جيڪب آباد (رپورٽر) جيڪب آباد ۾ رانديگرن پاران فٽبال گرائونڊ مان نيڪال جو پاڻي نه ڪڍڻ تي انتظاميه خلاف احتجاجي مظاهرو ڪيو ويو.
فٽبالر سھراب کوسو، ڪليم الله، نذر محمد ۽ ٻين جي اڳواڻي ۾ رانديگرن شاهه عبدالطيف ڀٽائي فٽبال گرائونڊ مان نيڪال جو پاڻي نه ڪڍڻ خلاف مظاهرو ڪري نعريبازي ڪئي. مظاهري دوران پي ٽي آءِ ايم پي ايم اسلم ابڙو پهچي گرائونڊ مان پاڻي نيڪالي لاءِ خاطري ڪرائي.
رانديگرن جو چوڻ هو ته فٽبال گرائونڊ مان نيڪال جو پاڻي اڃان تائين ناھي ڪڍيو ويو، جنھن سبب چئن ڏينهن کان راند بند آهي. هن چيو ته شڪايت باوجود فيفا جي فٽبال گرائونڊ مان گندو پاڻي نه ڪڍڻ سبب بدبو پکڙجي وئي آهي، ضلعي انتظاميا جو رويو مذمت جوڳو آهي.
رانديگرن راندين واري صوبائي وزير کان مطالبو ڪيو ته گرائونڊ مان پاڻي ڪڍڻ لاءِ ميونسپل انتظاميه کي حڪم جاري ڪري ته جيئن پنهنجي راند جاري رکي سگهون.
مظاهري دوران پي ٽي آءِ ايم پي اي اسلم ابڙو رانديگرن سان ڳالهيون ڪيون، پاڻي نيڪال لاءِ اپاءُ وٺڻ لاءِ ڊي سي عمران علي سان رابطو ڪيو، جنهن بعد اسلم ابڙو چيو ته ميونسپل ڪاميٽي جو چيئرمين شھر ۾ صفائي بدران شھرين کي ڏکيايون ڏئي رهيو آهي، فٽبالرن جي شڪايت باوجود ميونسپل عملي جو رويو ڳڻتي جوڳو آهي.

ڪوٽڙي (رپورٽر) ڪوٽڙي ۾ پاڪستان بلائنڊ ڪرڪيٽ ٽي ٽوئنٽي ٽورنامينٽ شروع ٿي وئي، پهرين ڏينهن ٿيل ٻن ميچن ۾ پنجاب سنڌ ۽ بلوچستان ڪي پي کي شڪست ڏني.
پاڪستان بلائنڊ ڪرڪيٽ ڪائونسل جي انتظام هيٺ شروع ٿيل ٽي ٽوئنٽي ٽورنامينٽ جي افتتاحي ميچ ۾ سنڌ ٽيم ٽاس کٽي پهرين فيلڊنگ جو فيصلو ڪيو، جيڪو غلط ثابت ٿيو.
پنجاب ٽيم 4 وڪيٽن جي نقصان تي 212 رنسون ٺاهيون، بيٽسمين نثار علي 70 ۽ محسن خان 65 رنسون ٺاهيون.
جواب ۾ سنڌ ٽيم مقرر اوورن ۾ ٽن وڪيٽن جي نقصان تي 204 رنسون ٺاهي سگهي. ميچ کٽڻ بعد پنجاب ٽيم جي رانديگرن خوشي ۾ جهمريون پڻ هنيون.
ٻي ميچ ۾ بلوچستان ٽيم ڪي پي کي 32 رنسن تان شڪست ڏئي ميچ پنهنجي نالي ڪئي. بلوچستان ٽيم ٽاس کٽي پهرين بيٽنگ جو فيصلو ڪيو. پهرين بيٽنگ ڪندي بلوچستان جي ٽيم مقرر اوورن ۾ ٽن وڪيٽن جي نقصان تي 210 رنسون ٺاهيون، بيٽسمين اڪرم شاندار بيٽنگ ڪندي 130 ۽وقاص علي 36 رنسون ٺاهيون.
جواب ۾ ڪي پي ٽيم 6 وڪيٽن جي نقصان تي 178 رنسون ٺاهي سگهي، ڪي پي جي بيٽسمين ايوب خان 35 ۽ معين علي 41رنسون ٺاهي ٽاپ اسڪورر رهيا.
هوڏانهن افتتاحي تقريب ۾ وڏي انگ ۾ ماڻهن شرڪت ڪئي، جڏهن ڪمشنر حيدرآباد خاص مهمان طور شرڪت ڪئي.
تقريب کي خطاب ڪندي ڪمشنر حيدرآباد چيو ته اسپيشل نوجوانن لاءِ راندين جا موقعا ٿيڻ تمام بهتر عمل آھي، حيدرآباد ڊويزن جي اسپيشل رانديگرن جي نوڪري وارو مسئلو به حل ڪنداسين. هن چيو ته حيدرآباد ڊويزن ۾ جيڪڏهن ڪرڪيٽ ميدانن تي قبضا آھن ته رهواسي شڪايت ڪن ته جيئين اسان قبضا ختم ڪرائي سگهون.

خيرپور (رپورٽر) خيرپور ڀرسان ملهه مقابلا ڪرايا ويا، سنڌ جي ڀلوڙ ملهه پهلوانن مخالف پهلوانن کي دسي هوڪرا ڪرائي ڇڏيا. پريالوءِ جي ڪرڪيٽ اسٽيڊيم ۾ سماجي اڳواڻ حسين مهر پاران ڪرايل ملهه مقابلن ۾ سنڌ جي مختلف ضلعن جي ڀلوڙ ملهه پهلوانن وڏي انگ ۾ شرڪت ڪئي، ملهه پهلوانن سندرا ٻڌي ۽ ملهه ماري داد ماڻيو.
ملاکڙي ۾ پهلوان اويس گهانگهرو پهريون نمبر ماڻيو، محمد خان ڦل ٻئين ۽ ديدار جمالي ٽئين پوزيشن ماڻي. خاص مهمانن طور پ پ پ ايم اين اي سيد جاويد علي شاهه جيلاني، پ پ پ اڳواڻ اڏيل ڦلپوٽو، سينيئر وڪيل عبدالستار مهر شرڪت ڪئي.
ان موقعي تي سيد جاويد علي شاهه ملاکڙي ۾ پهرين پوزيشن حاصل ڪندڙ اويس گهانگهرو کي 20 هزار روڪ انعام ڏنو، جڏهن ته ٻئين ۽ ٽئين پوزيشن ماڻيندڙ ملهه پهلوانن کي پڻ علائقي واسين وڏي انگ ۾ ملهه مارڻ تي داد ڏيڻ سان گڏ روڪ رقم طور انعام پڻ ڏنا.
ملاکڙي ۾ ٻارڙن سميت علائقي واسين وڏي انگ ۾ شرڪت ڪئي. جڏهن ته سڪيورٽي لاءِ پوليس طرفان سخت انتظام پڻ ڪيا ويا هئا.

ممبئي (اسپورٽس ڊيسڪ) آسي سي ڀارتي ڪرڪيٽ بورڊ کي خبردار ڪيو آهي ته 31 ڊسمبر تائين عالمي ٽي ٽوئنٽي 2016 دوران ٽڪيس جي مد ۾ 2 ڪروڙ 30 لک ڊالر ادا نه ڪيا ته عالمي ڪپ 2023 جي ميزباني تان هٿ کڻڻو پوندو.
ڀارتي بورڊ جي اڳوڻي صدر ششانگ منوهر جي سربراهي ۾ ڪرڪيٽ کي عالمي سطح تي هلائيندڙ گورننگ باڊي ڀارتي ڪرڪيٽ بورڊ کان 2016 ۾ وفاقي ۽ رياستي سطح ٽيڪس جي مد ۾ ڪيل ڪٽوتي جي رقم واپس گهرڻ چاهي ٿي، آءِ سي سي ڀارتي ڪرڪيٽ بورڊ کي ان سلسلي ۾ آگاهه ڪيو هو.
آءِ سي سي ڌمڪي ڏني آهي ته جيڪڏهن ڀارتي ڪرڪيٽ بورڊ رقم ڏيڻ ۾ ناڪام رهيو ته هلندڙ سال جي نفعي واري حصي مان اها رقم ڪٽي ويندي.
آءِ سي سي ڀارتي ڪرڪيٽ بورڊ کي اها به ڌمڪي ڏني ته رقم واپس نه ڪرڻ تي ڀارت ۾ شيڊول چيمپئنز ٽرافي 2021ع ۽ عالمي ڪپ 2023 جي ميزباني لاءِ ٻين آپشنز تي به غور ڪري سگهجي ٿو.

ڍاڪا (اسپورٽس ڊيسڪ) ويسٽ انڊيز ٽئين ٽي ٽوئنٽي ميچ ۾ بنگلاديش کي 50 رنسن تان شڪست ڏئي سيريز به کٽي ورتي. ميرپور جي شير بنگلا اسٽيڊيم ۾ ٽن ٽي ٽوئنٽي ميچن تي ٻڌل سيريز جي فيصلائتي ميچ ۾ بنگلاديش ٽاس کٽي فيلڊنگ جو فيصلو ڪيو، جيڪو غلط ثابت ٿيو.
ويسٽ انڊيز جي اوپنر ليوس جي تيز ترين بيٽنگ سبب مقرر اوورن ۾ 9 وڪيٽن جي نقصان تي 190 رنسون ٺاهيون. ليوس 36 بالن تي 89 رنسون ٺاهيون، پوران 29 ۽ هوپ 23 رنسون ٺاهي ٽاپ اسڪورر رهيا. بنگلاديش طرفان محمود الله، مستفيظ رحمان ۽ شڪيب الحسن 3-3 شڪار ڪيا.
191 رنسن جي جواب ۾ بنگلاديشي ٽيم مڪمل اوور به نه کيڏي سگهي، سڄي ٽيم 17 اوورن ۾ 140 رنسن تي ڍير ٿي وئي. ليٽن داس 43، ابو حيدر 22 ۽ حسن مرزا 19 رنسون ٺاهي ٽيم ۾ ٽاپ اسڪورر رهيا. ويسٽ انڊيز طرفان پال 4 اوورن 15 رنسن عيوض 5 شڪار ڪيا، جڏهن ته الين 2 وڪيٽون، براٿ ويٽ ۽ ڪاٽريل هڪ هڪ وڪيٽ حاصل ڪئي.
اهڙي ريت ويسٽ انڊيز بنگلاديش خلاف هڪ جي ڀيٽ ۾ ٻن ميچن تان سيريز کٽي.

بينوئي (اسپورٽس ڊيسڪ) پاڪستان پريڪٽس ميچ ۾ ڏکڻ آفريڪا انويٽيشن اليون کي شڪست ڏئي ڇڏي. ميچ جي ٽئين ڏينهن 197 رنسن جي هدف جي جواب ۾ امام الحق ۽ حارث سهيل جي شاندار بيٽنگ سبب پاڪستان گهربل هدف 4 وڪيٽن تي حاصل ڪري ڪاميابي ماڻي. بينوئي ۾ کيڏيل پريڪٽس ميچ جي ٽئين ڏينهن حارث سهيل 73 ۽ امام الحق 66 رنسن جي شاندار اننگ کيڏي. هوڏانهن ڏکڻ آفريڪا ۽ پاڪستان جي ٽيمن ۾ ٽن ٽيسٽ ميچن تي ٻڌل پهرين ميچ 26 کان 30 ڊسمبر تائين سنچورين ۾ کيڏي ويندي.

بارسلونا (اسپورٽس نيوز) ارجنٽينا جو اسٽار رانديگر ۽ فٽبال جو بادشاهه رانديگر ليونل ميسي پنهنجي فٽبال ڪلب بارسلونا لاءِ نئون رڪارڊ جو ڙي ورتو آهي. فٽبال ڪلب ليوانتي خلاف ميچ ۾ بارسلونا ٻڙي جي مقابلي ۾ 5 گولن تان شاندار ڪاميابي حاصل ڪئي، جنهن جو سڄو ڪريڊٽ ليونل ميسي ڏانهن وڃي ٿو. ميچ ۾ بارسلونا ڪنگ گولن جي هيٽرڪ ڪندي مخالفن کي بيحال ڪري ڇڏيو، پر ڳالهه اتي ختم نه ٿي، هن ميچ ۾ ٻه وڌيڪ گول اسسٽ ڪيا، سندس مدد سان بارسلونا 5 گول ڪري ليوانتي ڪلب کي بدترين شڪست ڏني. ميسي لا ليگا جي 323 ميچ ۾ بارسلونا کي ڪاميابي ڏياري اڳوڻي فٽبال اسٽار زاوي جو 322 ميچن وارو رڪارڊ ٽوڙي ڇڏيو. ميسي يورپ ۾ سڀ کان وڌيڪ هڪ سيزن ۾ 24 گول ڪرڻ يا مدد ڪرڻ جو رڪارڊ پڻ پنهنجي نالي ڪيو.