قبو سعيد خان ۾ ٽائون چيئرمين جي مبينا ڪرپشن خلاف بک هڙتال

قبوسعيدخان (رپورٽ اصغرعلي کوسو ) قبو سعيد خان ۾ ٽائون چيئرمين جي مبينا ڪرپشن خلاف سياسي سماجي تنظيمن 304 هين ڏينهن به علامتي بک هڙتال جاري رکي. پي ٽي آءِ جي صدرالدين بروهي، ڪامريڊ عيسيٰ مگسي، نوجوان چانڊيو اتحاد جي ساگر چانڊيو، پ پ ش ڀ جي نواز علي ۽ ف ليگ جي احمد علي مگسي، جانب علي کوسو ۽ ٻين بک هڙتال دوران ٽائون ڪاميٽي جي چيئرمين خلاف نعريبازي ڪئي. ان موقعي تي مظاهرين دانهيو ته ٽائون چيئرمين غلام اصغر مگسي وڏي پئماني تي ڪرپشن ڪئي آهي، پر ڪير جاچ ڪرڻ لاءِ تيار نه آهي. هنن چيو ته هو 304 ڏينهن کان بک هڙتال تي ويٺل آهن، پر ٽائون چيئرمين جي ڪرپشن جو ڪنهن نوٽيس به ناهي ورتو، جيڪو ظلم آهي. هنن مطالبو ڪيو ته ٽائون چيئرمين خلاف ڪارروائي ڪري شهر ۾ ترقياتي ڪم ڪرايا وڃن.