اسلام آباد ( م ڊ ) افغان مفاهمتي عمل ۾ اهم اڳڀرائي ٿي آهي، پاڪستان افغان حڪومت ۽ طالبان کي هڪ ميز تي آڻڻ ۾ ڪامياب ٿي ويو. پرڏيهي وزير شاهه محمود قريشي طالبان جي مشروط راضپي بابت افغان حڪومت کي آگاهه ڪري ڇڏيو آهي. پرڏيهي وزير ايران ۽ چين جي پرڏيهي وزير کي به آگاهه ڪيو. ذريعن موجب افغان مفاهمتي عمل ۾ اهم اڳڀرائي ٿي آهي. پاڪستان افغان حڪومت ۽ طالبان کي هڪ ميز تي آڻڻ ۾ ڪامياب ٿي ويو آهي. پرڏيهي وزير طالبان جي مشروط راضپي بابت افغان حڪومت، ايران ۽ چيني پرڏيهي وزير کي آگاهه ڪري ڇڏيو آهي. طالبان افغان حڪومت جي نمائندن سان ملاقات کان انڪار ڪيو هو پاڪستان جي ڪوششن سان طالبان مشروط راضپو ظاهر ڪيو،  ميڊيا تي هلندڙ خبرن موجب طالبان نگران حڪومت قائم ڪرڻ جو مطالبو ڪيو آهي، نگران حڪومت قائم ڪرڻ لاءِ ڪميٽي جوڙڻ جو به مطالبو ڪيو ويو آهي. رپورٽن موجب طالبان ڪميٽي ۾ نمائندگي جو به مطالبو ڪيو ۽ ڪجهه اڳواڻن جي آزاديءَ جو به مطالبو ڪيو.  رپورٽن موجب افغان حڪومت جي رد عمل تي وڌيڪ اڳڀرائي جو امڪان آهي. افغان حڪومت جي هاڪاري رد عمل تي وڌيڪ ڳالهيون ٿينديون.

اسلام آباد(بيورو رپورٽ) سوئي سدرن گيس ڪمپني لميٽڊ( ايس ايس جي سي ايل) سينيٽ جي اسٽيڊنگ ڪميٽي کي خاطري ڪرائي آهي ته سنڌ ۾ گيس جي گهٽتائي کي جلد پورو ڪيو ويندو پر هن ان جي حتمي وقت جي باري ناهي ٻڌايو. ميڊيا جي رپورٽن موجب سينيٽر محسن عزيز جي سربراهي ۾ اسٽيڊنگ ڪميٽي جو اجلاس ٿيو جنهن ۾ مينجنگ ڊائريڪٽر ايس ايس جي سي محمد امين به شرڪت ڪئي. ايم ڊي ايس ايس جي سي ڪميٽي کي ٻڌايو ته سنڌ ۾ هن وقت گيس جي قلت فيلڊ مان ايندڙ مقدار جي گهٽتائي جي ڪري آهي. هن ٻڌايو ته هن وقت ڪمپني کي گيس فيلڊ مان ماهوار 115 ملين ڪيوبڪ فٽ (ايم ايم سي ايف ڊي) جي گهٽتائي کي منهن ڏيڻو پيو پوي.  ايم ڊي ايس ايس جي سي انڪشاف ڪيو ته پاڪستان جي گهٽ ٿيندڙ گيس جي ذخيرن جي ڪري 80 ايم ايم سي ايف ڊي جي گهٽتائي جڏهن ته ڪنار ۽ گمبٽ ۾ گيس سپلاءِ ۾ گهٽتائي جي ڪري باقي شارٽ فال کي منهن ڏيڻو پيو آهي. پر هن ڪميٽي کي خاطري ڪرائي ته جيڪو پاور پلانٽ آڪٽوبر کان ڊسمبر تائين گهٽ گيس فراهم ڪندو رهيو انهن کي نوٽيس جاري ڪري ڇڏيا آهن. .

لاهور(م ڊ) خانگي يونيورسٽين جي قانوني حيثيت بابت سپريم ڪورٽ لاهور رجسٽري ۾ ٻڌڻي دوران چيف جسٽس ريمارڪس ڏنا ته اڄ ڪم ڪري قائد اعظم کي ڀيٽا پيش ڪري رهيا آهيون. تفصيل موجب سپريم ڪورٽ لاهور رجسٽري ۾ چيف جسٽس جي سربراهي ۾ بينچ خانگي يونيورسٽين جي قانوني حيثيت بابت ڪيس جي ٻڌڻي ڪئي. عدالت ۾ ٻڌڻي دوران چيف جسٽس ريمارڪس ڏنا ته عدالت ۾ پيش ڪيل يونيورسٽين جي منظوري بابت تفصيل کان آگاهه ڪيو. سرڪاري وڪيل عدالت کي ٻڌايو ته خانگي يونيورسٽين جي قانوني حيثيت بابت ڪميٽيون بڻايون ويون آهن، انهن ڪميٽين جو اجلاس 28 ڊسمبر تي ٿيندو جنهن ۾ خانگي يونيورسٽين جا معاملا غور هيٺ ايندا. چيف جسٽس ميان ثاقب نثار چيو ته اهي ڪميٽيون سالن جا سال ڪم ڪنديون رهنديون، اسان کي ته حتمي رپورٽ گهربل آهي، وزيرن کي گهرايو،  هتي ڪم ڪيو، يوم قائد اعظم جي موڪل نه ملهائن، قوم جي ابي  چيو هو ته ڪم ڪم ۽ رڳو ڪم. چيف جسٽس آف پاڪستان ريمارڪس ڏنا ته جن پنهنجي زندگي تي کيڏي هي ملڪ بڻايو، اسان ان جي ياد ۾ موڪل ڪري ملهائيندا آهيون، اسان 25 ڊسمبر ته ملهائيندا آهيون ۽ گهر ويهي رهندا آهيون.

لاهور(م ڊ) جماعت اسلامي جي امير سينيٽر سراج الحق چيو آهي ته پاڪستان جو مسئلو آبادي ناهي پر وسيلن جي غير منصفاڻي ورڇ ۽ 60 سيڪڙو کان وڌيڪ بنجر زمين آهي. سينيٽر سراج الحق جو چوڻ آهي ته جن ملڪن آبادي گهٽ ڪئي اتي انفرادي ۽ اجتماعي سڪون ختم ٿي ويو. هن چيو ته اولهه ۽ يورپ آبادي ڪنٽرول کي ترقي جو ذريعو سمجهندا هئا، اڄ هنن آبادي وڌائڻ وارا پروگرام شروع ڪري ڇڏيا آهن. هن چيو ته اولهه جي ايجنڊا تي هلڻ بدران پاڪستان کي پنهنجي ايجنڊا تي هلڻو پوندو. جماعت اسلامي جي امير چيو ته پاڪستان جو مسئلو آبادي نه پر اختيارن جي غير منصفاڻي ورڇ ۽ 60 سيڪڙو بنجر زمين آهي. هن چيو ته حڪومت وسيلن جي منصفاڻي ورڇ، ڪرپشن جي خاتمي ۽ بنجر زمين آباد ڪرڻ ڏانهن ڌيان ڏئي. ڊيم فنڊن بابت ڳالهائيندي سراج الحق چيو ته چيف جسٽس ۽ وزير اعظم طرفان ڊيمن جي اڏاوت جو منصوبو فخر جوڳو آهي.

اسلام آباد(م ڊ) حريت اڳواڻ ياسين ملڪ جي گهر واري مشال ملڪ چيو آهي ته اڄ قوم جي ابي کي ڀيٽا پيش ڪرڻ جو ڏينهن آهي، قائد اعظم محمد علي جناح ڪشمير کي پاڪستان جي شهه رڳ قرار ڏنو هو. تفصيل موجب حريت اڳواڻ ياسين ملڪ جي گهرواري مشال ملڪ پاڪستان جي باني جي سالگرهه ۽ ڪرسمس جي موقعي تي پنهنجي پيغام ۾ چيو آهي ته اڄ قوم جي ابي کي ڀيٽا پيش ڪرڻ جو ڏينهن آهي، پاڪستان ۾ اقليتون آزاد هوائن ۾ ساهه کڻي رهيون آهن. هن چيو ته قوم ڪرسمس جي خوشين ۾ برابر جي شريڪ آهي، مسيحي برادري هميشه ڪشميرين جي حق ۾ آواز اٿاريو آهي. هن چيو ته قائد اعظم ڪشمير کي پاڪستان جي شهه رڳ قرار ڏنو هو جڏهن ته اقليتن هميشه ڪشميرين تي ظلمن خلاف احتجاج ڪيو.

لاهور(م ڊ) مسلم ليگ ن جي اڳواڻ عظميٰ بخاري کي مسلم ليگ ن جي سوشل ميڊيا جو سربراهه بڻائڻ جو فيصلو ڪيو يوو آهي جنهن جو نوٽيفڪيشن جلد جاري ڪيو ويندو. تفصيل موجب مسلم ليگ ن جي غير فعال سوشل ميڊيا کي ٻيهر موثر بڻائڻ جو فيصلو ڪيو ويو آهي ۽ ان ضمن ۾ متحرڪ عورت اڳواڻ عظميٰ بخاري کي اِها ذميواري ڏيڻ جو فيصلو ڪيو ويو آهي. عظمي بخاري کي موجوده صورتحال خاص طور تي نواز شريف جي ٻيهر گرفتاري بعد پارٽي نظريي کي سوشل ميڊيا تي موثر انداز ۾ پيش ڪرڻ جي ذميواري ڏني وئي آهي، عظميٰ بخاري جلد مسلم ليگ ن جي سوشل ٽيم کي چونڊيندي.

اسلام آباد (م ڊ) وزيراعظم عمران خان پاناما پيپر ۽ جعلي اڪائونٽن وارين جي آءِ ٽي رپورٽن کي رياستن جي ناڪامي ۽ قرض ۽ غربت جي واڌ جي حوالي سان هڪ ڪيس اسٽڊي قرار ڏئي ڇڏيو. سماجي رابطن واري ويب سائيٽ ٽوئيٽر تي جاري ڪيل پنهنجي پيغام ۾ وزيراعظم لکيو ته پاناما ۽ ڪوڙن اڪائونٽن جي جي آءِ ٽي رپورٽون ڪيس اسٽڊي آهن ته رياستون ڪيئن ناڪام ٿينديون آهن ۽ ڪهڙي طرح غربت ۽ قرض ۾ ٻڏي وينديون آهن.  وزيراعظم عمران خان وڌيڪ لکيو ته جنهن طريقي ۽ جنهن پيماني تي عوام پئسو چوري ڪيو ويو، اهو ناقابل يقين آهي ، وزيراعظم وڌيڪ لکيو ته مونکي انهن ماڻهن تعجب ٿئي ٿو، جيڪي رپورٽون پڻ بعد به لٽيرن جو بچاءُ ڪري رهيا آهن.

اسلام آباد (رپورٽ: ايم بي سومرو)پاڪستان تحريڪ انصاف جي حڪومت عالمي مالياتي اداي آءِ ايم ايم ايف جو بجلي مهانگي ڪرڻ وارو شرط مڃي ورتو آهي، جڏهن ته گذريل حڪومت ۾ ٿيل گيس چوري جا 65 ارب به عوام کان اوڳاڙڻ جو فيصلو ڪيو ويو آهي. ان سلسلي ۾ ٻڌايو پيو وڃي ته پي ٽي آءِ سرڪار بيل آئوٽ پيڪيج لاءِ عالمي مالياتي فنڊ جا چئن مان ٻه مطالبا مڃي ورتا آهن، جڏهن ته آءِ ايم ايف ڊالر مهانگو ڪرڻ واري شرط تان هٿ کڻي ويو آهي. ذريعن موجب حڪومت روينيو اوڳاڙي بابت آءِ ايم ايف جو مطالبو تسليم نه ڪيو آهي، حڪومت جو موقف آهي ته روينيو اوڳاڙي جو هدف 4700 ارب رپين بدران 4400 ارب رپين تائين وڌايو ويندو ، جڏهن ته ذريعن موجب حڪومت پاران عالمي مالياتي اداري جو بينڪن کان قرض تي وياج جي شرح ٻيڻ تي وڌائي 13 سيڪڙو تائين وڌائڻ جو مطالبو مڃڻ کان به انڪار ڪيو ويو آهي. ٻڌايو پيو وڃي ته بيل آئوٽ پيڪيج تي ڳالهين لاءِ آءِ ايم ايف جي وفد جي جنوري جي پهرئين هفتي ۾ پاڪستان اچڻ جو امڪان آهي، آءِ ايم ايف جي نه اچڻ جي صورت ۾ وڊيو ڪانفرنس تي ڳالهيون ٿينديون. هوڏانهن تحريڪ انصاف جي حڪومت مسلم ن جي گذريل حڪومتي دور جي پنجن سالن دوران ٿيل گيس چوري جا 65 ارب روپيا واهپيدار کان وصول ڪرڻ جو فيصلو ڪيو آھي، ان سلسلي ۾ اوگرا سئي نادرن گيس ڪمپني جي درخواست تي 2013 کان گذريل پنج سالن دوران ٿيل گيس چوري جي مد ۾صارفين کان 65 ارب روپيا وصول ڪرڻ جي منظوري ڏئي ڇڏي آھي، اها رقم صارفين کان مرحلي وار بلن ذريعي وصول ڪئي ويندي، سئي نادرن جي صارفين کان چوري ٿيندڙ گيس جي مد ۾ اڳ ئي ساڍا چار سيڪڙو وصولي ٿي رهي آھي، جنهن شرح ۾ واڌ ڪري 7.1 سيڪڙو ڪئي وئي آھي.