ڪراچي (تجزيو: دودو چانڊيو) پي ٽي آءِ پاران سنڌ ۾ مراد علي شاهه جي سرڪار ختم ڪري پنهنجي سرڪار ٺاهڻ وارو خواب آساني سان ساڀيان ٿيندي نظر نه اچي رهيو آهي. ڇاڪاڻ ته 18هين ترميم ۾ فاروڊ بلاڪ جي ٺهڻ ۾ رڪاوٽون، اپوزيشن وٽ عددي تعداد تمام گهٽ ۽ پاڻ ۾ اتحاد نه هئڻ سبب خرم شير زمان جي دعويٰ عملي حوالي سان آسان نه پئي لڳي.
پي ٽي آءِ کي سنڌ ۾ سرڪار ٺاهڻ لاءِ مخالف ڌر جي سمورن پارٽين جي سهڪار کانپوءِ به پي پي پي جي 21 منحرف ميمبرن جو ساٿ لازمي کپي، ڇاڪاڻ ته سنڌ اسيمبلي جي 168 جي ايوان ۾ پي ٽي آءِ وٽ عددي تعداد صرف 30 آهي، سندن مقابلي ۾ حڪمران جماعت پي پي پي وٽ سنڌ اسيمبلي ۾ 99 ميمبر موجود آهن. پي ٽي آءِ کانسواءِ سنڌ اسيمبلي ۾ مخالف ڌر جي ٻين جماعتن جي ڊي اي وٽ 14، ايم ڪيو ايم پاڪستان وٽ 20، ايم ايم اي وٽ هڪ ۽ لبيڪ پاڪستان وٽ سنڌ اسيمبلي ۾ 3 ميمبر موجود آهن. سنڌ اسيمبلي جي گڏيل ايوان ۾ مخالف ڌر وٽ ٽوٽل 68 ميمبر موجود آهن، مخالف ڌر جي انهن ميمبرن ۾ لبيڪ پاڪستان ۽ ايم ايم اي هن وقت پي ٽي آءِ کان ناراض جماعتون آهن، تنهنڪري سنڌ اسيمبلي ۾ “اِن هائوس” تبديلي لاءِ اهي ٻئي پارٽيون پي ٽي آءِ جو ساٿ ڏين،اهو مشڪل نظر اچي رهيو آهي، پي ٽي آءِ کي سنڌ اسيمبلي ۾ ايم ڪيو ايم ۽ جي ڊي اي جي مڪمل ساٿ کانپوءِ مراد علي شاهه جي سرڪار ڪيرائڻ ۽ نئين حڪومت قائم ڪرڻ لاءِ گهٽ ۾ گهٽ 21 ميمبر کپن، جيڪي پي پي پي جي ناراض ميمبرن کانسواءِ ممڪن ناهي. ان لاءِ به انهن ميمبرن کي پارٽي وفاداريون تبديل ڪري پي ٽي آءِ جو ساٿ ڏيڻ سو به کليل راءِ شماري جي صورت ۾ 18هين ترميم جي ڪري ڏکيو هوندو. پي ٽي آءِ جي سنڌ حڪومت ڪيرائڻ واري دعويٰ بابت “پنهنجي اخبار” سان ڳالهائيندي ايم ڪيو ايم جي اڳواڻ خواجه اظهار الحسن چيو ته 18هين ترميم بعد فارورڊ بلاڪ ٺهڻ سولو ڪم ناهي، پي ٽي آءِ کي حڪومت ٺاهڻ لاءِ سڀني مخالف ڌر جي جماعتن جي ساٿ کانسواءِ پي پي پي جي فاروڊ بلاڪ جي ضرورت آهي، اگر عدم اعتماد جي رٿ جمع ٿي ۽ راءِ شماري ٿي، ان دوران پي پي پي ميمبر غير حاضر رهن، پوءِ اهو ممڪن ٿي سگهي ٿو، پر سڄي عمل بنهه ڏکيو هوندو. اپوزيشن جي ٽئين وڏي جماعت جي ڊي اي اڳواڻ نند ڪمار گوڪلاڻي چيو ته اڃا پي ٽي آءِ ڪو رابطو نه ڪيو آهي، اسان جو فيصلو پاڳارو ڪندو، پر پي ٽي آءِ لاءِ سنڌ حڪومت ڪيرائڻ ايترو آسان نه هوندو، جيترو هو سمجهن ٿا.

ڪراچي(ن پ ا ) سنڌ هاءِ ڪورٽ سميت سموري صوبي جي عدالتن ۾ اڄ کان 9 جنوري تائين سياري جي موڪلن جو اعلان ڪيو ويو آهي، اهم ڪيسن جون ٻڌڻيون جاري رکيون وينديون.
سنڌ هاءِ ڪورٽ جي رجسٽرار موجب سموري سنڌ جي عدالتن ۾ سياري لاءِ 15 ڏينهن جون موڪلون ڪيون ويون آهن.
رجسٽرار موجب اڄ کان 9 جنوري تائين سنڌ هاءِ ڪورٽ ۽ ٻين عدالتن ۾ موڪلون هونديون، جڏهن ته سنڌ هاءِ ڪورٽ پرنسپل بينچ ۾ 2، حيدرآباد، سکر ۽ لاڙڪاڻي سرڪٽ بينچ ۾ هڪ هڪ بينچ اهم ڪيسز جي ٻڌڻي ڪندي.
سنڌ هاءِ ڪورٽ جي رجسٽرار موجب موڪلن دوران عدالتن ۾ صبح ساڍي نائين کان منجهند هڪ وڳي تائين اهم ڪيسن جون ٻڌڻيون ٿينديون.

ڪراچي (م ڊ) امريڪا ۾ مقرر پاڪستاني سفير علي جهانگير صديقي کي عهدي تان هٽايو ويو، جهانگير صديقي چيو آهي ته امريڪا سان اعتماد واري کوٽ ختم ٿي رهي آهي.
علي جهانگير صديقي کي هلندڙ سال 8 مارچ تي امريڪا ۾ پاڪستان جو سفير مقرر ڪيو ويو هو ۽ هن 30 مئي تي پنهنجي عهدي جي چارج سنڀالي هئي.
علي جهانگير صديقي جو چوڻ آهي ته ماضي ۾ پريس رليز ۾ فرق هوندو هو، پر هن ڀيري پرڏيهي وزير شاهه محمود قريشي ۽ امريڪي هم منصب وچ ۾ ملاقات بابت پريس رليز ۾ فرق نه هو.
هن چيو ته امريڪا سان اعتماد واري کوٽ ختم ٿي رهي آهي ۽ اعتماد گڏ ڪم ڪرڻ سان ئي وڌندو آهي، افغانستان کانسواءِ امريڪا سان به ڪيترن ئي معاملن تي گڏجي ڪم ڪري رهيا آهيون.

سيوهڻ(ن پ ا) پ پ اڳواڻ ۽ سنڌ اسيمبلي جي ميمبر فريال ٽالپر وي آءِ پي پروٽوڪول ۾ سڀني کي پوئتي ڇڏي ڏنو. فريال ٽالپر 13 گاڏين جي پروٽوڪول ۾ قلندر جي درگاهه تي پهتي. فريال جي سڪيورٽي ۾ شامل گارڊز صحافين کي ڪووريج کان روڪي ڇڏيو. قلندر جي نگري تي حاضري دوران فريال ٽالپر سان سهيل انور سيال ۽ ضياءَ الحسن لنجار سميت ٻيا اڳواڻ به گڏ هئا.

ڪراچي(رپورٽ: دودو چانڊيو) پاڪستان پيپلزپارٽي پاران ڏکئي وقت ۾ بينظير ڀٽو جي ڀيڻ صنم ڀٽو کي پيپلزپارٽي ۾ سرگرم ڪرڻ جو اصولي فيصلو ڪري ڇڏيو آهي. ان سلسلي ۾ گذريل سڄو ڏينهن صنم ڀٽو بلاول هائوس ۾ گذاريو، جنهن دوران هن نه رڳو بلاول ڀٽو سان ملاقات ڪئي پر پ پ پ پنجاب جي صدر قمر الزمان ڪائره، پ پ پ ڪي پي ڪي جي صدر همايون خان، پ پ پ بلوچستان جي صدر علي محمد جتڪ سان پڻ ملاقات ڪرائي وئي. بلاول هائوس جي ذريعن موجب صنم ڀٽو سان ٽنهي صوبن جي صدرن جيڪا ملاقات ڪئي، ان ۾ پارٽي جي ٽنهي صوبن ۾ صورتحال ۽ تنظيمي معاملن تي بريفنگ ڏني وئي . پ پ پ جا ويجھا ذريعا ٻڌائين ٿا ته صنم ڀٽو جيڪا سياست کان هميشه پري رهندي آئي آهي، ان کي تازو سندس ڀاڻيجي ۽ پ پ پ چيئرمين بلاول ڀٽي سياست ۾ اچڻ جي لاءِ آماده ڪري ورتو آهي. پ پ پ جا حلقا ٻڌائين ٿا ته ڪافي عرصي کان وٺي پ پ پ جا سينئر اڳواڻ ۽ سينئر ڪارڪن پارٽي اندر ڀٽي خاندان جي ڪنهن به فرد جي سرگرم نه هئڻ تي مايوس رهيا آهن، تنهنڪري پ پ پ جي ليڊرشپ فيصلو ڪيو ته ڀٽي خاندان سان تعلق رکندڙ صنم ڀٽو کي ماٺ جو روزو ٽوڙائي سياسي طور سرگرم ڪيو وڃي. ذريعا اهو به ٻڌائين ٿا ته 27 ڊسمبر تي ڳڙهي خدابخش ڀٽو ۾ بينظير بٽو جي ورسي واري جلسي کي خطاب پڻ ڪندي، سياسي سرگرمين تي نظر رکندڙ حلقا ٻڌائين ٿا ته هڪ اهڙو موقعو جڏهن پ پ جي ليڊر شپ کي مختلف ڪيسن ۾ ڦاسايو پيو وڃي، تڏهن صنم جو امڪاني طور سرگرم ٿيڻ پ پ پ کي سياسي طور فائدو پهچائيندو.

ڪراچي (رپورٽر) سنڌ جي اڳوڻي وڏي وزير قائم علي شاهه جون پريشانيون وڌي ويون، نيب طرفان ڪال اپ نوٽيس اماڻڻ خلاف گرفتاري کان بچڻ لاءِ درخواست داخل ڪرائي ڇڏي.
قائم علي شاهه سنڌ هاءِ ڪورٽ پهچي گرفتاري کان اڳ واري ضمانت لاءِ درخواست داخل ڪرائي ورتي، درخواست ۾ هن موقف اختيار ڪيو آهي ته نيب ملير ندي جي زمين جي الاٽمينٽ تي 18 ڊسمبر تي ڪال اپ نوٽيس جاري ڪيو آهي، جڏهن ته زمين الاٽ ڪرڻ بعد اها الاٽمينٽ رد به ڪئي وئي هئي.
قائم علي شاهه درخواست ۾ وڌيڪ چيو ته نيب پيپلزپارٽي سياسي انتقام جو نشانو بڻائي رهيو آهي، نيب جو ڪال اپ نوٽيس به سياسي انتقام جي برابر آهي، نوٽيس ڪالعدم قرار ڏنو وڃي ۽ نيب کي منهنجي گرفتاري کان روڪيو وڃي.