همراهه ٻن مهينن کانپوءِ لاٽري ٽڪيٽ ڳولي ڪروڙ پتي بڻجي ويو

مشيگن (دلچسپ نيوز) آمريڪا ۾ هڪ همراهه ٻن مهينن جي جاکوڙ کانپوءِ هڪ ملين آمريڪي ڊالر يعني لڳ ڀڳ 14 ڪروڙ پاڪستاني روپيا حاصل ڪري ورتا. آمريڪي رياست مشيگن جو رهواسي 51 ورهين جو پيٽر ڊڪولا هڪ مشيگن لاٽري ٽڪيٽ خريد ڪئي پر کيس کٽڻ جا ڪا اميد نه هئي، جنهنڪري هن لاپرواهي ڪندي ٽڪيٽ کي گم ڪري ڇڏيو. انعام جي اعلان کانپوءِ هن گهڻو ڌيان نه ڏنو پر مقامي سطح تي لاٽري کٽندڙ جي سامهون نه اچڻ جون خبرون آيون، جنهن کانپوءِ کيس ياد آيو ته هن لاٽري ٽڪيٽ خريد ڪئي هئي. جڏهن هن فاتح لاٽري ٽڪيٽ نمبر ڏٺو ته سندس هوش خطا ٿي ويا پر هن همٿ نه هاري ۽ لڳاتار ٻن مهينن تائين ٽڪيٽ جي ڳولا ڪندو رهيو پر نيٺ کيس لاٽري ٽڪيٽ هن جي ئي ڪار مان ملي وئي، جنهن کانپوءِ هن هڪ ملين آمريڪي ڊالر جو انعام حاصل ڪري ورتو.