سنڌ مان مني لانڊرنگ ۾ وڏو گند نڪتو، مراد علي شاهه کي استعيفا ڏيڻ گهرجي:شيخ رشيد
پ پ ۾ فارورڊ بلاڪ ٺهي پيو، (فيصل واوڊا) اي سي ايل ۾ نالا وجهڻ ايگزيڪيوٽو جو فيصلو آهي عدليا جو نه:فواد چوڌري
لاهور/ ڪراچي (م ڊ) وفاقي وزير وڏي وزير مراد علي شاهه کان استعيفيٰ جو مطالبو ڪري ڇڏيو، سنڌ ۾ جلد فارورڊ بلاڪ ٺهڻ جي دعويٰ، لاهور ۾ ريلوي واري وفاقي وزير شيخ رشيد فيصل واوڊا سان گڏ پريس ڪانفرنس دوران اهم مطالبو ڪيو، شيخ رشيد چيو آهي ته ڪو شرم هوندو آهي، ڪو حيا هوندو آهي، مراد علي شاهه کي هاڻي استعيفيٰ ڏيڻ گهرجي، ايترو وڏو گند نڪتو آهي، ايترو بدبودار مواد نڪتو آهي جو شهيد ذوالفقار علي ڀٽو جي مزار به اڄ ڳوڙها ڳاڙي رهي آهي، هن چيو ته هنن چورن کي 7 سال سزا ملي، اسانجي ڪرپشن ثابت ٿئي ته 14 سال سزا ملڻ گهرجي، اسان چاهيون ته هر ان شخص جي جاچ ٿيڻ گهرجن جا احتساب عدالت ۾ ڪيس آهن، هن چيو ته بلاول جي تقرير تي گهڻو پريشان آهيان، منهنجو خيال هو ته هو وڏو ٿي ويو آهي پيءُ جي پچ تي نه کيڏندو، پيءُ جي سياست جي واٽ نه وٺندو پر آصف زرداري پٽ کي استعمال ڪري رهيو آهي، هن چيو ته آصف زرداري جو ته جيل ٻيو گهر آهي، هن جي ڏوهن ۾ پي ايڇ ڊي ٿيل آهي، زرداري جا پوري دنيا جي ڏوهارين سان رابطا آهن، اها ڳالهه آئون ذميواري سان چوان ٿو پر آصف زرداري بلاول کي استعمال پيو ڪري، جنهن تي افسوس آهي، شيخ رشيد چيو ته هنن ملڪ لٽيو آهي، هر طرف بک ۽ بدحالي آهي، ان موقعي تي فيصل واوڊ ڳالهائيندي چيو ته پيپلزپارٽي ۾ فارورڊ بلاڪ ٺهي سگهي ٿو، ماڻهو رابطي ۾ آهن، هن چيو ته نوازشريف عدليا ۽ فوج کي بدنام ڪيو، نواز مودي جو وڏو دوست آهي، ايل او سي تي فائرنگ ۾ به نوازشريف ملوث هو، ڊان ليڪس ياد آهي، هن ڪراچي ۾ امن امان جي صورتحال تي ڳالهائيندي چيو ته علي رضا عابدي جي واقعي تي افسوس آهي، ڪراچي ۾ امن امن کي هر صورت ۾ يقيني بڻايو ويندو، دهشتگرن کي انجام تائين پهچائينداسين. هن چيو ته ڪراچي ۾ ڪجهه ماڻهن کي واڇ ڪري ٻيهر اٿارڻ جي ڪوشش ڪئي وئي پر اها ناڪام ٿي، شهر جو امن خراب ٿيڻ نه ڏنو ويندو، هوڏانهن سڌ سماءَ واري وفاقي وزير فواد چوڌري چيو آهي ته نواز ۽ زرداري جي ڪرپشن جو ڪاٿو تمام وڏو آهي، هنن حڪومتي اختيارن کي غلط استعمال ڪري پئسا ٺاهيا ويا، وفاقي وزير فواد چوڌري هڪ نجي ٽي وي چينل سان ڳالهه ٻولهه ڪندي چيو ته ي سي ايل ۾ نالو شامل ڪرڻ ايگزيڪٽو جو فيصلو آهي، عدليا جو نه، نالا اي سي ايل ۾ شامل ڪرڻ جي سفارش رڳو ايف آءِ اي نه پر جي آءِ ٽي جي آهي، گهرو وزارت جي ذريعي ايجنسي نالا اي سي ايل ۾ شامل ڪرڻ جي سفارش ڪئي، هن چيو ته انويسٽيگيشن ايجنسيون فيصلو ڪنديون آهن ته نالو اي سي ايل ۾ شامل ڪرڻو آهي يا نه، هن چيو ته پي ٽي آءِ اڳواڻن خلاف نيب جا وڏا ڪيس ناهن، ٻن وزيرن الزام تي استعيفيٰ ڏئي ڇڏي.
وفاقي ڪابينا پاران جي آءِ ٽي طرفان مني لانڊرنگ معاملن ۾ شامل ڄاڻايل ماڻهن جي پرڏيهه وڃڻ تي پابندي جي منظوري
جي آءِ ٽي کي غيرسنجيدا وٺندڙ آصف زرداري کي جلد احساس ٿيندو، هي پراڻو پاڪستان ناهي: فواد چوڌري
اسلام آباد (رپورٽ: ايم بي سومرو) وفاقي ڪابينا پ پ جي چيئرمين بلاول ڀٽو، اڳوڻي صدر آصف زرداري، فريال ٽالپور، سنڌ جي وڏي وزير سيد مراد علي شاھ ۽ انور مجيد سوڌو مني لانڊرنگ بابت جوڙيل جي آءِ ٽي رپورٽ ۾ شامل 172 ڄڻن جا نالا اِي سي ايل ۾ شامل ڪري سندس پرڏيهه وڃڻ تي پابندي لاڳو ڪرڻ جي منظوري ڏئي ڇڏي آهي. وزيراعظم عمران خان جي صدارت ۾ خميس ڏينهن ٿيل وفاقي ڪابينا جي اجلاس ۾ اهم فيصلو ڪيو ويو آهي. اجلاس ۾ 20 نڪاتي ايجنڊا تي غور ڪيو ويو. اجلاس دوران ڪراچي ۾ ٽارگيٽ ڪري قتل ڪيل ايم ڪيو ايم جي اڳوڻي اڳواڻ علي رضا عابدي جي مغفرت لاءِ دعا ڪئي وئي، جڏهن ته وفاقي وزير نورالحق قادري جي والد جي وفات تي ڏک جو اظهار ڪيو ويو. وفاقي ڪابينا جي اجلاس ۾ ڪيل فيصلن بابت پريس ڪانفرنس ڪندي سڌ سماءُ جي وفاقي وزير فواد حسين چوڌري چيو ته سپريم ڪورٽ ۾ مني لانڊرنگ بابت رپورٽ پيش ڪئي وئي آهي. جي آءِ ٽي رپورٽ ۾ هوش اڏائيندڙ انڪشاف ڪيا ويا آهن ته پوري صوبي کي يرغمال بڻائي سنڌ حڪومت کي مني لانڊرنگ ۾ استعمال ڪيو ويو. وفاقي ڪابينا ان تي غور ڪرڻ بعد آصف زرداري، فريال ٽالپور، مراد علي شاھ سميت جي آءِ ٽي رپورٽ ۾ جن 172 ڄڻن جا نالا شامل آهن، انهن جا نالا اِي سي ايل ۾ شامل ڪرڻ جو فيصلو ڪيو ويو آهي. هن چيو ته آصف زرداري چيو هو ته مان جي آءِ ٽي کي سنجيدگي سان نه ٿو وٺان. اميد آهي ته هاڻي جي آءِ ٽي کي سنجيده وٺندو. هي پراڻو پاڪستان نه آهي جو سوديبازي ٿئي، هي نئون پاڪستان آهي هت قومي خزاني جي هڪ هڪ روپئي جو حساب ٿيندو. ملڪ ۾ احتساب بنا خوف ۽ خطري جي جاري رهندو. جن کي احتساب بابت سنجيدگيءَ جو احساس نه ٿو ٿئي اهو ڪجهه ڏينهن اندر ٿي ويندو. ڪجهه ماڻهن کي ته احساس ٿي ويو آهي، هو ظاهري طور کلي رهيا آهن. هن چيو ته وفاقي ڪابينا ايف آءِ جي ڪارڪردگي جي تعريف ڪئي. وزيراعظم جي آءِ ٽي ۽ ٻين معاملن ۾ ايف آءِ اي پاران ڏيکاريل ڪارڪردگي جي تعريف ڪئي. هن پيپلز پارٽيءَ جي احتجاج ڪرڻ بابت سوال جي جواب ۾ چيو ته حيران آهيان ته سنڌ جا پئسا انور مجيد ۽ هنن لٽيا، انهن پئسن کي بچائڻ لاءِ سنڌ جي انهن ماڻهن کي روڊن تي نڪرڻ لاءِ چئي رهيا آهن جن جو پئسو هنن لٽيو آهي. هن چيو ته ذوالفقار علي ڀٽو ۽ بينظير ڀٽو جي پيپلز پارٽي جو آصف زرداري جي پيپلز پارٽي سان ڪو تعلق نه آهي. 1970 ۾ ذوالفقار علي ڀٽي ته غريبن کي حق ڏيارڻ لاءِ پارٽي ٺاهي هئي، هاڻي آصف زرداري جي پارٽي ۾ ته عجيب ۽ غريب ماڻهو آهن. آصف زرداري جي پارٽي وارا ته هارين کي ٽريڪٽر ۽ ڀاڻ تي مليل سبسڊي جا پئسا به کائي ويا. هنن جو ذوالفقار علي ڀٽو ۽ بينظير ڀٽو جي پارٽي سان سطحي تعلق آهي. ڇا 31 ڊسمبر تي آصف زرداري گرفتار ٿيندو جي سوال جي جواب ۾ هن چيو ته الله ڪري ائين ئي ٿئي، پر اسان ڇا چئي سگھون ٿا، اسان کي ڪهڙي خبر آهي. هن سنڌ ۾ گورنر راڄ بابت پڇيل سوال جي جواب ۾ چيو ته سنڌ هجي يا پنجاب، بلوچستان هجي يا ڪي پي ڪي جي حڪومت اسان سڀ آئين جا پابند آهيون ۽ ڪابه حڪومت آئين جي خلاف ورزي نه ٿي ڪري سگھي. اميد آهي ته اهڙو موقعو نه ايندو. هن ٻڌايو ته وفاقي ڪابينا جي اجلاس ۾ ڪراچي جي صورتحال تي به غور ڪيو ويو. ڪراچي ۾ اچانڪ صورتحال خراب ٿي آهي. علي رضا عابدي قتل ٿيو ۽ اهڙا واقعا ٿيا آهن جن مان لڳي ٿو ته گينگ ٻيهر سرگرم ٿي رهيا آهن. هن چيو ته ڪراچي جو امن معيشت سان واڳيل آهي. ڪراچي جو امن خراب ڪرڻ جي ڪنهن کي اجازت نه ڏينداسين. هن چيو ته الطاف حسين برطانيا ۾ ويهي هت ماڻهن کي قتل ڪرڻ جا حڪم ڏيڻ جهڙيون تقريرون ڪيون، پر برطانيا حڪومت سندس خلاف ڪاروائي نه ڪئي آهي جنهن تي وفاقي ڪابينا ڳڻتي جو اظهار ڪيو آهي. فيصلو ڪيو ويو آهي ته وفاقي حڪومت برطانيا جي حڪومت اڳيان اهو مامرو اٿاريندي. وفاقي وزير چيو ته ڏکڻ آفريڪا جا گينگ ڪراچي ۾ متحرڪ آهن، ڏکڻ آفريڪا جي حڪومت اڳيان معاملو اٿارڻ لاءِ وفاقي ڪابينا پرڏيهي وزارت کي حڪم ڏنو آهي. انهي ملڪ جي زمين پاڪستان ۾ دهشتگردي لاءِ استعمال ٿي رهي آهي. وفاقي ڪابينا ڪراچي ۽ اسلام آباد ۾ لڳل سيڪيورٽي ڪئمرائن واري معاملي تي غور ڪيو. ڪراچي ۾ اڪثر ڪئمرائون ڪم نه ڪري رهيو آهن. ٻنهي شهرن ۾ ان مد ۾ ڪروڙين روپيا خرچ ٿيا آهن. وفاقي ڪابينا گھرو وزارت کي جانچ جو حڪم ڏنو آهي. وفاقي ڪابينا 15 جنوري بعد به موبائل رجسٽريشن ڪرائڻ جي منظوري ڏني آهي، پر 15 جنوري بعد موبائل رجسٽريشن ڪرائيندڙن کي 10 سيڪڙو ڪسٽم ڊيوٽي ادا ڪرڻي پوندي. هن چيو ته اسان موبائل امپورٽ ڪرڻ جي دلشڪني ڪرڻ چاهيون ٿا. وفاقي ڪابينا اتر وزيرستان ۽ مڪران ۾ موبائل سروس فراهم ڪرڻ جي به منظوري ڏني آهي. ڪابينا نيپرا چيئرمين جي سروس اسٽرڪچر جي به منظوري ڏني آهي. وفاقي ڪابينا چين جي مارڪيٽ ۾ بانڊ جاري ڪرڻ، فرخ سبزواري کي ايس اِي سي پي جو نئون چيئرمين مقرر ڪرڻ، اسٽيل مل ۽ ايف آءِ اي کي ضمني بجيٽ ڏيڻ جي به منظوري ڏني آهي. هن چيو ته اسٽيل مل جون 2019 تائين جون رهتون ادا ڪيون وينديون. گذريل حڪومتن اسٽيل مل جو ٻيڙو ٻوڙيو، هاڻي اسٽيل مل هلندي. هن هڪ سوال جي جواب ۾ چيو ته پارليامينٽ ۾ اسان اڪثريت ۾ آهيون. قانونسازي ۾ ڪا ڏکيائي ڪانهي، پيپلز پارٽي ۽ ن ليگ جا ميمبر به اسان جي سپورٽ ڪندا ڇو جو اهي ڪنهن جي لٽ مار ۾ ڇو حصو ٿيندا.
واردات ۾ استعمال ٿيل 30بور جو پستول احتشام جي قتل ۾ به ڪتب آيو ھو: فارنزڪ رپورٽ
گارڊ ۽ عابدي جي پيءُ جي بيانن ۾ تضاد، وڏي وزير کي ڪراچي صورتحال تي ڳڻتي آءِ جي کي سيڪيورٽي انتظام بھتر ڪرڻ جي ھدايت
ڪراچي (رپورٽ: حبيب جمالي)ڪراچي ۾ قتل ٿيل اڳوڻي ايم اين اي علي رضا عابدي جو قتل ڪيس سندس پيءُ جي مدعيت ۾ ٻن جوابدارن مٿان داخل ڪيو ويو آهي،فرانزڪ رپورٽ ۾ چيو ويو آهي ته قتل ڪيس ۾ استعمال ٿيل پسٽل قائد آباد ۾ قتل ٿيل احتشام جي واردات ۾ به استعال ڪيو ويو هو،ان ڏس ۾ ڊفينس جي خيابان غازي ۾ پنهنجي گھر اڳيان هٿياربندن هٿان قتل ٿيل اڳوڻي ايم اين اي علي رضا عابدي جي جنازي نماز امام بارگاهه يثرب ۾ ادا ڪئي وئي. جنازي نماز علامه حسن نقوي پڙهائي. جڏهن ته جنازي نماز ۾ فاروق ستار سميت ايم ڪيو ايم، مهاجر اتحاد. ايم ڪيو ايم حقيقي، پي ايس پي ۽ ٻين سياسي سماجي اڳواڻن ۽ شهرين وڏي انگ ۾ شرڪت ڪئي.
جنازي نماز بعد سندس مڙهه کي ڊفينس جي قبرستان ۾ مٽي ماءُ حوالي ڪيو ويو. علي رضا عابدي جي آخري رسمن دوران انتهائي جذباتي منظر هئا. ڪارڪن سندس رت سان انصاف لاءِ نعريٰ هڻندا رهيا.ٻئي طرف پوليس علي رضا عابدي جي گارڊ کي شڪ جي بنياد تي گرفتار ڪري ورتو. ايس ايس پي پير محمد شاهه موجب گارڊ قدير فائرنگ جي جواب ۾ ڪا ڪارروائي ڪرڻ بدران گهر اندر ويو ۽ علي رضا عابدي جي والد کان هٿيار گهريو.
گارڊ قدير جو واسطو ڊيرا غازي خان سان آهي ۽ هو ڏيڍ مهينو اڳ علي رضا عابدي جي گهر گارڊ طور مقرر ٿيو هو. کانئس واقعي بابت پڇاڳاڇا ڪئي پئي وڃي. ٻئي طرف تدفين بعد علي رضا عابدي جو قتل ڪيس سندس والد اخلاق عابدي جي فرياد تي ٻن نامعلوم جوابدارن خلاف داخل ڪيو ويو آهي. گذري ٿاڻي تي داخل ڪرايل ايف آءِ آر ۾ قتل، ارادي قتل ۽ دهشتگردي جا قلم لڳايا. اخلاق عابدي ايف آءِ آر ۾ ڄاڻايو ته قاتلن جا چهرا ياد آهن، کين ڏسي سڃاڻي سگھان ٿو. هن چيو ته فائرنگ جي آواز ٻڌندي ئي دروازي ڏانهن ڀڄندو ويس، گارڊ ٻڌايو ته فائرنگ ٿي آهي، مون کانئس هٿيار گھريو . ٻاهر نڪتس ته 2 جوابدار هئا، جيڪي موٽرسائيڪل تي فرار ٿيندي ڏٺم. پوليس سندس فرياد تي ايف آءِ آر داخل ڪري جاچ شروع ڪري ڏني آهي.
هوڏانهن علي رضا عابدي جي قتل ڪيس ۾ اهم اڳڀرائي ٿي آهي، فرانزڪ رپورٽ مطابق قتل ڪيس ۾ استعمال ٿيل پسٽل پهريان به هڪ واردات ۾ استعمال ٿي چڪو آهي، علي رضا عابدي جي ڪيس بابت فرانزڪ رپورٽ تيار ٿي وئي. علي رضا عابدي جي قتل ۾ 30 بور جو پسٽل استعمال ٿيو، گولين جا خول ميچ ٿي ويا آهن. ساڳي پسٽل سان لياقت آباد ۾ به قتل جي واردات ڪئي وئي هئي، .لياقت آباد ۾ 10 ڊسمبر تي هڪ نوجوان احتشام جو قتل ٿيو، ان ۾ ساڳيو پسٽل ٿيو آهي. جنهن جو ڪيس پڻ داخل ٿيل آهي. ذريعن موجب احتشام هڪ ڏوهاري شخص عرفان جي اڳوڻي زال سان شادي ڪرڻ چاهيندو هو،عرفان جوا به کيڏندو هو ۽ سندس ايم ڪيو ايم سان رابطا به هئا،ڳچ مهينا اڳ عرفان کڏا مارڪيٽ منتقل ٿيو،ذريعن موجب احتشام جي قتل ۾ عرفان جي ملوث هئڻ جون ثابتيون آهن،پر عرفان منظرعام تان غائب آهي،اطلاع آهن ته عرفان ايران فرار ٿي ويو آهي، ان سلسلي ۾ ميڊيا سان ڳالهائيندي ايس ايس پي سي ٽي ڊي عمر خطاب چيو ته علي رضا عابدي تي ٻن پسٽلن سان حملو ڪيو ويو، هٿياربند جي ٻنهي هٿن ۾ پسٽل هئا. جيڪو سي سي ٽي وي فوٽيجز ۾ نظر اچي رهيو آهي. هن چيو ته تمام جلد قاتلن تائين پهچي وينداسين.
متحده قومي موومينٽ (ايم ڪيو ايم) جي اڳواڻ اڳوڻي ايم اين اي علي رضا عابدي جي قتل کانپوءِ ايم ڪيو ايم جي ڌڙن پاڻ ۾ رابطا شروع ڪري ڇڏيا. ذريعن موجب گذريل ڏهاڙي فيصل سبزواري ڊاڪٽر فاروق ستار سان رابطو ڪيو. ميڊيا سان ڳالهائيندي فيصل سبزواري چيو ته فاروق ستار سان في الحال ملاقات جي لاءِ وقت گهريو آهي. فيصل سبزواري جو چوڻ هو ته ملاقات جو مقصد موجوده صورتحال تي فاروق ستار سان ڳالهيون ڪرڻ آهي. هن چيو ته فاروق ستار ملاقات جي راضپو ظاهر ڪيو، ملاقات ذاتي حيثيت ۾ ڪندس، پارٽي طرفان ملاقات جي لاءِ مون کي ناهي چيو ويو
علي رضا عابدي تي حملي بعد گرفتار ڪيل سيڪيورٽي گارڊ قدير وڊيو بيان ۾ چيو ته گاڏي مين گيٽ تي پهچڻ شرط آئون دروازو کولڻ ويس، دروازي جو هڪ حصو کولڻ شرط فائرنگ شروع ٿي وئي، مون هٿيار لوڊ ڪرڻ جي ڪوشش ڪئي پر هٿيار لوڊ نه ٿي سگھيو. فائرنگ بند ٿيڻ بعد ٻاهر ويس ته علي رضا جي ڪنڌ مان رت وهي رهيو هو ۽ ٻاهر مون کي ڪير به ڏسڻ ۾ نه آيو. مون کي بنگلي تي ڊيوٽي ڪندي هڪ مهينو 25 ڏينهن ٿيا آهن.
سنڌ جي وڏي وزير سيد مراد علي شاهه هڪ ڀيرو ٻيهر سندس ان عزم جو پڪو پهه ڪيو ته ڪراچي شهر کي پُرامن بڻايو ويندو، جنهن لاءِ قانون لاڳو ڪندڙ ادارن کي هدايت ڪئي ته اهي ان بابت سڪيورٽيءَ جا فول پروف اپاءَ ورتا وڃن. هن اها ڳالهه وزيراعليٰ هائوس ۾ امن امان جي حوالي سان هنگامي اجلاس جي صدارت ڪندي ڪئي. اجلاس ۾ چيف سيڪريٽري سنڌ ممتاز علي شاهه، قانون وارو صوبائي صلاحڪار مرتضيٰ وهاب، ڊي جي رينجرز ميجر جنرل محمد سعيد، انسپيڪٽر جنرل پوليس سنڌ ڊاڪٽر ڪليم امام، انٽيليجنس ايجنسين جا صوبائي اڳواڻ، ڊي آءِ جي ڏکڻ ڪراچي جاويد عالم اوڍو ۽ ٻين لاڳاپيل آفيسرن شرڪت ڪئي. وڏي وزير چيو ته گذريل 6 هفتن دوران شهر ۾ دهشتگرديءَ جا ڇهه واقعا ٿيا آهن جيڪي هڪ سنگين ۽ الارمنگ ڳالهه آهي ۽ ناقابل برادشت آهي، انڪري قانون لاڳو ڪندڙ ادارن خاص طور تي پوليس کي گهرجي ته سڪيورٽيءَ جا سخت اپاءَ ورتا وڃن ۽ پوليس ڪارڪردگيءَ کي بهتر بڻائي. هن چيو ته 17 نومبر تي لانڍي ۾ هڪ ڌماڪو ٿيو جنهن ۾ معصوم انسانن جون جانيون ضايع ٿيون، چين جي قونصليٽ تي حملو ٿيو، ضلعي ڏکڻ ڪراچيءَ ۾ هڪ گاڏيءَ تي حملو ٿيو، گلستان جوهر ۾ محفل ميلاد ۾ هڪ ڪريڪر حملو ٿيو، پاڪ سرزمين پارٽي (پي ايس پي) جا ڪارڪنن پنهنجي دفتر ۾ ماريا ويا ۽ هاڻ اڳوڻي پارليامينٽرين علي رضا عابديءَ کي قتل ڪيو ويو. هن چيو ته انهن واقعن سان اها ڳالهه ظاهر ٿئي ته پکڙيل دهشتگرد منظم ٿي رهيا آهن ۽ اسانجي گرفت ڪمزو ٿيندي پئي وڃي ۽ هن آءِ جي پوليس کي هدايت ڪئي ته هُو پوليس جي ڪارڪردگيءَ کي بهتر بڻائي.
هن آءِ جي پوليس کي هدايت ڪئي ته هُو سنڌ صوبي خاص طور تي ڪراچيءَ جي امن امان جي حوالي سان روازاني جي بنياد تي کين رپورٽ موڪلي وڃي. وڏي وزير سيد مراد علي شاهه کي علي رضا عابدي جي قتل بابت آگاهي ڏيندي ڊي آءِ جي ڏکڻ ڪراچي جاويد اوڍو ٻڌايو ته ان هنڌ جتي علي رضا عابدي کي قتل ڪيو اتان 5 خول مليا آهن اهي خول فرانزڪ ٽيسٽ لاءِ موڪليا ويا آهن ۽ اتان اها ڄاڻ ملي آهي ته جيڪو پسٽل استعمال ڪيو ويو آهي اهو پهرين کان جاچ هيٺ ڪجهه واقعن ۾ پڻ استعمال ٿيو آهي. هن چيو ته علي رضا عابدي جو موبائل فون تحويل ۾ ورتو ويو آهي ۽ ان کي ڊيڪوڊ ڪري رهيا آهيون ته جيئن ان جي پيغامن ۽ ڪالز کي جاچ وارن مقصدن لاءِ پرکيو وڃي. انٽيليجنس ايجنسين واقعي بابت بريف ڪندي سڪيورٽي جي ڪجهه سخت اپاءَ وٺڻ جي تجويز ڏني.
اجلاس ۾ ٻڌايو ويو ته پوليس ۽ رينجرز ڪجهه اهم گرفتاريون ڪيون آهن ۽ انهن کي يقين آهي ته علي رضا عابدي جي قاتلن جي گرفتاريءَ بابت جلد اهم شاهديون ملي وينديون، ان تي وڏي وزير واضح طور تي هدايت ڪئي ته شاهديون نه قاتلن کي گرفتاري ڪيو وڃي. هن چيو ته اهي (دهشتگرد) سرگرميون ٻيهر فعال ٿي رهيون آهن ۽ مان ان ڳالهه جي ڪڏهن به اجازت نه ڏينديس. هن صوبائي پوليس کي چيو ته مان چاهيان ٿو ته اوهان قاتلن کي گرفتار ڪرڻ کانپوءِ مونکي رپورٽ ڪئي وڃي. اجلاس ۾ اها ڳالهه ٻڌائي وئي ته لنڊن مان نفرت انگيز تقريرون ڪيون ويون آهن جنهن ۾ هڪ جماعت جي ڪارڪنن کي انهن جي مخالف کي قتل ڪرڻ لاءِ همٿايو پيو وڃي. ان تي وڏي وزير چيف سيڪريٽري ممتاز شاهه کي هدايت ڪئي ته هُو اسلام آباد ۾ پرڏيهي وزارت سان ڳالهائي ته اها ان مسئلي کي برٽش ايمبيسي سان ان معاملي تي ڳالهه ٻول ڪئي وڃي. هن چيو ته اهو ناقابل قبول آهي ۽ ان کي سفارتي ڪاوشن ذريعي روڪڻ گهرجي، وڏي وزير آءِ جي پوليس ڊاڪٽر ڪليم امام کي هدايت ڪئي ته هُو خالص ميرٽ جي بنياد تي پوليس اهلڪارن جي ڀرتي شروع ڪئي وڃي پوئين ڀيري اسان ڀرتيون ويون هيون ان ۾ پاڪستان آرمي جي ايڇ آر جا ماڻهو به شامل ڪيا ويا هئا. هن آءِ جي پوليس کي ان بابت ڪم شروع ڪرڻ جي هدايت ڪئي.
ٻئي طرف گورنر سنڌ عمران اسماعيل ۽ مملڪتي گھرو وزير شهريار آفريدي علي رضا عابدي جي گھر پهچي سندس پونئيرن سان تعزيت ڪئي. ان موقعي تي گورنر سنڌ ۽ مملڪتي گھرو وزير علي رضا جي وارثن کي يقين ڏياريو ته قتل ڪيس جي شفاف جاچ ڪرائي قاتلن کي قانون جي ڪٽهڙي ۾ آندو ويندو. گورنر سنڌ ۽ مملڪتي گھرو وزير کانسواءِ فاروق ستار، ڪامران اختر، نسرين جليل، حليم عادل شيخ، خرم شيرالزمان ۽ ٻين ايم پي ايز ۽ ايم اين ايز سميت ايم ڪيو ايم ۽ پي ايس پي توڙي ٻين پارٽين جي اڳواڻ گھر پهچي سندس پونئيرن سان ڏک جو اظهار ڪيو آهي.
ڪراچي ۾ قتل ٿيل علي رضا عابدي يثرب امام بارگاهه ۾ ادا ڪئي وئي، گورنر سوڌو اهم شخصيتن جي شرڪت
هٿياربندن جي حملي دوران علي رضا عابدي جي گارڊ جوابي فائرنگ نه ڪئي، کيس گرفتار ڪيو آهي: ايس ايس پي سائوٿ
ڪراچي (رپورٽر) پوليس ڊفنيس ۾ گذريل رات قاتلاڻي حملي ۾ مارجي ويل علي رضا عابدي جي گارڊ کي گرفتار ڪري ورتو، علي رضا عابدي جي جنازي نماز ادا ڪئي وئي، ايس ايس پي سائوٿ چيو ته گارڊ حملي وقت جوابي ڪارروائي نه ڪئي.
علي رضا عابدي جي جنازي نماز امام بارگاهه يثرب ۾ ادا ڪئي وئي، علامه حسن ظفر نقوي نماز پڙهائي، جنازي نماز ۾ فاروق ستار سميت ايم ڪيو ايم ۽ پي ايس پي اڳواڻن کانسواءِ مختلف سياسي جماعتن جي اڳواڻن ۽ شهرين وڏي انگ ۾ شرڪت ڪئي.
ڪراچي جي ڏکڻ پوليس علي رضا عابدي جي گارڊ کي شڪ جي بنياد تي گرفتار ڪري ورتو، ڪراچي ۾ ميڊيا سان ڳالهائيندي ايس ايس پي سائوٿ پير محمد شاهه چيو ته علي رضا عابدي معمول کان هٽي ڪري آفيس کان گهر جلدي هليو ويو هو، حملي وقت علي رضا عابدي جي گارڊ قدير کي حراست ۾ ورتو ويو آهي، جيڪو فائرنگ جي جواب ۾ ڪا ڪارروائي ڪرڻ بدران گهر اندر ويو ۽ علي رضا عابدي جي والد کان هٿيار گهريو.
ايس ايس پي چيو ته علي رضا عابدي جي گاڏي گهر جي در وٽ پهچڻ وقت گارڊ جيئن ئي گهر جو در کوليو ته هٿياربندن فائرنگ شروع ڪئي، گارڊ قدير جو واسطو ڊيرا غازي خان سان آهي ۽ هو ڏيڍ مهينو اڳ علي رضا عابدي جي گهر گارڊ طور مقرر ٿيو هو، کانئس واقعي بابت پڇاڳاڇا ڪئي پئي وڃي.
هڪ سوال جي جواب ۾ ايس ايس پي چيو ته علي رضا عابدي جي وارثن ڪنهن خاص قسم جو خدشو ظاهر نه ڪيو آهي.
واضح رهي ته ڊفينس فيز 5 جي علائقي خيابانِ غازي ۾ گذريل رات هٿياربندن علي رضا عابدي تي قاتلاڻو حملو ڪيو هو، جنهن جي نتيجي ۾ هو زخمي ٿيو، علي رضا عابدي کي ڳڻتي جوڳي حالت ۾ اسپتال منتقل ڪيو پيو پر هو بچي نه سگهيو ۽ دم ڌڻي حوالي ڪيو.
جي آءِ ٽي رپورٽ مني لانڊرنگ کان لانڊري تائين اچي وئي آهي، ايترا وڏا الزام نه آهن جو سزا ملي سگهي: مراد علي شاهه
جي آءِ ٽي الزامن جو عدالت ۾ دفاع ڪنداسين، اُميد ته سُپريم ڪورٽ جي حڪمن يڃڪڙي ڪندڙن خلاف به ڪارروائي ٿيندي
ڪراچي (رپورٽر) سنڌ جي وڏي وزير سيد مراد علي شاهه جو چوڻ آهي ته جي آءَ ٽي ۾ جيڪي مامره سامهون آيا آهن انهن جو جواب عدالتن ۾ ڏينداسين .هن اهڙن خيالن جو اظهار ملڪ جي باني قائداعظم محمد علي جناح جي جنم ڏينهن جي حوالي سان سندس مزار تي حاضري کانپوءِ ميڊيا سان ڳالهه ٻولهه دوران ڪيو .صحافين پاران پڇيل مختلف سوالن جا جواب ڏيندي سنڌ جي وڏي وزير چيو ته پيپيلزپارٽي قيادت کي عوام جي خدمت ڪرڻ تي عدالتن ۾ گهليو پيو وڃي اسين عوام خاطر عدالتن ۾ ڪيسن کي منهن ڏيڻ لاءِ تيار آهيون .هن چيو ته پاور پلانٽ کي سبسڊي اڄ نه 2008 کان ڏني پئي وڃي اها سبسڊي به عوام جي ڀلائي لاءِ ڏئي رهيا آهيون .هن چيو ته اسين عوام جي دخمت تي يقين رکون ٿا . سيد مراد علي ساهه جو چوڻ هو ته آرمي پبلڪ اسڪول کانپوءِ ملڪ ۾ امن جي قيام لاءِ ڀرپور ڪوششون ورتيون ويون ۽ هن وقت امن امان جي حوالي سان صورتحال ڪافي بهتر آهي .
متحده حيدرآباد جي ٻن ۽ ميرپورخاص جي ٽن سيٽن تي ڪاميابي ماڻي،5 آزاد اميدوار به ڪامياب ٿيا
ڪراچي(نمائندن وٽان) سنڌ جي مختلف ضلعن جي 65 خالي بلدياتي سيٽن تي ٿيل ننڍي چونڊ جي غير حتمي ۽ غير سرڪاري نتيجن موجب هن وقت تائين 31 سيٽن تي پيپلز پارٽي ڪاميابي ماڻي ورتي آهي،متحده قومي موومينٽ ۽ آزاد اميدوار پنجن پنجن سيٽن سان ٻئي نمبر تي رهيا
سنڌ جي مختلف ضلعن ۾ ضمني مڪاني چونڊون پوريون ٿيڻ بعد غير سرڪاري ۽ غير حتمي نتيجا اچڻ جو سلسلو جاري آهي. حيدرآباد جي مڪاني ادارن جي ٽن سيٽن تي ٿيل ننڍي چونڊ ۾ ٻن سيٽن تي متحده قومي موومينٽ جا اميدوار ڪامياب ٿيا آهن، جڏهن ته هڪڙي سيٽ تي پ پ اميدوار کٽي ويو. ميرپورخاص جي ٽن سيٽن تي متحده ڪاميابي ماڻي، نواب شاهه جي ضلعي ڪائونسل جي سيٽ تي بيٺل شاگردياڻي فرزانه جمالي هارائي وئي، کيس 90 ووٽ مليا، جڏهن ته پنو عاقل ۾ يوسي نوراجا وارڊ نمبر 4 ۾ ڪائونسلر سيٽ تي آزاد اميدوار آدم مهر 365 ووٽ کڻي ڪامياب ٿي ويو. سانگهڙ جي وارڊ نمبر 2 تي پ پ اميدوار اڪرم قريشي 619 ووٽ کڻي ڪاميابي ماڻي، جي ڊي اي اميدوار آفاق قريشي کي 504 ووٽ مليا.
عمرڪوٽ جي يوسي مردان شاهه ۾ ف ليگ جو عازي سمون 1643 ووٽ کڻي ڪامياب ٿي ويو، هن سيٽ تي پ پ جي روشن راهمون کي 1354 ووٽ مليا. سکر جي يوسي 17 نيو پنڊ وارڊ نمبر 4 تي پ پ اميدوار گل محمد 535 ووٽ کڻي ڪاميابي ماڻي، جڏهن ته پي ٽي آءِ جو محمد نعيم هارائي ويو. گهوٽڪي جي يوسي عمر ڊهو ۾ پ پ اميدوار ڄام دلاور لکڻ 1770 ووٽ کڻي ڪامياب ٿي ويو، آزاد اميدوار ارشد لکڻ 739 ووٽ کڻي ٻئي نمبر تي رهيو. ملير جي يوسي ڪاٺوڙ تي پ پ اميدوار دادا ڪريم بلوچ 2735 ووٽ کڻي کٽي ويو، پي ٽي آءِ جو عطاءُ الله 717 ووٽ کڻي سگهيو.
ماتلي جي وارڊ نمبر 7 ۾ پ پ جي عمران ڪشميري 1173 ووٽ کڻي ڪاميابي ماڻي، آزاد اميدوار منير نظاماڻي کي 926 ووٽ مليا. نوشهروفيروز ۾ يوسي ڪوٽ ستابو ۾ مير محمد عالماڻي 1309ووٽ کڻي ڪامياب ٿي ويو، پ پ جي آصف عالماڻي 500 ووٽ مليا. پيرڳوٺ جي يوسي راهوجا ۾ آزاد اميدوار 926 ووٽ کڻي ڪامياب ٿي ويو پ پ اميدوار ڌڻي بخش جاگيراڻي 852 ووٽ کڻي سگهيو. ٺري ميرواهه جي يوسي مانڊڻ وارڊ 2 ۾ آزاد اميدوار امتياز شر 469 ووٽ کڻي ڪامياب ٿي ويو، پ پ جي منور ملاح کي 355 ووٽ مليا.
ملير جي يوسي ڄام مراد علي تي آزاد اميدوار صدام بلوچ 1947 ووٽ کڻي ڪامياب ٿيو آهي جڏهن ته پ پ جي عرفان جوکيو کي 1835 ووٽ مليا. قاضي احمد جي يوسي گهرام مري جي وارڊ نمبر 3 تي پ پ اميدوار نياز حسين مهر 650 ووٽ کڻي ڪاميابي ماڻي. خيرپور جي يوسي اڀڙي وارڊ نمبر 4 تي پ پ جو غلام علي ڪنڌر 531 ووٽ کڻي ڪامياب ٿيو،سندس مخالف اميدوار حنيف تنيو کي 182 ووٽ مليا،ٺٽي جي يوسي ڇتو چنڊ ۾ پ پ جو حيدر شاهه شيرازي 1632 ووٽ کڻي ڪامياب سندس مخالف پي ٽي آءِ جي عظيم بروهي کي 112 ووٽ مليا.
خيرپورجي احمد پور ٽائون ڪميٽي وارڊ نمبر 4 ۾ پ پ اميدوار محمد بخش ميتلو 232 ووٽ کڻي ڪامياب ٿي ويو،خيرپورميرس جي احمد پور ٽائون ڪميٽي وارڊ نمبر 4 ۾ ف ليگ اميدوار سراج احمد کنڀڙو 34 ووٽ کڻي هارائي ويو،خيرپورجي يوسي مانڊڻ وارڊ نمبر 2 ۾ آزاد اميدوار امتياز شر 457 ووٽ کڻي ڪامياب ٿيو، پ پ جي منور ملاح کي 349 ووٽ مليا،ٽائون ڪميٽي ٺيڙهي 1 وارڊ نمبر 3 ۾ آزاد اميدوار عبدالوحيد شيخ 432 ووٽ کڻي ڪامياب ٿي ويو.ٽائون ڪميٽي ٺيڙهي 1 وارڊ نمبر 3 ۾ پ پ اميدوار شاهد شيخ 317 ووٽ کڻي هارائي ويو.ٽائون ڪميٽي ٺيڙهي 2 وارڊ نمبر 1 ۾ آزاد اميدوار حفيظ ڦلپوٽو 317 ووٽ کڻي ڪامياب ٿيو،ٽائون ڪميٽي ٺيڙهي 2 وارڊ نمبر 1 ۾ پ پ اميدوار عبدالغني ڦلپوٽو 292 ووٽ کڻي هارائي ويو،خيرپور جي يوسي هنڊياري وارڊ 3 ۾ پ پ اميدوار نظر شر 590 ووٽ کڻي ڪامياب ٿي ويو،يوسي هنڊياري وارڊ 3 ۾ ف ليگ اميدوار غلام الدين شر 345 ووٽ کڻي هارائي ويو،يوسي گمبٽ وارڊ 11 ف ليگ جو منور ميمڻ 468 ووٽ کڻي ڪامياب، پ پ جي يوسف ميمڻ کي 298 ووٽ مليا،ٽائون ڪميٽي کهڙا جي وارڊ 7 ۾ پ پ اميدوار اسحاق ناريجو 560 ووٽ کڻي ڪامياب ٿيو جڏهن ته ف ليگ اميدوار غوث محمد لاشاري 118 ووٽ کڻي هارائي ويو.
پيرڳوٺ لڳ يوسي راهوجا جي چيئرمين لاءِ ضمني چونڊون ٿي گذريون جنهن ۾ غير سرڪاري ۽ غير حتمي نتيجن موجب آزاد اميدوار مير غلام عباس ٽالپر 926 ووٽ کڻي ڪاميابي ماڻي جڏهن ته پ پ اميدوار ڌڻي بخش جاگيراڻي 852 ووٽ کنيان، ف ليگ جي ڪريم الدين ملڪ ڪل 550 ووٽ کنيان، جڏهن ته ٽائون ڪاميٽي احمدپور جي وارڊ نمبر 4 تي پڻ ضمني چونڊون ٿيون جنهن ۾ پ پ جي محمد بخش ميتلو ۽ 230۽ ف ليگ اميدوار سراج الدين کنڀڙو ڪل 36 ووٽ کڻي سگھيو
حيدرآباد جي مڪاني ادارن جي ٽن سيٽن تي ٿيل ننڍي چونڊ ۾ ٻن سيٽن تي متحده قومي موومينٽ جا اميدوار ڪامياب ٿيا آهن، جڏهن ته هڪڙي سيٽ تي پ پ اميدوار کٽي ويو، اليڪشن ڪميشن جي جاري ڪيل غير حتمي ۽ غيرسرڪاري نتيجن موجب يونين ڪاميٽي نمبر 21 حيدرآباد سٽي جي چيئرمين جي سيٽ تي متحده قومي موومينٽ جو پرويز وسيم 1005 ووٽ کڻي ڪامياب ٿيو آهي، آزاد اميدوار محمد امتياز عالم 441 ووٽ کڻي ٻئي نمبر تي رهيو، هن سيٽ تي پ پ جي محمد بلاول سهتو صرف 21 ووٽ حاصل ڪيا، يونين ڪامٽي 53 تي چيئرمين جي سيٽ تي ٿيل ننڍي چونڊ ۾ پ پ جي اميدوار سيد سجاد علي شاه 1340 ووٽ کڻي، ڪامياب ٿيو آهي، هن سيٽ تي ايم ڪيو ايم جي جهانگير ڪاڪا کي 705 ووٽ مليا، آزاد اميدوار عبدالرحيم 270 ووٽ کڻي ٽيئن نمبر تي، پي ٽي آءِ جو ولي محمد 213 ووٽ کڻي چوٿين نمبر تي رهيو، يونين ڪاميٽي 87 جي وارڊ هڪ تي جنرل ڪائونسلر جي سيٽ تي ايم ڪيو ايم جو شعيب الحسن 230 ووٽ کڻي ڪامياب ٿيو آهي، هن سيٽ تي پ پ جي عنايت علي خان کي 106 ووٽ مليا، جڏهن ته آزاد اميدوار نور علي هڪ ووٽ به حاصل نه ڪري سگهيو. ننڍي چونڊ جي لاءِ مجموعي طور 10 پولنگ اسٽيشنون قائم ڪري، سيڪيورٽي جا انتظام انتهائي سخت ڪيا ويا.
اليڪشن ڪميشن طرفان خيرپور جي ڊسٽرڪٽ ڪائونسل ۽ مختلف وارڊن جي بنا مقابلي پيپلزپارٽي جي ڇهه اميدوارن کي ڪامياب قرار ڏنو ويو. جيڪي اميدوار بنا مقابلي ڪامياب قرار ڏنا ويا آهن انهن ۾ تعلقه ٺري ميرواهه جي يونين ڪائونسل تلي تان ڊسٽرڪٽ ڪائونسل جي خالي ٿيل ميمبر واري سيٽ تي پيپلزپارٽي جو فرزند علي شر بنا مقابلي ڪامياب قرار ڏنل آهي. جڏهن ته يونين ڪائونسل مانڊڻ تان پڻ پيپلزپارٽي جو اميدوار فدا حسين دستي پڻ بنا مقابلي ڪامياب قرار ڏنل آهي. تعلقه ڪوٽڏيجي جي يونين ڪائونسل جسڪاڻي تان پيپلزپارٽي جو اميدوار نعيم رضا وساڻ ڊسٽرڪٽ ڪائونسل جي خالي ٿيل سيٽ تان بنا مقابلي ڪامياب قرار ڏنل آهي. ان کان علاوه يوسي ڪنب جي وارڊ نمبر 01 تان خالي ٿيل جنرل ڪائونسلر جي سيٽ تي پيپلزپارٽي جو اميدوار احمد نواز سولنگي جڏهن ته يوسي پير حيات شاهه جي وارڊ نمبر چار جي خالي ٿيل سيٽ تي سليم علي بهليم جيڪو پڻ پپيلزپارٽي جو اميدوار هو پڻ بنا مقابلي ڪامياب قرار ڏنل آهي. ان کان علاوه يوسي ٻيلهاڙو ۾ ضلعي ڪائونسل جي خالي ٿيل سيٽ تي پيپلزپارٽي جو وليداد کهڙو جيڪو پڻ پيپلزپارٽي جو نامزد اميدوار هو پڻ اليڪشن ڪميشن طرفان بنا مقابلي ڪامياب قرار ڏنل آهي.
هوڏانهن غير سرڪاري ۽ غير حتمي نتيجن موجب احمدپور جي ٽائون ڪميٽي وارڊ 04 جي خالي ٿيل سيٽ تي پيپلزپارٽي جو اميدوار محمد بخش ميتلو 232 ووٽ کڻي ڪامياب ٿي ويو جڏهن ته سندس مقابلي ۾ مسلم ليگ فنڪشنل جو اميدوار سراج احمد کنڀڙو 34 ووٽ کڻي سگهيو. يوسي مانڊڻ وارڊ 02 لاءِ جنرل ڪائونسلر جي سيٽ تي آزاد اميدوار امتياز شر 457 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار منور علي ملاح صرف 349 ووٽ کڻي سگهيو. ٽائون ڪميٽي ٺيڙهي ون جي وارڊ 03 لاءِ جنرل ڪائونسلر جي سيٽ تي آزاد اميدوار عبدالوحيد شيخ 432 ووٽ کڻي ڪاميابي حاصل ڪئي جڏهن ته سندس مقابلي ۾ پ پ اميدوار شاهد شيخ فقط 363 ووٽ کڻي سگهيو. ٽائون ڪميٽي ٺيڙهي 02 جي وارڊ 01 لاءِ جنرل ڪائونسلر جي سيٽ تي آزاد اميدوار عبدالحفيظ ڦلپوٽو 317 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار عبدالغني ڦلپوٽو 292 ووٽ کڻي سگهيو. يوسي هنڊياري جي وارڊ 03 لاءِ جنرل ڪائونسلر جي سيٽ تي پ پ اميدوار نظر شر 590 ووٽ کڻي ڪامياب ٿي ويو جڏهن ته مسلم ليگ فنڪشنل اميدوار غلام الدين شر فقط 345 ووٽ کڻي سگهيو. يوسي گمبٽ جي وارڊ نمبر 11 لاءِ جنرل ڪائونسلر جي سيٽ تي مسلم ليگ فنڪشنل اميدوار منور ميمڻ 468 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار يوسف ميمڻ فقط 298 ووٽ کڻي سگهيو. يوسي اڀڙي جي وارڊ 04 لاءِ جنرل ڪائونسلر جي سيٽ تي پ پ اميدوار غلام علي ڪنڌر 528 ووٽ کڻي ڪامياب ٿي ويو جڏهن ته آزاد اميدوار محمد حنيف تنيو فقط 182 ووٽ کڻي سگهيو. ٽائون ڪميٽي کهڙا جي وارڊ 07 لاءِ جنرل ڪائونسلر جي سيٽ تي پ پ اميدوار اسحاق ناريجو 560 ووٽ کڻي ڪامياب ٿي ويو جڏهن ته مسلم ليگ فنڪشل اميدوار غوث محمد لاشاري فقط 118 ووٽ کڻي سگهيو.
يوسي راهوجا جي چيئرمين واري سيٽ تي آزاد اميدوار مير غلام عباس ٽالپور 926 ووٽ کڻي ڪامياب ٿي ويو جڏهن ته سندس مقابلي ۾ پ پ اميدوار 849 ووٽ کنيا جڏهن ته ف ليگ اميدوار ڪريم ملڪ 530 ووٽ کڻي سگهيو. ياد رهي ته ضلع ڪائونسل جي چار سيٽن، چار ٽائون ڪميٽين جي سيٽن، پنجن يونين ڪائونسلن جي سيٽن، ڇهه ميونسپل ڪميٽي، هڪ يوسي چيئرمين سميت ٽوٽل سورنهن خالي ٿيل سيٽن تي ضمني چونڊ ٿي جنهن ۾ 6 اميدوارن کي اليڪشن ڪميشن طرفان بنا مقابلي ڪامياب قرار ڏنو ويو آهي جڏهن ته رهيل 10 سيٽن تي فنڪشنل مسلم ليگ، پيپلزپارٽي ۽ آزاد اميدوارن وچ ۾ مقابلا ٿيا.
ميرپور خاص جي ميرپور خاص جي ٽن سيٽن تي متحده اميدوار ڪامياب ٿيا،وارڊ نمبر 6 تي متحده اميدوار رئيس الدين 451 ووٽ کڻي ڪامياب، پ پ جي اشتياق بيگ کي 331 ووٽ مليا،وارڊ 39 ۾ متحده اميدوار جنيد قريشي 690 ووٽ کڻي ڪامياب، پ پ جي جاويد پنهور کي 68 ووٽ مليا،وارڊ 23 تي متحده اميدوار محمد عمران 496 ووٽ کڻي ڪامياب، پ پ اميدوار نعيم بابا کي 291 ووٽ مليا.
نواب شاهه جي يوسي گهرام مري وارڊ 3 ۾ پ پ جو نياز مهر 615 ووٽ کڻي ڪامياب، ايس يو پي جي موسيٰ جوڻو کي 272 ووٽ مليا،يوسي نصير ڍانڍو وارڊ 107 تي پ پ جو واحد بخش ۽ يوسي کنڀڙا وارڊ 37 تي پ پ جو نور احمد ڀارو بنا مقابلي ڪامياب ٿيو،يوسي پٽڻي 15 ۾ پ پ جو امتياز ڇڄڻ 2499 ووٽ کڻي ڪامياب ٿيو، جي ڊي اي اميدوار اصغر ڇڄڻ کي 1667 ووٽ مليا
عمرڪوٽ ضلعي جي يونين ڪائونسل شاھ مردان شاھ ۾ چيئرمين جي سيٽ تي چونڊ ۾ غير سرڪاري ۽ غير حتمي نتيجن ۾ فنڪشنل ليگ اميدوار غازي خان سمون 1667 ووٽ کڻي ڪامياب ٿي ويو آھي، جڏھن تہ مخالف پ پ اميدوار روشن الدين راھمون 1303 ووٽ حاصل ڪيائين جڏھن ته ف ليگ اميدوار جي ڪاميابي کي پ پ اميدوار نتيجن کي ڌانڌلي قرار ڏيندي رد ڪري ڇڏيو آھي ۽ پريس ڪلب عمرڪوٽ تي ھنگامي ڪانفرنس ڪندي شاه مردان شاه يوسي چئيرمين پ پ اميدوار روشن راهمون, وڪيل شوڪت راهمون, پ پ يوٿ ونگ سنڌ جي جنرل سڪريٽري اعظم نوحاڻي, غلام حسين آريسر, نورجهان ڳيلهڙو, گلزاره سمون ۽ ٻين چيو ته پولنگ اسٽيشن مٺو راڄڙ ۽ پولنگ اسٽيشن ترڪو منڱريو تي اسان جي پولنگ ايجنٽ عورتن سان گار گند ڪئي وئي انهن کي ڌڪا ڏئي ووٽن جي ڳڻپ وقت پولنگ کان ٻاهر ڪڍيو سرعام ڌانڌلي ڪئي وئي ، هنن مطالبو ڪندي چيو ته ٻيهر آر او آفيس ۾ صاف شفاف ڳڻپ ڪرائي وڃي ٻئي صورت ۾ اسان عدالت ۾ درخواست داخل ڪنداسين ،ووٽنگ دوران ڳوٺ مٺو ٺاراڻي ۾ پ پ جا ووٽر روڪڻ تي جھيڙو پڻ ٿيو پوليس پاران 3 ڄڻا گرفتار ڪيا ويا.
لوئي يوسي جي چيئرمن واري سيٽ تي ننڊي چونڊ ۾ ارباب لطف الله حامي پ پ پ اميدوار غلام نبي لنڊ غير حتمي ۽ غير سرڪاري نتيجن موجب 2790 ووٽ کڻي ڪامياب ٿي ويو،سندس مقابلي ۾ ارباب گروپ ۽ پ پ پ اڳواڻ محمد خان لنڊ جو گڏيل حمايت يافته آزاد اميدوار الهجهڙيو لنڊ 2350 ووٽ کڻي هارائي ويو. ڪامياب ٿيل پ پ پ اميدوار ايم پي اي ارباب لطف الله جو حامي ۽ هارايل اميدوار کي ارباب گروپ ۽ پ پ پ جي ناراض اڳواڻ محمد خان لنڊ جي حمايت حاصل هئي.
بدين جي ٻن تعلقن ۾ به يو سي چيئرمين ۽ جنرل ڪائونسلر جي هڪ هڪ سيٽ لاء غير سرڪاي نتيجن موجب ٻنهي سيٽن تي پ پ پ جي اميدوارن ڪاميابي ماڻي ورتي ماتلي جي وارڊ ست تي جنرل ڪائونسلر جي سيٽ لاء پ پ پ عمران ڪشميري 1173 ووٽ کڻي ڪاميابي ماڻي جڏهن ته سندس مقابلو ڪندڙ آزاد اميدوار منيراحمد نظاماڻي 926 ۽ پي ٽي آئي اميدوار محمد ڪمبوه 150 ووٽ کنيا ،ٽنڊي باگي جي يوسي خان بهادر مير غلام محمد ٽالپر جي سيٽ تي پ پ پ جي اميدوار علي احمد نظاماڻي 3100 ووٽ کڻي ڪاميابي ماڻي سندس مقابلي ۾ بيٺل جي ڊي اي اميدوار قاري موسى زنگيجو 776 ووٽ حاصل ڪري هارائي ويو.
ٽنڊ الهيارضلعي بلدياتي اليڪشن ۾ خالي ٿيل ٽن سيٽن نصرپور ٽائون ڪميٽي جي وارڊ 6 يوسي راوت لغاري ۽ ڊاسوڙي جي وارڊ 4 تي ضمني اليڪشن ٿي جنهن ۾ ٽنهي سيٽن تي پ پ جا اميدوار سوڀارا ٿيا.نصرپور جي وارڊ 6 جي جنرل ڪائونسلر جي سيٽ تي پ پ جي سيد سجاد شاه ۽ آزاد اميدوار وحيد پليجو وچ ۾ مقابلو ٿيو ، پ پ جي سيد سجاد شاه 717 ووٽ کڻي ڪامياب ٿيو ۽ آزاد اميدوار بيٺل وحيد پليجو 55 ووٽ کڻي سگهيو،يوسي راوت لغاري ۾ ضلعي ڪائونسل جي سيٽ تي پ پ جي هاشم نونداڻي ۽ آزاد اميدوار محمد خان جلباڻي جو وچ ۾ مقابلو ٿيو،پ پ جو اميدوار 3831 ووٽ کڻي ڪامياب ٿي ويو ۽ آزاد اميدوار 1661 ووٽ کڻي سگهيو ، ڊاسوڙي جي وارڊ 4 تان پ پ جو اميدوار خليل بلوچ بنا مقابلي ڪامياب ٿي ويو پ پ جي ڪاميابي بعد نصرپور ۾ سيد سجاد شاه حامين پاران ريلي ڪڍي مٺايون ورهايون ويون.
سکر ۾ بلدياتي ضمني چونڊ ۾ ٻن سيٽن تي پ پ اميدوار ڪامياب۔هڪ سيٽ تي پ پ اميدوار کي آزاد اميدوار هٿان شڪست۔ ان ڏس ۾ مليل ڄاڻ موجب سکر جي يونين ڪاميٽي 17 نيوپنڊ جي وارڊ نمبر 4 جنرل ڪائونسلر جي سيٽ تي پيپلز پارٽي جو اميدوار گل محمد خان 535 ووٽ کڻي ڪامياب ٿي ويو ، تحريڪ انصاف جو اميدوار محمد نعيم خان 401 ووٽ کنيا ، يونين ڪائونسل پٽڻي جي سيٽ تي پ پ اميدوار اعجاز ڇڃڻ غيرحتمي غيرسرڪاري نتيجن موجب 2513 ووٽ کڻي ڪامياب ٿي ويو آهي جڏهن ته آزاد اميدوار اصغر علي 2099 ووٽ کنيا، يوسي نوراجا جي ڪائونسلر جي سيٽ تي سنڌ ۾ حڪومت ڪندڙ پ پ جي اميدوار عبدالحق مهر 221 ووٽ کڻي سگهيو جڏهن ته آزاد اميدوار آزاد خان 393 ووٽ کڻي ڪامياب ٿيو آهي، لوڪل گورنمينٽ ڊپارٽمينٽ سکر جي ڊپٽي ڊائريڪٽر ۽ رٽرننگ آفيسر يار محمد جوڻيجو پاران هڪ نوٽيفڪيشن جاري ڪندي ڊسٽرڪٽ ڪائونسل جي ميمبر جي لاءِ خالي ٿيل يوسي گهمرا جي سيٽ تي برهان ولد الهوسايو گهمرو بنا مقابلي ڪامياب قرار ڏنو هو، جڏهن ته سکر ميونسپل ڪارپوريشن جي ٻن يونين ڪاميٽين جي وارڊن يوسي پير الاهي بخش جي وارڊ نمبر هڪ تي الطاف حسين ۽ يوسي غريب آباد جي وارڊ نمبر 3 محمد عثمان جنرل ڪائونسلر طور بنامقابلي ڪامياب ٿي چڪا آهن۔
گهوٽڪي جي ٽن سيٽن تي چونڊ ۾ ٽيئي سيٽون پيپلز پارٽي کٽي ورتيون،نوشهرو فيروز جي يوسي ستابو جي جنرل ڪائونسلر جي سيٽ تي آزاد اميدوار ۽ ٽائون ڪميٽي هالاڻي جي سيٽ تي پ پ اميدوار شاهد گاڏهي ڪاميابي ماڻي
ماضي ۾ ماڻهن پئسو ٺاهڻ لاءِ حڪومت کي استعمال ڪيو ۽ ڪرپشن بچائڻ لاءِ اسيمبلين جي اوٽ ورتي ؛ لاهور ۾ تقريب کي خطاب
لاهور(م ڊ) وزير اعظم عمران خان چيو آهي ته پارٽي ليڊر شپ کي هدايت ڪئي آهي ته اپوزيشن جي هر ڳالهه مڃي وٺو، پر اهو نٿو ٿي سگهي ته اسان احتساب کان پوئتي هٽي وڃون.
لاهور ۾ پنجاب حڪومت جي سئو ڏينهن جي ڪارڪردگي تقريب کي خطاب ڪندي وزير اعظم عمران خان چيو ته اسيمبلي ۾ روز ڊرامو ٿي رهيو آهي، اپوزيشن چوي ٿي اسان انتقام وٺي رهيا آهيون، اسان ڪوبه ڪيس ناهي ٺاهيو، اهي سڀ پراڻي دور جا ڪيس آهن.
هن چيو ته پارٽي ليڊر شپ کي چئي ڇڏيو آهي ته اپوزيشن جي هر ڳالهه ٻڌو ۽ تسليم ڪيو، سعد رفيق جا پروڊڪشن آرڊر جاري ڪيو، شهباز شريف کي پي اي سي جو چيئرمين بڻائي ڇڏيو پر اهو ڪير به نه سوچي ته احتساب جي عمل کان پوئتي هٽي وينداسين.
وزير اعظم چيو ته ملڪي سالميت، مستقبل ۽ ايندڙ نسلن لاءِ ضروري آهي ته ڪرپشن ۽ بدعنواني جو خاتمو ڪيو وڃي، جڏهن ته ڪرپشن سبب ملڪ جو مستقبل به خطري ۾ پئجي ويندو آهي، اپوزيشن اهو نه چوي ته احتساب کان پوئتي هٽي وڃو.
عمران خان وڌيڪ چيو ته 22 سال اڳ ڪرپشن خلاف ئي سياست جي ميدان تي لٿو هئس، هيءَ ماڻهو پهرين حڪومت کي پئسو ٺاهڻ لاءِ استعمال ڪندا آهن ۽ پوءِ اسيمبلي کي ڪرپشن بچائڻ لاءِ استعمال ڪيو ويندو آهي پر هاڻي ائين نه ٿيندو.
هن چيو ته جڏهن ڪرپشن ٿيندي آهي ته ڀوڳڻو عوام کي پوندو آهي، جيڪڏهن بجلي، گئس مهانگي ڏينداسين ته انڊسٽري ٻين ملڪن سان مقابلو نه ڪري سگهندي، رپيو هيٺ ڪرڻ شروع ٿي ويندو ۽ ڊالر جي قيمت وڌي ويندي آهي.
هن چيو ته زمين جا 30ڪيس حل ڪرڻ ۾ 30 سال لڳي ويندا آهن، پر اسان سول پروسيجر ڪورٽس جو قانون آڻي رهيا آهيون، جنهن ذريعي هڪ سال اندر سمورن سول ڪيسن جو فيصلو ٿي ويندو.
وزير اعظم چيو ته پوليس کي سياسي بڻائڻ جو ڳرو نقصان ٿيو آهي، خاص ڪري پنجاب ۾ پوليس کي سياسي ڪرڻ جو نقصان ٿيو، سڌارا آڻي پوليس کي سياست کان پاڪ ڪنداسين.
هارين جي حوالي سان ڳالهائيندي وزير اعظم عمران خان چيو ته ڪوشش آهي ته ننڍين شين سان هارين جي مدد ڪجي، هارين کي مٿي آڻڻو پوندو ته جيئڻ 40 مڻ فصل ڏيندڙ زمين مان 80 مڻ تائين اُپت حاصل ڪري سگهجي.
نريندر مودي کي ٻڌائڻو آهي ته اوهان اقليتن سان ڪهڙو ورتاءُ ڪندا آهيو ۽ اسان ڪيئن پيش ايندا آهيون: عمران خان
اقليتن جي تحفظ جي حوالي سان ڳالهائيندي عمران خان چيو ته ڀارتي اداڪار نصير الدين شاهه جو انٽرويو پڙهي رهيو هئس ته احساس ٿيو، قائد اعظم گهڻو اڳ چيو هو هندوستان ۾ مسلمانن کي برابري جو شهري نه سمجهيو ويندو پر اسان اقليتن کي برابري جو حق ڏنو آهي.
هن چيو ته اسان ڀارت جي نريندر مودي کي پڇڻ گهرون ٿا ته اوهان پنهنجي اقليتن کي ڪهڙي ريت رکو ٿا ۽ اسان ڪهڙي ريت رکون ٿا.
ڪرپشن الزام ۾ گرفتار ميان جاويد گذريل ڏينهن دل جي تڪليف سبب فوت ٿيو هو
فوت ٿيڻ کانپوءِ هٿڪڙيون لڳل مڙهه جي تصوير وائرل ٿيڻ بعد نيب تي ڇتي تنقيد
لاهور (رپورٽر ) لاهور جي ڪيمپ جيل ۾ لاڏاڻو ڪري ويل سرگوڌا يونيورسٽي جي سي اي او جو پوسٽ مارٽم اڄ ٿيندو، هٿڪڙيون لڳل مڙهه جي تصوير وائرل ٿيڻ بعد نيب کي سخت تنقيد جو نشانو بڻايو ويو.
مبينا ڪرپشن جي الزام هيٺ گرفتار سرگوڌا يونيورسٽي جو سي اي او ميان جاويد احمد کي دل جي تڪليف سبب گذريل ڏينهن لاهور جي ڪيمپ جيل مان سروسز اسپتال پهچايو ويو، جتي هو لاڏاڻو ڪري ويو هو
فوت ٿيڻ کانپوءِ به ميان جاويد احمد کي لڳل هٿڪڙيون نه هٽايون ويون ۽ هٿڪڙيون لڳل مڙهه جي تصوير سوشل ميڊيا تي وائرل ٿيڻ بعد نيب توڙي حڪومت کي سخت تنقيد جو نشانو بڻايو ويو، سياسي ڌرين سميت عوام واقعي تي سخت ڪاوڙ جو اظهار به ڪيو، پنجاب جو وڏي وزير عثمان بوزدار واقعي جو نوٽيس وٺندي رپورٽ به طلب ڪري چڪو آهي.
ميان جاويد کي نيب سرگوڌا يونيورسٽي جا غير قانوني ڪيمپس کولڻ جي الزام هيٺ هلندڙ سال گرفتار ڪيو هو، نيب پنهنجي حراست ۾ ميان جاويد جي لاڏاڻي جي ترديد ڪندي چيو ته احتساب عدالت کيس آڪٽوبر 2018 ۾ ئي جڊيشل ريمانڊ تي جيل اماڻيو هو، جنهن بعد نيب لاهور ميان جاويد کي صحتمند حالت ۾ ڪيمپ جيل منتقل ڪيو هو.
ترجمان نيب موجب گذريل ڏينهن جيل اختيارين ميان جاويد احمد کي دل جي تڪليف سبب سروسز اسپتال پهچايو، جتي هن دم ڏنو، موت جو ڪارڻ معلوم ڪرڻ لاءِ اڄ لاش جو پوسٽ مارٽم ڪيو ويندو
