مٺي(رپورٽر) سول اسپتال مٺي ۾ خوراڪ جي کوٽ ۽ مختلف بيمارين وگهي وڌيڪ ٽي ٻارڙا موت جو شڪار ٿي ويا آھن. جنهن کان پوءُ هلندڙ مهيني فوتي ٻارڙن جو انگ 50 ٿي ويو ۽ هلندڙ سال ٻارن جي فوتگين جو انگ 620 تي پهچي ويو آهي. تازو فوت ٿيل 3 ٻارڙن ۾ 18 مهينن جو ڀيرجي، 17 مهينن جو مدن ۽ چار سالن جو سلمان ساهڙ شامل آھن. اسپتال ۾ وڌيڪ ٻ 40 ٻارڙن کي ميل نيوٽريشن ۽ نرسري وارڊن ۾ داخل ڪيو ويو آھي . جنهن کان پوءُ اسپتال داخل ٻارن جو انگ 60 ٻڌايو وڃي ٿو.

ڄامشورو (رپورٽر) انڊس هاءِ وي مانجهند شهر ۾ ڪار ڊرائيور جي ڪنٽرول مان نڪري کاهي ۾ ڪري پئي، حادثي جي نتيجي ۾ قاسم آباد واسي سلمان مهر فوت ٿي پيو، جڏهن ته ٽي ڄڻا فهيم عمراڻي، شهزاد ۽ سيد طالب شاهه شديد زخمي ٿي پيا،فوتي ۽ زخمين کي تعلقه مانجهند منتقل ڪيو ويو.

ٺل(رپورٽر)ٺل لڳ ريڊ ڪمشنر پوليس چوڪي تي ڇاپو هڻي ناحق باندي بڻيل 3 ڄڻا بازياب ڪرائي ورتا سيشن جج جي حڪم تي ريڊ ڪمشنر عزيز الله جمالي ٺل جي اي سيڪشن ٿاڻي جي اوڍاڻو پوليس چوڪي تي ڇاپو هنيو، ڇاپي دوران پوليس چوڪي ۾ واڙيل ناحق باندي بڻيل ٽن ڄڻن غلام فريد گولو علي بخش انڙ ۽ محمد اسحاق گولو کي بازياب ڪرائي ورتو ،ڇاپي دوران ٽنهي ڄڻن کي هٿڪڙيون لڳل هيون ،جنهن بعد رڪارڊ چيڪ ڪيو ويو ته ٽنهي ڄڻن جي ڪابه انٽري ٿيل نه هئي ڇاپي بعد ريڊ ڪمشنر عزيز الله جمالي پاران ايس ايڇ او اي سيڪشن ٺل کي سڀاڻي رڪارڊ سميت طلب ڪري ورتو ،ناحق باندي بڻيل ٽنهي ڄڻن ٻڌايو ته اسانکي ناحق گرفتار ڪري پوليس چوڪي اوڍاڻي تي هٿڪڙيون هڻي ڪري ويهاريو ويو جڏهن ته اسان مٿان تشدد پڻ ڪيو هنن چيو ته اسان نٿان ڪوبه ڪيس داخل ٿيل ناهي پر پوليس ٻه لک روپيا رشوت طلب ڪري رهي هئي.

ڪراچي( ن پ ا) نقيب الله قتل ڪيس جي مک جوابدار اڳوڻي ايس ايس پي ملير رائو انوار عمري جي ادائيگي خاطر اي سي ايل مان نالو ڪڍڻ لاءِ سپريم ڪورٽ ۾ درخواست داخل ڪرائي ڇڏي.
درخواست ۾ رائو انوار موقف اختيار ڪيو ويو ته عمري تي وڃڻ چاهيان ٿو، تنهن ڪري ايل سي ايل مان نالو ڪڍيو وڃي پرڏيهه وڃڻ جي صورت ۾ ٽرائل ۾ ڪا به رنڊڪ پيش نه ايندي.
رائو انور چيو ته منهنجا ٻار ٻچا پرڏيهه ۾ ترسيل آهن، ان ڪري به منهنجو پرڏيهه وڃڻ ضروري ٿي پيو آهي، زندگي کي خطرو هئڻ سبب نه منهنجا ٻار پاڪستان اچي سگهن ٿا ۽ نه ئي مان اي سي ايل ۾ نالو هجڻ ڪري پرڏيهه وڃي سگهان پيو.
رائو انوار درخواست ۾ سپريم ڪورٽ کي نالو اي سي ايل مان ڪڍڻ جي استدعا ڪندي موقف اختيار ڪيو ته بينظير ڀٽو قتل ڪيس، ايان علي ڪيس ۽ 12 مئي سانحي جي ڪيس ۾ جوابدارن جا نالا اي سي ايل ۾ ناهن وڌا ويا

ميان صاحب(ن پ ا) ٽانوري محلي ۾ اڄ صبح بجلي جي 220 وولٽ جي تارن کي اوچتو باھ لڳي وئي جنهن سبب صبح دڪانن ۽ هوٽلن تي چانھھ پيئندڙ ماڻهن ۾ ڀاڄ پئجي وئي تارن کي باھ لڳڻ سبب 220 وولٽ جون ٽيئي تارون ٽٽي هيٺ ڪري پيون پر صبح جو سويل ماڻهن جي گهر هجڻ ڪري ڪو بھ نقصان نھ ٿيو جڏهن تھ تارن جي ٽٽي ڪرڻ سبب ٽانوري سيد ۽ راجپوت پاڙن جي بجلي بند ٿي وئي.اطلاع باوجود سيپڪو وارا آخري اطلاع تائين اڃان نھ پھتا ھئا

ڪنري (ن پ ا) ڪنري جي ڳوٺ ٺيڪيدار غلام رسول آرائين جي غريب ھاري خاندان سان تعلق رکندڙ شريمتي رامون زال نيلو ڪولھي کي ويم لاءِ صحت کاتي جي تحت ھلندڙ ٻارن جي اسپتال حاجره ميٽرنٽي ھوم آندو ويو تہ اسپتال جو گيٽ بند ھو ۽ بعد ۾ گيٽ کولڻ تي اتي موجود چوڪيدار ڊاڪٽرياڻي ۽ عملي جي موجود نہ ھئڻ جو چئي دروازو ٻيھر بند ڪري ڇڏيو ۽ منٿون ميڙون ڪرڻ باوجود ھنن کي اسپتال ۾ داخل ڪرڻ نہ ڏنو ويو جنھن تي ڪافي دير تائين بعد چوڪيدار ھنن کي اسپتال ۾ داخل ٿيڻ جي اجازت ڏني، اسپتال ۾ بيڊ نہ ھئڻ سبب ڳورھاري عورت کي سخت سردي ۾ ٿڌي فرش تي سمھاري ڇڏيو، اسپتال عملي جي رويي ۽ ڊاڪٽرن جي غير موجودگي جي خلاف ڳورھاري عورت جي وارثن ڪانجي ڪولھي، شامون ڪولھي، ويرجي، شريمتي ويرو ۽ ٻين اسپتال جي گيٽ سامھون احتجاجي مظاھرو ڪيو، ڳورھاري عورت جي سھري پارو مل صحافين آڏو دانھيندي ٻڌايو تہ ھو جڏھن اسپتال پھتا تہ ڊاڪٽرياڻي ۽ ٻيو عملو اتي موجود ڪونہ ھو، جنھن بعد ھو رات جو تقريبن ٽہ وڳي سول اسپتال ڪنري پھتا تہ اتي ڊيوٽي تي موجود ڊاڪٽر لجپت عورت کي داخل ڪرڻ کان اھو چئي انڪار ڪري ڇڏيو تہ ھتي ڊليوري جي سھولت موجود ناھي جڏھن تہ سول اسپتال ۾ اھو سھولت موجود آھي، متاثر سڄي رات خوار ٿيندا رھيا پر سندس جي ڪابه مدد نہ ڪئي وئي ۽ نہ ئي ڊاڪٽر کي سڏيو ويو، آخرڪار ڏھن ڪلاڪن جي عرصي کانپوءِ سخت سياري ۽ تڙپڻ بعد عورت اسپتال جي احاطي ۾ ٿڌي فرش تي ڊاڪٽرياڻي ۽ عملي جي غير موجودگي ۾ ٻار کي جنم ڏنو سندس ساڻ آيل عورتن ٻار کي جنم ڏيڻ ۾ ھن جي مدد ڪئي، ڊاڪٽرياڻي ۽ عملو رجسٽرڊ تي حاضري لڳائي غائب ٿي ويندو آھي ۽ گھر ويٺي پگھارون کڻڻ ۾ مصروف آھي، جڏھن تہ اسپتال جي سموري نظام لاءِ مقرر ڪيل ڪائونسلرن تي مشتمل ڪميٽي ۽ سٽي چيئرمين ھنن جي خلاف ڪاروائي ڪرڻ بدران بي وس بڻيل آھن، اطلاح ملڻ تي ايم ايس تعلقہ اسپتال ڪنري ڊاڪٽر مبارڪ علي درس ۽ ڪائونسلر حاجي عبدالحفيظ آرائين حاجره ميٽرنٽي ھوم پھتا، جنن متاثرن سان معلومات ورتي ۽ ھنن کي ڊيوٽي ڊاڪٽرياڻي ۽ عملي جي خلاف ڪاروائي جو يقين ڏياريو، متاثرن وزيراعليٰ سنڌ، صوبائي وزير صحت ۽ ٻين کان معاملي جو فوري نوٽيس وٺي ذميوران خلاف ڪاروائي جي گھر ڪئي آھي.

ڄامشورو (پڌرائي)سنڌ يونيورسٽي جي انسٽيٽيوٽ آف سنڌالاجي پاران 2017ع ۾ ڇپيل ڪتابن تي ايوارڊ ڏيڻ جو اعلان ڪيو ويو آهي. ان سلسلي ۾انسٽيٽيوٽ آف سنڌالاجي جي ڊائريڪٽر ڊاڪٽر اسحاق سميجو پاران جاري ڪيل پڌرائي موجب ججن جي ڏنل فيصلي موجب تاريخ جي موضوع تي ڊاڪٽر نبي بخش خان بلوچ جي ڪتاب “باقياتِ از احوال ڪلهوڙا”، تحقيق جي موضوع تي ڊاڪٽر شازيه سفير جي ڪتاب “شاهه عبداللطيف ڀٽائيءَ جي شاعريءَ جو لساني اڀياس”، سوانحي ادب/سفرنامي جي موضوع تي منصور ٿلهي جي ڪتاب “سوکي بندر ۽ سامونڊي سوز”، ناول تي اڪبر سومري جي ناول “کماچ”، ٻاراڻي ادب تي ياسر قاضيءَ جي ڪتاب“لولو ڏنم ڪانوَ کي”، شاعريءَ تي ادل سومري جي ڪتاب “نيروليءَ جو خواب” ۽ ترجمي ۾ جوهر بروهيءَ جي جديد سنڌي شاعريءَ جي بروهي زبان ۾ ڪيل منظوم ترجمي واري ڪتاب “سنڌ رنگ” کي انعامن لاءِ چونڊيو ويو آهي. جڏهن ته ڪهاڻيءَ جي صنف تي جهان آرا سومرو جي ڪتاب“ماءُ منهنجو جندڙو” ۽ ابراهيم کرل جي ڪتاب “موٽي ايندس مان” هڪ جيتريون مارڪون کنيون، جنهن سبب ايوارڊ جي رقم ٻنهي ليکڪن ۾ برابريءَ جي بنياد تي ورهائڻ جو فيصلو ڪيو ويو آهي ۽ ٻنهي ليکڪن کي ايوارڊ پڻ ڏنو ويندو. ياد رهي ته سنڌالاجي هرهڪ ڪتاب تي ٽن ٽن ججن کان لکت ۾ ورتل راءِ جي آڌار تي ڄاڻايل نتيجن جو اعلان ڪيو آهي. سنڌالاجي جي ڊائريڪٽر ڊاڪٽر اسحاق سميجي سمورن ايوارڊ ماڻيندڙ ليکڪن کي مبارڪ ڏيندي چيو آهي ته سنڌالاجي کي اميد آهي ته هن ايوارڊ ملڻ بعد ڄاڻايل ليکڪ پنهنجي ٻوليءَ جي جهولي وڌيڪ معياري تخليقن ۽ ڪتابن سان ڀريندا ۽ سنڌالاجي سان پنهنجو علمي تعاون جاري رکندا. ڊاڪٽر اسحاق سميجي سمورن اشاعتي ادارن ۽ ليکڪن کي گذارش ڪئي آهي ته اهي 2018ع ۾ ڇپيل پنهنجن ڪتابن جون چار چار ڪاپيون انسٽيٽيوٽ آف سنڌالاجي سنڌ يونيورسٽي ڄام شوري جي ڏس پتي تي ڏياري موڪلين، ته جيئن انهن کي ايندڙ ايوارڊن واري مرحلي جو حصو بڻائي سگهجي.

ڪلوئي(ن پ ا)سڄي ٿر جيان ڪلوئي تعلقي ۾ ڏڪاري حالتون برقرار، ڪلوئي لڳ ستون ميل موري ويجهو پورهيت جو هڪ ڏينهن جو ڄاول ٻارڙو مبينا سهولتن جي کوٽ بک بدحاليءَ سبب فوت ٿي ويو، ڪاري ڏڪار سبب غريب پورهيت ٻن وقتن جي ماني لاءِ پڻ پريشان آهن، ستون ميل لڳ ڳوٺ ارباب احسان فارم واسي پورهيت پريم ڪولهي جو هڪ ڏينهن جو ڄاول ٻارڙو مبينا بک بدحالي ۽ بيمارين وگهي فوت ٿي ويو آهي.
پورهيت دانهيندي چيو منهنجي گهر واري انتهائي ڪمزور هئي مقامي اسپتال عملي پاران ڪمزور ۽ ڳورهاري عورتن لاءِ آيل راشن پڻ نه ڏنو ويو ۽ ٻار انتهائي ڪمزور پيدا ٿيو،جنهن کي اسان اسپتال کڻي وڃي رهيا هئاسين ته رستي ۾ ٻارڙو فوت ٿي ويو، رهواسين اعلي اختيارين کان نوٽيس وٺڻ جو مطالبو ڪيو آهي.
ٻئي طرف ڳورهاري ۽ ڪمزور عورتن کي امدادي راشن نه ملڻ ۽ سوين ڳوٺ سروي ۾ شامل نه هجڻ خلاف يوسي گرڙاٻه ،ستون ميل ۽ ٻين علائقن جي مختلف ڳوٺن لال ساهڙ، ٻانڌو، ڏمڀرلي، اتادو سومرا، ڊاڀو سميجا، سپڻاڻي سومرا، ارباب احسان فارم ۽ ٻين ڳوٺن مان آيل ڏڪار متاثر ڳوٺاڻن منظور ساهڙ، لکاڏنو ساهڙ، مانجھي، عالم، قربان، ڀائي خان، کيتو مل، ميوو ۽ ٻين امدادي راشن لاءِ سندن ڳوٺ سروي نه ٿيڻ خلاف دانهيندي چيو ته يوسي گرڙاٻه جا ڄاڻايل سمورا ڳوٺ اڃا تائين امدادي راشن لاءِ سروي پڻ نه ڪيا ويا آهن.
رابطو ڪرڻ تي صحت کاتي ٿرپارڪر جي ڊي ايڇ او علاو الدين سومرو جو چوڻ آهي ته هي راشن صرف ڳورهاري ۽ ڪمزور عورتن جو آهي جڏهن ته علائقي ۾ ڏڪاري حالتن سبب هر ماڻهون چاهي ٿو ته راشن جو سامان کين ملي جيڪو ممڪن نه آهي.

پنگريو(ن پ ا)پنگريو لڳ مدرسي جامع حنفيه سلطان المدارس مان پراسرار طريقي سان گم ٿيل نينگر 13 ورهيه محبت ولد رمضان ملاح ڳولا بعد هٿ اچي ويو آهي ،نينگر محبت ملاح ٻڌايو ته قاري عبدالباسط مدرسي کان هٽي ڪري ذاتي ڪم وٺندو آهي ۽ جواب ڏيڻ تي تشدد پڻ ڪندو آهي جنهن ڪري مجبور ٿي خوف مان نڪتو هئس .

سرحد(ن پ ا) سرحد مان اڻڄاتل چور دُڪان جا تالا ٽوڙي روڪ رقم ۽ سامان چوري ڪري فرار ٿي ويا. خبرموجب اسٽيشن روڊ تي واقع واپاري سنتوش ڪمار جي ڪريانه جي دوڪان جا تالا ٽوڙي دوڪان ۾ پيل هزارين روپيه روڪ رقم ۽ ٻيو سامان کڻي فرار ٿي ويا. دوڪان مان چوري جي واردات جو سرحد پوليس کي اطلاع پڻ ڏنو ويو.

جيڪب آباد(رپورٽر) جميعت علماء اسلام جي مرڪزي ترجمان ۽ متحده مجلس عمل جي رابطا ڪميٽي جي سربراھ حافظ حسين احمد چيو ته ميان نواز شريف کي العزيزيه ريفرنس ۾ سزا “عزيزن” جي بدولت ملي آهي، لڳي ٿو ته پوري کيپ “اسيمبلي” کان “اڊيالا” منتقل ٿي ويندي. “پنهنجي اخبار” سان ڳالهائيندي حافظ حسين احمد چيو ته العزيزيه ريفرنس ۾ جيڪڏهن نواز شريف جا پٽ پيش ٿين ھا ته اڄ معاملو مختلف ھجي ھا، العزيزيه ريفرنس جو فيصلو عزيزن جي بدولت آيو آهي، ھن چيو ته احتساب عليم کان وٺي عليمه تائين ٿيڻ کپي،اسان ته چئون ٿا احتساب سڀ جو ٿيڻ کپي ۽ احتساب کي انتقام ۾ تبديل نه ڪيو وڃي، ھن چيو ته ملڪ ۾ جيڪا صورتحال موجود آهي اگر اھا صورتحال رھي ته پوءِ پوري کيپ “اسيمبلي” کان “اڊيالا” منتقل ٿي ويندي، ھڪ سوال جي جواب ۾ ھن چيو ته اپوزيشن کي اپوزيشن ئي ڪرڻ کپي مگر اپوزيشن ان پوزيشن ۾ ناهي، اڄ به پنجاب جو ميان ۽ بي بي جي ميان جي حوالي سان جيڪو ڪجھ ٿي رهيو آهي ان باوجود ھي پاڻ ۾ اپوزيشن کي متحد ڪرڻ لاءِ تيار ناهن.

شھدادڪوٽ (رپورٽر )شھدادڪوٽ ۾ وڌندڙ بدامني خلاف شھري اتحاد جي سڏ تي آل پارٽيز ڪانفرنس ،ڏوھن جي واپسي لاء 3 ڏينھن جو الٽيميٽم، 28 ڊ سمبر کان ڀرپور تحريڪ ھلائڻ جو اعلان، ان ڏس ۾ شھدادڪوٽ ۾ تيزي سان وڌندڙ بدامني خلاف شھري اتحاد جي سڏ تي شھر جي ليبر ھال ۾ آل پارٽيز ڪانفرس ٿي، جنھن ۾ شھر جي سياسي سماجي تنظيمن جي اڳواڻن شرڪت ڪئي،ان موقعي تي پي ٽي آءِ اڳواڻ مير غيبي خان مغيري،سماجي اڳواڻ وھاب پندراڻي،جي يو آء اڳواڻ مولانا محمد جان عابد،شھري اتحاد جي ايڊووڪيٽ عبدالوحيد ڀٽي،ايس يو پي اڳواڻ حمل خشڪ، ايس ٽي پي جي حيات تونيو،پورھيت اڳواڻ ڪامريڊ عرس سيلرو،قومپرست اڳواڻ حبدار ميرجت،پ پ اڳواڻ اڳواڻ اصغر شيخ،ڪائونسلر انيل ڪمار، شھيد ڀٽو جي وزير کوسو، شيعا اڳواڻ سيد اڪبرشاه ۽ ٻين چيو ته شھر ۾ تيزي سان وڌندڙ بدامني جي ذميوار پوليس انتظاميه مٿان آھي،پر پوليس خاموش تماشائي بڻيل آھي ڏوھ،ڦر،چوريون روز جو معمول بڻجي ويون آھن،ڏوھن ۾ اضافي سبب واپاري غيرمحفوظ بڻيل آھن. ھنن آءِ جي سنڌ کان مطالبو ڪيو ته 3 ڏينھن اندر شھدادڪوٽ ۾ ٿيندڙ ڏوھاري سرگرمين جو نوٽيس وٺي ڪيل ڏوھ واپس ڪرايا وڃن،ٻئي صورت ۾ 28 ڊسمبر کان ڀرپور تحريڪ ھلائي ويندي جيڪا شھر جي امن ڪرائڻ تائين جاري رھندي.