ريڊڪراس جي مدد سان ٺهرايل ٽراما سينٽر به لاڀ نه ڏئي سگھيو

ڳڙهي خيرو: عالمي سماجي اداري آءِ سي آر سي ۽ سنڌ گورنمينٽ پاران ٺهرايل ٽراما سينٽر به مريضن لاءِ بي لاڀ بڻيل آهي.عالمي اداري پاران لکين روپين جي لاڳت سان ٺهرايل ٽراما سينٽر ۽ اسپتال ۾ موجو الٽراسائونڊ مشين،اي سي جي مشين ۽ ڏندن جي چڪاس واريون مشينون ۽ ليبارٽري جو ٻيو سامان به ايم ايس ڊاڪٽر قربان لانگاھ جي بي ڌياني سبب خراب ٿيڻ لڳو آهي. اسپتال لاءِ آيل ايئرڪنڊيشنر مبينا طور ايس ايم گھر کڻائي ويو آهي. الٽراسائونڊ مشين جيڪا اڳ ۾ هفتي ۾ ٻه دفعا هلائي ويندي هئي اهو سلسلو به بند ڪيو ويو آهي..شهرين عبدالغني کوکر،عبدالمجيد لهر،نذير حسين بروهي،لياقت دايو،ظفرالله بروهي ۽ ٻين دانهيندي چيو ته عالمي سماجي اداري پاران ٺهرائي ڏنل ٽراما سينٽر کي ڊاڪٽرن پنهنجو آرام گاھ بڻائي ڇڏيو آهي.ٽراماسينٽر جيڪو هڪ جديد اسپتال هئڻ گهرجي ها کي ڊاڪٽرن رڳو ڪانفرنسن لاءِ استعمال ڪري رهيا آهن.شهرين وڌيڪ دانهيو ته بند الٽرسائونڊ کوليو وڃي،ڏندن جو ڊاڪٽر گهرائي بيڪار پيل سامان کي ڪارآمد بڻائي ماڻهن کي لاڀ ڏنو وڃي ۽ خراب اي سي جي مشين جي به مرمت ڪئي وڃي ته جيئن بي لاڀ بڻيل سامان کي لاڀائتو بڻائي شهرين کي سهولت ڏني وڃي.