گمبٽ)ن پ ا)گمبٽ جي ڪچي واري علائقي ڳوٺ گلوسيال مان هڪ مهينو اڳ پاڻي جي واري تان اغوا ٿيل پورهيت شمن چاچڙ کي پوليس بازياب ڪرائي10 هٿياربندن کي گرفتار ڪرڻ جي دعوا ڪري ڇڏي، ان موقعي تي اي ايس پي خيرپور عمران نيازي سان رابطو ڪرڻ تي ٻڌايو ته هڪ مهينو اڳ اغوا ٿي ويل پورهيت شمن چاچڙ کي هٿياربند هڪ هنڌ کان ٻئي هنڌ منتقل ڪري رهيا هئا ته ڳجهي اطلاع تي پوليس اٽالن سان پهچي اغوا ٿيل شمن چاچڙ کي بازياب ڪرائي 10 ماڻهن کي هٿيارن سميت گرفتار ڪري ورتو آهي.
ڀارت سميت سمورن ملڪن سان واپار ۽ مضبوط لاڳاپا چاهيون ٿا:اسد عمر
اسلام آباد (رپورٽر) ناڻي ۽ اقتصادي معاملن واري وفاقي وزير اسد عمر چيو آهي ته ڀارت سميت خطي جي سمورن ملڪن سان واپار ۽ مضبوط لاڳاپا چاهيون ٿا، حڪومت جي ڪوشش آهي ته اهڙي پاليسي ٺاهي وڃي جنهن ۾ پوري ملڪ کي فائدو ٿئي، ڪوئيٽا ۾ چيمبر آف ڪامرس اينڊ انڊسٽري جي ميمبرن کي خطاب وفاقي وزير اسد عمر چيو ته گوادر ۾ ايڪسپورٽ پروسيسنگ زون ۽ اسپيشل اڪنامڪ زون ٺاهيا پيا وڃن، سي پيڪ جي ايندڙ مرحلي ۾ صنعت ۽ واپار کي هٿي ڏيڻي آهي، هن چيو ته غربت جو خاتمو، ڪاروباري سرگرمين کي هٿي وٺرائڻ ۽ نوجوانن کي روزگار فراهم ڪرڻ اسان جي اولين ترجيح آهي، پاڪ ايران واپار کي هٿي وٺرائڻ لاءِ مهيني ۾ رپورٽ تيار ڪرڻ جي هدايت ڪئي آهي، حلال فوڊز جي عالمي مارڪيٽ ۾ بلوچستان موثر ڪردار ادا ڪري سگهي ٿو.
جوهي ڀرسان ڪانڌين کان ڦرلٽ، احتجاج، اطلاع باوجود پوليس نه پهتي
دادو(رپورٽر) جوهي جي حاجي لنڪ روڊ تي حادثي ۾ فوت ٿيل ميان ڏتو کوسو جو مڙھ سول اسپتال دادو کان ڪاڇي جي باز مال کوسو نيو پئي ويو ته جوهي ڀرسان حاجي خان لنڪ روڊ تي 12 هٿياربند ڦورن ايمبولنس ۽ ان سان گڏ موٽر سائيڪلن تي ويندڙ ڳوٺاڻن کي هٿيارن جي زور تي روڪي 2 موٽر سائيڪلون ۽ 8 موبائيل سيٽ ڦر ڪري ڀڄي ويا آهن فوتي ڳوٺاڻي جي وارثن پاران جوهي پوليس کي اطلاع ڏنو پر پوليس ٻن ڪلاڪن تائين واقعي واري هنڌ نه پهتي ڳوٺاڻن محبوب ، اعجاز کوسو ، شريف لنڊ ۽ ٻين احتجاج ڪندي چيو ته ميت سان گڏ هئڻ باوجود،انسانيت کان ڪريل ڦورن کائن ڦر ڪئي آهي ٻئي طرف ايس ايس پي دادو پرويز احمد عمراڻي جو چوڻ آهي اهڙي واقعي جو اطلاع آهي جلد پوليس واقعي ۾ ملوث جوابدار گرفتار ڪري ڦر ڪيل سامان واپس ڪرائيندي.
ڪرمپور ۾ پورهيت جي قتل جو ڪيس تيغاڻي برادري جي 11 ڄڻن خلاف داخل
بجاراڻي – تيغاڻي تڪرار تان 2 ڏينهن اڳ پورهيت علي بجاراڻي قتل ٿيو
نوجوان جي قتل بعد ڌرين ۾ ٺاهه جي تاريخ مقرر ڪرڻ لاءَ رٿيل گڏجاڻي ملتوي
ڪرمپور (رپورٽر)ڪرمپور ۾ بجاراڻي- تيغاڻي خوني تڪرار ۾ ٻه ڏينهن اڳ بيگناه قتل ٿيل پورهيت نوجوان دوست علي بجاراڻي جو قتل ڪيس سندس ڀائيٽي جي فرياد تي تيغاڻي برادري جي 11 جوابدارن خلاف غوثپور ٿاڻي تي داخل ڪيو ويو آهي .ڪيس ۾ غازي تيغاڻي ، نادر ،ارباب ، واحدبخش ، ثناءالله، علي محمد، محبوب،رحمت الله ۽ ٽن نامعلوم جوابدارن کي ڪيس ۾ نامزد ڪيو ويو پوليس پاران هڪ جوابدار رحمت الله عرف ٻوڙو تيغاڻي کي گرفتار ڪرڻ جي دعوي ڪئي آهي . هوڏانهن گذريل ڏينهن ٻنهي برادرين جي سردارن سردار محبوب علي بجاراڻي ، سردار تيغو خان تيغاڻي ۽ (جسم) چيئرمين رياض چانڊيو ۽ سردار منظور پنهنور جي گڏجاڻي ڪراچي ۾ رٿيل هئي جنهن ۾ خوني جهيڙي جي خاتمي لاء جرڳي جي تاريخ مقرر ڪرڻي هئي پر هن واقعي کان پوء اها گڏجاڻي ڪينسل ڪئي وئي ۽ فيصلي جي تاريخ مقرر نه ٿي سگهي .
ڪشمور لڳ ٽريڪٽر جو موٽرسائيڪل کي ٽڪر، نوجوان فوت، 2 ڄڻا زخمي
ڪشمور(ن پ ا) ڪشمور لڳ گڊو ۾ شھنشاھ محلا مين روڊ تي ٽريڪٽر جي موٽرسائيڪل سان ٽڪر ٿيڻ سبب نوجوان فوت، 2 ڄڻا زخمي ٿي پيا. شھنشاھ محلا گڊو ۾ مين روڊ تي ڪمند سان ڀريل ٽريڪٽر جو موٽرسائيڪل کي ٽڪر لڳي ويو، نتيجي ۾ موٽرسائيڪل سوار 20 ورھين جو نوجوان ناصر سھرياڻي ٿڏي تي فوت ٿي ويو. جڏھن تھ حيدر علي ٽانوري ۽ علي رضا سخت زخمي ٿي پيا. گڊو پوليس واقعي واري ھنڌ پھچي فوتي جو لاش تحويل ۾ وٺي ڇڏيو، زخمين کي اسپتال منتقل ڪيو ويو. ضروري ڪارروائي بعد فوتي جو لاش وارثن حوالي ڪيو ويو. پوليس ٽريڪٽر تحويل ۾ وٺي ڊرائيور کي بھ گرفتار ڪري ورتو.
رتوديري ۾ نوجوان قتل، قومي شاهراهه تي لاش رکي ڌرڻو
رتوديرو (م ڊ) رتوديرو ۾ هٿياربندن نوجوان کي قتل ڪري ڇڏيو، لاش رکي وارثن جو ڌرڻو، رتوديرو جي وچ شهر ۾ ٽيليفون ايڪسچينج ڀرسان هٿياربندن 19 ورهين جي برڪت علي ولد ممتاز علي ويسر کي گوليون هنيون، جوابدار واردات کانپوءِ فائرنگ ڪندا فرار ٿي ويا، زخمي نوجوان کي سندس وارث تعلقه اسپتال کڻائي ويا جتي هو زخمن جا سور نه سهندي فوت ٿي ويو، مقتول جو لاش تعلقه اسپتال مان پوسٽ مارٽم بعد وارثن حوالي ڪيو ويو، وارثن نوجوان جو مڙھ کڻي لاڙڪاڻو سکر ۽ ٻين شهرن ڏانهن ويندڙ قومي شاهراهه تي رکي پوليس خلاف ڌرڻو هنيو، ان موقعي تي مقتول جي والد ممتاز علي ويسر ميڊيا سان ڳالهائيندي الزام هنيو ته اسان جي نوجوان کي عمراڻي برادري جي ماڻهن قتل ڪري وڏو ناحق ڪيو آھي، جيسيتائين پوليس قاتل گرفتار نه ڪندي اسان لاش رکي ويھي رهنداسين، جڏهن ته روڊ بند هئڻ ڪري ٻنهي پاسن کان گاڏين جون ڊگهيون قطارون بيهجي ويون، جڏهن ته آخري اطلائن تائين واقعي جو ڪو به ڪيس داخل نه ٿي سگهيو.
ٽنڊي آدم ويجھو ٽرڪ جي ٽڪر ۾ نينگر فوت
ٽنڊوآدم ( نمائندو ) ٽنڊوآدم حيدرآباد روڊ تي ڳوٺ غازي خان ڪاتيار وٽ تيز رفتار ٽرڪ جي ٽڪر م 8 سالا ٻاررو شڪيل پٽ محمد شريف ڪاتيارٿڏي تي فوت ٿي ويو لاش تعلقه اسپتال آڻڻ بعد ضروري ڪارروائي بعد وارث لاش ڳوٺ غازي خان ڪاتيار کڻائي ويا ٻارڙي جو لاش گهر پهچڻ تي قهرام مچي ويو سٽي پوليس ٽرڪ ڊرائيور گلباز کي گرفتار ڪري ورتو آهي
حيدرآباد ۾ 18 ڏينهن اڳ حادثي ۾ زخمي ٿيل لاوارث نينگر فوت
حيدرآباد (رپورٽر) حيدرآباد جي حسين آباد ٿاڻي جي حد ۾ آٽو ڀان روڊ تي 18 ڏينهن اڳ حادثي ۾ زخمي ٿيل نامعلوم نينگر سول اسپتال حيدرآباد جي آء سي يو ۾ فوت ٿي ويو آھي. راهگيرن کيس سول اسپتال ۾ داخل ڪرايو هو پر سندس وارثن جو پتو پئجي نه سگهيو و. هو 18 ڏينهن آء سي يو ۾ رهيو جتي اڄ فوت ٿي ويو. سندس لاش سول اسپتال جي مرده خاني ۾ رکيو ويو آھي. لاڳاپيل پوليس به اسپتال انتظاميه جي باربار رابطي جي باوجد ان نينگر جي ڪا واهر نه ڪئي.
چڙ ڏياريندڙ تقريرن جا 2 ڪيس اي ڪلاس ڪرڻ جو حڪم
ڪراچي جي دهشتگردي ٽوڙ عدالت ۾ ٻڌڻي، ايم ڪيو ايم اڳواڻن خلاف 2 ڪيس اي ڪلاس ڪيا وڃن: پوليس
ٻنهي ڪيسن جا فريادي پنهنجي ڏنل ايڊريس تي موجود ناهن: پوليس جي رپورٽ
ڪراچي( رپورٽر) ڪراچي پوليس چڙڏياريندڙ تقرير ۾ سهولتڪاري جي ٽن ڪيسن مان 2 ڪيس اَي ڪلاس ڪرڻ جي سفارش ڪري ڇڏي، پوليس جو چوڻ آهي ته ٻنهي ڪيسن جا فريادي پنهنجي ڏنل ايڊريس تي موجود ناهن، عدالت فريادين کي ڳولي پيش ڪرڻ جو حڪم ڏئي ڇڏيو.
ڪراچي جي دهشتگردي ٽوڙ عدالت ۾ ايم ڪيو ايم باني جي چڙڏياريندڙ تقرير ۾ سهولتڪاري بابت ٽن ڪيسن جي ٻڌڻي ٿي، جنهن دوران ايم ڪيو ايم اڳواڻ فاروق ستار، خواجا اظهار الحسن، رئوف صديقي ۽ ٻيا جوابدار پيش ٿيا.
پوليس ٽن مان ٻن ڪيسن کي اي ڪلاس ڪرڻ لاءِ ٻيهر رپورٽ پيش ڪري ڇڏي، جنهن ۾ پوليس ڄاڻايو آهي ته ٻنهي ڪيسن جا فريادي پنهنجي ڏنل ايڊريس تي موجود نه آهن، تنهنڪري جوابدارن خلاف 2 ڪيس اي ڪلاس ڪيا وڃن.
لاڙڪاڻي ۾ سڱاوتي تڪرار تان ٻه ڌريون وڙهي پيون،لٺيون ۽ سرون لڳڻ سبب 6 ڄڻا زخمي
لاڙڪاڻو(بيورو رپورٽ) لاڙڪاڻي شهر جي وليد ٿاڻي جي حد منور آباد ۾ سڱاوتي تڪرار تان ڪلهوڙا برادري جي ٻن ڌرين وچ ۾ جهيڙو ٿي پيو، جنهن دوران لٺيون، سرون ۽ ٺونشا لڳڻ سبب هڪ ئي ڌر جا نديم علي، جمشيد ڪلهوڙو، عاطف ڪلهوڙو، حسيب، جنيد ڪلهوڙو ۽ ٻيا سخت زخمي ٿي پيا، جن کي چانڊڪا ميڊيڪل اسپتال جي ايمرجنسي واري وارڊ ۾ داخل ڪيو ويو ، ان موقعي تي جهيڙي ۾ زخمي ٿيلن صحافين کي ٻڌايو ته سڱاوتي تڪرار تان جوابدار شمن علي ڪلهوڙو، محمد قاسم، علي حسن، سليم ڪلهوڙو، خدا بخش ڪلهوڙو ۽ ٻين هٿياربندن اسان مٿان حملو ڪيو.
ٺل: آپگهات جي ڪوشش دوران زخمي ٿيل نوجوان فوت
ٺل ( رپورٽر) گذريل ڏينهن آپگهات جي ڪوشش ڪندي زخمي ٿيل نوجوان لاڙڪاڻي جي اسپتال ۾ فوت ٿي ويو، ڳوٺ ٻيلو ڪٽو ۾ نوجوان عبدالهادي بنگلاڻي پاڻ تي پسٽل جو فائر ڪري آپگهات جي ڪوشش ڪئي ۽ گولي لڳڻ سبب سخت زخمي ٿي پيو، کيس فوري طور لاڙڪاڻي جي اسپتال منتقل ڪيو ويو، جتي هو اڄ زخمن جي سٽ نه سهندي فوت ٿي ويو