حڪومت جو يوٽرن، وزيراعظم هائوس کي يونيورسٽي بڻائڻ تان ڦري وئي

اسلام آباد (رپورٽر) وفاقي حڪومت وزيراعظم هائوس کي پهرئين مرحلي ۾ يونيورسٽي بنائڻ واري ارادي کان هٿ کڻي وئي آهي. وفاقي ڪابينا جي اجلاس بعد سڌ سماءُ جي وفاقي وزير فواد چوڌري ٻڌايو ته ڪابينا اجلاس ۾ وزيراعظم تعليم واري وزير شفقت محمود پاران وزيراعظم هائوس کي يونيورسٽي بنائڻ لاءِ ڪيل ڪوششن جي تعريف ڪئي. اجلاس ۾ فيصلو ڪيو ويو ته پهرئين مرحلي ۾ وزيراعظم هائوس کي دارالحڪمه بنايو ويندو، جتي انتظامي مامرن، آءِ ٽي، صنعتن ۽ ٻين شعبن بابت تحقيقي ماهر تحقيق ڪري سگھندا. ٻئي مرحلي ۾ وزيراعظم هائوس کي يونيورسٽي بنايو ويندو. هن اهو به ٻڌايو ته صنعتن سوڌو شعبن کي جديد بنائڻ لاءِ وزيراعظم جي سربراهي ۾ ٽاسڪ فورس قائم ڪئي وئي آهي جنهن جو وائيس چيئرمين ڊاڪٽر عطاءُالرحمان هوندو ۽ ان کي ٽيڪنالاجي ٽاسڪ فورس به چيو ويندو.