اسلام آباد (رپورٽر) ناڻي واري وفاقي وزير اسد عمر چيو آهي ته معيشت جي ترقي لاءِ رڪاوٽون ختم ڪري رهيا آهيون، ناڻي جي ذخيرن کي وڌائڻ لاءِ اڃا وڌيڪ قدم کڻنداسين، ناڻي واري وفاقي وزير اسد عمر پريس ڪانفرنس ڪندي چيو ته پيداوار ۽ روزگار ۽ سيڙپڪاري ۾ واڌ ڪرڻي آهي، غيرملڪي ڪمپنين کي پاڪستان ۾ سيڙپڪاري تي راضي ڪرڻ لاءِ ڪوششون ڪري رهيا آهيون،انهن سان رابطي ۾ آهيون، اسان کي ايڪسپورٽ کي وڌائڻ ۽ هنرمندي کي هٿي ڏيڻ جي اهم ضرورت آهي،
بلاول صاحب! ”اس طرح تو هوتا هي، ايسي ڪامون مين“: مراد سعيد
اسلام آباد (رپورٽر) وفاقي وزير مراد سعيد پ پ چيئرمين جي خطاب تي رد عمل ۾ چيو آهي ته بلاول صاحب “اس طرح تو هوتا هي اس طرح ڪي ڪامون مين” بي رحمي سان ڦرلٽ ڪرڻ وقت اوهان جي والد محترم کي انجام ياد رکڻ گهرجي ها، ناشتي ۽ صدقي جي ٻڪرن جي جعلي اڪائونٽس مان ادائگي جو حوالي ڏيڻ پاڻ هڪ ڏوهه جو اعتراف ڪرڻ آهي، وفاقي وزير مراد سعيد چيو ته سنڌ پوليس کي تباهه ۽ برباد ڪرڻ لاءِ بلاول جي والد ڪرپشن ۾ رت جي هولي جي کلي ڇوٽ ڏني، بلاول کي سمجهه ۾ نٿو اچي ته اسان سمجهائي وٺون ٿا ته پاڪستان بدلجي چڪو آهي، هن يچو ته پي پٽ کي ڪجهه ٻيو نظر اچي يا نه اچي اهو ضرور نظر اچي رهيو آهي ته ڪرپشن خلاف ڌرتي تنگ آهي، نئين پاڪستان ۾ قوم جي ڏوهارين سان مفاهمت نه ٿيندي، بلاول صاحب قوم کي ٻڌايو ٿر ۾ موت جي ننگي رقص جو ذميوار ڪير آهي؟ قوم جي هر هڪ ٻار کي جي آءِ ٽي جي رپورٽ پڙهائڻ گهرجي، قوم کي خبر پوي ته ڪيتري بيدردي سان ملڪ کي لٽيو ويو ۽ ادارا تباهه ڪيا ويا.
آصف زرداري، بلاول ڀٽو، فريال ٽالپر، مراد شاهه، انور مجيد ۽ ملڪ رياض سميت 172 بااثر شخصيتن جا نالا اي سي ايل ۾ شامل
وفاقي ڪابينا پاران جي آءِ ٽي طرفان مني لانڊرنگ معاملن ۾ شامل ڄاڻايل ماڻهن جي پرڏيهه وڃڻ تي پابندي جي منظوري
جي آءِ ٽي کي غيرسنجيدا وٺندڙ آصف زرداري کي جلد احساس ٿيندو، هي پراڻو پاڪستان ناهي: فواد چوڌري
اسلام آباد (رپورٽ: ايم بي سومرو) وفاقي ڪابينا پ پ جي چيئرمين بلاول ڀٽو، اڳوڻي صدر آصف زرداري، فريال ٽالپور، سنڌ جي وڏي وزير سيد مراد علي شاھ ۽ انور مجيد سوڌو مني لانڊرنگ بابت جوڙيل جي آءِ ٽي رپورٽ ۾ شامل 172 ڄڻن جا نالا اِي سي ايل ۾ شامل ڪري سندس پرڏيهه وڃڻ تي پابندي لاڳو ڪرڻ جي منظوري ڏئي ڇڏي آهي. وزيراعظم عمران خان جي صدارت ۾ خميس ڏينهن ٿيل وفاقي ڪابينا جي اجلاس ۾ اهم فيصلو ڪيو ويو آهي. اجلاس ۾ 20 نڪاتي ايجنڊا تي غور ڪيو ويو. اجلاس دوران ڪراچي ۾ ٽارگيٽ ڪري قتل ڪيل ايم ڪيو ايم جي اڳوڻي اڳواڻ علي رضا عابدي جي مغفرت لاءِ دعا ڪئي وئي، جڏهن ته وفاقي وزير نورالحق قادري جي والد جي وفات تي ڏک جو اظهار ڪيو ويو. وفاقي ڪابينا جي اجلاس ۾ ڪيل فيصلن بابت پريس ڪانفرنس ڪندي سڌ سماءُ جي وفاقي وزير فواد حسين چوڌري چيو ته سپريم ڪورٽ ۾ مني لانڊرنگ بابت رپورٽ پيش ڪئي وئي آهي. جي آءِ ٽي رپورٽ ۾ هوش اڏائيندڙ انڪشاف ڪيا ويا آهن ته پوري صوبي کي يرغمال بڻائي سنڌ حڪومت کي مني لانڊرنگ ۾ استعمال ڪيو ويو. وفاقي ڪابينا ان تي غور ڪرڻ بعد آصف زرداري، فريال ٽالپور، مراد علي شاھ سميت جي آءِ ٽي رپورٽ ۾ جن 172 ڄڻن جا نالا شامل آهن، انهن جا نالا اِي سي ايل ۾ شامل ڪرڻ جو فيصلو ڪيو ويو آهي. هن چيو ته آصف زرداري چيو هو ته مان جي آءِ ٽي کي سنجيدگي سان نه ٿو وٺان. اميد آهي ته هاڻي جي آءِ ٽي کي سنجيده وٺندو. هي پراڻو پاڪستان نه آهي جو سوديبازي ٿئي، هي نئون پاڪستان آهي هت قومي خزاني جي هڪ هڪ روپئي جو حساب ٿيندو. ملڪ ۾ احتساب بنا خوف ۽ خطري جي جاري رهندو. جن کي احتساب بابت سنجيدگيءَ جو احساس نه ٿو ٿئي اهو ڪجهه ڏينهن اندر ٿي ويندو. ڪجهه ماڻهن کي ته احساس ٿي ويو آهي، هو ظاهري طور کلي رهيا آهن. هن چيو ته وفاقي ڪابينا ايف آءِ جي ڪارڪردگي جي تعريف ڪئي. وزيراعظم جي آءِ ٽي ۽ ٻين معاملن ۾ ايف آءِ اي پاران ڏيکاريل ڪارڪردگي جي تعريف ڪئي. هن پيپلز پارٽيءَ جي احتجاج ڪرڻ بابت سوال جي جواب ۾ چيو ته حيران آهيان ته سنڌ جا پئسا انور مجيد ۽ هنن لٽيا، انهن پئسن کي بچائڻ لاءِ سنڌ جي انهن ماڻهن کي روڊن تي نڪرڻ لاءِ چئي رهيا آهن جن جو پئسو هنن لٽيو آهي. هن چيو ته ذوالفقار علي ڀٽو ۽ بينظير ڀٽو جي پيپلز پارٽي جو آصف زرداري جي پيپلز پارٽي سان ڪو تعلق نه آهي. 1970 ۾ ذوالفقار علي ڀٽي ته غريبن کي حق ڏيارڻ لاءِ پارٽي ٺاهي هئي، هاڻي آصف زرداري جي پارٽي ۾ ته عجيب ۽ غريب ماڻهو آهن. آصف زرداري جي پارٽي وارا ته هارين کي ٽريڪٽر ۽ ڀاڻ تي مليل سبسڊي جا پئسا به کائي ويا. هنن جو ذوالفقار علي ڀٽو ۽ بينظير ڀٽو جي پارٽي سان سطحي تعلق آهي. ڇا 31 ڊسمبر تي آصف زرداري گرفتار ٿيندو جي سوال جي جواب ۾ هن چيو ته الله ڪري ائين ئي ٿئي، پر اسان ڇا چئي سگھون ٿا، اسان کي ڪهڙي خبر آهي. هن سنڌ ۾ گورنر راڄ بابت پڇيل سوال جي جواب ۾ چيو ته سنڌ هجي يا پنجاب، بلوچستان هجي يا ڪي پي ڪي جي حڪومت اسان سڀ آئين جا پابند آهيون ۽ ڪابه حڪومت آئين جي خلاف ورزي نه ٿي ڪري سگھي. اميد آهي ته اهڙو موقعو نه ايندو. هن ٻڌايو ته وفاقي ڪابينا جي اجلاس ۾ ڪراچي جي صورتحال تي به غور ڪيو ويو. ڪراچي ۾ اچانڪ صورتحال خراب ٿي آهي. علي رضا عابدي قتل ٿيو ۽ اهڙا واقعا ٿيا آهن جن مان لڳي ٿو ته گينگ ٻيهر سرگرم ٿي رهيا آهن. هن چيو ته ڪراچي جو امن معيشت سان واڳيل آهي. ڪراچي جو امن خراب ڪرڻ جي ڪنهن کي اجازت نه ڏينداسين. هن چيو ته الطاف حسين برطانيا ۾ ويهي هت ماڻهن کي قتل ڪرڻ جا حڪم ڏيڻ جهڙيون تقريرون ڪيون، پر برطانيا حڪومت سندس خلاف ڪاروائي نه ڪئي آهي جنهن تي وفاقي ڪابينا ڳڻتي جو اظهار ڪيو آهي. فيصلو ڪيو ويو آهي ته وفاقي حڪومت برطانيا جي حڪومت اڳيان اهو مامرو اٿاريندي. وفاقي وزير چيو ته ڏکڻ آفريڪا جا گينگ ڪراچي ۾ متحرڪ آهن، ڏکڻ آفريڪا جي حڪومت اڳيان معاملو اٿارڻ لاءِ وفاقي ڪابينا پرڏيهي وزارت کي حڪم ڏنو آهي. انهي ملڪ جي زمين پاڪستان ۾ دهشتگردي لاءِ استعمال ٿي رهي آهي. وفاقي ڪابينا ڪراچي ۽ اسلام آباد ۾ لڳل سيڪيورٽي ڪئمرائن واري معاملي تي غور ڪيو. ڪراچي ۾ اڪثر ڪئمرائون ڪم نه ڪري رهيو آهن. ٻنهي شهرن ۾ ان مد ۾ ڪروڙين روپيا خرچ ٿيا آهن. وفاقي ڪابينا گھرو وزارت کي جانچ جو حڪم ڏنو آهي. وفاقي ڪابينا 15 جنوري بعد به موبائل رجسٽريشن ڪرائڻ جي منظوري ڏني آهي، پر 15 جنوري بعد موبائل رجسٽريشن ڪرائيندڙن کي 10 سيڪڙو ڪسٽم ڊيوٽي ادا ڪرڻي پوندي. هن چيو ته اسان موبائل امپورٽ ڪرڻ جي دلشڪني ڪرڻ چاهيون ٿا. وفاقي ڪابينا اتر وزيرستان ۽ مڪران ۾ موبائل سروس فراهم ڪرڻ جي به منظوري ڏني آهي. ڪابينا نيپرا چيئرمين جي سروس اسٽرڪچر جي به منظوري ڏني آهي. وفاقي ڪابينا چين جي مارڪيٽ ۾ بانڊ جاري ڪرڻ، فرخ سبزواري کي ايس اِي سي پي جو نئون چيئرمين مقرر ڪرڻ، اسٽيل مل ۽ ايف آءِ اي کي ضمني بجيٽ ڏيڻ جي به منظوري ڏني آهي. هن چيو ته اسٽيل مل جون 2019 تائين جون رهتون ادا ڪيون وينديون. گذريل حڪومتن اسٽيل مل جو ٻيڙو ٻوڙيو، هاڻي اسٽيل مل هلندي. هن هڪ سوال جي جواب ۾ چيو ته پارليامينٽ ۾ اسان اڪثريت ۾ آهيون. قانونسازي ۾ ڪا ڏکيائي ڪانهي، پيپلز پارٽي ۽ ن ليگ جا ميمبر به اسان جي سپورٽ ڪندا ڇو جو اهي ڪنهن جي لٽ مار ۾ ڇو حصو ٿيندا.
نوازشريف خلاف پاڪ پتن زمين ڪيس: جي آءِ ٽي جو سربراهه تبديل
سپريم ڪورٽ ۾ ڊي جي نيڪٽا خالد داد جي آءِ ٽي جي سربراهي کان معذرت ڪئي
لاهور( م ڊ ) سپريم ڪورٽ نوازشريف خلاف پاڪ پتن زمين ڪيس جي جاچ لاءِ جوڙيل جي آءِ ٽي جو سربراهه تبديل ڪري ڇڏيو، نئين سربراهه کي 10 ڏينهن اندر ٽي او آرز ڏيڻ جي هدايت ڪئي وئي.
سپريم ڪورٽ لاهور رجسٽري ۾ چيف جسٽس پاڪستان ميان ثاقب نثار جي سربراهي ۾ پاڪ پتن زمين ڪيس جي ٻڌڻي ٿي، جنهن دوران جي آءِ ٽي سربراهه ڊي جي نيڪٽا سربراهي کان معذرت ڪئي، جنهن تي چيف جسٽس چيو ته خالق داد لڪ جي معذرت جا ڪارڻ حقيقتن تي ٻڌل آهن، تنهنڪري مٿس دٻاءُ نه ٿا وجهي سگهون.
ڊي جي نيڪٽا جي معذرت بعد چيف جسٽس ڊي جي اينٽي ڪرپشن پنجاب ڊاڪٽر حسين اصغر کي جي آءِ ٽي جو نئون سربراهه مقرر ڪري ڇڏيو، عدالت جي آءِ ٽي جي نئين سربراهه کي 10 ڏينهن ۾ ٽي او آرز ڏيڻ جي هدايت ڪئي آهي.
اسلام آباد ۾ ڀارت جي سفارتي عملي کي ھراسان ڪرڻ وارا الزام رد
ڀارت ۾ سزا پوري ڪندڙ پاڪستانين جي واپسي لاءِ ڪوشش ڪريون پيا: پرڏيهي ترجمان
اسلام آباد (ن پ ا) پاڪستان ڀارتي سفارتي عملي کي اسلام آباد ۾ حراسان ڪرڻ وارن الزام کي رد ڪري ڇڏيو، پرڏيهي ترجمان چيو آهي ته ويانا ڪنوينشن جو احترام ڪيون ٿا، ڀارتي سفارتڪار پاڪستان ۾ پوري آزادي سان ڪم ڪري رهيا آهن، ڀارتي جيلن ۾ سزا پوري ڪندڙ 45 پاڪستاني قيدين جي واپسي لاءِ ڪوششون ڪيون پيون وڃن.
اسلام آباد ۾ هفتيوار بريفنگ دوران پرڏيهي ترجمان ڊاڪٽر فيصل چيو ته ڀارتي جيلن ۾ قيد 45 پاڪستاني قيدي سزا پوري ڪري چڪا آهن، انهن جي واپسي لاءِ ڪوششون ڪيون پيون وڃن، اسلام آباد ۾ ڀارتي سفارتي عملي کي حراسان ڪرڻ وارا الزام بي بنياد آهن، ڀارتي سفارتڪار آزادي سان ڪم ڪري رهيا آهن، پاڪستان ويانا ڪنوينشن جو احترام ڪري ٿو.
هن چيو ته ڪرتارپور راهداري جي اڏاوت جو ڪم تيزي سان جاري آهي، ڀارت سان ڳالهين لاءِ ڪوشش ڪئي پر ڀارت پوئتي هٽي ويو، بنگلاديش جي چونڊن ۾ پاڪستان جي مداخلت جا الزام به بنياد آهن، پاڪستان اهڙن الزامن کي رد ڪري ٿو.
ڊاڪٽر فيصل چيو ته پرڏيهي وزير شاهه محمود قريشي جي چار ملڪي دوري جو مقصد پاڙيسري ملڪن سان لاڳاپا بهتر بڻائڻ آهي، پرڏيهي وزير جي دورن ۾ معاشي سهڪار تي به ڳالهيون ڪيون ويون.
اليڪشن ڪميشن آصف زرداري جي نااهليءَ لاءِ پي ٽي آءِ طرفان داخل درخواست ٻڌڻي لاءِ منظور ڪري ورتي
شروعاتي ٻڌڻي دوران رڳو درخواستگذار جو موقف ٻڌو ويندو: اليڪشن ڪميشن
اليڪشن ڪميشن ۾ آصف زرداري خلاف درخواست تي ٻڌڻي ايندڙ هفتي ٿيڻ جو امڪان
اسلام آباد( ن پ ا ) اليڪشن ڪميشن آصف زرداري جي نااهلي بابت پي ٽي آءِ جي درخواست شروعاتي ٻڌڻي لاءِ منظور ڪري ورتي، ايندڙ هفتي ٻڌڻي ٿيڻ جو امڪان ظاهر ڪيو پيو.
اليڪشن ڪميشن جي 5 رڪني بينچ خرم شير زمان جي درخواست جو جائزو وٺڻ بعد شروعاتي ٻڌڻي لاءِ منظوري ڏني، شروعاتي ٻڌڻي دوران رڳو درخواستگذار کي نوٽيس جاري ڪري سندس موقف ٻڌو ويندو.
آصف زرداري خلاف درخواست تي شروعاتي ٻڌڻي ايندڙ هفتي ٿيڻ جو امڪان ظاهر ڪيو پيو وڃي، درخواست ۾ پي آءِ اي جي خرم شير زمان آصف زرداري تي اثاثا لڪائڻ جو الزام هڻندي کيس نااهل قرار ڏيڻ جي استدعا ڪئي آهي.
واضح رهي ته ڪجهه وقت اڳ وفاقي وزير فواد چوڌري الزام هنيو هو ته آصف زرداري امريڪا ۾ هڪ اپارٽمينٽ جو مالڪ آهي ۽ هن اهو اپارٽمينٽ پنهنجي اثاثن ۾ ظاهر ناهي ڪيو.
نيپرا بجلي جي اگهن ۾ 31 پيسا لاٿ ڪري ڇڏي
بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي: نيپرا
بجلي اگهن ۾ لاٿ سان واهپيدارن کي 2 ارب رپين جو رليف ملندو: نيپرا
اسلام آباد ( ن پ ا ) بجلي جي اگهن ۾ 31 پيسا لاٿ ڪئي وئي، نيپرا موجب بجلي اگهن ۾ لاٿ سان واهپيدارن کي 2 ارب رپين جو رليف ملندو.
بجلي اگهن بابت ٻڌڻي نيپرا جي ٻڌڻي رحمت الله بلوچ جي صدارت ۾ ٿي، جنهن دوران بجلي جي اگهه ۾ 31 پيسا في يونٽ لاٿ جي منظوري ڏني وئي، نيپرا موجب بجلي اگهن ۾ لاٿ نومبر جي ماهوار فيول ايڊجسٽمينٽ جي مد ۾ ڪئي وئي.
نيپرا جو چوڻ آهي ته سينٽرل پاور پرچيزنگ ايجنسي بجلي جي اگهن ۾ لاٿ جي درخواست ڏني هئي ۽ اگهن ۾ لاٿ سان واهپيدارن کي 2 ارب رپين جو رليف ملندو.
ريلوي خسارو ڪيس، خواجه سعد رفيق آڊٽ رپورٽ جو جواب جمع ڪرائي ڇڏيو
لاهور( م ڊ ) اڳوڻي ريلوي واري وفاقي وزير خواجا سعد رفيق وڪيل پاران ريلوي ۾ خساري واري ڪيس ۾ ريلوي خساري تي آڊٽ جو جواب جمع ڪرائي ڇڏيو آهي. سپريم ڪورٽ لاهور رجسٽري ۾ چيف جسٽس پاڪستان ميان ثاقب نثار جي سربراهي ۾ 3 رڪني بئنچ ريلوي خساري واري ڪيس جي ٻڌڻي ڪئي، بئنچ ۾ جسٽس عمر عطا بنديال ۽ جسٽس اعجاز الاحسن به شامل هئا. نيب پاران خواجا سعد رفيق کي عدالت آڏو پيش ڪيو ويو، ان موقعي تي سندس وڪيل پاران ريلوي خساري بابت آڊٽ پيرا جو جواب جمع ڪرايو ويو. سعد رفيق جي وڪيل چيو ته آڊٽ پيراز ۾ ڪابه ڪرپشن ناهي، جنهن تي چيف جسٽس رمارڪس ڏيندي چيو ته نقصان ته ٿيو آهي، جنهن جي جواب ۾ وڪيل چيو ته اهو نقصان نه پر خسارو آهي جيڪو 65 سالن کان هلندو پيو اچي. عدالت خواجا سعد رفيق جي جواب تي آڊيٽر جنرل ۽ وفاقي حڪومت کي جواب تي جواب جمع ڪرڻ جي هدايت ڪئي آهي. ٻئي پاسي سپريم ڪورٽ لاهور رجسٽر ٻاهران ميڊيا سان ڳالهائيندي سعد رفيق چيو ته ريلوي ۾ بهترين ڪم ڪيو، افسوس آهي شيخ رشيد سپريم ڪورٽ ۾ انجڻن جي قيمت تي غلط بياني ڪئي. سعد رفيق چيو ته 22 ڪروڙن ۾ آمريڪي ريلوي انجڻ ايندي آهي نه 44 ڪروڙن ۾ خريدي وئي، ٻنهي معاملن تي شيخ رشيد غلط بياني ڪري رهيو آهي، کيس ساڙ ۽ حسد کان پاسو ڪرڻ گهرجي. خواجه سعد رفيق جو چوڻ هو ته مونسان نيب جو رويو ٺيڪ ناهي، مونکي نيب قانون تي اعتراض آهن ۽ مون خلاف نيب جو ڪيس غلط آهي. صحافي کائنس سوال ڪيو ته اوهان خلاف آمدني کان وڌيڪ اثاثن جي جاچ پڻ شروع ٿي آهي جنهن سعد رفيق چيو ته اسان جي خلاف خبر ناهي ڪهڙيون ڪهڙيون انڪوائريون شروع ڪيون ويون آهن. خواجه سعد رفيق وڌيڪ جو وڌيڪ چوڻ هو ته احتساب جي نالي تي مسلم ليگ (ن) کي ٽارگيٽ ڪيو پيو وڃي نواز شريف کي سزا ڏني وئي ان کان وڏو ظلم ٻيو ڪو به ناهي.
سپريم ڪورٽ چوڌري سرور خلاف ٻٽي شهريت ڪيس اُڪلائي ڇڏيو
لاهور(م ڊ) سپريم ڪورٽ پرڏيهي شهريت ڇڏڻ تي پنجاب جي گورنر چوڌري محمد سرور ۽ مسلم ليگ ن جي نزهت صادق جي خلاف ٻٽي شهريت بابت ڪيس اُڪلائي ڇڏيو. سپريم ڪورٽ رجسٽري ۾ چيف جسٽس ميان ثاقب نثار جي سربراهي ۾ 2 رڪني بينچ ٻٽي شهريت بابت پاڻمرادي نوٽيس جي ٻڌڻي ڪئي. ٻڌڻي دوران پرڏيهي کاتي طرفان رپورٽ جمع ڪرائي وئي جنهن ۾ ٻڌايو ويو ته ٻنهي اڳواڻڻ مستقل طور تي پرڏيهي شهريت ڇڏي ڏني آهي. پرڏيهي کاتي طرفان رپورٽ ملڻ بعد سپريم ڪورٽ ڪيس اُڪلائي ڇڏيو.
ابرار الحق به ٽڪيٽ ڪٽائي لائين ۾ لڳي ويو، صلاحڪاري ملڻ جو امڪان
لاهور (م ڊ) مشهور پاڪستاني گلوڪار ۽ پي ٽي آءِ اڳواڻ ابرار الحق کي وزيراعظم جو ثقافتي صلاحڪار جو عهدو ڏيڻ جو فيصلو ڪيو ويو آهي. ذريعن موجب ابرار الحق ايندڙ ڪجهه ڏينهن تائين وزيراعظم عمران خان سان ملاقات ڪندو. جنهن بعد کيس ثقافت کاتي جي صلاحڪار جي عهدي ۽ ٻين معاملن تي ڳالهه ٻولهه ڪرڻ جو امڪان آهي. ابرار الحق پاڪستان ۾ پنهنجي فن گلوڪاري سبب تمام گهڻي مشهوري ماڻي، جڏهن ته گلوڪاري سان گڏ هن سياست به پير رکيو. هاڻي هو پاڪستان جي حڪمران پارٽي تحريڪ انصاف سان سلهاڙيل آهي. سندس سڀ کان مشهور ڪلام “اسان تي جاڻا بلو دي گھر، ٽڪيٽ ڪٽائو، لين بڻائو” هو، جنهن کيس شهرت جي بلندين تي پهچائي ڇڏيو.
نئون پاڪستان هائوسنگ رٿا، فارم جمع ڪرائڻ جي تاريخ ۾ 21 جنوري تائين واڌ
اسلام آباد( بيورورپورٽ ) نئون پاڪستان هائوسنگ رٿا ۾ فارم جمع ڪرائڻ جي تاريخ ۾ هڪ مهيني جي واڌ ڪئي وئي آهي. ميڊيا رپورٽن موجب نادرا پاران جاري ڪيل بيان ۾ چيو ويو آهي ته عوام هاڻي نئين پاڪستان هائوسنگ پروگرام ۾ حصو وٺڻ لاءِ 21 جنوري تائين فارم جمع ڪرائي سگهندا. اسلام آباد، فيصل آباد، مظفر آباد، سوات، سکر، ڪوئيٽا ۽ گلگت ۾ پنهنجي گهر جا خواهشمند عورت ۽ مرد ضلعي ۽ نادرا آفيس ۾ پنهنجا فارم جمع ڪرائي سگهن ٿا.
پاڪستان تي سي پيڪ جا 40 ارب ڊالر رهتن وارو تاثر غلط آهي: رٿا بندي وزارت
سي پيڪ بيلٽ اينڊ روڊ فليگ شپ نهايت فعال منصوبو آهي: حسن دائود
پاڪستان حڪومت جي مٿان رڳو 6 ارب ڊالر جون رهتون آهن جيڪي گهٽ شرح جي وياج تي ٻڌل آهن
اسلام آباد(بيورو رپورٽ) منصوبا بندي سڌارن واري وزارت ميڊيا ۾ جاري سي پيڪ جي حوالي سان پاڪستان جي مٿان 40 ارب ڊالر قرض باب رپورٽ غلط ڄاڻ تي ٻڌل ۽ ڪوڙي قرار ڏيندي رد ڪري ڇڏي. منصوبابندي واري وزارت ۾ سي پيڪ جي فوڪل پرسن حسن دائود جو چوڻ هو ته سي پيڪ بيلٽ اينڊ روڊ جو فيلگ شپ ۽ انتهائي فعال منصوبو آهي جڏهن ته سي پيڪ جا مالي معاملا حڪومتن جي وچ ۾ قرضن، خانگي سيڙپڪاري ۽ گرانٽس تي ٻڌل هوندا آهن. هن ٻڌايو ته هن وقت 22 منصوبا مڪمل ٿيڻ وارن مختلف مرحلن ۾ آهن ۽ ان ۾ پاڪستان حڪومت جي مٿان رڳو 6 ارب ڊالر جون رهتون آهن جيڪي گهٽ شرح جي وياجي قرضن ۽ انفرااسٽريڪچر منصوبن ۾ گرانٽس تي ٻڌل آهن. هن چيو ته قرض ادائيگي جو مدو 20 کان 25 سالن تائين آهي، ان ڪري پاڪستان جي ذمي 40 ارب ڊالرن جي رهتن جو تاثر ڪوڙ تي ٻڌل آهي، بي بنياد ۽ ڪوڙو آهي. هن چيو ته توانائي جا منصوبا آءِ پي پيز جي تحت مڪمل ڪيا پيا وڃن ۽ انهن جي لاءِ سموري مالي امداد جي فراهمي خانگي ڪمپني جي ذميواري آهي.
ڌمڪين سان چپ نٿو ڪرائي سگهجي، الماڙين ۾ بند ڪيس ڪڍي ريفرنس داخل ڪيا وڃن: نيب چيئرمين
نيب خلاف پروپيگينڊا ڪئي پئي وڃي، پنهنجي ڪارڪردگي سان ان جو مقابلو ڪنداسين: جاويد اقبال
ميگا ڪرپشن ۽ وائٽ ڪالر ڪيسن کي آخري انجام تائين پهچائڻ ترجيح آهي، ڪرپشن ڪندڙ انجام تي پهچندا
پشاور ( م ڊ ) قومي احتساب بيورو ( نيب ) جي چيئرمين جاويد اقبال جو چوڻ آهي ته ڌمڪين ذريعي نيب کي خاموش نٿو ڪرائي سگهجي ٿو. نيب چيئرمين جاويد اقبال خيبرپختونخوا جي آفيس جو دورو ڪيو جتي ڊي جي نيب ڪي پي کيس بيورو جي ڪارڪردگي تي بريفنگ ڏني. ان موقعي تي ڳالهائيندي نيب چيئرمين جاويد اقبال چيو ته هن سال الماڙين ۽ فائلن مان ڪڍي 440 ريفرنس داخل ڪيا، خيرپختونخوا ۾ ڪرپشن جي هنڌن کي ميرٽ تي اڪلايو ويندو، ميگا ڪرپشن ۽ وائٽ ڪالر ڪيسن کي آخري انجام تائين پهچائڻ ترجيح آهي، نيب خلاف منظم پروپيگنڊا ڪيو پيو وڃي پنهنجي ڪارڪردگي سان ان پرپيگنڊا جو مقابلو ڪنداسين. چيئرمين نيب جسٽس ( ر) جاويد اقبال جو چوڻ هو ته ڪرپشن خلاف نيب جي زيرو ٽالرنس پاليسي آهي ۽ ڌمڪين ذريعي نيب کي خاموش نٿو ڪرائي سگهجي، هر قدم قانون جي دائري ۾ رهي ڪري کڻي رهيا آهيون.
وزيراعظم پاران علي رضا عابدي جي قتل تي ڏک جو اظھار، رپورٽ طلب
وزيراعظم ايم ڪيو ايم اڳواڻ جي قتل تي گھري ڏک جو اظھار ڪندي واقعي جي رپورٽ طلب ڪئي
حڪمران پارٽي، مملڪتي گھرو وزير، گورنر سنڌ عمران اسماعيل پاران بھ مذمت، شفاف جاچ جو مطالبو
اسلام آباد (بيورو رپورٽ) وزير اعظم ايم ڪيو ايم اڳواڻ علي رضا عابدي جي قتل جي مذمت ڪندي واقعي جي رپورٽ طلب ڪري ورتي. حڪمران پارٽي تحريڪ انصاف ۽ مسلم ليگ ن واقعي جي فوري جاچ جو مطالبو پڻ ڪيو آھي. وزير اعظم هائوس مان جاري ٿيل بيان موجب وزير اعظم عمران خان ايم ڪيو ايم اڳواڻ علي رضا عابدي جي قتل تي گهري ڏک ۽ افسوس جو اظهار ڪندي سخت لفظن ۾ مذمت ڪئي ۽ واقعي جي رپورٽ پڻ طلب ڪئي آھي. جڏھن تھ تحريڪ انصاف ۽ن ليگ واقعي جي مذمت ڪندي واقعي جي فوري جانچ جو مطالبو ڪيو آھي. ان حوالي سان تحريڪ انصاف جي سيڪريٽري جنرل ارشد داد پاران جاري ڪيل بيان ۾ واقعي تي ڏک ۽ افسوس جو اظهار ڪيو ويو. ن ليگ ترجمان مريم اورنگزيب پڻ علي رضا عابدي جي قتل جي مذمت ڪندي قاتلن کي قانون جي ڪٽھڙي ۾ آڻڻ جو مطالبو ڪيو آھي. مملڪتي گھرو وزير شھريار آفريدي ۽ سنڌ جي گورنر عمران اسماعيل پڻ واقعي تي افسوس جو اظھار ڪيو آھي.
وزير اعظم ڪابينا اجلاس اڄ طلب ڪري ورتو
اسلام آباد (بيورو رپورٽ) وزيراعظم عمران خان وفاقي ڪابينا جو اجلاس اڄ طلب ڪري ورتو. ميڊيا جي رپورٽن موجب وزيراعظم عمران خان طرفان طلب ڪيل وفاقي ڪابينا جو اجلاس ساڍي يارهين وڳي وزيراعظم هائوس ۾ ٿيندو جنهن لاءِ 13 نڪاتي ايجنڊا جاري ڪيو ويو ، نيپرا چيئرمين ۽ ميمبرن جي مقرري ايجنڊا ۾ شامل آهي. ذريعن موجب وفاقي ڪابينا ۾ صحت جي شعبي ۾ فلسطين سان معاهدي، وفاقي ڪابينا چيني مارڪيٽ ۾ بانڊن ۽ ايف آءِ اي لاءِ پنج ڪروڙ جي خاص گرانٽ جي منظور ڏني ويندي. وفاقي ڪابينا جي ايجنڊا ۾ موبائيل ڪمپنين جي لائسنس جي تجديد، هائير ايجوڪيشن ڪميشن ۽ تعليم واري وزارت لاءِ گرانٽ جي منظور شامل آهن ۽ اسٽيل مل لاءِ سپليمنٽري گرانٽ جي منظوري پڻ ڪابينا ايجنڊي ۾ شامل آهي.