سکر (ن پ ا) سڄي ملڪ جيان ڪرسمس وڏي عقيدت ۽ احترام سان ملهائي وئي،سينٽ سيويئر چرچ ۾ مرڪزي تقريب ڪوٺائي ويئ، امن ۽ خوشحالي لاءِ دعائون ڪيون ويون، جنهن ۾ عورتن، ٻارن سميت وڏي انگ ۾ مسيحي برادري جي ماڻهن شرڪت ڪئي. ان موقعي تي خاص عبادت سان گڏ ڪرسمس گيت ڳايا ويا ۽ هڪٻئي کي مبارڪن سان گڏ تحفا ڏنا ويا.

سکر(بيورو رپورٽ) پوري ملڪ جيان سکر ۾ به عيسائي برادري پاران ڪرسمس ڊي مذهبي جوش ۽ جذبي سان ملهايو ويو، اِن حوالي سان سکر جي سينٽ سويئر چرچ ۾ دعائي تقريب منعقد ڪئي وئي جنهن وڏي تعداد ۾ عيسائي برادري جي مرد عورتن توڙي ٻارڙن شرڪت ڪئي، اِن دوران مس سارا سحر ۽ ٻين دعائي گيت ڳائي مخصوص عبادتون ڪيون جنهن کان پوءِ هڪ ٻئي کي ڪرسمس ڏهاڙي جون مبارڪون ڏنيون. اِن موقعي تي مس سارا سحر ۽ ٻين جو چوڻ هو ته ميري ڪرسمس خوشين جو ڏهاڙو آهي.

سکر(رپورٽر) پاڪستان پيپلزپارٽي جي اطلاعات سيڪريٽري ڊاڪٽر سيده نفيسه شاھ جيلاني نيب قانون کي ڊريڪولا قانون قرار ڏئي ڇڏيو، سندس چوڻ آهي ته قتل ڪيس ۾ به 3 ڏينهن جو رمانڊ هوندو آهي پر نيب جو 90 ڏينهن جو آهي ۽ اها ڪٿي به گرفتاري ڪري سگھي ٿي. پاڪستان پيپلزپارٽي جي مرڪزي اڳواڻ سيد خورشيد احمد شاھ جي رهائشگاھ تي گڏجاڻي بعد ميڊيا سان ڳالهيون ڪندي ڊاڪٽر سيده نفيسه شاھ جيلاني چيو ته پيپلزپارٽي جي آءِ ٽي رپورٽ کي تسليم نه ٿي ڪري، سندن قانوني ماهر رپورٽ جو جواب ڏيندا. وڏيون دعوائون ڪيو ويون هيون پر ڳالھه بلاول هائوس جي ٻڪرن تي اچي ختم ٿي. عمران خان غير قانوني طريقي سان بني گالا جو سڄو جبل کائي ويو، جهانگير ترين به کاتن مان اربين روپيا ڪمايا آهن، ان لاءِ ڪجھ به ڪونهي عليم خان، عليمه خان ، جهانگير ترين لاءِ ڪابه جي آءِ ٽي ڪانهي. جنرل پرويز مشرف جي پوري ٽيم هن وقت اقتدار ۾ آهي ان تي به جي آءِ ٽي ٺهڻ گھرجي، رڳو احتساب پيپلزپارٽي ۽ مخالف ڌر لاءِ آهي. احتساب سڀني جو ٿيڻ گھرجي. ڊاڪٽر نفيسه شاهه چيو ته نيب جو قانون ڊريڪولا قانون آهي، قتل ڪيس ۾ به 3 ڏينهن جو رمانڊ هوندو آهي پر نيب جو 90 ڏينهن جو آهي ۽ اها ڪٿي به گرفتاري ڪري سگھي ٿي. نيب جي قانون ۾ تبديلي ٿيڻ گھرجي. جيل ۾هٿڪڙيون لڳل هوندي پروفيسر جو موت ٿيو مهذب معاشرن ۾ ائين ناهي ٿيندو. هن چيو ته حڪومت کي ووٽ عوامي خدمت لاءِ مليا هئا پر انهن غريب عوام جي ملڪيتن کي نقصان پهچايو، وٽن الزام هڻن کانسواءِ ڪجھ به ڪونهي. هي پوليٽيڪل ڪمپيئن آهي جنهن ۾ حڪومت انتقامي ڪاررويون ڪري رهي آهي. هن چيو ته 27 ڊسمبر جي جلسي ۾ عوام وڏي انگ ۾ شرڪت ڪندو ۽ ڪاروان بينظير جي نالي سان قافلا ڳڙهي خدابخش پهچندا. اِن کان اڳ سيد خورشيد احمد شاهه جي رهائش گاهه ۾ شهيد بينظير ڀٽو جي ورسي جي حوالي سان ٿيل اجلاس ۾ سيد خورشيد احمد شاهه، پ پ سنڌ جي صدر نثار احمد کهڙو، اڳوڻي وڏي وزير سيد قائم علي شاهه، نفيسه شاهه ۽ ٻين شرڪت ڪئي.

سکر(بيورو رپورٽ) پاڪستان پيپلز پارٽي سنڌ جي ترجمان سينيٽر عاجز ڌامراهه چيو آهي ته پهريان آصف علي زرداري جي جاچ ۾ گهوڙا هئا پر هاڻي ڪتا به بيهاريا ويا آهن، آصف علي زرداري اهڙن ڪيسن کي اڳ به منهن ڏئي چڪو آهي، عوام جا اربين روپيا ريفرنسز ۾ خرچ ڪيا ويا آهن. سکر ۾ ميڊيا وارن سان ڳالهائيندي عاجز ڌامراهه وڌيڪ چيو ته پانامه ليڪس ۽ هن جي آءِ ٽي ۾ تمام گهڻو فرق آهي، هي جي آءِ ٽي اهڙي آفيسر ٺاهي جنهن پ پ خلاف اليڪشن ۾ حصو ورتو، اسان عدليه سان نه پر قانوني جنگ وڙهنداسين. هن چيو ته ڪي پي ڪي ۾ هڪ ئي ڏنهن 5 پراسيڪيوٽر استعيفيٰ ڏئي ويا آهن، ذلفي بخاري ڪيس ۾ پراسيڪيوٽر کي ڌمڪائي استعيفيٰ ورتي وئي، ڪي پي ڪي ۾ جيڪا 10 ارب روپين جي با نامي اڪائونٽس جي ٽرانزيڪشن آهي اُن تي ڪهڙي جي آءِ ٽي ٺهي؟ عمران خان عوام تي مهانگائي جو خودڪش حملو ڪيو آهي حڪومت پنهنجي هني مون جو ٽارڪيٽ پورو ڪري ورتو آهي. هن چيو ته 27 ڊسمبر تي هڪ عدالت ڳڙهي خدا بخش ۾ لڳندي جِتي پارٽي جا اڳواڻ آئينده جو لائحه عمل جوڙيندا. شهيد بينظير ڀٽو جي ورسي کان پوءِ مهانگائي تي به تحريڪ هلائڻ جو اعلان ڪيو ويندو.

پنوعاقل(ن پ ا)پنوعاقل جي سومرا محلا ۾ بجلي جي شارٽ سرڪٽ مان استري جي دوڪان ۾ اچانڪ باهه لڳي وئي ،الهه تلهه سڙي رک، دڪان مالڪ زخمي ٿي پيو، بجلي جي شارٽ سرڪٽ مان فرحان علي شيخ جي ڪپڙا استري جي دڪان ۾ اچانڪ باهه لڳي وئي دڪان مالڪ کي جيئن اطلاع ڏنو ويو ته هن پهچي پنهنجي مدد پاڻ باھ وسائڻ جي ڪوشش ڪندي زخمي ٿي پيو .دڪان مالڪ موجب فائر برگيڊ عملي کي اطلاع ڏيڻ باوجود ڪير نه پهتو ،جنهن سبب دڪان ۾ پيل ڪپڙن ۽ استرين سميت سمورو سامان سڙي رک ٿي ويو .

سکر: مليل ڄاڻ موجب سبزي منڊي وٽ به ٽريفڪ هوندي آهي ۽ بس ٽرمينل وٽ به ان ٽائيم رش هوندي آهي گاڏي کي واقعي واري هنڌ کان سولي روڊ تي پهچڻ ۾ 20 منٽن کان اڌ ڪلاڪ لڳندا آهن. جيڪڏهن سکر باءِ پاس کان به ٻاهر نڪري خيرپور يا گهوٽڪي واري پاسي نڪري ته به 20 کا 25 منٽ لڳي ويندا آهن. پوليس واقعي واري هنڌ ته 20 منٽن ۾ ايس ايس پي سکر جي اڳواڻي ۾ پهتي پر وڏي پيماني تي ناڪابندي نه ٿيڻ سبب ڌاڙيل مغوي کي ڪڍي ويا.

سکر: شو روم ويجهو ڳجهي ڪيمرا رڳو بينڪ آڏو لڳل هئي جڏهن ان سلسلي ۾ پنهنجي اخبار پاران پوليس ذريعن توڙي علائقي جي ماڻهن کان معلومات حاصل ڪئي وئي ته پتو پيو ته بينڪ جي ٻاهران لڳل ڪيمرا رڳو بينڪ ۾ داخل ٿيندڙن جي ڪوريج ڪري سگهي ٿي ڇو ته ان جو منهن هيٺ جهڪيل ئي هيو. ان ڪري اتان ڪا به معلومات حاصل نه ٿي سگهي آهي.

سکر(رپورٽ: ممتاز بخاري) سکر مان پنج ڊسمبر تي اغوا ٿيل وچولي درجي جي هڪ پڙهيل لکيل واپاري رميش لال جي اغوا جي واردات جي واقعي جي پوري ڪهاڻي واقعي واري هنڌ وڃي ماڻهن کان معلوم ڪري ورتي آهي. رميش لال 7.25 منٽن تي سبزي منڊي ويجهو چوڪ وٽ موٽر سائيڪلن جي شوروم تان لٿو، سندس گاڏي ۾ ڊرائيور ويٺل هو. رميش لال اڃا گاڏي وٽ پهچڻ کان اڳ آسپاس جي ماڻهن سان رسمي حال احوال ڪرڻ لڳو. هو اتي پنج اٺ منٽ موجود هيو ڀرپاسي ٻيا ماڻهو ۽ دڪاندار به موجود هئا ته هڪ ڪلٽس ڪار مان ٽي هٿيار بند لٿا ۽ کيس گاڏي ۾ ويهڻ لاءِ چيو هن ٿوري مزاحمت ڪئي ته کيس بٽ هنيو ويو ۽ کيس زوري ڪار ۾ ويهاريو ويو اها ڪاروائي هڪ منٽ به مس ٿي ۽ ڪار شڪارپور طرف رواني ٿي وئي. سندس ڀاءُ ايڊوڪيٽ اشوڪ ڪمار کي اطلاع ڪيو ويو ۽ اهو واقعي واري هنڌ پهتو پوليس ايس پي جي اڳواڻي ۾ به ويهن منٽن اندر پهتي. پر پوليس اهري قسم جي ڪابه ڪاروائي نه ڪري سگهي جنهن سان ڌاڙيلن جي رستا روڪ ٿي سگهي ها. اغوا واري واردات بعد پوليس رڳو شهر ۾ ڪاروايون ڪري 50 جي لڳ ڀڳ ماڻهن جي ٻڌ ڇوڙ ڪئي جنهن مان چاليهن ڄڻن بابت پوليس پاڻ ڊيٽا ظاهر ڪئي پر انهن مان ڪوبه ان اغوا واردات سان لاڳاپيل نه نڪتو. آءِ جي جي دٻاءُ پوڻ بعد 12 ڊسمبر تي ڏانهس هڪ رپورٽ موڪلي وئي جنهن ۾ دعويٰ ڪئي وئي ته اغوا ۾ استعمال ڪيل ڪار پنوعاقل مان هٿ ڪئي وئي آهي ۽ رپورٽ ۾ واقعي ٿيڻ بعد ايس ايس پي جي جاءِ واردات تي فوري پهچڻ کي ڪارنامي وانگر بيان ڪيو ويو. جڏهن ته بعد ۾ پوليس ڪار واري رڪوري تان ڦري وئي ۽ اها ڪار ٻي واردات واري ڄاڻائي وئي. شڪي ماڻهن جي گرفتارين جوبه ذڪر ڪيو ويو. ٻي پاسي وارث پ پ ايم اين اي خورشيد احمد شاهه سوڌو سکر ۽گهوٽڪي جي ڪجهه ٻين چونڊيل نمائندن سان به مليا پر کين رڳو آسرا مليا آهن. هوڏانهن پوليس پاران ان سلسلي ۾ ٻي ڪابه ڪاروائي اڃا ظاهر ناهي ٿي ۽ اها به ان انتظار ۾ آهي ته ڌاڙيل رابطو ڪن ته ڪجه اڳڀرائي ڪجي. جڏهن ڀنگ ڀرڻ جي افواهن کي پوليس ۽ رميش لال جا وارث رد ڪن ٿا. رميش جي گهر ۾ پريشاني وارو عالم آهي.

ڪنڌرا( ن پ ا) ڪنڌرا لڳ ڳوٺ آنبھ جي رهواسي ٽيڪسي ڊرائيور فيروز گهانگرو جو ڪراچي ۾ علاج ڪرائڻ خاطر مائٽن وٽ رهندڙ پٽ 12 ورهين جو آفاق گهانگرو گم ٿي ويو هو سندس اچانڪ گم ٿيڻ ڪري سندس وارث سخت پريشان ٿي ويا هئا ۽ ڪراچي ۾ حد جي ٿاڻي , ايدي سينٽر سميت مختلف جڳهن تي رهندڙ مٽن مائٽن وٽ ڪافي ڳولا ڪئي هئي پر هو هٿ ن آيو هو جڏهن ت گم ٿيل12 ورهين جو نينگر آفاق گهانگرو گذريل رات اچانڪ ڪراچي کان ڪنڌرا لڳ ڳوٺ آنبه واري گهر پهچي ويو جتي گهر ڀاتين ۾ خوشي جي لهر ڇانئجي وئي.