرو ڪندي فقط 3 اوررن ۾ 15 رنسون ڏئي 4 رانديگرن کي آئوٽ ڪيو.
ان موقعي تي خاص مهمان پ پ سٽي اطلاعات سيڪريٽري گل حسن مگسي فاتح ٽيم جي ڪپتان صدام مينگل کي ٽرافي ڏني، جڏهن ته ڪپتان صدام مينگل کي ميچ کٽڻ تي سينئر ڪريڪيٽر وقاراحمد کوسي هڪ هزار رپيا روڪ انعام پڻ ڏنو.

سڊني (اسپورٽس ڊيسڪ) بگ بيش ليگ ۾ ميلبورن اسٽارز 5 وڪيٽن تان سڊني سڪسرز کي هارائي ڇڏيو.
سدني ڪرڪيٽ گرائونڊ تي بيگ بيش ليگ جي 10هين ميچ ۾ ميلبورن اسٽارز ٽاس کٽي پهرين فليڊنگ جو فيصلو ڪيو. پهرين بيٽنگ ڪندي سڊني سڪسرز مقرر اوورن ۾ 9 وڪيٽن جي نقصان تي 130 رنسون ٺاهي سگهي. جي سي سِلڪ 41 رنسون ٺاهي ناٽ آئوٽ رهيو. سين ايبٽ 22 ۽ هيوز 20 رنسون ٺاهي ٽاپ اسڪورر رهيا.
مليبورن اسٽارز طرفان ڪوليمن 3، لميڪهناني ۽ ڊي جي براو 2-2 وڪيٽون ورتيون، جڏهن ته زامپا ۽ ميڪسويل هڪ-هڪ وڪيٽ ورتي.
جواب ۾ ميلبورن اسٽارز 15 هين اوور جي آخري بال ۽ 5 وڪيٽن جي نقصان تي گهربل هدف ماڻي ميچ کٽي. هينڊز ڪومب شاندار بيٽنگ ڪندي 70 رنسون ٺاهيون، لرڪِن 20 ۽ اسٽوئنس 10 رنسون ٺاهي نمايان رهيا.
سڊني سڪسرز طرفان ورشوئز 3 ۽ او ڪِيف 2 وڪيٽون وٺي سگهيا. جڏهن ته 35 بالن تي 70 رنسون ٺاهڻ تي پيٽر هينڊز ڪومب کي ميچ جو بهترين رانديگر قرار ڏنو ويو.

ڪوٽڙي (رپورٽر) ڪوٽڙي ۾ جاري بلائنڊ ڪرڪيٽ سپرليگ ۾ سنڌ ۽ ڪي پي ميچون کٽي ورتيون.
پاڪستان بلائينڊ ڪائونسل جي انتظام هيٺ جاري بلائينڊ ڪرڪيٽ سپرليگ جي ٽئين ڏينهن پنجاب پهريان بيٽنگ ڪندي 20 اورن ۾ 8 وڪيٽن جي نقصان تي 219 رنسون ٺاهيون، بيٽسمين نثار علي 61 ۽ رياست علي 42 رنسون ٺاهي نمايان رهيا، جڏهن ته ڪي پي جي بالرن مجيب الرحمان 2 وڪيٽون ورتيون ,متيع الله ,اعجاز ۽ شاهزيب هڪ-هڪ وڪيٽ ورتي، هڪ رانديگر رن-آئوٽ ٿيو،
جواب ۾ڪي پي ٽيم 19 اوورن ۾ 5 وڪيٽن جي نقصان تي هدف پورو ڪري ميچ کٽي، بيٽسمين معين 70بالن تي 92 رنسون اسڪور ڪيون، ايوب خان 17 بالن تي 30 رنسون اسڪور ڪري ٽاپ اسڪورر رهيا. پنجاب جي بالرن احتشام ٽي وڪيٽون ورتيون ۽ هڪ وڪيٽ ادريس ورتي.
ٻي مئچ ۾ سنڌ 8 وڪيٽن جي نقصان تي بلوچستان کي شڪست ڏني. بلوچستان ٽاس کٽي پهريان بيٽنگ ڪندي مقرر اوورن ۾ٽن وڪيٽن تي 209 رنسون ٺاهيون، بلوچستان جي بيٽسمين اسلم 35 بالن تي 62، بدر 36 بالن تي 40 ۽ شاهزيب 19 بالن تي 36 رنسون ٺاهيون. سنڌ جي بالرن صادق ۽نواز هڪ-هڪ وڪيٽ ورتي.
جواب ۾ سنڌ جي رانديگرن 17 اوون ۾ ٻن وڪيٽ جي نقصان تي گهربل هدف ماڻي ميچ پنهنجي نالي ڪئي. سنڌ جي بيٽسمين هارون 40 بالن تي 71، راشد 30 بالن تي 47 رنسون ٺاهي نمايان رهيا. سنڌ پنهنجي ٽن مئچن مان پهرين ڪاميابي حاصل ڪئي.

باقراڻي(رپورٽر) باقراڻي ۾ شھيد شفيق احمد عباسي جي ياد ۾ ڪرايل والي بال ٽورنامينٽ الشھباز باقراڻي ٽيم کٽي ورتي.
ٽورنامينٽ جي فائنل ۾ پراڻي گڏ ٽيم ۽ الشهباز باقراڻي ٽيم ۾ سخت مقابلو ٿيو، جنهن بعد باقراڻي جي ٽيم مقابلو کٽي ٽورنامينٽ جو اعزاز پنهنجي نالي ڪيو.
ٽورنامينٽ ۾ الشھباز ٽيم باقراڻي، پراڻي گڏ ، دولت کوکر ، ڏوڪري ۽ ٻين شهرن جي ٽيمن حصو ورتو.
فائنل مقابلي بعدخاص مھمان اڳوڻي نائب ناظم آفتاب احمد عباسي ۽ حاجي ڪفايت ڪلھوڙو فاتح ٽيم کي ٽرافي ۽ پنج ھزار روڪ رقم انعام طور ڏني وئي، جڏهن ته ٽرافي ھارائيندڙ ٽيم کي به ٻه ھزار ۽ رنر-اپ ٽرافي ڏني وئي.

ڪراچي (اسپورٽس ڊيسڪ) چيف جسٽس ڪرپشن فري پاڪستان سائيڪل ڊوڙ عرفان بلوچ کٽي ورتي.
16 ڪلوميٽر ڊگهي سائيڪل ڊوڙ ۾ ذوهيب ٻئين ۽ اشعر بلوچ ٽئين پوزيشن ماڻي. ڊپٽي ڪمشنر جي آفيس وٽان خاص مهمان عابد علي ايڊووڪيٽ مقابلي جو افتتاح ڪيو.
سنڌ سائيڪلنگ ايسوسي ايشن جي چيئرمين ۽ مقابي جي خاص مهمان عابد علي ايڊووڪيٽ ڊپٽي ڪمشنر جي آفيس کان مقابلي جي شروعات ڪرائي.
ٽيم ڪراچي ايڪسپريس جي عرفان بلوچ 21 منٽ 30 سڪينڊن ۾ مقابلو کٽيو. ذوهيب بلوچ 3 سڪينڊ جي فرق سان ٻين پوزيشن ماڻي، جڏهن ته ٽيم ملير ٽائيگر جي اشعر بلوچ 5 سيڪنڊن جي فرق سان ٽئين پوزيشن حاصل ڪئي.

نئون ديرو(رپورٽر) آل پاڪستان ميموريل شوٽنگ والي بال ٽورنامينٽ 4 جنوري شروع ٿيندي. نئي ديري جي بلاول ڀٽو زرداري والي بال ڪلب جي ميزباني هيٺ عبدالمجيد شيخ ميموريل شوٽنگ والي بال ڪپ 4 کان 6 جنوري کان لاڙڪاڻي جي شهيد بينظير ڀٽو اسٽيڊيم ۾ ٿيندو. ٽورنامينٽ ۾ شرڪت لاءِ ميزبان ٽيم مختلف ڪلبن سان رابطا شروع ڪري ڇڏيا.
ان سلسلي ۾ انجنيئر ظهير ٻڌايو ته شوٽنگ بال ڪلپ لاءِ پنجاب،بلوچستان سميت سنڌ جي ڪلبن سان رابطا ڪري کين دعوت ڏني وئي آهي، ٽورنامينٽ ۾ سڄي ملڪ مان ٽيمون حصو وٺنديون.

ٺٽو ( ن پ ا ) ٺٽي ۾ راندين جو هفتو ملهايو ويو. ڪرڪيٽ جو فائنل مقابلو ڊگري ڪاليج جي انٽرميڊيئيٽ ٽيم کٽي ورتو. بوائز ڊگري ڪاليج ۾ ملهايل راندين جي هفتي دوران شاگردن راندين ۾ حصو وٺي پاڻ مڃايو.
ڪرڪيٽ جي فائنل مقابلي ۾ ٻارهين ڪلاس جي ٽيم پهرين بيٽنگ ڪندي مقرر 12 اوررن ۾ ضمير احمد سولنگي جي 55 رنسن جي مدد سان 124 رنسون ٺاهيون، جواب ۾ يارهين ڪلاس جي سڄي ٽيم 92 رنسون تي ڍير ٿي وئي. ٻارهين ڪلاس جي ٽيم جي ضمير سولنگي کي 2 وڪيٽون وٺڻ ۽ 55 رنسون ٺاهڻ تي ميچ جو بهترين رانديگر قرار ڏنو ويو.
ڪاليج جي پرنسيپال ۽ ناليواري اديب ۽ محقق ڊاڪٽر محمد علي مانجهي، پروفيسر غلام مصطفيٰ چارڻ، ڊائريڪٽر فزيڪل ايجوڪيشن عبدالعزيز خاصخيلي، بسم الله جان، عبدالستار ميمڻ، لطيف کتري، امان الله جوکيو ۽ ٻين فاتح ٽيم ۽ فائنل ۾ هارائيندڙ ٽيم جي رانديگرن کي انعام ڏنا.

خيرپور (رپورٽر) خيرپور ۾ ارسلان اليون آل سنڌ ڪرڪيٽ ٽورنامينٽ جو ٽائيٽل کٽي ورتو. سپيريئر سائنس ڪاليج جي ميدان تي آل سنڌ ٽورنامينٽ جي فائنل ۾ سمير اليون پهريان بيٽنگ ڪندي مقرر 8 اوورن ۾ 5 وڪيٽن جي نقصان تي 78 رنسون ٺاهيون. جنهن بعد ارسلان اليون چئن وڪيٽن جي نقصان تي 78 تي چئن اوورن ۾ هدف ماڻي ٽرافي پنهنجي نالي ڪئي.جنهن ۾ ارسلان اليون جي ڪامران اويسي 36 رنسون ٺاهي نمايان رهيو ۽ کيس ميچ جو پهرين رانديگر قرار ڏنو ويو. ٽورنامينٽ جا خاص مهمان ضلع ڪائونسل چيئرمين شهريار وساڻ، اي ايس پي راءِ مظهر اقبال، لالا فرقان شيخ ۽ ٻيا هئا. جن فاتح ٽيم کي ٽرافي ڏني. ٽورنامينٽ ۾ خيرپور، لاڙڪاڻي، گهوٽڪي، ڪوٽڏيجي ۽ گمبٽ سميت سنڌ جي مختلف شهرن جي 28 ٽيمن حصو ورتو. جڏهن ته ٽورنامينٽ ڏسڻ لاءِ شهر توڙي ڀرپاسي جي رهواسين وڏي انگ ۾ شرڪت ڪري بهترين راند تي رانديگرن کي داد ڏنو.