اسلام آباد ( م ڊ ) العزيزيه ريفرنس ۾ گرفتار نوازشريف کي اڊيالا جيل کان ڪوٽ لکپت جيل منتقل ڪيو ويو، ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو.
نيب ٽيم صبح ڌاري اڊيالا جيل پهتي، جتان روڊ ذريعي نوازشريف کي ايئرپورٽ پهچائڻ بعد خصوصي جهاز ذريعي لاهور پهچايو ويو، جنهن بعد اڳوڻي وزيراعظم کي ڪوٽ لکپت جيل منتقل ڪيو ويو
پنجاب جي گهرو سيڪريٽري جو چوڻ آهي ته ڪوٽ لکپت جيل ۾ نوازشريف لاءِ بي ڪلاس ڪمرو تيار ڪيو ويو آهي، جنهن ۾ ٽي وي، هنڌ بسترو، ڪمبل، هيٽر، ڪرسي ۽ ميز رکرائي وئي آهي، کيس هڪ خدمتگار ۽ گهران ماني گهرائڻ جي سهولت به هوندي.
گهرو سيڪريٽري جو وڌيڪ چوڻ هو ته صوبي ۾ امن خراب ڪندڙن کي سختي سان منهن ڏنو ويندو، ڀڃ ڊاهه ڪندڙن خلاف دهشتگردي جا ڪيس داخل ڪيا ويندا، امن امان جي حوالي سان ڪشمنر ۽ آر پي کي خصوصي هدايتون جاري ڪيون ويون آهن.
نوازشريف کي اڊيالا جيل کان ڪوٽ لکپت جيل منتقل ڪيو ويو
نوازشريف کي ڪوٽ لکپت جيل جي بي ڪلاس روم ۾ رکيو ويندو: گهرو سيڪريٽري
سنڌ جو خوراڪ کاتو آبادگارن لاءِ قرض کڻي ڪڻڪ خريداري ڪندي پاڻ 104- ارب جو قرضي ٿي ويو!
خوراڪ کاتي پاران ڪڻڪ خريداري لاءِ بينڪن کان قرض کڻڻ سبب 14 لک وياج ڀرڻ تي مجبور
آبادگارن کي بارداڻو ڏيڻ کان وٺي ڪڻڪ کڻي پهچائڻ تي هر ٻوريءَ تي هڪ سئو رپيا وڌيڪ ڀرڻا پون ٿا
ڪراچي (رپورٽ:دودو چانڊيو) سنڌ جو خوراڪ کاتو آبادگارن لاءِ قرض کڻي ڪڻڪ خريد ڪندي بئنڪن جو 104 ارب رپين جو قرضي بڻجي ويو آهي. کاتي کي هر سال صرف وياج تي 14 لک رپيا ادا ڪرڻا پون ٿا، سنڌ جو خوراڪ کاتو هر سال آبادگارن کان هڪ ڪروڙ 10 لک کان هڪ ڪروڙ 20 لک جي لڳ ڀڳ ٻوريون خريد ڪندو آهي، جيڪو سنڌ ۾ پيدا ٿيندڙ ڪڻڪ جو 30 سيڪڙو هوندو آهي. آبادگارن کي بارداڻو ڏيڻ کان وٺي ڪڻڪ کڻي گدامن ۽ سينٽرن تائين پهچائڻ تائين سنڌ جي خوراڪ کاتي کي هر ٻوريءَ تي هڪ سئو رپيا وڌيڪ ادا ڪرڻا پون ٿا، اهڙي ريت سنڌ جي خوراڪ کاتي کي اها ٻوري چار مهينا مختلف گدامن ۾ رکڻ بعد ساڳئي اگهه تي فلور ملن ۽ اٽي چڪين کي ڪوٽا تحت وڪرو ڪرڻي پوي ٿي. هر سال توڙي جو ڪڻڪ جو امدادي اگهه الڳ هجي ٿو. خوراڪ کاتي وٽ ڇاڪاڻ ته پنهنجا پئسا ناهن، تنهن ڪري کاتو پهرين نيشنل بئنڪ ۽ هاڻي سنڌ بئنڪ کان هر سال قرض کڻي سنڌ جي آبادگارن کان ڪڻڪ وٺندو آهي، اهو قرض گڏ ٿي هاڻ 104 ارب رپيا ٿي ويو آهي، جنهن جو وياج ئي هر سال 14 ارب رپيا خوراڪ کاتو بئنڪن کي ادا ڪري ٿو، خوراڪ واري صوبائي وزير هري رام ڪشوري لال ٻڌايو ته سنڌ جي خوراڪ کاتي جو قصو هلي ئي قرضن تي ٿو جيڪو آئون25 سالن کان ڏسندو پيو اچان. هن چيو تهآئون بنيادي طور آبادگار آهيان، مونکي تازو خوراڪ کاتي جو قلمدان مليو آهي، بارداڻو غريب آبادگارن کي ملندو ئي ناهي، سڀ وڏيرا ۽ سيٺ کڻي ويندا آهن، صوبائي وزير چيو ته جڏهن ڪڻڪ لهندي آهي ته فوڊ انسپيڪٽر اسان وزيرن جو به فون ناهن کڻندا، مون اچڻ سان ئي سيڪريٽري خوراڪ کي هدايتون ڏنيون آهن ته جيڪڏهن ڪو فوڊ انسپيڪٽر فون نه کڻندو ته اهو معطل هوندو، آئون هن کاتي کي ضرور سڌاريندس.
ڏهرڪي: فلمي سين، ڪار پٽڙين ۾ ڦاسي پئي، ٽرين ڏسي ڪار سوارن ٽپا ڏئي جان بچائي
ڏهرڪي (اعظم سهرياڻي ) ڏهرڪي ريلوي اسٽيشن ڀرسان,سانڪو روڊ جي کليل ڦاٽڪ ڪراس ڪندي ڪار ريلوي ٽريڪ جي پٽڙين ۾ ڦآسي پيئي، ڪراچي کان لاهور ويندڙ ڪراچي ايڪسپريس ٽرين پهچي ويئي ٽرين کي ويجهو ڏسي ڪار سوارن ڪار مان ٽپو ڏيئي جان بچائي، ٽرين جو ٽريڪ تي ڦاٿل ڪار ٽڪرا ٽڪرا ٿي ويئي، اکين ڏٺن شاهدن جو چوڻ آھي ته ڪار کي ٽڪر لڳڻ بعد ڪار سوار موقعي تان ڀڄي ويا. حادثي جو شڪار ٿيل ڪار جي ڊرائيور ميرپور ماٿيلو جي رهواسي غلام فريد شيخ والد غلام حسين کي ڏهرڪي پوليس گرفتار ڪرڻ جي دعويٰ ڪئي آھي. پوليس موجب ڊرائيور غلام فريد شيخ ميرپور مان سواري کڻي داد لغاري ڇڏي ڏهرڪي واپس اچي رهيو هيو ته ڪار پٽڙين ۾ ڦاسي پئي، ٽرين ايندو ڏسي ڊرائيور جان بچائي آھي، پوليس جو چوڻ آھي گاڏي جو مالڪ ڳڙهي چاجر جو رهواسي علي محمد بوزدار ٻڌايو وڃي ٿو.
پاڪستان سوڌو سڄي دنيا ۾ ڪرسمس ملهايو پيو وڃي
گرجا گهرن ۾ خاص عبادت جا انتظام، امن لاءِ دعائون گهريون وينديون
مرڪزي تقريب ويٽيڪن سٽي ۾ ٿيندي، پوپ فرانسس روايتي رسم ادا ڪندو
ڪراچي (ا ڊ) پاڪستان سميت سڄي دنيا ۾ مسيحي برادري پاران حضرت عيسيٰ عليهه اسلام جي جنم ڏهاڙي جي حوالي سان ڪرسمس ملها يو پيو وڃي. اڄوڪي ڏينهن تي گرجا گهرن ۾ گڏيل طور خاص عبادت جا انتظام ڪيا ويا آهن، جڏهن عبادت ۾ امن توڙي سلامتي لاءِ خاص دعائون گهريون وينديون آهن. مرڪزي تقريب ويٽيڪن سٽي ۾ ٿيندي، پوپ فرانسس روايتي رسم ادا ڪندو. ڪرسمس جي ڏينهن تي مسيحي برادري هڪٻئي ۾ تحفن جي ڏي وٺ ڪندي آهي، جڏهن ته مزيدار ۽ خاص کاڌا پڻ تيار ڪيا ويندا.
خيرپور ۾ جبلن جي غيرقانوني ليز، رائلٽي جي مد ۾ ڪرپشن، اينٽي ڪرپشن جاچ شروع ڪري ڇڏي
مائنز اينڊ منرل کاتي جي اختيارين کان 20 سالن دوران ٿيل ليز، بينڪ اڪائونٽ جا تفصيل طلب
مائنز اينڊ منرل کاتي جي عملدارن خلاف پٿر ۽ بجري جا غيرقانوني لائسنس جاري ڪرڻ جي جاچ
ڪراچي (رپورٽ:شاهد ميراڻي) خيرپور ضلعي ۾ پهاڙن جي غيرقانوني ليز ٿيڻ جو انڪشاف ٿيو آهي، رائلٽي جي مد ۾ به مائينز اينڊ منرل کاتي جي اختيارين پاران روزانو لکين روپين جا گھپلا، اينٽي ڪرپشن کاتي جي اختيارين جاچ شروع ڪري ڇڏي، ڊي جي مائينز اينڊ منرل کي جاچ ٽيم پاران 20 سالن ۾ ٿيل ليز، بئنڪ اڪائونٽ، رائلٽي ۽ ضلعي ۾ سائيٽن جي تفصيلن سميت طلب ڪري ورتو آهي. ان سلسلي ۾ مليل ڄاڻ موجب ته اينٽي ڪرپشن کاتي جي اختيارين پاران خيرپور ضلعي جي پهاڙي علائقن مان نڪرندڙ پٿر ۽ بجري جي رائلٽي جي مد ۾ مبينا طور روزانو ٿيندڙ لکين روپين جي گھپلن ۽ غيرقانوني طور من پسند ماڻهن کي لائسنس جاري ڪرڻ واري معاملي جي جاچ شروع ڪري ڇڏي آهي. اينٽي ڪرپشن کاتي جي اختيارين پاران ڊائريڪٽر جنرل (ڊي جي ) مائينز اينڊ منرل ڏانهن نوٽيس اماڻي کيس طلب ڪري ورتو آهي. جڏهن ته 1997ع کان هلندڙ مهيني تائين يعني 20 سالن جو سمورو رڪارڊ پڻ گھرائي ورتو آهي. مائينز اينڊ منرل کاتي ڏانهن اماڻيل نوٽيس ذريعي اينٽي ڪرپشن جي جاچ ٽيم پاران 20 سالن دواران لائسنس لاءِ درخواستگذارن جا تفصيل، رائلٽي جي مد ۾ ملندڙ رقم، ڄاڻايل عرصي ۾ جاري ڪيل لائسنس، بئنڪ اڪائونٽ جا تفصيل ۽ آڊٽ رپورٽ طلب ڪري ورتي آهي، سيڪريٽري مائينز اينڊ منرل چيو آهي ته اينٽي ڪرپشن جي جاچ ٽيم ڊي جي ڏانهن نوٽيس اماڻيو آهي، مون کان مدد ورتي وئي ته رڪارڊ ڏيارڻ ۾ ساڻن قانون موجب هر سهڪار ڪندس. ان سلسلي ۾ سيڪريٽري مائينز اينڊ منرل شمس الدين سومرو رابطو ڪرڻ تي “پنهنجي اخبار” سان ڳالهائيندي چيو آهي ته اينٽي ڪرپشن جي اختيارين ڊائريڪٽر جنرل مائينز اينڊ منرل کان رڪارڊ ورتو آهي. مون سان ڪنهن به رابطو ناهي ڪيو. هن چيو ته جيڪڏهن اينٽي ڪرپشن جي جاچ ٽيم پاران مون کان ڪا مدد ورتي وئي ته رڪارڊ ڏيارڻ ۾ مان ساڻن سهڪار ڪندس، ليز بااثر سياستدانن جي ويجھن ماڻهن ۽ سندن سفارشين کي ڏنا وڃن ٿا، قانون موجب پهاڙن جي ڪٽائي به نه ٿي ڪئي وڃي. ان سلسلي ۾ ذريعن وٽان مليل ڄاڻ موجب ته روهڙي رينج ۾ ايندڙ خيرپور ضلعي جي علائقن ابن شاھ، درگاھ ابراهيم آدم سلطان ۽ ٻين هنڌن تي موجود پهاڙون هيوي مشينن سان ڪٽي پٿرن جو وڏو ڪاروبار ڪيو وڃي ٿو. ذريعن جو اهو پڻ چوڻ آهي ته بااثر سياستدانن جي ويجھن ماڻهن کي آساني سان ليز ملي وڃي ٿي. جنهن بعد قانون جي ابتڙ پهاڙن جي ڪٽائي ڪئي ويندي آهي. پر ان باوجود مائينز اينڊ منرل کاتي جي اعليٰ اختيارين قانون کي حرڪت ۾ نه ٿيون آڻين.
ايجوڪيشن ورڪس ۾ 42 ڪروڙن جا گهپلا، هڪ جاچ مڪمل، ڪامورن کي بچائڻ لاءِ جتن
چيف انجنيئر تي 428 ملين رپين جي ڪرپشن جو الزام، اينٽي ڪرپشن جاچ مڪمل ڪري ڇڏي
ڪجهه عملدارن پاران ٻيهر جاچ ڪرائي جوابدارن کي فائدو پهچا ئڻ جي ڪوشش
حيدرآباد(رپورٽر)سنڌ ايجوڪيشن ورڪس ڊپارٽمينٽ ۾ 42 ڪروڙ 80 لک روپين جي رقم ۾ گهوٻين جو انڪشاف ٿيو آهي، اها رقم سنڌ جي 18 ضلعن ۾ اسڪولن جي تعمير ۽ مرمت جي حوالي سان ايجوڪيشن ورڪس کاتي کي ملي هئي، جنهن جي جاچ تي سنڌ جي اينٽي ڪرپشن کاتي جا ڪجهه آفيسر ڪرپشن ۾ ملوث عملدارن کي بچائڻ جي ڪوششن ۾ لڳي ويا آهن، جڏهن ته کاتي جا ٻيا آفيسر هن ڪيس کي ثابت ڪرڻ لاءِ سرگرم بڻيل آهن، اينٽي ڪرپشن کاتي جي ذريعن وٽان مليل دستاويزن موجب سنڌ جي ايجوڪيشن ورڪس کاتي ۾ 2017ع جي شروعات ۾ ٺيڪيدارن کي مختلف اسمن جي مد ۾ 10 سيڪڙو اضافي رقم ادا ڪئي وئي، جنهن تي هڪ غيرسماجي تنظيم اينٽي ڪرپشن کاتي کي خط لکيو ته ايجوڪيشن ورڪس کاتي جي چيف انجنئر فريدالدين صديقي انهن ٺيڪن جي مد ۾ 428 ملين روپين جي ڪرپشن ڪئي آهي، هن درخواست جي بنياد تي چيف سيڪريٽري سنڌ جاچ جي منظوري ڏني، ۽ اينٽي ڪرپشن اسٽيبلشمينٽ ڪراچي جي ڊپٽي ڊائريڪٽر ون هيڊڪوارٽر ضمير عباسي کي هن معاملي جي جاچ جو آفيس مقرر ڪيو، ذريعن موجب ضمير عباسي 15 آگسٽ 2018ع تي پنهنجي هڪ رپورٽ ۾ اهو ثابت ڪيو آهي ته ايجوڪيشن ورڪس کاتي ۾ فيبروري 2017ع کان جون 2017ع تائين ٿيل ٺيڪن جي مد ۾ 42 ڪروڙ 80 لک روپين جي ڪرپشن ٿي آهي، پنهنجي رپورٽ ۾ هن سفارش ڪئي آهي ته ان ڪرپشن ۾ ملوث عملدارن خلاف ايف آءِ آر داخل ڪري، کين گرفتار ڪرڻ جي اجازت ڏني وڃي، پر اينٽي ڪرپشن کاتي جي ڪجهه بالا آفيسرن ان رپورٽ تي عمل ڪرڻ بدران اها جاچ اسسٽنٽ ڊائريڪٽر (اي) سرڪل آفيسر اينٽي ڪرپشن اسٽيبلشمينٽ حيدرآباد جي عرفان علي ارباب جي حوالي ڪئي، جنهن پنهنجي رپورٽ ۾ لاڳاپيل عملدارن کي ڪرپشن ڪرڻ کان آجو قرار ڏيندي، پنهنجي بالا آفيسرن ڏانهن اماڻيل رپورٽ ۾ ذميوارن خلاف صرف کاتيوار ڪارروائي جي سفارش ڪئي آهي، ذريعن موجب اينٽي ڪرپشن کاتي جي ايڊيشنل ڊائريڪٽر ليگل رضوان احمد ترمزي پاران ضمير عباسي جي رپورٽ کي وڌيڪ ڪارروائي لاءِ اعليٰ عملدارن ڏانهن اماڻڻ بدران پاڻمرادو معاملي جي ٻيهر جاچ هڪ اسسٽنٽ ڊائريڪٽر عرفان ارباب حوالي ڪئي، جڏهن ته قانون مطابق اها جاچ ڊپٽي ڊائريڪٽر جي معرفت اماڻڻ گهرجي ها، پر ذاتي مفادن خاطر اها انڪوائري سڌي ريت هڪ اسسٽنٽ ڊائريڪٽر ڏانهن اماڻي وئي، ذريعن موجب هن معاملي تان اينٽي ڪرپشن جي عملدارن وچ ۾ شديد اختلاف هلندڙ آهن ۽ حيدرآباد جي ڊپٽي ڊائريڪٽر ذاڪر سمون، اسسٽنٽ ڊائريڪٽر عرفان علي ارباب جي جاچ تي اسسٽنٽ ڊائريڪٽر ليگل اينٽي ڪرپشن اسٽيبلشمينٽ حيدرآباد کان ليگل اوپينئن وٺڻ بعد هن ڪيس جي جاچ ٻيهر شروع ڪرائي آهي ۽ سرڪل آفيسر حيدراباد شير محمد سانگي کي جاچ حوالي ڪندي، کانئس 15 ڏينهن ۾ رپورٽ طلب ڪئي آهي. ذريعن موجب ڊپٽي ڊائريڪٽر اينٽي ڪرپشن ڏانهن اماڻيل ليگل اوپينيئن ۾ اسسٽنٽ ڊائريڪٽر ليگل ڄاڻايو آهي ته ڊپٽي ڊائريڪٽر ضمير عباسي جي رپورٽ ميرٽ ۽ ثبوتن تي ٻڌل هئي، جڏهن ته اسسٽنٽ ڊائريڪٽر عرفان علي ارباب جي جاچ رپورٽ جوابدارن کي فائدو ڏيڻ لاءِ جوڙي وئي آهي، اسسٽنٽ ڊائريڪٽر ليگل پنهنجي رپورٽ ۾ سفارش ڪئي آهي ته ضمير عباسي جي رپورٽ جي روشني ۾ هن ميگا ڪرپشن جو ڪيس جوابدارن خلاف داخل ڪيو وڃي، فيبروري 2017ع کان جون 2017 تائين سنڌ جي 18 ضلعن ۾ اسڪولن جي تعمير ۽ مرمت لاءِ 428 ملين روپيا آيا هئا ۽ ان دور ۾ مهانگائي جو جواز ڄاڻائي چيف انجنيئر ايجوڪيشن ورڪس فريد صديقي ٺيڪيدارن کي 10 سيڪڙو اضافي ادائيگي ڪرڻ جو ليٽر جاري ڪيو هو، جنهن تي اها جاچ نگران حڪومت ۾ شروع ڪئي وئي هئي، حيدرآباد: ضمير عباسي جي تيار ڪيل رپورٽ ۾ اهو انڪشاف ڪيو ويو آهي ته جنهن وقت ٺيڪيدارن کي ٺيڪن تي 10 سيڪڙو اضافي رقم ڏني وئي هئي، ان وقت گهربل سامان سستو هو پر ان جي باوجود اضافي ريٽ لڳائي رقم ۾ ڪرپشن ڪئي وئي.
بجيٽ ختم ٿي وئي آهي، پيٽرول پمپن جا قرضي ٿي ويا آھيون:اي ايم ايس
مريضن کان تيل جي مد ۾ اوڳاڙي ڪئي آھي، ڪوشش آهي ته اوڌر تيل ملي وڃي
مٺي: اسپتال جي اي ايم ايس ڊاڪٽر چمن شرما رابطو ڪرڻ تي ٻڌايو ته اسپتال کي تيل جي مد ۾ مليل بجيٽ ختم ٿي ويئي آھي. پيٽرول پمپن جا قرضي ٿي ويا آھيون، جيڪي وڌيڪ اوڌر تي تيل نٿا ڏين انڪري اسان صرف اڄ کان مريضن کان تيل جي مد ۾ اوڳاڙي ڪئي آھي. ڪوشش ڪريون ٿا ته ڪنهن پينٽرول پمپ تان اوڌر تيل ملي وڃي ته جيئن بجيٽ اچڻ تائين مفت ايمبولينسز سروس جاري رکي سگهون. هن چيو ته اسان وٽ تيل جا ڏوڪڙ نه هوندا ته اسين پنهنجي گهران ته تيل ڀرائي ريفر ڪيل مريضن کي اسپتالن تائين نٿا پهچائي سگهون.
مٺي سول اسپتال انتظاميه مفت ايمبولنس سروس مهيني بعد بند ڪري ڇڏي، مريض دربدر
وڏي وزير سيد مراد علي شاهه جي هدايتن تي صرف هڪ مهينو ئي عمل ٿي سگهيو، ڳري ڀاڙي جي اوڳاڙي شروع
ريفر ٿيندڙ هر مريض کان اوڳاڙڻ خاطر ڪراچي لاءِ 10 هزار ۽ حيدرآباد لاءِ 7 هزار روپيه ڀاڙو مقرر ڪيو ويو
مٺي(رپورٽر)مٺي سول اسپتال انتظاميه بجيٽ ختم ٿي وڃڻ جي بهاني مريضن لاءِسنڌ سرڪار پاران شروع ڪيل مفت ايمبولينسز سروس اوچتو بند ڪري ڇڏي،مريضن کان ڳاٽي ٽوڙ ڀاڙو اوڳاڙي شروع ڪيو ويو آھي. جنهن ڪري مٺي سول اسپتال مان ڪراچي ۽ حيدرآباد سميت شھرن جي اسپتالن ڏانهن ريفر ٿيندڙ ڏڪار متاثر ٻارڙا توڙي عام مريض ڀاڙو نه هجڻ ڪري دربدر ۽ پريشان ٿي ويا آھن. ان ڏس ۾ وڏي وزير سيد مراد علي شاه پاران هڪ مهينو اڳ تيل جي مد ۾ اضافي بجيٽ جاري ڪندي ڏڪار متاثر مريضن لاءِ مفت ايمبولينسز سروس شروع ڪئي هئي ۽ ڏڪار جون هنگامي حالتون معمول تي اچڻ تائين مفت ايمبولينسز سروس جاري رکڻ ۽ ڪنهن به مريض کان ڀاڙو اوڳاڙي نه ڪرڻ جو اعلان ڪندي مقامي اسپتالن جي انتظاميه کي وارننگ جاري ڪئي هئي ته جنهن به مريضن کان ايمبولينسز سروس جي نالي تي ڀاڙو وصول ڪيو انکي جيل اماڻيو ويندو. ان اعلان کانپوءُ هڪ مهينو اڳ شروع ٿيل مفت ايمبولينسز سروس مٺي سول اسپتال انتظاميه بجيٽ ختم ٿي وڃڻ جو جواز ڄاڻائي بند ڪري ڇڏي آھي ۽ ريفر ٿيندڙ هر مريض کان ڪراچي لاءُ 10 هزار ۽ حيدرآباد لاءُ 7 هزار روپيه ڀاڙو جي نالي ۾ اوڳاڙي شروع ڪري ڇڏي آھي. مٺي سول اسپتال مان ڪيترائي ڪلاڪ اڳ ريفر ڪيل ڌار ڌار 3 مريض ۽ انهن جا وارث ڀاڙو نه هجڻ ڪري بيوس بڻجي اسپتال جي احاطي ۾ ويٺل هئا ۽ ان وقت اوچتو پي ٽي آءِ جو صوبائي جنرل سيڪريٽري ۽ سنڌ اسيمبلي ۾ مخالف ڌر جو اڳواڻ حليم عادل شيخ اسپتال وزٽ لاءُ پهتو ته اهي مريضن جا وارث سندس آڏو دانهون ۽ التجائون ڪرڻ لڳا.ان موقعي تي موجود اسپتال جي ڪلارڪ رياض هنڱورجو ٻڌايو ته اسان وٽ تيل جي بجيٽ ختم ٿي آھي. ان ڪري اڄ کان مفت ايمبولينسز سروس بند ڪري اسپتال انتظاميه کي آگاه ڪري ڇڏيو هو. ان ڪري ريفر ٿيندڙ مريضن کان رڳو تيل جا پئسا وٺي مريض اسپتالن ڏانهن موڪلي رهيا آھيون.
وارهه ۾ ٻڍڙي ماءُ کي نافرمان پٽ مارڪٽ بعد گهران ڪڍي ڇڏيو
وارھ (ن پ ا) واره جي مٺا ڪالوني واسڻ امڙ کي نافرمان پٽ گهران ڪڍي ڇڏيو ان ڏس ۾ مليل ڄاڻ موجب واره جي مٺا ڪالوني واسڻ مسمات عالم خاتون لاشاري دانهيو آھي ته سندس پٽ سوجهرو لاشاري غلط صحبت ۾ اچي موالي بڻجي ويو آھي ۽ گهر جي جڳه کپائڻ لاءِ ماڻھو گهر وٺي آيو ته مون گهر کپائڻ کان انڪار ڪندي آيل ماڻھن کي موٽائي ڇڏيو ته مون کي نافرمان پٽ ڌڪ هڻي گهران ڪڍي ڇڏيو آھي متاثر 75 ورهيه پوڙھي عورت چيو ته مذڪوره جڳه منهنجي نالي ٿيل آھ،جنهن جو رڪارڊ پڻ موجود آھي ڪجه بااثر ماڻهون زوري سستي رقم عيوض گهر خريد ڪرڻ چاهين ٿا هن ايس ايس پي قمبر شهدادڪوٽ کان انصاف جو مطالبو ڪيو ته سندس نافرمان موالي پٽ سوجهرو لاشاري کي گرفتار ڪري سندن اجهو کپائڻ کان بچايو وڃي.
ڪراچي ۾ دڪاندارن جو ميئر خلاف ڌرڻو
ڪراچي(اسٽاف رپورٽر) ڪراچي جي ايمپريس مارڪيٽ جي دڪاندارن ميئر ڪراچي وسيم اختر خلاف احتجاجي مظاهرو ڪري ڌرڻو هنيو. ڪراچي پريس ڪلب پهتل ايمپريس مارڪيٽ جي دڪاندارن دانهيو ته ميئر ڪراچي اجائي واويلا ڪري رهيو آهي ته ايمپريس مارڪيٽ ۾ ڊاهي پٽ ڪيل دڪانن تي منشيات وڪرو ڪيو ويندو هو. هنن مطالبو ڪيو ته ميئر ڪراچي خلاف ڪارروائي ڪري آپريشن متاثر دڪاندارن جي سهائتا ڪئي وڃي.
احتساب عدالت جو فيصلو تاريخي آهي، نواز شريف دنيا جي وڏن ڪرپٽ ماڻهن ۾ شامل آهي: فواد چوڌري
حڪومت تي انتقامي ڪارروائي جو الزام مڙهيو پيو وڃي، اصل انتقام عمران خان کان ورتو ويو
نواز شريف کي ٻار بچائڻ لاءِ نه آيا، حسين ۽ حسن ڏيهه ورندا ته کين سزا ملندي: وفاقي وزير
اسلام آباد (مانيٽرنگ ڊيسڪ) سڌ سماءَ واري وفاقي وزير فواد چوڌري چيو آهي ته احتساب عدالت جو فيصلو تاريخي آهي، نواز شريف دنيا جي وڏن ڪرپٽ ماڻهن ۾ شامل آهي. اسلام آباد ۾ پريس ڪانفرنس ڪندي فواد چوڌري چيو ته حڪومت تي انتقامي ڪارروائي جو الزام مڙهيو پيو وڃي، پر اصل انتقام عمران خان کان ورتو ويو هو، کانئس 40 سالن جي ملڪيت ۽ ڪاروبار جا ثبوت ۽ دستاويز گهريا ويا هئا. فواد چوڌري چيو ته نواز شريف کي ٻار بچائڻ لاءِ نه آيا، حسين ۽ حسن ڏيهه ورندا ته کين سزا ملندي.
لڳي ٿو ته پوري کيپ "اسيمبلي" کان "اڊيالا" منتقل ٿيندي:حافظ حسين
جيڪب آباد(رپورٽر) جميعت علماء اسلام جي مرڪزي ترجمان ۽ متحده مجلس عمل جي رابطا ڪميٽي جي سربراھ حافظ حسين احمد چيو ته ميان نواز شريف کي العزيزيه ريفرنس ۾ سزا “عزيزن” جي بدولت ملي آهي، لڳي ٿو ته پوري کيپ “اسيمبلي” کان “اڊيالا” منتقل ٿي ويندي. “پنهنجي اخبار” سان ڳالهائيندي حافظ حسين احمد چيو ته العزيزيه ريفرنس ۾ جيڪڏهن نواز شريف جا پٽ پيش ٿين ھا ته اڄ معاملو مختلف ھجي ھا، العزيزيه ريفرنس جو فيصلو عزيزن جي بدولت آيو آهي، ھن چيو ته احتساب عليم کان وٺي عليمه تائين ٿيڻ کپي،اسان ته چئون ٿا احتساب سڀ جو ٿيڻ کپي ۽ احتساب کي انتقام ۾ تبديل نه ڪيو وڃي، ھن چيو ته ملڪ ۾ جيڪا صورتحال موجود آهي اگر اھا صورتحال رھي ته پوءِ پوري کيپ “اسيمبلي” کان “اڊيالا” منتقل ٿي ويندي، ھڪ سوال جي جواب ۾ ھن چيو ته اپوزيشن کي اپوزيشن ئي ڪرڻ کپي مگر اپوزيشن ان پوزيشن ۾ ناهي، اڄ به پنجاب جو ميان ۽ بي بي جي ميان جي حوالي سان جيڪو ڪجھ ٿي رهيو آهي ان باوجود ھي پاڻ ۾ اپوزيشن کي متحد ڪرڻ لاءِ تيار ناهن.
اسلام آباد ۾ احتجاج ڪندڙ ليگي ڪارڪنن تي دھشتگردي ڪيس داخل
اسلام آباد (رپورٽر) اسلام آباد ۾ پوليس پٿراءَ جو نون ليگ ڪارڪنن تي ڪيس داخل، دهشتگردي جا قلم لاڳو ڪيا ويا، احتساب عدالت ٻاهران ن ليگ ڪارڪنن پاران پوليس اهلڪارن تي پٿراءِ واري معاملي جو رمناني ٿاڻي تي ن ليگ ڪارڪنن خلاف ڪيس داخل ڪيو ويو، جنهن ۾ دهشتگردي جا قلم لاڳو ڪيا ويا آهن، ايف آءِ آر ۾ چيو ويو آهي ته ڏنڊن ۽ پٿرن سان ڪارڪنن اهلڪارن کي حملو ڪري زخمي ڪيو، جوابدارن سرڪاري ڪم ۾ مداخلت ڪري خوف ۽ هراس پکيڙي پکيڙيو، جيڪو دهشتگردي ايڪٽ ۾ اچي ٿو.
سکر هندو پنچائت جون چونڊون : ڌريون چلهه ۽ شناختي ڪارڊ تي چونڊ لاءِ بضد
پنچائت جي سال کان چونڊ نه ٿي ، قاعدن جي لتاڙ ڊي سي پاران رپورٽ عدالت حوالي
شناختي ڪارڊ تي ووٽ ڪرايو (رنجيت) ووٽ چلهه تي ئي ٿيندا:دوراڪا داس
سکر(رپورٽ: ممتاز بخاري) هڪ سال گذري وڃڻ بعد به ورهاڱي کان اڳ قائم هندو پنچائت سکر جون چونڊون نه ٿي سگهيون آهن. چونڊن جي تاريخ 17 نومبر 2018ع هئي پر ڪجهه ڏينهن اڳ هڪ ڌر جي ڪمل ڪمار، جئه رام ۽ ٻين سکر هاءِ ڪورٽ ۾ پٽيشن داخل ڪرائي ته هندو پنچائت ستن عهديدارن تي ٻڌل آهي پر غير قانوني طور يارنهن عهدن تي چونڊون ڪرايون پيون وڃن. جنهن تي ڪورٽ سڳوري پاران چونڊون روڪڻ جا حڪم ڏئي ڊي سي سکر کي حقيقت معلوم ڪري رپورٽ جمع ڪرائڻ جون هدايتون ڏنيون. تڏهوڪي ڊي سي الاهي بخش ميتلي جاچ ڪرڻ بعد ڌرين کي گهرائي ميٽنگ ڪئي ،جنهن ۾ اها ڳالهه ظاهر ٿي ته اڳ ڪيل چونڊن ۾ قاعدا اورانگهيا ويا. اهڙي رپورٽ هن ڪورٽ سڳوري ڏانهن به موڪلي ڇڏي. ان کان پوءِ هندو پنچائت جون گڏجاڻيون به ٿيون پر چونڊون پوءِ به نه ٿي سگهيون. مکي ايشور لال جي پينل جو چوڻ آهي ته اهي ڪورٽ جي حڪمن جي انتظار ۾ آهن. هوڏانهن اڳ رٿيل چونڊن ۾ ٻن عهدن تي رڳو هڪ هڪ اميدوار ڍولومل ۽ وڪيل شيوڪ ڪمار فارم ڀريو هو ،انهن به هاءِ ڪورٽ کي رجوع ڪيو ته کين بنا مقابلي عهديدار ڊڪليئر ڪيو وڃي. ان سلسلي ۾ پنهنجي اخبار پاران ڍولو مل سان رابطو ڪيو ويو ته سندس چوڻ هو ته مان جنرل سيڪريٽري تي بنامقابلي ڪاميابي ماڻي، انائونس نه ڪيو ويو ته ڪورٽ ۾ ويو آهيان پر وري نگران پنچائت ڳالهايو ۽ مان چپ ڪري ويس ان باوجود ڪا اڳڀرائي ناهي، حالانڪه ڪورٽ جو به ڪو اسٽي ناهي. هوڏانهن مکي پهرين پٽيشن داخل ڪندڙ جئه رام ۽ ڪمل ڪمار جو چوڻ آهي ته چونڊون دير ٿيڻ جو ڪو جواز ناهي قانون ۽ قاعدن موجب چونڊ ٿئي ته اسان کي ڪو اعتراض ناهي. هندو پنچائت جي چونڊن جي ڪمشنر سريچند رابطو ڪرڻ تي ٻڌايو ته اسان جو ڪو مسئلو ناهي اسان کي جڏهن به ڊاڪٽر دوارڪي جي سربراهي ۾ ٺهيل پنچائت جي نگران باڊي چوندي اليڪشن ڪرائينداسين. اسان کي سندن هدايت جو انتظار آهي. هوڏانهن هندو پنچائٽ جي مکي ايشورلال جو چوڻ آهي ته ڪورٽ سڳوري ڊي سي کي چيو هو ته ڌرين کي ٻڌي قاعدن موجب چونڊون ڪرايو پر ڊي سي ڳالهيون ٻڌيون جنهن ۾ برابر باءِ لاز ۾ فرق هو. پر هن رپورٽ ڪورٽ کي موڪلي ان ڪري هاڻ معامرو ڪورٽ ۾ آهي. هن چيو ته هونئن ته مکي اسان آهيون منهنجو ڏاڏو ڀڳوانداس پهريون مکي هو پر هاڻي جيڪو صدر ٿي. صدر جي اميدوار جواهر لال جو چوڻ هيو ته ڪجهه مهينا اڳ ڳئون شلا نگران پنچائت کي دلچسپي وٺي چونڊون ڪرائڻ گهرجن اسان سان واعدو به ڪيو اٿن، اسان لکي به ڏنو. ڪورٽ جي رڪاوٽ جي ڳالهه آهي ته ترت اوڏانهن وڃن. هن چيو ته جيڪو صدر هوندو اهو ئي مکي به هوندو. اسان چاهيون ٿه هر 18 سالن جي نوجوان کي ووٽ جو حق هجي باقي هو گهراڻي تي ڪرڻ ٿا چاهين، باقي اسان ان ڳالهه ۾ هنن سان متفق آهيون ته عورتن کي پنچائت جي چونڊن ۾ ووٽ جو حق نه هجي. نائب صدر جي اميدوار رنجيت ڪمار چيو ته نگران پنچائت نوجوانن جي رستا روڪ ڪري ٿي. هي نوجوانن جو ووٽ ڪرائڻ کان روڪين ٿا. نگران ۽ مکي گڏجي ڄاڻي واڻي اليڪشن کي اينگهائي رهيا آهن. هاڻ سو سال پراڻا قانون نه هلندا. هن چيو ته اليڪشن نه ٿيڻ جي ڪري ڪميونٽي جي سوين مسئلا حل نه ٿا ٿين. اسان چلهه تي نه پر شناختي ڪارڊ تي ووٽ ڪرائڻ جو مطالبو ڪيون ٿا. هوڏانهن نگران پنچائت جي صدر ڊاڪٽر دوارڪا داس رابطي ڪرڻ تي ٻڌايو ته ڪورٽ ۾ 15 جنوري تي ٻڌڻي آهي اها جيڪو چوندي ڪنداسين. باقي ووٽ چلهه تي ئي ٿيندا. ڪا ايم پي اي جي اليڪشن ناهي جو شناختي ڪارڊ تي ٿئي ۽ نه وري عورتن کي ووٽ ڏيڻ جو اختيار آهي.
”هم تو هين پٿر ڪي لوگ، يه دُک بهي سهه لينگي“: نوازشريف جو فيصلي تي شاعراڻو تبصرو
اسلام آباد (م ڊ) اڳوڻي وزيراعظم ميان نوازشريف احتساب عدالت جي فيصلي کانپوءِ شاعراڻي انداز ۾ مختصر گفتگو ڪئي، نوازشريف ميڊيا سان ڳالهه ٻولهه ڪندي چيو ته ”هم تو هين پٿر کي لوگ، يه دک به سهه لينگي ، جائين تو جائين ڪهان، ڪوئي سنتا هي ڪهان؟“ سندس چوڻ هو ته ڪرپشن نه ڪرڻ تي ضمير مطمئن آهي.