4 ڪروڙ رپين جي لاڳت سان ٺهيل شاهه عبدالطيف اسٽيڊيم ۾ نالن جو پاڻي وهڻو لڳو، ميونسپل ڪميٽي کي شڪايتن جو ازالو نه ڪيو : رانديگر
جيڪب آباد (رپورٽر) جيڪب آباد ۾ ميونسپل ڪميٽي جي بي ڌياني سبب 4 ڪروڙ جي لاڳت سان ٺهيل فٽبال ميدان نيڪال جي پاڻي هيٺ اچي ٻڌي ويو، رانديگر انتظاميه جي بي ڌياني خلاف روڊن تي نڪري آيا.
فيفا جي نگراني ۾ ٺهيل شاهه عبد الطيف اسٽيڊيم ۾ شهر جي نيڪال جو پاڻي وهڻ لڳو، پاڻي سبب سڄو ميدان خراب ٿي ويو. هوڏانهن فٽبال ايسوسي ايشن جي صدر نظر محمد بروهي، ڪوچ سهراب کوسي ۽ حاجي اصغر بروهي سميت ٻين رانديگرن اتنظاميه خلاف احتجاج ڪيو.
رانديگرن جو چوڻ هو ته ڪيترائي ڀيرا ميونسپل ڪميٽي جي عملدارن کي شڪايت ڪئي، جواب ۾ چيو ويو ته عملو شادي تي ويل آهي، جنهن سبب ڪم متاثر ٿي رهيو آهي.
هنن چيو ته اسان جي شڪايتن ڪو به ڌيان نه ويو، نالين جو گندو پاڻي اوور ٽاپ ٿي ميدان ۾ داخل ٿي ويو آهي، جنهن سبب اڄ اسان جي ٿيندڙ ميچ به نه ٿي سگھي، سکيا لاءِ ايندڙ رانديگر به مايوس ٿي ويا آهن.
رانديگرن اعليٰ اختيارين کان مطالبو ڪيو ته ميدان مان بنا دير گندو پاڻي ڪڍيو وڃي ته جيئن راند متاثر نه ٿي سگهي.
ٽيسٽ ڪرڪيٽ ۾ ناڪامي جو ذميوار سرفراز کي قرار ڏيڻ درست ناهي
ڪراچي (اسپورٽس ڊيسڪ) اڳوڻي ڪپتان جاويد ميانداد چيو آهي ته پي سي بي سرفراز احمد کي قيادت تان هٽائڻ بدران اهڙن رانديگرن کي ٽيم مان ڪڍي جيڪي ناڪام رهيا آهن. هڪ انٽرويو ۾ جاويد ميانداد جو چوڻ هو ته ڪيويز خلاف تازي هو سيريز ۾ شڪست جو ذميوار سرفراز احمد کي قرار ڏيڻ سراسر ناانصافي آهي، سرفراز پاڻ مٿان ڪنهن به قسم جو دٻاءُ نه وجهي. اڳوڻي ڪپتان جو چوڻ هو ته سرفراز احمد هن وقت قومي ٽيسٽ ڪرڪيٽ ٽيم جي قيادت لاءِ سڀ کان بهترين ۽ مناسب آپشن آهي، ڇاڪاڻ ته کيس وڪيٽ ڪيپنگ سان گڏ بيٽنگ ۾ به مهارت حاصل آهي. هن چيو ته اسان کي اهڙن رانديگرن تي تنقيد ڪرڻ گهرجي جيڪي ڪارڪردگي ڏيکارڻ ۾ ناڪام آهن، تڏهن ئي ٽيم سٺا نتيجا ڏئي سگهندي.
