ليجنڊ اداڪار راج ڪپور جي 94هين سالگره ملهائي پئي وڃي

ڪراچي (شوبز ڊيسڪ) بالي ووڊ جي مشهور اداڪار راج ڪپور جا مداح اڄ سندس 94هين سالگره ملهائي رهيا آهن. 14 ڊسمبر 1924 تي پشاور ۾ جنم وٺندڙ راج ڪپور جو اصل نالو رنبير راج ڪپور هو، سندس والد پرٿوي راج ڪپور مشهور اداڪار ۽ فلمساز هو. 1935 ۾ چائلڊ آرٽسٽ طور فلم نگري ۾ پير رکندڙ راج ڪپور نه رڳو اداڪاري پر فلمسازي ۽ هدايتڪاري جي ميدان ۾ به پاڻ مڃايو. سندس فلمون ”آواره ۽ بوٽ پالش“ ڪينز فلم فيسٽيول ۾ گولڊن پام ايوارڊ لاءِ به نامزد ڪيون ويون. ليجنڊ اداڪار راج ڪپور کي 2 نيشنل فلم ايوارڊ ۽ 9 فلم فيئر ايوارڊ مليا. 1988 ۾ راج ڪپور کي فلمسازي بابت هندستان جو وڏي ۾ وڏو اعزاز دادا صاحب ڦالڪي ايوارڊ سان نوازيو ويو. راج ڪپور 2 جون 1988 تي دهلي ۾ لاڏاڻو ڪري ويو. راج ڪپور جي هدايتڪار طور آخري فلم ”حنا“ هئي، جيڪا سندس لاڏاڻي بعد ريليز ڪئي وئي، ۽ اها فلم به هٽ وئي.