سنڌڙي(ن پ ا) سنڌڙي ڀرسان ڪنڊيار جي ٽيم جيلاني اليون فقير دلبر مهر ٽيم کي شڪست ڏئي ٽورنامينٽ پنهنجي نالي ڪري ورتي. ڳوٺ مير عبدالله ٽالپر ۾شھيد سورھيه بادشاھ جي ياد ۾ ڪرايل ڪرڪيٽ ٽورنامينٽ جي فائنل ۾ پھرين بيٽنگ ڪندي جيلاني اليون مقرر 3 اوورن ۾ ڪل 29 رنسون ٺاهي سگهي، جواب فقير اليون صرف 18 رنسون ٺاھي ٽورنامينٽ هارايو.
4 ڏينھن کان جاري ٽورنامينٽ ڪرڪيٽ ٽورنامنٽ ۾ سانگھڙ، عمرڪوٽ ۽ ميرپورخاص ضلعن جي 17 ٽيمن حصو ورتو.
ٽورنامينٽ جي فائنل ميچ بعد خاص مھمان فقير امان الله ۽ منير نوھڙي ڪامياب ٽيم کي ٽرافي ڏني، ان سان ميچ جو بهترين رانديگر قرار ڏنل شھباز ٿيم کي ٽرافي ۽ روڪ رقم 10 ھزار رپين جو انعام ڏنو، جڏهن ته مين آف دي ٽورنامينٽ قرار ڏنل عاشق کي به ٽرافي ڏني وئي، ان سان گڏ رنر اپ فقير اليون جي ٽيم جي ڪپتان ڊي ايم مھر کي رنر اپ ٽرافي ۽ روڪ رقم جو انعام ڏنو.

ملتان (اسپورٽس ڊيسڪ) بنون جي ٽيم ملتان کي شڪست ڏئي انٽر ڪاليجٽ باسڪيٽ بال چيمپئن شپ پنهنجي نالي ڪري ورتي.
تعليمي بورڊ ميدان ۾ ٿيل انٽرڪاليجٽ باسڪيٽ بال چيمپئن شپ جي فائنل مقابلي ۾ بنون ۽ ملتان جي ٽيمن سخت مقابلو ڪيو، راند جي پڄاڻي تي بنون جي ٽيم 40 جي ڀيٽ ۾ 50 پوائنٽن تان ٽائٽيل پنهنجي نالي ڪري سوڀ جو جشن ملهايو.
چيمپئن شپ ۾ ڪل 15 ٽيمن حصو ورتو، جڏهن ته بهترين ڪارڪردگي ڏيکاريندڙ رانديگرن کي ٽرافيون ۽ روڪ رقم جا انعام به ڏنا ويا.

لاهور (اسپورٽس نيوز) پاڪستان ڪرڪيٽ بورڊ جي نئين مقرر ڪيل مينيجنگ ڊائريڪٽر وسيم خان چيو آهي ته سندس خواهش آهي ته پاڪستاني رانديگرن کي آءِ پي ايل ۾ کيڏايو وڃي. ڪرڪيٽ جي ويبسائيٽ اي ايس پي اين ڪرڪ انفو کي انٽرويو ڏيندي پي سي بي ايم ڊي وسيم خان چيو ته ڀارتي ڪرڪيٽ بورڊ جي اختيارين سان ٻه طرفا ڪرڪيٽ لاڳاپا بهتر بڻائڻ جي ڪوشش ڪندس، ٻنهي ملڪن وچ ۾ ڪرڪيٽ کانسواءِ ٻيا معاملا معاملا به آهن، جيڪي پيچيدا آهن، پر منهنجي خواهش هوندي ته پاڪستاني ڪرڪيٽرن کي آءِ پي ايل ۾ شامل ڪرايان. وسيم خان چيو ته هو سڀني ڪرڪيٽ بورڊن سان ڳالهائڻ لاءِ تيار آهي ته جيئن اعتماد پيدا ٿي سگهي ۽ ملڪ ۾ عالمي ڪرڪيٽ جي بحالي ٿئي، ان حوالي سان پي ايس ايل جون پاڪستان ۾ 8 ميچون اهم ڪردار ادا ڪنديون. ايم ڊي پي سي بي وڌيڪ چيو ته پاڪستان وٽ بهترين اسٽيڊيم موجود آهن ۽ عوام جي ڪرڪيٽ ۾ تمام گهڻي دلچسپي آهي، پرڏيهي رانديگر پي ايس ايل ۾ آيا ته معاملا بهتري طرف ويندا.

ٽنڊوالهيار (ن پ ا) ٽنڊي الهيار ۾ مبارڪ جروار هاءِ اسڪول جي ٽيم 6 وڪيٽن تان پراونشل بوائز هاءِ اسڪول کي شڪست ڏئي ٽورنامينٽ پنهنجي نالي ڪري ورتو. ڊسٽرڪٽ ايجوڪيشن سيڪنڊري آفيس طرفان ڪرايل ٽورنامينٽ ۾ 15 هاءِ اسڪولن جي ٽيمن حصو ورتو. جن مان پراونشل هاءِ اسڪول ۽ مبارڪ جروار هاءِ اسڪول ٽيمون فائنل ۾ جاءِ ٺاهي. فائنل مقابلي ۾ پراونشل هاءِ اسڪول جي ٽيم ٽاس کٽي پهرين بيٽنگ ڪندي مقرر 10 اوورن ۾ 85 رنسون ٺاهيون. جواب ۾ مبارڪ جروار هاءِ اسڪول جي ٽيم 4 وڪيٽن جي نقصان تي مليل هدف آخري اوور ۾ ماڻي ٽورنامينٽ کٽي ورتي. ان موقعي تي ڊي اي او سيڪنڊري مٺو اوڏ ڪامياب ٽيم جي ڪپتان فرحان عمراڻي کي ونر ٽرافي ڏني، جڏهن ته ٽي اي او رشيد احمد بوزدار فائنل هارائيندڙ ٽيم جي ڪپتان هريش ڪمار کي رنرز اپ ٽرافي ڏني. ڊي اي او مٺو اوڏ جو چوڻ هو ته ضلعي جي نوجوانن ۾ ڪرڪيٽ سميت ٻين راندن جو وڏو ٽيلنٽ آهي. جنهن کي اجاگر ڪرڻ جي سخت ضرورت آهي.

بوسٽن (اسپورٽس ڊيسڪ) يو ايس اوپن جونئير اسڪواش چيمپئن سپ ۾ 2 پاڪستاني رانديگر حمزه خان ۽ همام احمد فائنلز ۾ پهچي ويا. آمريڪي شهر بوسٽن ۾ جاري يو ايس اوپن جونيئر اسڪواش چيمپئن شپ جي سيمي فائنلز ۾ انڊر 13 سيمي فائنل ۾ پشارو سان واسطو رکندڙ حمام احمد آمريڪا جي احمد حق خلاف ڪاميابي ماڻي، سندس اسڪور 7-11، 6-11 ۽ 9-11 رهيو، فائنلز ۾ سندس مقابلو ڀارتي روهن گانڌي سان ٿيندو. ٻي پاسي انڊر 15 ڪيٽيگري جي سيمي فائنل ۾ پشاور جي حمزه خان ٽاپ سيڊ ميڪسيڪو جي سوسا فيڊريڪو کي هارايو. ميچ جو اسڪور 5-11، 9-11 ۽ 5-11 رهيو. ٽرافي جي فائنل ۾ حمزه خان جو مقابلو آمريڪي رانديگر ڪريني سان ٿيندو.

ڪولمبو(اسپورٽس ڊيسڪ) پاڪستان ايشين رسه ڪشي چيمپئن شپ ۾ ميدان ماري ورتو، چيمپئن شپ ۾ پهرين پوزيشن حاصل ڪري ورتي. ڪولمبو ۾ ٿيل رسه ڪشي چيمپئن شپ جي مقابلن ۾ پاڪستان 2 سونا، هڪ-هڪ چاندي ۽ پتل جا ٻلا کٽي ورتا. ايونٽ ۾ پاڪستان پهرين، سريلنڪا ٻئين ۽ ڀارت ٽئين پوزيشن ماڻي. جڏهن ته چيمپئن شپ ۾ پاڪستان سميت 6 ملڪن مقابلن ۾ حصو ورتو، جن م مين اينڊ ويمن ڪمبائن مقابلا 600 ڪلو ڪيٽيگري ۾ ٿيا.