حيدرآباد(رپورٽر)گئس سلينڊر ڌماڪي جي نتيجي ۾ زخمي ٿيل 5 ڄڻن مان 14 ورهين جي نينگري فوت ٿي ويو.
راهوڪي ٿاڻي جي حد ۾ ڳوٺ ڇٽو مير بحر ۾ گئس سلينڊر ڌماڪي جي نتيجي ۾ 5 ڄڻا زخمي ٿيا هئا، جن کي اسپتال منتقل ڪيو ويو، زخمين مان 14 ورهين جي عائشه ملاح زخمن جي سٽ نه سهندي دم ڏئي ڇڏيو.

جيڪب آباد)رپورٽر)جيڪب آباد ڀرسان شمبي شاھ لڳ ٻه موٽرسائيڪلون ٽڪرائجي ويون،هڪ ڄڻو فوت ۽ ٻه ڄڻا زخمي ٿي پيا،صدر ٿاڻي جي حد شنبي شاھ لڳ ٻن موٽرسائيڪلن ۾ آمھون سامھون ٽڪر ٿي پيو ٽڪر جي نتيجي ۾ 50 ورهين جو عبداللطيف جکراڻي موقعي تي فوت ٿي ويو، جڏهن ته سيف الدين ۽ قمرالدين جکراڻي شديد زخمي ٿي پيا،علائقي واسين لاش ۽ زخمين کي سول اسپتال پهچايو،جتي زخمين جو علاج ڪيو پيو وڃي اطلاع ملڻ تي فوتي ۽ زخمين جا وارث اسپتال پھتا لاش کڻائي ڪري پنهنجي ڳوٺ روانا ٿي ويا ،صدر پوليس جي اھلڪار رابطي ڪرڻ تي ٻڌايو ته حادثو اسان جي حد ۾ ناھي ٿيو ،بلوچستان جو حد آهي اھا پوليس وڌيڪ ڪاروائي ڪندي ٻي پاسي فوتي ۽ زخمي پاڻ ۾ پيءُ پٽ آھن جن جو تعلق بلوچستان جي ٻڌائي پئي وڃي.

صالح پٽ (ن پ ا) صالح پٽ ڀرسان زمين جي تڪرار تان پيرسن قتل ٿي ويو،ان ڏس ۾ صالح پٽ ڀرسان ڳوٺ ڪريم بخش مڱريو ۾ زمين جي تڪرار تان پنجن جوابدرن گھر م ستل 70 ورهيه ڏاتر ڏنو ولد محمد پناھ مڱريو کي بندوق جا فائر ڪري قتل ڪري ڇڏيو، اھڙي اطلاع بعد صالح پٽ پوليس واقعي واري ھنڌ پھچي مقتول ڏاتر ڏنو مڱريو جو لاش کڻائي تعلقه اسپتال روھڙي مان پوسٽ مارٽم ڪرائڻ بعد لاش وارثن حوالي ڪري ڇڏيو، جڏھن ته آخري اطلاعن تائين واقعي جو ڪيس داخل نه ٿي سگھيو آهي ۽ نه وري ڪا گرفتاري ٿي سگھي آھي ، صالح پٽ پوليس ٻڌايو ته مقتول ڏاتر ڏنو مڱريو جي پٽ محمد نواز مڱريو ٻڌايو آھي ته اسان جو پنھنجي سئوٽن سان زمين جو تڪرار ھلندڙ آھي جنهن تي عبدالفتاح مڱريو سميت پنجن جوابدارن اسان جي گھر ۾ گھڙي گھر اندر ستل سندن پيءُ کي بندوق جا فائر ڪري قتل ڪري ڇڏيو آھي ،پوليس مطابق فريادي ٿاڻي تي نه آيا آھن جيئن فريادي ٿاڻي تي ايندا ته ڪيس داخل ڪيو ويندو.

ڪڙيو گهنور )ن پ ا) گولاڙچي ويجهو شادي نه ڪرائڻ تان نوجوان آپگهات ڪري ڇڏيو.
گولاڙچي جي گراڙي ٿاڻي جي حد ۾ 22 سالن جي نوجوان دودو ڀيل جو وڻ ۾ ڦاهو لڳل لاش هٿ آيو، سندس وارثن جو چوڻ آهي ته دودو ڀيل ڪافي عرصي کان شادي ڪرائڻ جي ضد ڪري رهيو هو، في الحال انڪار ڪرڻ تي هن انتهائي قدم کنيو.
آپگهات ڪندڙ نوجوان جو لاش وڻ مان لاهي وارثن حوالي ڪيو ويو

سانگھڙ(ن پ ا)ڳوٺ گھنڊڻ ۾ گھرجي ڇت ڪرڻ سبب عورت سميت 2 نينگريون فوت ٿي ويون جڏھن تھ ھڪ ٻارڙو زخمي ٿي پيو. ٻار کي اسپتال پھچايو ويو.گھر ۾ موجود ماڻھو صبح جو ناشتو ڪري رھيا ھئا تھ اوچتو ڌماڪي سان گھر جي ڇت ڪري پئي.واقعي سبب ڳوٺ ۾ قيامت برپا ٿي وئي.

ڪراچي(اسٽاف رپورٽر) سنڌ جي اڳوڻي گورنر محمد زبير چيو آهي ته سنڌ ۾ گورنر راڄ لاڳو ڪرڻ لاءِ ماحول پيدا ڪيو پيو وڃي، گورنر راڄ نه لڳي ته بهتر آهي، پيپلزپارٽي سنڌ جي سڀ کان وڏي پارٽي آهي، وزيراعظم گھرووزارت پاڻ وٽ رکڻ جو شوق صرف ان لاءِ آهي ته ايف آءِ سندس ماتحت هجي. عمران خان کي شوق آهي ته سينٽرلائز سسٽم هجي جنهن کي هو پاڻ ويهي ڪنٽرول ڪري. ڪير سندس ڳالهه نٿو مڃي ته جي آءِ ٽي ٺاهي ڇڏين ٿا. هن اهڙو اظهار ڪراچي جي ڊفينس واري علائقي ۾ امام بارگاهه يثرب ۾ علي رضا عابدي جي ٽيجھي ۾ شرڪت دوران ميڊيا سان ڳالهائيندي ڪيو. محمد زبير چيو ته علي رضا عابدي سٺو انسان ۽ بهترين سياستدان هو، وزيراعظم کي به سندس وارثن سان تعزيت لاءِ ڪراچي اچڻ گھرجي ها، ڇاڪاڻ ته وزيراعظم، گھرو وزير به آهي. هن چيو ته 2013 ۾ هر طرف ڌماڪا ٿيندا هئا پر اسان جي حڪومت پهرين 100 ڏينهن ۾ آپريشن شروع ڪيو، جيڪو اڃا جاري آهي. نواز ليگ حڪومت رينجرز کي پوليسنگ اختيار ڏياريا، جنهن بعد 2015 کان حالتون بهتر ٿيڻ شروع ٿيون. هن چيو ته ان کان اڳ جو دير ٿي وڃي، وزيراعظم کي ڪم ڪرڻ گھرجي. اڳواڻي گورنر هڪ سوال جي جواب ۾ چيو ته ٻن بلين وارو معاملو نسورو ڪوڙ آهي. نوازشريف سمورا عدالتي فيصلا قبول ڪيا، سندس متعلق ڪا به منفي ڳالهه سامهون نه آئي آهي. ججز فيصلا ڪندا آهن ته ڏوهه لکندا آهن، پهرين پٽ کان منافعو نه وٺڻ ۽ هاڻي وري پٽ کان فائدو وٺڻ جي سزا ملي آهي. ايف بي آر ڪجهه ٻيو ۽ نيب وري ٻيون ڳالهه ڪري ٿي. فيصل واوڊا ته روز نئين ڪهاڻي پيش ڪري ٿو.هن چيو ته وزيراعظم کي گھرو وزير بڻجڻ جوشوق ان لاءِ آهي جو هو چاهي ٿو ته ايف آءِ اي سندس ماتحت هجي.ڪير سندن ڳالهيون نٿو مڃي ته جي آءِ ٽي ڍاهي ٿا ڇڏي. هن چيو ته پيپلزپارٽي سنڌ جي وڏي پارٽي آهي، صوبي ۾ گورنر راڄ لاءِ ماحول ٺاهيو پيو وڃي. جيڪو غلط آهي، گورنر راڄ نه لڳڻ گھرجي.

ٽنڊوآدم (ن پ ا)ٽنڊي آدم ۾ نوجوان گهرڀاتين کان ناراض ٿي زهر پي ڇڏيو،ان ڏس ۾ٽنڊوآدم جي علائقي رشيد ڪالوني ۾ 25 ورهيه نوجوان محمد نذير پٽ محمد مائٽن کان ناراض ٿي زهريلي دواپي آپگهات جي ڪوشش ڪئي، جنهن کي وارثن تعلقي آسپتال آندو .

سيوھڻ ( ن پ ا ) ٽول پلازه وٽ انڊس هاءِ وي تي ڪار هڪ مزدا سان ٽڪرائجي وئي، جنهن جي نتيجي ۾ صوبو لغاري نالي هڪ شخص فوت ٿي ويو ۽ 4 ڄڻا زخمي ٿي پيا، زخمين ۾ مشتاق، فدا حسين، محبوب لغاري ۽ اصغر شامل آهن، جن کي ڄامشورو اسپتال پهچايو ويو.
پوليس موجب حادثي جو شڪار ٿيل ڪار سوار ماڻهو شهيد بينظير ڀٽو جي ورسي تقريبن ۾ شرڪت لاءِ ڳڙهي خدابخش وڃي رهيا هئا

ڪوٽ لالو (ن پ ا) ڪوٽ لالو پوليس پورهيت جي گهر تي حملو ڪندڙن خلاف ڪارروائي ڪري هڪ ڄڻي کي گرفتار ڪري ورتو.
جلالجي چودڳي لڳ پوليس هڪ گهر تي چڙهائي ڪري شر برادري سان واسطو رکندڙ هڪ جوابدار کي گرفتار ڪيو، پوليس جو چوڻ آهي ته پورهيت جي گهر تي حملي ۾ ملوث سمورن جوابدارن کي گرفتار ڪري ڪيس داخل ڪيو ويو.
واضح رهي ته ڪجهه ڏيبهن اڳ جوابدارن پورهيت اعجاز ونگي جي گهر تي حملو ڪري عورتن سميت گهرڀاتين کي زخمي ڪري وڌو هو

خانواهڻ )ن پ ا) گٽرن جي گندي پاڻي غريب پورهيتن جا اجها ڊاهي ڇڏيا
گٽرن جو گندي پاڻي ڪافي عرصي کان نيڪال نه ٿيڻ ڪري غريب پورهيتن جا 2 گهر ڊهي پيا، جنهن سبب پورهيتن سخت سيءُ ۾ پريشانين کي منهن ڏنو.
پورهيتن شاهد ملاح ۽ گلشن سولنگي جو چوڻ آهي ته ڪافي عرصي کان گندو پاڻي بيٺل هئڻ سبب گهرن جون ڀتيون ڪمزور ٿي ويون ۽ رات دير سان ٻئي گهر ڊهي پيا، ڪيترائي ڀيرا شڪايتون ڪرڻ باوجود پاڻي نيڪال نه ڪيو ويو.
پورهيتن مطالبو ڪيو ته پاڻي نيڪال ڪري سندن نقصان جو ازالو ڪيو وڃي

حيدرآباد (بيورو رپورٽ) حيدرآباد ۾ ڪينسر جي مرض ۾ مبتلا همراهه آپگهات ڪري ڇڏيو. ڀنگي پاڙي جي رهواسي 50سالن جي لڇمڻ داس پکي ۾ رسو ٻڌي زندگي جو ڏيئو اجهائي ڇڏيو. مقامي ماڻهن جي اطلاع تي پوليس پهچي لاش تحويل ۾ وٺي اسپتال آندو، جتان ضروري ڪارروائي کانپوءِ وارثن حوالي ڪيو ويو. وارثن موجب لڇمڻ ڪينسر جي مرض ۾ مبتلا هئڻ سبب ذهني پريشاني جي ور چڙهيل هوندو. هوڏانهن پوليس ٻڌايو ته واقعو آپگهات لڳي رهيو آهي، وڌيڪ جاچ ڪئي پئي وڃي.