رڳو جاچ تي استعيفيٰ وٺڻي آهي ته وزيراعظم کان به ورتي وڃي: مرتضيٰ وهاب

ڪراچي (م ڊ) سنڌ حڪومت جي ترجمان مرتضيٰ وهاب جو چوڻ آهي ته جيڪڏهن جاچ جي بنياد تي استعيفيٰ جو مطالبو ڪيو پيو وڃي ته تحريڪ انصاف پنهنجي وزيراعظم سميت ٻين ماڻهن کان به استعيفيٰ وٺن. نجي ٽي وي سان ڳالهائيندي مرتضيٰ وهاب جو چوڻ هو ته بلاول ڀٽو زرداري جي آءِ ٽي جي فائنڊنگز کي اڇو ڪوڙ قرار ڏنو، اسان پنهنجيون شاهديون گڏ ڪري پنهنجي بيگناهي ثابت ڪنداسين. هن چيو ته سياسي انتقام لاءِ جي آءِ ٽي جي فائنڊنگز سامهون آنديون ويون، جنهن کي عدالت کان رد ڪرائينداسين.هن چيو ته ٻٽو معيار نه هجڻ گهرجي، جاچ جي بنياد تي استعيفيٰ ڏيڻي آهي ته وزيراعظم، بچاءَ وارو وزير، ڪي پي ڪي جو وڏو وزير ۽ پنجاب جو سينيئر وزير عليم خان خلاف به نيب ۾ جاچ هلي رهي آهي، تحريڪ انصاف ۾ ايتري اخلاقي جرعت آهي ته پنهنجي پارٽي کان به استعيفيٰ جو مطالبو ڪن.