ڪراچي(رپورٽ: حبيب جمالي )ڪراچي ۾ ڪالاپل واري علائقي جي هزارا ۽ ريلوي ڪالوني ۾ حددخلين خلاف آپريشن جي ڪوشش، آپريشن عملي ۽ پوليس تي پٿراءُ سبب سبب عملو واپس روانو، ڇڪتاڻ سبب همراھ هيانءُ ڦاٽڻ سبب فوت ٿي ويو.
ڪالاپل ڀرسان هزارا ۽ ريلوي ڪالوني ۾ سرڪيولر ريلوي ٽريڪ تان غيرقانوني دڪان هٽائڻ لاءِ اينٽي انڪروچمينٽ عملي پوليس جي مدد سان آپريشن جي ڪوشش ڪئي ته دڪاندارن سخت مزاحمت ڪندي پوليس ۽ ڪي ايم سي جي عملي تي پٿراءُ ڪري ڏنو، چڪرين سبب ٽرئفڪ جام ٿي وئي، هزارا ڪالوني روڊ تي گاڏين جون قطارون لڳي ويون.
آپريشن جو ٻڌي هڪ دڪاندارپرويز کي دل جو دورو پيو، جنهن کي اين آءِ سي وي ڊي کڻائي ويا، جتي هن دم ڏيئي ڇڏيو. هوڏانهن مسلسل ٽن ڪلاڪن جي سخت ڇڪتاڻ بعد ايس ايس پي پيرمحمد شاهه، ايس ايس پي ريلوي شهلا قريشي ۽ ڊپٽي ڪمشنر موقعي تي پهتا، جن هزارا ڪالوني ايڪشن ڪميٽي جي اڳواڻن سان ڳالهيون ڪيون.
دڪاندار اڳواڻ زيد محمد، سجاد حسين شاهه ، راشد عباسي ۽ ٻين جو چوڻ هو ته رڳو هزارا ڪالوني ۾ 371 دڪان ۽ 3 هزار گھر آهن، 45 هزار جي لڳ ڀڳ آدمشاري آهي. اسان انتظاميه کي انڌاڌنڌ آپريشن ڪرڻ نه ڏينداسين، پنهنجي گھرن ۽ دڪانن کي بچائڻ لاءِ سخت مزاحمت ڪنداسين، پوءِ ڀلي اسان کي گرفتار ڪري ڪيس داخل ڇو نه ڪيو وڃي.
ڪراچي:ڪالا پل ۾ حددخلين خلاف آپريشن،رهواسين جي سخت مزاحمت،خوف ۾ دڪاندار فوت
هزارا ۽ريلوي ڪالوني ۾ آپريشن دوران دڪاندارن سخت مزاحمت ڪئي، پٿراءُ
چڪتاڻ سبب ٽرئفڪ جام،آپريشن جو ٻڌي دڪاندار کي دل جو دورو پئجي ويو،اسپتال ۾ دم ڏنو
ميرپور ماٿيلو:گهنٽا گهر ويجهو گهڻ ماڙ رهائشي عمارت کي باهه
شهرين پوليس ۽ رينجرز جي مدد سان باهه تي ضابطو آندو،فائر برگيڊ گاڏي دير سان پهتي
ميرپور ماٿيلو(رپورٽر)ميرپور ماٿيلو شھر جي گھنٽا گھر چوڪ ڀرسان واقع ھڪ گھڻ ماڙ رھائشي عمارت ۾ ڪپيل ڪمار نالي شھري جي فليٽ کي شارٽ سرڪٽ سبب باھ لڳي وئي, جنهن سبب گھر ۾ پيل سمورو آلھ تلھ سڙي رک ٿي ويو, فليٽ ۾ باھ لڳڻ سبب عمارت ۾ رھندڙ ماڻهن ۾ خوف ۽ حراس پکڙجي ويو ۽ سمورا رھائشي عمارت خالي ڪري محفوظ ھنڌن تي منتقل ٿي ويا، باھ جي واقعي واري اطلاع تي شھري وڏي انگ ۾ گڏ ٿي ويا ۽ انهن پوليس ۽ رينجرز سان گڏجي ڏيڍ ڪلاڪ کان پوءِ باھ تي ضابطو آندو, شھر جي مصروف علائقي ۾ باھ لڳڻ باوجود ميونسپل ڪميٽي جي فائر برگيڊ گاڏي ھڪ ڪلاڪ دير سان پھتي, جنهن به جڏھن باھ وسائڻ جي ڪوشش ڪئي ته ان جو پاڻي وارو پائيپ ڦاٽي پيو.
ڊاڪٽر جاويد نيب جي حراست ۾ فوت ناهي ٿيو، تشدد جون خبرون ڪوڙيون آهن: نيب ترجمان
لاهور(مانيٽرنگ ڊيسڪ) لاهور جي ڪيمپ جيل ۾ ڊاڪٽر جاويد ميان جي فوت ٿيڻ ۽ هٿڪڙيون لڳل لاش جي تصوير سوشل ميڊيا تي وائرل ٿيڻ کانپوءِ قومي احتساب بيورو کي سخت تنقيد جو نشانو بڻايو پيو وڃي. نيب لاهور ڊاڪٽر فوت ٿيڻ واري معاملي تي وضاحت جاري ڪئي آهي، جنهن ۾ ڄاڻايو ويو آهي ته ڊاڪٽر جايد ميان ڪيمپ جيل لاهور ۾ قيد هو، سندس جڊيشل رمانڊ ورتل هو. نيب ترجمان جو چوڻ آهي ته ڊاڪٽر جاويد جي طبيعت خراب هئڻ سبب کيس اسپتال آندو ويو، جتي دل جو دورو پوڻ سبب هن دم ڏئي ڇڏيو آهي. نيب ترجمان ڊاڪٽر جي لاش کي هٿڪڙيون لڳل هئڻ واري معاملي تي موقف اختيار ڪيو ته جڏهن به ڪنهن جوابدار کي اسپتال آندو ويو آهي ته کيس هٿڪڙيون هنيون وينديون آهن. هوڏانهن سوشل ميڊيا تي پڌري ٿيل هٿڪڙين واري تصوير تي مختلف ڌرين سان واڳيل ماڻهو تجزين سان گڏ نيب کان سوال به ڪري رهيا آهن. هڪ شهري سوال ڪيو ته جيڪڏهن ڊاڪٽر جي طبيعت خراب هئي ته کيس هٿڪڙيون ڇو هنيون ويون ۽ نيب ٻڌائي ته دنيا جي ڪهڙي ڪنڊ ۾ دل جي مرض ۾ مبتلا قيدي جو هٿڪڙيون هڻي علاج ڪيو ويندو.
لاڙڪاڻي ۾ سڱاوتي تڪرار تان ٻه ڌريون وڙهي پيون،لٺيون ۽ سرون لڳڻ سبب 6 ڄڻا زخمي
لاڙڪاڻو(بيورو رپورٽ) لاڙڪاڻي شهر جي وليد ٿاڻي جي حد منور آباد ۾ سڱاوتي تڪرار تان ڪلهوڙا برادري جي ٻن ڌرين وچ ۾ جهيڙو ٿي پيو، جنهن دوران لٺيون، سرون ۽ ٺونشا لڳڻ سبب هڪ ئي ڌر جا نديم علي، جمشيد ڪلهوڙو، عاطف ڪلهوڙو، حسيب، جنيد ڪلهوڙو ۽ ٻيا سخت زخمي ٿي پيا، جن کي چانڊڪا ميڊيڪل اسپتال جي ايمرجنسي واري وارڊ ۾ داخل ڪيو ويو ، ان موقعي تي جهيڙي ۾ زخمي ٿيلن صحافين کي ٻڌايو ته سڱاوتي تڪرار تان جوابدار شمن علي ڪلهوڙو، محمد قاسم، علي حسن، سليم ڪلهوڙو، خدا بخش ڪلهوڙو ۽ ٻين هٿياربندن اسان مٿان حملو ڪيو.
نيب حراست جي پت وائکي، ڪرپشن الزام ۾ گرفتار ڊاڪٽر فوت، لاش کي هٿڪڙيون لڳل
سرگوڌا يونيورسٽي لاهور ڪئمپس جي ڊاڪٽر ميان جاويد کي گرفتار ڪري جيل منتقل ڪيو ويو
ڊاڪٽر جيل ۾ دل بيهڻ سبب فوت، نيب عملدارن لاش کي لڳل هٿڪڙيون نھ کوليون!
سرگوڌا(مانيٽرنگ ڊيسڪ) ملڪ مان ڪرپشن جي خاتمي ۽ اداري ۾ انسانيت جي احترام جي دعويدار قومي احتساب بيورو جي پت وائکي ٿي وئي. نيب حراست ۾ هيٺ ماڻهن کي هٿڪڙيون هڻڻ جو انڪشاف ٿيو آهي.
قومي احتساب بيورو پاران ڪرپشن الزام هيٺ حراست ۾ ورتل سرگوڌا يونيورسٽي لاهور ڪئمپس جو ڊاڪٽر ميان جاويد دل جو دورو پوڻ سبب جيل ۾ ئي فوت ٿي ويو، پر نيب جي انسانيت جي احترام واري دعوائن جا پول پڌرا ڪري ويو.
دنيا جي ڪنهن به ملڪ جو قانون ڪنهن به شهري کي ڪرپشن جا الزام ثابت ٿيڻ کان اڳ گرفتاري جي اجازت نٿو ڏئي، پر پاڪستان ۾ رڳو شڪ جي بنياد تي ڊاڪٽرن ۽ استادن کي ٻڌي جيل ڀيڙو ڪرڻ عام ڳالهه آهي.
لاهورجيل ۾ نيب حراست دوران فوت ٿيل ڊاڪٽر ميان جاويد جي هڪ تصوير سوشل ميڊيا تي وائرل ٿي آهي، جنهن ۾ ڏسي سگهجي ٿو ته فوتي ڊاڪٽر جي لاش کي به هٿڪڙيون لڳل آهن..
صفائي نه هجڻ ڪري مريضن سان گڏ آيل وارث به بيمار ٿيو پون
اسپتالن جي ٻن گاڏين مان هڪ ايم ايس جي استعمال هيٺ، ٻي گم
نوابشاهه: صفاہي ء سٿراہي جو خراب انتظام ھئڻ ڪري مريض سان ايندڙ سندس خدمت گار ماہٽ چويھ ڪلاڪن جي اندر بيمار ٿي دوا وٺڻ تي مجبور ٿي وڃن ٿا مريضن کي وارڊن تائن پھچائڻ جي لاء چار لفٽون.آھن جن مان ٽي ڪافي عرصي کان خراب آھن جڏھن تہ بلاڪ ڊي جي ھڪڙي ھلندڙ آھي پر نہ ھلڻ جي برابر آھي، معياري ء ملٽي نيشنل ڪمپنين جون دوائون ضلعي جي آفيسرن ء با اثر ماڻھن کي ايل پي ڪري ڏنيون وينديون آھن جيڪي اسپتال مہ بہ داخل نہ ھوندا آھن اسپتال جي وارڊن جي مرمت يا رنگ ڪرڻ جو ٺيڪو بہ من پسند ماڻھن کي ڏنو ويندو آھي اسپتال مہ مريضن کي ٽراما سينٽر کان وارڊن مہ.شفٽ ڪرڻ جي لاء ٽوٽل 6 ايمبولينسون آھن جنھن مان ٻہ نہ ھلڻ جي برابر آھن جڏھن تہ 3 ايمبولينس بولان جيڪي مريضن کي کڻڻ بجاء پنھنجي بااثر ماڻھن جي مريضن کي ٻين اسپتالن لاء شفٽ ڪرڻ لاء رکيون ويون آھن جڏھن تہ وينٽي ليٽر واري ايمبولينس من پسند ء وي آئ پروٽوڪول مہ استعمال لاء رکي وئ آھي. جڏھن ته ٻه ڪارون پڻ اسپتال جون ملڪيت آھن انھن مان ھڪڙي ڪار ايم ايس جي استعمال مہ آھي جڏھن تہ ٻي ڪار جي خبر ناھي تہ ڪنھن جي استعمال ۾ آھي.
پيپلز ميڊيڪل يونيورسٽي اسپتال نوابشاهه ۾ اهم عهدن تي ڪلارڪ ڪم ڪرڻ لڳا، سهولتون اڻلڀ
هڪ ارب رپين کان وڌيڪ بجيٽ رکندڙ اسپتال جي انتظاميا ڪواليفائيڊ ميڊيڪل سپرنٽينڊنٽ، گزيٽيڊ آفيسر ڀرتي نه ڪري سگھي
اسپتال جي بيڊز جي حالت خراب، سِرن جي ٽيڪ تي بيٺل، مريض ويهارڻ سان کي پٽ تي ڪريو پوي، مرمت جي مد ۾ آيل ڪروڙين رپيا خرچ نه ٿيا
نوابشاهه (ڊ ر) اڳوڻي صدر آصف زرداري جي شھر ۾ قائم سرڪاري اسپتال (پيپلز ميڊيڪل يونيورسٽي، اسپتال) نواب شاھ بي لاڀ بڻيل آهي، اسپتال ۾ ڪواليفائڊ گزيٽيڊ ميڊيڪل سپرينٽنڊنٽ ء پنج گزيٽيڊ آفيسر، جن ۾ ٻه اڪائونٽنٽ ٻه سپرينڊنٽ ء ھڪ ايڊمنسٽريٽر ڪواليفائيڊ ڀرتي ڪرڻ بدارن انھن جي خالي جاين تي اسپتال جي ڪلارڪن کان ڪم ورتو پيو وڃي، ھڪ ارب رپين کان وڌيڪ سالياني بجيٽ رکندڙ اسپتال بنيادي سھولتن کان محروم آھي. نئين ٺھيل ٽراما سينٽر کي اسپتال انتظاميا وارڊن ۾ تبديل ڪري ڇڏيو آھي. جنھن ۾ آپريشن ٿيٽر، آهي نه ايمرجنسي ڪارڊيو . اسپتال ۾ ايندڙ مريض آءِ سي يو جي سھولتن کان به محروم آھن. ڳڻتي جوڳي حالت وارا مريض آءِ سي يو، دل جي مرض واري وارڊ ء آپريشن ٿيٽر تائين پھچڻ لاء ٽراما سينٽر کان منتقل ٿين ٿا، جنهن دوران ڪيترائي مريض دم ڌڻي حوالي ڪيو ڇڏين، اھڙيون شڪايتون اسپتال انتظاميا کي ڏنيو ويون پر ٽراما سينٽر۾ اڄ ڏينھن تائين سهولتون نه ڏئ سگھيي آهي. اسپتال ۾ پيراميڊيڪل اسٽاف ميل ء في ميل ء لوئر اسٽاف کي گڏائي 2000 کان وڌيڪ ملازم ڀرتي ٿيل آھن جڏھن ته رجسٽرار ء ھائوس جاب ڪندڙ ڊاڪٽرن جو انگ 300 کان وڌيڪ آھي. مختلف بيمارين لاء اسپتال ۾ چار بلاڪ قائم ڪيا ويا آھن ھر بلاڪ ٽه ماڙ آھي ء ٽوٽل چار بلاڪ آھن ء ھر بلاڪ ۾ ٽي وارڊ آھن انھن وارڊن ۾ ڪل 879 بسترا آھن. اسپتال ۾ رکيل بيڊ اھڙا آھن جو مريض کي سمھاريو وڃي ته مريض پٽ تي ڪريو پوي، ڀڳل ٽٽل بيڊ جي ھيٺان سرون رکي مريضن کي سمھاريو ويندو آھي جڏھن ته مرمت جي مد ۾ ڪروڙين روپيا اسپتال جي بجيٽ آھي پر انھن بيڊن جي مرمت نٿي ڪرائي وڃي. هوڏانهن مريضن کي ملندڙ کاڌو غير معياري ھوندو آھي جنھن ڏينھن ڪنھن صحت کاتي جي آفيسر جي آمد جو اطلاع ملندو آھي ته انھي ڏينھن مرغي مريضن کي نصيب ٿيندي آھي جڏھن ته اسپتال جي ڪچن جو خرچ روزانو لکين روپيا ۾ آھي. مريضن کي اسپتال ۾ ملندڙ دوائن جي بجيٽ ڪروڙن ۾ آھي پر مريضن کي ملٽي نيشنل ڪمپنين جي دوائن بدران لوڪل ڪمپنين کان سستي اگھ مہ دوائون وٺي مريضن کي خوش ڪرڻ جي ڪوشش ڪندا آھن سال جي آخر ۾ مريضن کي اھي به.دوائون ڪونہ ٿيون ملن ايتري قدر جو انجيڪشن واري سرنج بہ مريض جا وارث بہ ٻاھران پرائويٽ ميڊيڪل اسٽورن تان خريد ڪندا آھن.
ڪراچي ۾ ڪارروائي، ڪالعدم تنظيم جا 2 اهم ڪمانڊر گرفتار
ڪراچي(اسٽاف رپورٽر) ڪراچي جي علائقي بهادر آباد ۾ پوليس ڪارروائي ڪري ڪالعدم تنظيم سان واسطو رکندڙ 2 دهشتگردن کي گرفتار ڪري ورتو. پوليس موجب، بهادر آباد ۾ ڳجهي اطلاع تي ڪارروائي ڪئي وئي، جنهن دوران تحريڪ طالبان سوات گروپ سان واسطو رکندڙ ٻن دهشتگردن صابر ۽ رحمت علي کي گرفتار ڪيو ويو. پوليس دعويٰ ڪئي آهي ته دهشتگرد پوليس چوڪي کي ڌماڪي سان اڏائڻ سميت ٻين دهشتگرد ڪاررواين ۾ ملوث آهن، جن جي قبضي مان هٿيار به هٿ ڪيا ويا آهن.
ايف آءِ اي جي جاچ تي ڀروسو ناهي، جي آءِ ٽي سربراهه زرداري جو ڏوهي آهي: سعيد غني
ڪراچي(اسٽاف رپورٽر) مڪاني ادارن واري صوبائي وزير سعيد غني مني لانڊرنگ ڪيس جي جي آءِ ٽي سربراهه کي فوري طور هٽائڻ جو مطالبو ڪندي چيو آهي ته جي آءِ ٽي سربراهه آصف زرداري جو ڏوهي آهي، تڪراري شخص جي سربراهي ۾ ٿيندڙ جاچ ڪيئن شفاف ٿي سگهي ٿي؟. ڪراچي ۾ پريس ڪانفرنس ڪندي سعيد غني چيو ته پ پ جنهن ايف آءِ اي سربراهه تي بي اعتمادي ظاهر ڪئي، انهيءَ آفيسر جي اماڻيل نالن تي جي آءِ ٽي جوڙي وئي. سعيد غني چيو ته عام چونڊن دوران سموري آفيسرن کي هٽايو ويو پر ڊي جي ايف آءِ اي بشير ميمڻ کي نه هٽائڻ سمجهه کان ٻاهر هو. سعيد غني سوال ڪيو ته اصغر خان ڪيس ۾ ڪهڙي اڳڀرائي ٿي آهي، لڳي ٿو ته جي آءِ ٽي سربراهه کي نه هٽائڻ جو مقصد کانئس جعلي اڪائونٽس ڪيس جي جاچ ڪرائڻ هئي. هن چيو ته وزير اعظم جي صلاحڪار شهزاد اڪبر جي ڊي جي ايف آءِ ۽ ٻين سان ملاقات مان لڳي ٿو ته اهو سڀ حڪومت جي چوڻ تي ٿيو آهي.
حڪومت ۽ نيب جو ڳٺ جوڙ آهي، پ پ کي سيف الرحماني احتساب جو نشانو بڻايو پيو وڃي: بلاول جو ترجمان
وزير اعظم جي صلاحڪار جي جَي آءِ ٽي ميمبرز سان ملاقات ۽ هٿ ٺوڪين شاهدن کي گهرائڻ معنيٰ رکندڙ آهي: مصطفيٰ کوکر
سمجهه ۾ اچي ويو ته وزيرن جا بيان ئي نيب ۽ ايف آءِ اي جي جاچ جو بنياد آهي، موجوده ڪاررواين کي احتساب نٿو چئي سگهجي : جاري ڪيل بيان
ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري جي ترجمان مصطفيٰ نواز کوکر چيو آهي ته حڪومت، نيب ۽ ايف آءِ اي جو ڳٺ جوڙ آهي، پ پ کي هڪ ڀيرو ٻيهر سيف الرحماني احتساب جو نشانو بڻايو پيو وڃي. ڪراچي مان جاري ڪيل بيان ۾ بلاول جي ترجمان چيو ته وزير اعظم جي صلاحڪار جي جَي آءِ ٽي ميمبرز سان ملاقات ۽ هٿ ٺوڪين شاهدن کي گهرائڻ معنيٰ رکندڙ آهي. هن چيو ته سمجهه ۾ اچي ويو ته وزيرن جا بيان ئي نيب ۽ ايف آءِ اي جي جاچ جو بنياد آهي، موجوده ڪاررواين کي احتساب نٿو چئي سگهجي. هن چيو ته سليڪٽيڊ وزير اعظم ۽ سندس ٽيم کي ڄيڪو وڻي ڪري، پ پ ميدان ۾ مقابلو ڪندي. بلاول جي ترجمان وڌيڪ چيو ته پ پ قيادت خلاف ميڊيا تي ڪوڙيون ڪهاڻيون نشر ڪرائڻ وفاقي وزيرن جو ڪارنامو آهي.
وفاق جي سنڌ ۾ رڳو 6 لک 60 هزار بيروزگار هجڻ جي دعويٰ
2016 کان 2018 تائين ملڪ ۾ بيروزگار ماڻهن جو تعداد با بت انگ اکر جاري نھ ڪيا ويا
اسلام آباد (بيورو رپورٽ) وفاقي حڪومت سينيٽ ۾ ملڪ اندر صوبي وار بيروزگارن بابت ويهن سالن جي سروي جا تفصيل پيش ڪري ڇڏيا آهن. سروي رپورٽ ۾ وفاقي حڪومت دعوي ڪئي آهي ته سال 2015 ع ۾ سنڌ صوبي اندر بيروزگارن جو ڪل تعداد 6 لک 60 هزار هو. تفصيل موجب مسلم ليگ (ن) جي سينيٽر چوڌري تنوير جي سوال جو لکت ۾ جواب ڏيندي شماريات جي وزارت پاران سينيٽ ۾ 1991ع کان 2015ع تائين بيروزگارن بابت ڪيل سروي جا صوبي وار تفصيل پيش ڪيا آهن. ڄاڻايل وزارت پاران لکت ۾ سينيٽ کي آگاھ ڪيو ويو آهي ته سنڌ صوبي ۾1991ع ۾ بيروزگارن جو تعداد 2 لک پنجاھ هزار، 1992ع ۾ 2 لک 70 هزار، 1993ع ۾ سنڌ ۾ بيروزگارن جو تعداد گھٽجي 1 لک 90 هزار تي پهتو. 1994ع ۾ سنڌ صوبي اندر بيروزگارن جو تعداد 2 لک 30 هزار، 1995 ۾ هڪ ڀيرو ٻيهر سنڌ ۾ بيروزگارن جو انگ گھٽجي 2 لک 10 هزار تي پهتو. جڏهن ته ڄاڻايل وزارت پاران 1996ع جا تفصيل نه ڄاڻايا ويا آهن. 1997ع ۾ سنڌ اند صرف 2 لک 20 هزار، 1998ع ۽ 2000ع ۾ ٿيل سروي موجب سنڌ اند ڪل بيروزگارن جو تعداد 2 لک 40 هزار، جڏهن ته 2002ع ۾ ٿيل سروي موجب بيروزگارن جو تعداد 4 لک 80 هزار، 2004ع جي سروي موجب سنڌ ۾ بيروزگارن جو تعداد 6 لک 10 هزار، 2006ع ۾ 5 لک 10 هزار، 2007ع ۾ 4 لک، 2008ع ۾ 3 لک 90 هزار، 2009ع ۾ 4 لک 40 هزار، 2010ع ۾ 5 لک 60 هزار، 2011ع ۾ 7 لک، 2013ع ۾ 7 لک 70 هزار، 2014ع ۾ 5 لک 80 هزار. سال 2015ع سنڌ صوبي اندر بيروزگارن جو ڪل تعداد صرف 6 لک 60 هزار هجڻ جي دعوي ڪئي وئي آهي. لکت ۾ ٻڌايو ويو آهي ته 2015ع کانپوءِ 2017ع ۾ ملڪ اندر بيروزگارن بابت ليبر سروي ڪئي وئي آهي جنهن جي رپورٽ کي مرتن ڪيو پيو وڃي. سينيٽ ۾ ڏنل جواب موجب، ملڪ ۾ بيروزگارن بابت ٿيل آخري سروي 2015ع موجب ملڪ اندر مجموعي طور تي بيروزگارن جو انگ 36 لک 20 هزار هو جن ۾ ڪي پي ڪي صوبي ۾ بيروزگارن جو تعداد 5 لک 10 هزار، پنجاب ۾ 23 لک 20 هزار، بلوچستان ۾ 1 لک 30 هزار بيروزگار هئا..
واٽر ڪميشن جو سکر ۾ واٽر سپلاءِ ۽ ڊرينيج اسڪيمون پبلڪ هيلٿ انجنيئرنگ کاتي کي منتقل ڪرڻ جو حڪم
هاڻي ڪو بهانو نه هلندو، ملازمن جي بدلين تي عمل ڪيو وڃي: امير هاني مسلم
واٽرسپلاءِ ۽ ڊرينيج اسڪيمن جي پبلڪ هيلٿ انجنيئرنگ کاتي ڏانهن منتقل ڪيو وڃي
سکر (رپورٽر) سنڌ واٽر ڪميشن جي سربراهه جسٽس رٽائرڊ امير هاني مسلم چيو آهي ته واٽرسپلاءِ ۽ ڊرينيج اسڪيمن جي پبلڪ هيلٿ انجنيئرنگ کاتي ڏانهن منتقلي ۽ ملازمن جي بدلي وارين هدايتن تي عمل ڪيو وڃي، ڪو به بهانو نه هلندو، اسڪيمن تي ڊيوٽي جوائن نه ڪندڙ ملازمن کي گهر وڃڻو پوندو ۽ کين ٽرمينيٽ ڪيو ويندو.
واٽر ڪميشن جي سربراهه اهڙيون هدايتون ڊي سي آفيس سکر ۾ سکر ۽ لاڙڪاڻو ڊويزنن جي اعليٰ انتظامي، لوڪل گورنمينٽ، پبلڪ هيلٿ انجنيئرنگ ۽ ٻين لاڳاپيل آفيسرن سان گڏجاڻي جي صدارت دوران ڪيون، جنهن ۾ سيڪريٽري پبلڪ هيلٿ انجنيئرنگ اينڊ رورل ڊولپمينٽ ڊپارٽمينٽ جمال مصطفيٰ سيد، سيڪريٽري لوڪل گورنمينٽ خالد حيدرشاهه ۽ ڪمشنر سکر/لاڙڪاڻو ڊويزن رفيق احمد ٻرڙو سميت سمورن ضلعن جي ڊي سيز، ايگزيڪيوٽو انجنيئرز پبلڪ هيلٿ، لوڪل گورنمينٽ آفيسرن، ميئر سکر بيريسٽر ارسلان اسلام شيخ، ميئر لاڙڪاڻو اسلم شيخ ۽ ٻيا شريڪ ٿيا.
اجلاس کي خطاب ڪندي امير هاني مسلم چيو ته آئوٽ سورسنگ خريداري ۾ ميونسپل کي فري هينڊ نه ڏينداسين، جيڪا به خريداري ٿيندي اُها ضلعي انتظاميه جي رضامنديءَ سان ڪئي ويندي ۽ زون وائيز آئوٽ سورسنگ ٿيندي ته جيئن بهتر نموني وجيلنس ٿي سگهي، هن چيو ته هو تمام جلد بخشاپور ويندو ۽ واٽرسپلاءِ اسڪيم جي غلط پلاننگ ۽ ڊزائننگ ڪندڙن جو حساب ڪتاب ٿيندو، ذميوار ماڻهن کان پئسا ڀرايا ويندا، جڏهن ته ٺل ۾ ڪروڙين رپيا ضايع ڪرڻ وارو معاملو نيب ڏانهن اماڻيو ويندو.
واٽرڪميشن جي چيئرمين ميئر سکر کان پڇاڻو ڪيو ته شهرين کي گندو پاڻي ٽريٽ ڪري پيئارڻ کان بهتر آهي ته پهريان اپ اسٽريم ۾ گندي پاڻي جو ڇوڙ روڪيو وڃي، اهڙي ڪا اسڪيم هن وقت تائين ڇونه ٺاهي وئي.
هن وڌيڪ چيو ته مرحليوار عمل وارو تاثر ختم ڪري ڇڏيو، ڌار نوٽيفڪيشن جي ضرورت ناهي، اسٽاف جِي منتقلي ۾ لوڪل گورنمينٽ پابند آهي، جيڪو ملازم اسڪيم تي ڪم نه ڪندو اُهو گهر ويندو ۽ اُن کي ٽرمينيٽ ڪيو ويندو. ميونسپلز ۾ 2-2 سئو ڪلارڪ آهن، جن جي جڳهه به ناهي اهي گهر ويٺي پگهارون جو مزو ماڻي رهيا آهن، اوور اسٽاف کي سرپلس پول ۾ وجهي استعمال هيٺ آڻڻو آهي
ڪراچي: حد دخلين خلاف ڪارروائي دوران مزاحمت، آپريشن روڪيو ويو پوليس اھلڪار واپس روانا
ڪالاپل ويجهو پوليس ۽ دڪاندارن وچ ۾ چڪريون، اهلڪارن تي پٿراءُ به ڪيو ويو
آپريشن سرڪلر ريلوي جو ٽريڪ خالي ڪرڻ لاءِ ڪيو ويو هو
ڪراچي(م ڊ ) ڪراچي ۾ سرڪلر ريلوي جو ٽريڪ خالي ڪرائڻ لاءِ ڪيل آپريشن سخت مزاحمت سبب روڪيو ويو، رهواسين ۽ دڪاندانن سان چڪرين دوران اهلڪارن تي پٿراءُ ڪيو ويو.
ڪالا پل ويجهو هزاره ڪالوني ۽ ڀرپاسي وارن هنڌن تان حد دخليون هٽائڻ لاءِ شهري انتظاميه پوليس جي مدد سان آپريشن شروع ڪيو ته کين سخت مزاحمت کي منهن ڏيڻو پيو.
حد دخلين خلاف آپريشن دوران پوليس سان دڪاندارن ۽ رهواسين جون چڪريون ٿيون، ان موقعي تي مڇريل ماڻهن اهلڪارن تي پٿراءُ به ڪيو، ڇڪتاڻ تيز ٿي وڃڻ جي نتيجي ۾ انتظاميه کي آپريشن روڪڻو پئجي ويو ۽ پوليس اهلڪارن سميت آپريشن دوران مقرر سموري عملي کي واپس سڏايو ويو، واضح رهي ته حد دخلين خلاف آپريشن سرڪلر ريلوي جو ٽريڪ خالي ڪرڻ لاءِ ڪيو ويو هو
ڊکڻ: معصوم نينگر مڇي جي تلاءُ ۾ ٻڏي فوت ٿي ويو
ڊکڻ (رپورٽر) معصوم نينگر مڇي جي تلاءُ ۾ ٻڏي فوت ٿي ويو، ڳوٺ ابن اوڍو ۾ 3ورهين جو معصوم نينگر ياسين اوڍو گهرن ٻاهران راند ڪندي مڇي جي تلاءُ ۾ ڪري پيو، واقعي واري هنڌ موجود ماڻهن نينگر کي ٻاهر ڪڍي نازڪ حالت ۾ اسپتال پهچائڻ جي ڪوشش ڪئي پر هن رستي ۾ ئي دم ڏنو.
نينگر جو لاش گهر پهچڻ تي ڪهرام مچي ويو ۽ علائقي ۾ سوک پکڙجي ويو، فوتي نينگر رتوديرو جو رهواسي هو، جيڪو مائٽن سان گڏ گهمڻ لاءِ ڊکڻ آيو هو.
آرمي چيف 14 دهشتگردن کي موت جي سزا جي منظوري ڏئي ڇڏي
انهن دهشتگردن جي ڪاررواين ۾ 13 فوجي ۽ 3 عام شهري شهيد ٿيا: آءِ ايس پي آر
فوجي عدالتن طرفان وڌيڪ 20 دهشتگردن کي به قيد جي سزا ڏني وئي
راولپنڊي ( م ڊ ) آرمي چيف فوجي جوانن ۽ عام شهرين کي نشانو بڻائيندڙ 14 دهشتگردن جي موت جي سزا جي منظوري ڏئي ڇڏي، آءِ ايس پي آر موجب موت جي سزا ماڻيندڙ دهشتگرد سنگين ڪاررواين ۾ ملوث هئا، جن ۾ 16 ڄڻا شهيد ٿي ويا، انهن دهشتگردن جو نشانو بڻجندڙن ۾ 13 فوجي ۽ 3 عام شهري شامل آهن، آءِ ايس پي آر جو چوڻ هو ته سزا ماڻيندڙ دهشتگردن مواصلات جي نظام، پوليس اسٽيشنز ۽ ادارن کي به تباهه ڪيو، انهن وٽان هٿيار ۽ ڌماڪيدار مادو به هٿ آيو هو، آءِ ايس پي آر موجب فوجي عدالتن طرفان وڌيڪ 20 دهشتگردن کي به قيد جي سزا ٻڌائي وئي