fbpx
تازا ترين
  • *اصغر خان ڪيس وارو معاملو 25 سال پُراڻو آهي، پئسا اڪائونٽس ۾ جمع ٿيڻ بابت پڻ رڪارڊ ناهي مليو: ايف آءِ اي*
  • *ايترا ثبوت نه آهن جو اصغر خان ڪيس تي فوجداري ڪارروائي ٿي سگهي، شاهدن جا بيان به تڪراري آهن: ايف آءِ اي*
  • *ايف آءِ اي اصغر خان عملدرآمد ڪيس جو فائيل بند ڪرڻ جي سفارش ڪري ڇڏي، سُپريم ڪورٽ ۾ جواب جمع*
  • *ٽنڊو الهيار: موٽر سائيڪل سوار هٿياربندن جي فائرنگ ۾ هڪ ڄڻو شاهنواز ابڙو قتل*
  • *پيپلزپارٽي ڪهڙي ميدان تي جنگ وڙهڻ جون ڌمڪيون ڏئي رهي آهي، اسان ڌمڪين کان نه ڊڄنداسين: گورنر عمران اسماعيل*
  • *“مهرن جي دعوت” آصف زرداري کانپوءِ گورنر عمران ۽ متحده اڳواڻن جي خانڳڙهه ياترا*
  • *حيدرآباد: راجپوتانه اسپتال سامهون تيز رفتار ڪار ڪلٽي، هڪ ڄڻو فوت، ٻن عورتن سوڌو 3 زخمي*
  • *پنوعاقل: ڳوٺ اڌ لک ۾ چور صلاح الدين بروھي جي سرن جي بٺي تي بيٺل موٽر سائيڪل چوري ڪري فرار ٿي ويا*
پاڪستان ۽ ڏکڻ آفريڪا اڄ پهرين ٽيسٽ ۾ مقابلو ڪندا
پاڪستان 8 سالن کانپوءِ ساڳي گرائونڊ تي ٽيسٽ ميچ کيڏندو

سينچورين (اسپورٽس ڊيسڪ) پاڪستان ۽ ڏکڻ آفريڪا وچ ۾ پهرين ٽيسٽ ميچ ۾ مقابلو ڪندا، سينچورين جي سپر اسپورٽس پارڪ ۾ ٻنهي ملڪن وچ ۾ ميچ 1 وڳي شروع ٿيندي. پاڪستان طرفان محمد عباس زخمي هئڻ ڪري ٽيسٽ ميچ ۾ شرڪت نه ڪري سگهندو، جڏهن ته فخر زمان فٽ ٿي ٽيم جو حصو هوندو. سينچورين جي پچ بالرن لاءِ سازگار ٻڌائي پئي وڃي، جيڪا تيز ۽ بائونسي آهي، جڏهن ته پچ تي بال سوئنگ ٿيڻ جا امڪان پڻ آهن. پاڪستان جي ٽيم ۾ فخر زمان، امام الحق، اظهر علي، اسد شفيق، حارث سهيل، بابر اعظم، سرفراز احمد، حسن علي، ياسر شاهه، محمد عامر ۽ شاهين آفريدي شامل هوندا. ڏکڻ آفريڪا طرفان ڊيل اسٽين کي پنهنجي ملڪ طرفان سڀ کان وڌيڪ وڪيٽون حاصل ڪرڻ لاءِ هڪ وڪيٽ جي ضرورت آهي، جنهن سان ڊيل اسٽين شان پولاڪ جو 422 وڪيٽن جو رڪارڊ ٽوڙيندو.

پاڪستان پاران بيٽنگ جو فيصلو

پاڪستان پاران بيٽنگ جو فيصلو

ڀارت خلاف ٽيسٽ۾ ٻارڙو آسٽريلوي ٽيم جو ڪپتان بڻيو
دل جي بيماري ۾ مبتلا معصوم آرچي شلر جي ڪپتاني جي خواھش ھئي

ميلبورن (اسپورٽس ڊيسڪ) ڀارت خلاف باڪسنگ ڊي ٽيسٽ ميچ ۾ 7 ورهين جو ٻارڙو آسٽريلوي ٽيم جو اعزازي ڪپتان بڻيو. ميلبورن ۾ ڪالهه شروع ٿيل باڪسنگ ڊي ٽيسٽ ۾ آرچي شلر آسٽريلوي ٽيم جي شريڪ ڪپتان جو اعزاز ماڻيو. نينگر آرچي شلر پيدائش بعد دل جي موذي مرض ۾ مبتلا آهي، آرچي شلر ڪرڪيٽ جو وڏو مداح آهي.سندس ڪيتريون ئي سرجريون ٿي چڪيون آهن. کائنس والد پڇيو هو ته هو ڇا ڪرڻ چاهي ٿو ته ٻارڙي جواب ڏنو ته آسٽريلوي ڪرڪيٽ ٽيم جي ڪپتاني ڪرڻ چاهيان ٿو. ڪالهه ڪرڪيٽ آسٽريليا ٻارڙي جي خواهش پوري ڪئي. گذريل مهيني گڏيل عرب امارات ۾ ٿيل سيريز دوران آرچي شلر کي اسڪواڊ ۾ پڻ شامل ڪيو ويو هو.

دل جي بيماري ۾ مبتلا معصوم آرچي شلر

دل جي بيماري ۾ مبتلا معصوم آرچي شلر

ڪرائيسٽ چرچ ٽيسٽ: پهرين ڏينهن 14 وڪيٽون ڪري پيون
سريلنڪا نيوزيلينڊ کي پهرين اننگز ۾ 178 رنسن تي آئوٽ ڪري ڇڏيو

ڪرائيسٽ چرچ (اسپورٽس ڊيسڪ) نيوزيلينڊ ۽ سريلنڪا وچ ۾ ٽيسٽ ميچ دوران هڪ ئي ڏينهن 14 وڪيٽون ڪري پيون. باڪسنگ ڊي ٽيسٽ ۾ سريلنڪن ڪپتان دنيش چنديمل ٽاس کٽي پهريان ميزبان ٽيم کي کيڏڻ جي دعوت ڏني ته سرنگا لڪمل ۽ ڪمارا تباهي ڪندڙ بالنگ ڪندي نيوزيلينڊ جا 66 رنسن تي 6 رانديگر پويلن موڪلي ڇڏيا. ٽم سائوٿي زبردست مزاحمت ڪندي نيوزيلينڊ کي مڪمل تباهي کان بچائي ورتو. ٽم سائوٿي ۽ بي جي واٽلنگ پاران ڀائيواري ڪندي اسڪور کي 172 رنسن تائين پهچايو. ٽم سائوٿي 68 رنسون ٺاهيون، جڏهن ته واٽلنگ 46 رنسون ٺاهيون. سريلنڪا طرفان لڪمل ڪيريئر بيسٽ بالنگ ڪندي 5 شڪار ڪيا ۽ ڪمارا 3 وڪيٽون حاصل ڪيون. جواب ۾ سريلنڪا پڻ ڍينگو ڍيري ثابت ٿيڻ لڳي ۽ ٽم سائوٿي بيٽنگ کانپوءِ بالنگ ۾ پاڻ ملهايو ۽ 3 شڪار ڪندي سريلنڪا جا 40 رنسن تي 4 وڪيٽون ڪرائي ڇڏيون. ڏينهن جي پڄاڻي تي سريلنڪا 4 وڪيٽن جي نقصان تي 88 رنسون ٺاهي ورتيون آهن. اينجلو ميٿيوز ۽ سلوا ٻئين ڏينهن جي راند جي شروعات ڪندا.

سائوٿي 50 اسڪور ڪرڻ تي داد وصول ڪندي

سائوٿي 50 اسڪور ڪرڻ تي داد وصول ڪندي

پونٽنگ بال ٽيمپرنگ بابت بيان تي بينڪرافٽ مٿان ڪاوڙجي پيو
بينڪرافٽ پنهنجي ڪرڪيٽ راند کي گهڻو نقصان پهچايو آهي: رڪي پونٽنگ

ميلبورن (اسپورٽس ڊيسڪ) آسٽريليا جو اڳوڻو ڪپتان رڪي پونٽنگ بال ٽيمپرنگ ۾ 9 مهينن جي معطلي کي منهن ڏيندڙ بين ڪرافٽ مٿان ڪاوڙجي پيو آهي. ڪالهه بين ڪرافٽ انٽرويو ڏيندي چيو هو ته کيس بال خراب ڪرڻ لاءِ ڊيوڊ وارنر چيو هو، جنهن جي ڳالهه ٻڌندي هن بال ٽيمپرنگ ڪئي هئي. ان بيان تي رڪي پونٽنگ پاران بينڪرافٽ مٿان ڪاوڙ جو اظهار ڪيو آهي. سندس چوڻ هو ته بينڪرافٽ پنهنجي راند کي گهڻو نقصان پهچائي چڪو آهي، 9 مهينا گذري وڃڻ جي باوجود اهڙيون ڳالهيون ورجائڻ افسوسناڪ آهي. هن چيو ته ڊيوڊ وارنر، اسٽيو سمٿ۽ بين ڪرافٽ جي واپسي لاءِ ڪوششون ڪيون پيون وڃن ۽ پراڻي واقعن کي وسارڻ جي ڪوشش ڪئي پئي وڃي پر بينڪرافٽ پاران اهڙيون ڳالهيون مايوس ڪندڙ آهن.

پرٿ اسڪارچرز ايڊليڊ اسٽرائڪرز کي گهمائي لاٿو

پرٿ اسڪارچرز ايڊليڊ اسٽرائڪرز کي گهمائي لاٿو

بي بي ايل: پرٿ اسڪارچرز ايڊليڊ اسٽرائڪرز کي گهمائي لاٿو

ايڊليڊ (اسپورٽس ڊيسڪ) بگ بيش ليگ ۾ پرٿ اسڪارچرز ايڊليڊ اسٽرائيڪرز کي 7 وڪيٽن تان بدترين شڪست ڏئي ڇڏي. بگ بيش ليگ جي نائين ميچ ۾ پرٿ اسڪارچرز ٽاس کٽي پهرين فيلڊنگ جو فيصلو ڪيو. بيٽنگ جي دعوت ملڻ تي ايڊليڊ اسٽرائيڪرز کيڏندي 88 رنسن تي ڍير ٿي وئِي. ويٿرلينڊ 22، والينٽي ۽ راشد خان 21-21 رنسون ٺاهي نمايان رهيا. پرٿ اسڪارچرز جي بالر رچرڊسن شاندار ڪارڪردگي جو مظاهرو ڪندي 3 اوورن ۾ 7 رنسن عيوض 3 شڪار ڪيا، جڏهن ته بيهرينڊراف ۽ اي جي ٽاءِ 2-2 ۽ ڪولٽر نيل ۽ ڊي جي وِلي هڪ-هڪ وڪيٽ ورتي. 89 رنسن جي جواب ۾ پرٿ اسڪار چرز 18 اوورن ۾ ٽن وڪيٽن جي نقصان تي هدف ماڻي ميچ کٽي. بوسيستو 36، ڪپتان ٽرنر 24 ۽ انگليز 22 رنسون ٺاهي ٽيم کي ڪامياب بڻايو. ايڊليڊ اسٽرائيڪرز طرفان اسٽان ليڪ ۽ والينٽي هڪ-هڪ وڪيٽ ورتي، جڏهن ته هڪ رانديگر رن-آئوٽ ڪيو. پرٿ اسڪارچرز جي بالر رچرڊسن کي 3 وڪيٽون وٺڻ تي ميچ جو بهترين رانديگر قرار ڏنو ويو.

نيوزيلينڊ پاران سريلنڪا خلاف ون سيريز لاءِ ٽيم جو اعلان
جيمز نيشم، ڊوگ بريسويل کي به 3 ون ڊي ميچن لاءِ ٽيم ۾ شامل ڪيو ويو

ويلنگٽن (اسپورٽس ڊيسڪ) نيوزيلينڊ پاران سريلنڪا خلاف ون ڊي سيريز لاءِ ٽيم جو اعلان ڪري ڇڏيو آهي. مارٽن گپٽل جي وڏي عرصي کانپوءِ عالمي ڪرڪيٽ ۾ واپسي ٿي آهي. ٽن ون ڊي ميچن جي سيريز لاءِ ڪيويز پاران پاڪستان خلاف ڊراپ ڪيل جيمز نيشم ۽ ڊوگ بريسويل کي پڻ شامل ڪيو ويو آهي. ٽيم ۾ ڪين وليمسن (ڪپتان) ٽرينٽ بولٽ، ڊوگ بريسويل، جيمز نيشم، مارٽن گپٽل، ميٽ هينري، لوڪي فرگوسن، هينري نڪولس، ڪولن منرو، ٽم اسٽافئر، اش سوڍي، ٽم سائوٿي ۽ روس ٽيلر شامل آهن. نيوزيلينڊ ايندڙ سال ورلڊ ڪپ کان اڳ 11 ون ڊي ميچن، سريلنڪا، ڀارت ۽ بنگلاديش خلاف کيڏندي جنهن کي نظر ۾ رکندي ٽيم جي چونڊ ڪئي وئي آهي.

باڪسنگ ڊي ٽيسٽ: پوجارا جي سينچري، ڀارت 443 رنسن تي اننگز ڊڪليئر

ميلبورن (اسپورٽس ڊيسڪ) ڀارت ۽ آسٽريليا ۾ ٽئين ٽيسٽ ميچ جي ٻي ڏينهن ورات ڪوهلي پاران 443 رنسن تي پنهنجي پهرين اننگز ڊڪليئر ڪري ڇڏي، جواب ۾ آسٽريليا ڏينهن جي پڄاڻي تي بنا ڪنهن نقصان جي 8 رنسون ٺاهي ورتيون آهن. ڀارت طرفان ٻي ڏينهن جي شروعات ورات ڪوهلي ۽ چتيشور پوجارا ڪئي ۽ اسڪور کي 295 تائين پهچايو. ورات ڪوهلي غلط شاٽ کيڏندي 82 رنسن تي آئوٽ ٿي ويو، جڏهن ته پوجارا 102 رنسون ٺاهي ويو. رشي پانٽ 39 اسڪور ڪيو، جڏهن ته روهت شرما 63 رنسون ٺاهي ناٽ آئوٽ رهيو. ورات ڪوهلي پاران ڏينهن جي پڄاڻي کان ٿوري دير پهريان اننگز 443 رنسن تي ڊڪليئر ڪئي. آسٽريليا طرفان پيٽر ڪمنز 3 وڪيٽون حاصل ڪيون. جواب ۾ ٻي اننگز ۾ ڏينهن جي پڄاڻي تائين ڪينگروز بنا ڪنهن نقصان جي 8 رنسون ٺاهي ورتيون آهن.

پوجارا سينچري تي ڪوهلي کان مبارڪ وصول ڪندي

پوجارا سينچري تي ڪوهلي کان مبارڪ وصول ڪندي

لاڙڪاڻي ضلعي جي چونڊ رانديگرن جي ٽيم ٺاهي وئي

لاڙڪاڻو(رپورٽر) لاڙڪاڻي ۾ ڪرڪيٽ راند کي هٿي وٺرائيندڙ پوليس انسپيڪٽر حق نواز بلوچ طرفان لاڙڪاڻي جي مختلف ڪرڪيٽ ڪلبن جي مڃيل رانديگرن جي چونڊ ڪري لاڙڪاڻو اسٽارز جي نالي سان ڪرڪيٽ ٽيم جوڙي ورتي آهي. شيخ زيد ڪالوني جي پي سي بي گرائونڊ ۾ تقريب ڪوٺائي چونڊيل رانديگرن ۾ ڪرڪيٽ ڪٽس ورهايون ويون. ان موقعي تي لاڙڪاڻي جي ڊپٽي ڪمشنر محمد نعمان صديق، پريس ڪلب جي صدر ايس اقبال بابو ۽ ٻين طرفان لاڙڪاڻه اسٽارز ٽيم جي رانديگرن محمد صديق ابڙو، عبدالرحيم ابڙو ۽ عبدالستار نوناري سميت ٻين کي ڪرڪيٽ ڪٽس ڏنيون. تقريب کي خطاب ڪندي ڊي سي محمد نعمان چيو ته لاڙڪاڻي ۾ راندين جي حوالي سان کوڙ مسئلا آهن، مون کي آئي 2 مهينا ٿيا آهن پر ان باوجود گرائونڊن جا رڪيل ترقياتي ڪم شروع ڪرائڻ سان گڏ ٻيا مسئلا حل ڪرڻ جي ڀرپور ڪوشش ڪري رهيو آهيان.

لاڙڪاڻو: ڊي سي رانديگرن کي ڪٽس ڏيندي

لاڙڪاڻو: ڊي سي رانديگرن کي ڪٽس ڏيندي

بي بي ايل: ميلبورن اسٽارز سڊني سڪسرز کي مات ڏئي ڇڏي

سڊني (اسپورٽس ڊيسڪ) بگ بيش ليگ ۾ ميلبورن اسٽارز 5 وڪيٽن تان سڊني سڪسرز کي هارائي ڇڏيو. سدني ڪرڪيٽ گرائونڊ تي بيگ بيش ليگ جي 10هين ميچ ۾ ميلبورن اسٽارز ٽاس کٽي پهرين فليڊنگ جو فيصلو ڪيو. پهرين بيٽنگ ڪندي سڊني سڪسرز مقرر اوورن ۾ 9 وڪيٽن جي نقصان تي 130 رنسون ٺاهي سگهي. جي سي سِلڪ 41 رنسون ٺاهي ناٽ آئوٽ رهيو. سين ايبٽ 22 ۽ هيوز 20 رنسون ٺاهي ٽاپ اسڪورر رهيا. مليبورن اسٽارز طرفان ڪوليمن 3، لميڪهناني ۽ ڊي جي براو 2-2 وڪيٽون ورتيون، جڏهن ته زامپا ۽ ميڪسويل هڪ-هڪ وڪيٽ ورتي. جواب ۾ ميلبورن اسٽارز 15 هين اوور جي آخري بال ۽ 5 وڪيٽن جي نقصان تي گهربل هدف ماڻي ميچ کٽي. هينڊز ڪومب شاندار بيٽنگ ڪندي 70 رنسون ٺاهيون، لرڪِن 20 ۽ اسٽوئنس 10 رنسون ٺاهي نمايان رهيا. سڊني سڪسرز طرفان ورشوئز 3 ۽ او ڪِيف 2 وڪيٽون وٺي سگهيا. جڏهن ته 35 بالن تي 70 رنسون ٺاهڻ تي پيٽر هينڊز ڪومب کي ميچ جو بهترين رانديگر قرار ڏنو ويو.

ناڪام بيٽنگ تي مڪي آرٿر سينيئر رانديگرن تي ڏمرجي پيو

سنچورين (اسپورٽس ڊيسڪ) ڏکڻ آفريقا خلاف ناڪام بيٽننگ جو مظاهرو ڪرڻ تي هيڊ ڪوچ مڪي آرٿر ڪپتان سرفراز، اسد شفيق ۽ اظهر سان ڏند چڪ ڏنا. مڪي آرٿر سينيئر رانديگرن کي سخت لفظن ۾ تنقيد جو نشانو بڻايو. پرڏيهي ميڊيا موجب مڪي آرٿر ٽنهي سينيئر رانديگرن کي انگريزي ۾ گاريون ڏئي ۽ ڊريسنگ روم ۾ شيون کڻي هيٺ اڇليون. هوڏانهن سنچورين ٽيسٽ جي ٻي اننگز ۾ سرفراز احمد، اظهر علي ۽ اسد شفيق غيرذميوارراڻي شاٽ کيڏيندي آئوٽ ٿيا.

قومي ٽيم جو ھيڊ ڪوچ مڪي آرٿر

قومي ٽيم جو ھيڊ ڪوچ مڪي آرٿر

ايشيا جون وڏيون ٽيمون پهريون ڀيرو هڪ ئي ڏينهن ٽيسٽ ميچون کيڏنديون
ڀارت، پاڪستان ۽ سريلنڪا 26 ڊسمبر تي باڪسنگ ڊي ٽيسٽ ۾ حصو وٺنديون

ڪراچي (اسپورٽس ڊيسڪ) ڪرڪيٽ جي تاريخ ۾ پهريون ڀيرو ايشيا کنڊ جون ٽي وڏيون ڪرڪيٽ ٽيمون پهريون ڀيرو هڪ ئي ڏينهن ٻين ملڪن سان مقابلو ڪنديون. 26 ڊسمبر تي ڪرسمس جي حوالي سان تحفي طور باڪس ڏنو ويندو آهي، جنهنڪري 26 ڊسمبر کي باڪسنگ ڊي ڪوٺيو ويندو آهي، جڏهن ته آسٽريليا، ڏکڻ آفريڪا، انگلينڊ ۽ نيوزيلينڊ ۾ عيسائي آبادي هئڻ ڪري اتي باڪسنگ ڊي خاص ڏهاڙو آهي، ڪرڪيٽ ۾ به ان ٽيسٽ ميچ رکي ويندي آهي ته جيئن وڌ کان وڌ تماشائين کي پاڻ ڏانهن ڌيان ڇڪائڻ سميت ان کي يادگار بڻائي سگهجي. هلندڙ سال جي باڪسنگ ڊي تي پاڪستان، ڀارت، سريلنڪا پهريون ڀيرو هڪ ئي ڏينهن ٻن گورن جي ٽيمن ۽ ڏکڻ آفريڪا جي اڌ گورن واري ٽيم سان مقابلو ڪنديون. پاڪستان ڏکڻ آفريڪا سان مقابلو ڪندو، ڀارت آسٽريليا خلاف ميدان ۾ لهي کيس دسڻ جي ڪوشش ڪندي، جڏهن ته سريلنڪا پڻ نيوزيلينڊ خلاف مقابلو ڪندي. اهو پهريون ڀيرو آهي جو ايشيائي ٽيمون هڪ ئي ڏينهن نه صرف ٽيسٽ ميچ کيڏي رهيون آهن پر باڪسنگ ڊي ٽيسٽ ۾ پڻ سندن پهرين شرڪت هوندي.

سر فراز احمد ۽ ورات ڪوھلي

سر فراز احمد ۽ ورات ڪوھلي

خيرپور ۾ راندين جو هفتو ملهايو ويو، جناح هائوس ٽيم فاتح
مختلف مقابلن ۾ جناح هائوس پهرين، ٽيپو هائوس ٻئين ۽ اقبال هائوس ٽئين پوزيشن ماڻي، ڪاليج جي پرنسيپال احسان علي فاتح ٽيمن جي رانديگرن ۾ ٽرافي ۽ انعام ورهايا

خيرپور (رپورٽر) خيرپور ۾ راندين جو هفتو شاندار مقابلن سان پڄاڻي تي پهتو. بحريه فائونڊيشن ڪاليج ۾ ڪرايل راندين جي هفتي جي پڄاڻي واري ڏينهن ڇوڪرين جي ٽيمن ۾ ٿرو بال جي فائنل مقابلي جناح هائوس ٽيم 1-2 تان ٽيپو هائوس کي شڪست ڏني. راندين واري هفتي دوران ڇوڪرن جي ڊوڙ واري مقابلي ۾ ٽيپو هائوس جي آصف گوپانگ پهرين ۽ اميد کنڊ ٻين پوزيشن ماڻي. مختلف مقابلن بعد پڄاڻي واري تقريب رکي وئي، جنهن ۾ جناح هائوس پهرين، ٽيپو هائوس ٻين ۽ اقبال هائوس ٽئين پوزيشن جو اعلان ڪيو ويو. خاص مهمان ڪاليج جي پرنسيپال احسان علي سھتو ٽيمن ۾ ٽرافي، شيلڊ ۽ ميڊل ورهايا.

خيرپور: فاتح ٽيم جون رانديگرياڻيون انعام وٺندي

خيرپور: فاتح ٽيم جون رانديگرياڻيون انعام وٺندي

اڳوڻو فاسٽ بالر عاقب جاويد

اڳوڻو فاسٽ بالر عاقب جاويد

قومي ٽيم جي فٽنيس معاملن تي انتظاميه جو ٻٽو معيار آهي: عاقب جاويد

لاهور (اسپورٽس ڊيسڪ) پاڪستان ٽيم اڳوڻي فاسٽ بالر عاقب جاويد ٽيم انتظاميه کي سخت تنقيد جو نشانو بڻائيندي چيو آهي ته ٽيم جي فٽنيس معاملن تي انتظاميه جو ٻٽو معيار آهي. ميڊيا سان ڳالهائيندي عاقب جاويد چيو ته فٽنيس ڪلچر جي دعويدار مئنيجمينٽ خاص رانديگرن کي رعايت ڏي ٿي، ٽيم انتظاميه کان اهو سوال ڪرڻ واجب آهي ته جڏهن ته ٽن رانديگرن جي فٽنيش شڪي هئي ته پوءِ کين ڏکڻ آفريقا ڇو وٺي وئي. هن چيو ته جن رانديگرن کي گذريل دورن ۾ فٽنيس مسئلن تي واپس اماڻيو ويو هو ته اهي ٽيم انتظاميه جي اهڙن فيصلن تي ڇا سوچيندا هوندا. سندس چوڻ هو ته محمد عرفان ۽ وهاب رياض ٽي ٽوئنٽي فارميٽ جا بهترين بالر آهن، پر کين ٽيسٽ ڪرڪيٽ کان ٻاهر ڪيو ويو آهي. هڪ سوال جي جواب ۾ عاقب جاويد جو چوڻ هو ته ڏکڻ آفريقا دوري تي ويندڙ پاڪستاني بيٽسمينن کي پچ بائونس جو اندازو ناهي هوندو، امام الحق ۾ ٽيلنٽ آهي، پر کيس ڏکين حالتن ۾ سکڻ لاءِ وقت لڳندو.

شهداد پور ڀرسان جنوري ۾ چيمپئنز ٽرافي ڪرائڻ جو اعلان

شهداد پور (ن پ ا) شهداد پور ڀرسان ايريا ڪرڪيٽ ڪائونسل جنوري ۾ چيمپئنز ٽرافي ٽورنامينٽ جو اعلان ڪيو آهي. ايريا ڪرڪيٽ ڪائونسل جي چيئرمين مجيب الرحمان رند جي اڳواڻي ۾ مختلف ٽيمن جي ڪپتانن گڏجاڻي ڪري مقصودو رند ۾ ٽورنامينٽ ڪرائڻ جو اعلان ڪيو. هنن چيو ته ٽورنامينٽ ۾ شهدادپور سميت مختلف علائقن جي 30 ٽيمن ۾ مقابلا ٿيندا. جنهن ۾ هر هڪ ڪپتان چئمپئن ٽرافي ٽورنامينٽ ۾ حصو وٺڻ لاءِ پنهنجون ٽيمون رجسٽرڊ ڪرائيندا. سندن چوڻ هو ته چيمپئن ٽرافي ٽورنامينٽ ۾ فاتح ٽيم کي هڪ عدد موٽر سائيڪل، رنر اپ ٽيم ٽيم کي 30 هزار روڪ رقم، جڏهن ته سيريز جي بهترين رانديگر کي 10 هزار روڪ انعام ڏنا ويندا. ايريا ڪرڪيٽ ڪائونسل جي اطلاعات سيڪريٽري منور علي رند موجب چيمپئن ٽرافي ٽورنامينٽ هر سال ڪرائيندا آهيون، نوجوانن ۾ ڪرڪيٽ راند جو وڏو ٽيلنٽ موجود آهي. هن چيو ته ايندڙ سال جون ۽ جولاءِ ۾ ضلعي سطح تي جشن آزادي ڪپ پڻ ڪرائينداسين، جنهن ۾ فاتح ٽيم کي ڏيڍ لک روپيه روڪ رقم ۽ ٻيو انعام ڏنو ويندو.

خيرپور ۾ يوم قائد تي رسا ڪشي جا مقابلا ڪرايا ويا

خيرپور (رپورٽر) خيرپور ۾ قائد اعظم محمد علي جناح جي سالگره جي موقعي تي رسي ڪشي جا مقابلا ڪرايا ويا. سکر ڊويزن ٽگ آف وار ايسوسيئيشن پاران ڪرايل مقابلن جو فائنل خيرپور ۽ سکر جي ٽيمن جي ۾ ٿيو، سخت مقابلي بعد خيرپور 1-2 تان مقابلو کٽي ورتو. رسه ڪشي جي مقابلن ۾ سکر ٻئين ۽ گھوٽڪي ٽئين پوزيشن حاصل ڪئي. ان موقعي تي خاص مهمانن شفقت علي مھيسر ۽ شھمير عباسي کٽندڙ ٽيمن کي ٽرافي ۽ شيلڊ ڏنا.

خيرپور: رسا ڪشي مقابلو کٽيندڙ ٽيم ٽرافي وٺندي

خيرپور: رسا ڪشي مقابلو کٽيندڙ ٽيم ٽرافي وٺندي