صنعتي پلاٽن جو ڪمرشل استعمال: واٽر ڪميشن سنڌ سرڪار کي پاليسي جوڙي رپورٽ پيش ڪرڻ جو حڪم ڏئي ڇڏيو

ڪراچي(ن پ ا) صنعتي پلاٽ ڪهڙي قانون تحت ڪمرشل لاءِ استعمال ڪيا پيا وڃن، وضاحت ڏني وڃي: واٽر ڪميشن سنڌ سرڪارکي هڪ مهيني اندر پاليسي رپورٽ پيش ڪرڻ ۽ نالن تان ڪمرشل جو استعمال فوري طور ختم ڪرڻ جو حڪم ڏئي ڇڏيو، ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟
سنڌ هاءِ ڪورٽ ۾ واٽر ڪميشن حيدرآباد جا صنعتي پلاٽس ڪمرشل لاءِ استعمال ڪرڻ واري معاملي جي ٻڌڻي ڪئي، جنهن دوران ايڊووڪيٽ جنرل سنڌ، ڊي جي سنڌ بلڊنگ ڪنٽرول اٿارٽي ۽ ٻيا ڪميشن آڏو پيش ٿيا.
ايڊووڪيٽ جنرل سنڌ چيو ته صنعتي پلاٽس تي ڪمرشل سرگرميون ڪيترن ئي سالن کان جاري آهن، ڪيئن ٿيون ختم ڪري سگهجن؟، فيڪٽري ۾ ڪم ڪندڙ ماڻهن لاءِ به ڪجهه ڪمرشل شيون ٺهي ويون آهن.
ڪميشن ايڊووڪيٽ جنرل سنڌ کان پڇاڻو ڪيو ته صنعتي پلاٽس ڪمرشل بنيادن تي ڪيئن ٿا استعمال ٿي سگهن، 80 سيڪڙو صنعتي پلاٽ ڪمرشل بنيادن تي استعمال ٿي رهيا آهن، نالا کي به ناهي ڇڏيو ويو.