سکر: نيب ڪورٽ سکر ۾ اربين رپين جي ڪرپشن ۽ بيقائدگين جا ڪيس هلندڙ آهن. پنهنجي اخبار پاران گڏ ڪيل معلومات موجب نيب ڪورٽ سکر ۾ 2018ع جي آخري هفتي دوران 32 ڪيس هلندڙ آهن جيڪي گهڻي ڀاڱي سرڪاري ڪامورن، ٺيڪيدارن ۽ سياستدانن خلاف آهن. سکر ۾ پراپرٽي جو ڪيس پ پ پ جي اڳوڻي ايم پي اي نصرالله بلوچ، پي ٽي آءِ اڳواڻ ديدار جتوئي، ٻن ايس ڊي ايمز اعجاز هاليپوٽو، مولاداد دراني، مختيار ڪار شاهنواز چارڻ خلاف آهي. ان ڪيس ۾ 19 ڊسمبر تي جوابدارن کي مشروط ضمانت ڏني وئي آهي ذريعن موجب جوابدارن هڪ حلفيا بيان جمع ڪرايو آهي ته اهي زمين جي ڪاغذن ۾ هيرا ڦيري ثابت ٿيڻ تي اها پراپرٽي سرڪار کي واپس ڪندا. زمينن جي حوالي سان هيرا ڦيري جو هڪ ٻيو وڏو ڪيس سيوهڻ کان رتوديرو روڊ لاءِ زمين حاصل ڪرڻ واري معامري ۾ هاڻوڪي فوڊ ڊائريڪٽر سنڌ ۽ تڏهوڪي ڊي سي قمبر شهداد ڪوٽ قمر رضا بلوچ ۽ ٻين خلاف هلندڙ آهي جنهن ۾ جوابدارن تي الزام آهي ته انهن روڊ لاءِ نو ڪروڙ ڏهن لک رپين جي زمين خريداري ۾ هيراڦيري ڪئي. ان ڪيس ۾ جوابدار خادم حسين ڪتريو تي الزام آهي ته هو 16 گريڊ جو مختيارڪار هيو پر کيس 18 گريڊ جي ڊي ڊي او واري چارج ڏئي صحيون ڪرائي هيرا ڦيري ڪئي وئي. نيب ڪورٽ ۾ بلديات کاتي جي عملدارن خلاف به وڏي پيماني تي ڪيس هلندڙ آهن جنهن ۾ ٽي ايم او نيو سکر عبدالشڪور مهر، يار محمد جوڻيجي سان گڏ ٺيڪيدارن نبي بخش جسڪاڻي، يوسف جاگيراڻي، ثاقب اعواڻ، ضمير شاه ۽ ٻين تي الزام آهن ته انهن سي سي بلاڪن ۾ ناقص مٽيريل ڪتب آندو ۽ کين واڌو پيمنٽ به ڪئي وئي. ٽائون ڪميٽي ٺري ميرواه جي ٽي ايم او ارشاد خاصخيلي ۽ ٺيڪيدار نادر شاهه امروٽي تي به 20 ڪروڙ روپين جي ڪرپشن جو الزام آهي، ٽي ايم او گمبٽ الاهي بخش ٻانڀڻ ۽ ٻين تي 7 ڪروڙ، ٽي ايم او باقراڻي مسعود ڀٽو تي به ڪروڙين رپين، طارق زرداري ٽي ايم او ڀريا تي جعلي ملازمن جي نالن تي پگهارون ڪڍرائڻ، ان بعد آيل ٽي ايم او ڀريا بشير لاشاري تي ترقياتي ڪمن جي فنڊن ۾ گهوٻيون هڻڻ جي الزامن هيٺ ڪيس هلندڙ آهن. آبپاشي کاتي ۾ چيف انجنيئر ليفٽ بيراج سکر احمد جنيد ميمڻ تي روهڙي ڪئنال جي هڪ حصي جي مرمتي ڪمن ۾ 35 ڪروڙن جي ڪرپشن جو الزام آهي ساڻس گڏ سعيد جاگيراڻي ٻيا ٺيڪيدار به جوابدار ڄاڻايل آهن، ياد رهي ته روهڙي ڪئنال جي ميگا ڪرپشن ڪيس مان ان جي هڪڙي حصي جو ڪيس رڳو سکر ۾ آهي. خوراڪ کاتي جا جتي ڪجهه ڪيس اڪلائجي چڪا آهن اتي ڪيترائي ڪيس هلندڙ به آهن جن ۾ ميرپور ماٿيلي جي ڊي ايف سي سلمان مهر تي ٻورين ۾ خورد برد جو الزام آهي. ساڳي ريت ڊي ايف سي گهوٽڪي عبدالمجيد پٺاڻ تي سينٽرن تي ڪڻڪ جي خريداري جي حوالي سان خوردبرد جو الزام آهي. ايئن خوراڪ کاتي جي عملدار غلام حسين مري تي به ڪيس هلندڙ آهي. هاءِ ويز کاتي ۾ جميل قريشي ۽ ٻين تي ناقص ڪم جي الزام وارو ڪيس هلندڙ آهي. تعليم کاتي جي عملدار ممتاز شيخ تي به هڪ اهم ڪيس هلندڙ آهي جنهن ۾ ڄاڻايل آهي ته هن ريڪارڊ ۾ اسڪولن لاءِ ڪروڙين رپين جو فرنيچر خريديل ڄاڻايو آهي پر مٿس الزام آهي ته اهو رڳو ريڪارڊ ۾ آهي پر اسڪولن ۾ ناهي پهتو. جڏهن ته تعليم کاتي جي هڪ ٻي عملدار دين محمد سهرياڻي جو ڪيس هلندڙ آهي جنهن ۾ مٿس الزام آهن ته هن 46 ڄڻن جون ڪنڌڪوٽ ۾ غيرقانوني ڀرتيون ڪيون آهن. نيب ڪورٽ سکر ۾ خزاني کاتي جي هڪ ٻئي عملدار سڪندر ابڙي تي ڪورٽ ۾ ڪيس هلندڙ آهي ته هو جتي به رهيو آمدني کان وڌيڪ اثاثا ٺاهيا اٿائين مٿس 87 ڪروڙ رپين جا اثاثا رکڻ جو الزام آهي اصل ۾ لاڙڪاڻي جو آهي. حضور بخش مري تي به آمدني کان وڌيڪ اثاثا رکڻ جو ڪيس داخل آهي. هڪ عملدار غلام حسين کوسي تي ٺل ۾ سرڪاري زمين جي کاتن ۾ هيراڦيري ڪرڻ جو الزم آهي. پبلڪ هيلٿ انجنيئرنگ کاتي جي احمد خان ابڙي ۽ ٻين عملدارن تي مختلف هنڌن تي ناقص مٽيريل ۽ ايڊوانس پيمنٽ جو ڪيس هلندڙ آهي. ساڳي نوعيت جو ڪيس ڪشمور ڪنڌڪوٽ ضلعي جي روڊس کاتي جي عملدار عبدالخالق خلاف پڻ هلندڙ آهي. ٻي پاسي نيب ڪورٽ 21 ڊسمبر تي پنوعاقل نيشنل بينڪ جي سي ون اڪائونٽ ۾ 69 ڪروڙن واري ڪيس ۾ جوابدار ڄاڻايل ڊرائيور صديق چاچڙ ۽ خادم حسين مهر کي باعزت بري ڪري ڇڏيو آهي. ياد رهي ته اهو ڪيس 2014ع ۾ داخل ٿيو هو جنهن ۾ زبيرعالماڻي کي ڏه سال سزا ملي هئي ۽ پنجن سالن بعد ڪجهه مهينا اڳ هو ضمانت تي جيل مان ٻاهر نڪتو آهي.

سکر(بيورو رپورٽ) نيب سکر پاران هڪ پڌرائي جاري ڪري سکر ڊويزن جي عوام کي آگاهه ڪيو ويو آهي ته ڊائريڪٽر جنرل نيب سکر مرزا عرفان بيگ اڄ 27 ڊسمبر تي خميس ڏهاڙي منجهند جو 2 وڳي کان 4 وڳي تائين کليل ڪچهري ڪوٺائي ڪرپشن متعلق شڪايتون ٻڌندو..

سکر(بيورو رپورٽ) سکر جي عورتن رت جو عطيو ڏ ئي شهيد محترمه بينظير ڀٽو کي ڀيٽا پيش ڪئي، سماجي اڳواڻ شائسته کوسو جو چوڻ آهي ته رت جو عطيو ڏيڻ اسلام ۾ به افضل سمجهيو ويندو آهي، هڪ عورت جي حيثيت سان شهيد بينظير ڀٽو ملڪ جي خاطر پنهنجي جان جو نذرانو پيش ڪيو، جنهن جي قرباني کي ڪڏهن به نٿو وسائي سگهجي. اِن کان اڳ عورتن جي هڪ وفد سماجي اڳواڻ شائسته کوسو جي اڳواڻيءَ ۾ ريجنل بلڊ سينٽر پهچي رت جو عطيو پيش ڪيو، ان موقعي تي ريجنل بلڊ سينٽر جي مينيجنگ ڊائريڪٽر مريم، محمد افضل، عارف، نويد لاشاري ۽ ٻين جو چوڻ هو ته عورتن بينظير ڀٽوکي ڀيٽا پيش ڪرڻ لاءِ پنهنجي رت جو عطيو ڏئي اعليٰ مثال قائم ڪيو آهي، سنڌ ۾ مردن جي ڀيٽ ۾ عورتن طرفان رت جو عطيو ڏيڻ جو رجحان گهٽ آهي. ريجنل بلڊ سينٽر کي ملندڙ رت سان سول اسپتال ۾ ايندڙ مريضن توڙي ٿيليسيما جي مريضن جي لاءِ فائديمند ثابت ٿينديون.

سکر: شاهه عبداللطيف يونيورسٽي خيرپور جي ترجمان ابراهيم کوکر پنهنجي اخبار پاران رابطو ڪرڻ تي ٻڌايو آهي ته سپلا طرفان امتحانن جي بائيڪاٽ واري ڄاڻ ملي آهي جنهن متعلق وائيس چانسلر ۽ لاڳاپيل اختيارين سان مشاورت کان پوءِ ڪجهه چئي سگهجي ٿو. البته سپلا جا سمورا مطالبا تسليم ڪيا ويا آهن صرف ڪاپي چيڪ ڪرڻ وارو معاوضو سنڌ يونيورسٽي جي برابر ڪرڻ واري مطالبو تسليم ناهي ٿي سگهيو جنهن تي پڻ ماهرن سان ڳالهيون جاري هيون پر بغير ڪنهن ڳالهين جي سپلا جو اهڙو فيصلو سمجهه کان ٻاهر آهي.

سکر: شاهه عبداللطيف يونيورسٽي خيرپور جي ماتحت 28 ڊسمبر کان ٿيندڙ بي اي، بي ايس اسي، ايم اي ۽ بي ڪام جي امتحانن متعلق سپلا الزام هنيو آهي ته سوين شاگردن جا فارم گم ۽ رولڙي جو شڪار آهن، جنهن متعلق يونيورسٽي جي امتحانن واري ڪنٽرولر سان رابطو ڪري کيس آگاهه ڪيو ويو ته اُن جو رويو انتهائي نا مناسب ۽ تڪيلف ڏيندڙ هيو. جنهن ڪري اسان مجبور ٿي امتحانن جي بائيڪاٽ ڪرڻ جو فيصلو ڪيو آهي. سپلا سکر ۽ لاڙڪاڻو ريجن جي صدر پروفيسر اصغر علي شاهه اِهو به انڪشاف ڪيو آهي ته امتحاني فارم آن لائين موڪلڻ باوجود هن وقت تائين 27 سيڪڙو سلپون پرنسپل جي صحي، ٺپي ۽ رسيدن کان بغير موڪڪليون ويون آهن. سپلا اڳواڻ طرفان اِهو به انڪشاف ڪيو آهي ته گذريل سال امتحانن ۾ حصو وٺندڙ وڏي انگ ۾ شاگردن جي نتيجن جو اعلان به ناهي ڪيو ويو جنهن ڪري اُهي شاگرد مونجهاري جو شڪار آهن ته اُهي پهرين سال ۾ امتحان ڏين يا ٻئين سال جو؟

سکر: سپلار سکر۽ لاڙڪاڻو ريجن جي جنرل سيڪريٽري پروفيسر مشتاق احمد ڦلپوٽو پنهنجي اخبار سان ڳالهائيندي چيو آهي ته گذريل سال پنهنجي جائز مطالبن جي مڃتا لاءِ 52 ڏينهن امتحانن جو بائيڪاٽ ڪرڻ کان پوءِ يونيورسٽي جي وائيس چانسلر ڊاڪٽر پروين شاهه 30 ڏينهن اندر معاوضو ڏيڻ جو نوٽيفڪيشن جاري ڪيو هو، پر هن وقت تائين سوين استادن کي معاوضن وارا مليل چيڪ پاس ناهن ٿي سگهيا. اهڙي طرح شاگردن جي فيسن توڙي استادن جو معاوضو سنڌ يونيورسٽي جي برابر ڪرڻ سميت ٻين جائز مطالبن جي لکت ۾ يقيني ڌهاني ڪرائڻ باوجود ڪنهن به هڪ مطالبي تي هن وقت تائين عمل ناهي ٿي سگهيو.

سکر(بيورو رپورٽ) پاڻي ماهر ۽ دانشور محمد علي شاهه چيو آهي ته هاڻي پاڻيءَ تي جنگون لڳنديون، سڄي دنيا ۾ پاڻي جي کوٽ وڌي رهي آهي، سکر پريس ڪلب ۾ جاڳرتا فورم طرفان سنڌ ۾ پاڻي کوٽ ۽ سنڌوءَ مان ڊيمن جي ڀرمار واري عنوان هيٺ منعقد سيمينار کي صدارتي خطاب ڪندي هن چيو ته ڊيمن جي تعمير هڪ سازش آهي دنيا اندر 282 وڏن درياين مان رڳو 18 دريا پنھنجي منزل يا ڊيلٽا ۽ سمنڊن تائين پھچن ٿا. هن چيو ته ڪرپٽ سياستدانن، ڀوتارن جا ڊيمن جي تعير سان اقتصادي ۽ معاشي مفاد وابستا آھن جنھن جي ڪري اھي ڊيمن جي تعمير تي زور ڏين ٿا. هن چيو ته دنيا اندر جنگون پاڻيء تي لڳنديون جنهن ۾ پاڻي جي کوٽ ڪارڻ وڏا نقصان ٿيندا، سنڌو دريا سنڌ ڌرتيءَ جو وجود آهي ان جي پاڻيء کي ڪنٽرول ڪرڻ سان وڏي زرعي تباھي ۽ دريا جي ڊيلٽا کان سواءِ آبي حيات سخت متاثر ٿيندي. ھن وڌيڪ چيو ته ڪالا باغ ڊيم تي ٽن صوبن جو عوام راضي ناھي، تنهن باوجود هڪ سوچيل سمجهيل سازش تحت ڪالابا ڊيم منصوبي متعلق مختلف بيان سامهون ايندا رهيا آهن. سيمينار کي ناليواري دانشو عبدالخالق جوڻيجي چيو ته فني لحاظ کان به ڊيمن جي تعمير ناممڪن آھي پ پ سرڪار پنھنجي دور ۾ ڪالا باغ ڊيم لاء رقم رکي ھاڻي ڊرامو ڪري سنڌين جي حمايت حاصل ڪرڻ خاطر ان جي مخالفت ڪري رهي آهي. ھن چيو ته ڊيمن جي تعمير سان ھن ملڪ اندر خوشحالي نه پر وڏي تباھي ٿيندي. ملڪ کي غير آئيني طور تي ھلايو پيو وڃي. چيف جسٽس غير آئيني طور تي ڊيم لاء فنڊ گڏ ڪري پيو. ھن طرفانـ سنڌي ماڻھن مٿان ـڊيمن جي مخالفت ڪرڻ تي غداري جو الزام بي بنياد آھي. سيمينار ۾ کي صحافي لالا اسد پٺاڻ، غلام رسول گهمرو، فيض سومرو، ڊاڪٽر خادم منگي ۽ ٻين پڻ خطاب ڪيو.

سکر(بيورو رپورٽ) صوبائي وزير سيد ناصر حسين شاهه چيو آهي ته ملڪ کان ٻاهر ويٺل ملڪ دشمن شخص ٽارگيٽ ڪلنگ کي هٿي ڏئي رهيو آهي آصف علي زرداري ۽ فريال ٽالپر خلاف هٿ ٺوڪيو ڪهاڻيون ٺاهيون ويون ويون آهن. سکر هوائي اڏي تي ناصر شاهه ميڊيا سان ڳالهائيندي چيو ته ملڪ ۾ وڏي عرصي کان پوءِ امن قائم ٿيو هو، علي رضا عابدي جو قتل ملڪ جو امن خراب ڪرڻ آهي. ملڪ کان ٻاهر ويٺل ملڪ دشمن شخص ٽارگيٽ ڪلنگ کي هٿي ڏئي رهيو آهي. سندس چوڻ هو ته آصف علي زرداري ۽ فريال ٽالپر خلاف هٿ ٺوڪيون ڪهاڻيون ٺاهيون ويون آهن. فالودي واري کان وٺي جيڪي به اڪائونٽس نڪتا اُهي ڪيڏانهن ويا. جڏهن به انهن جو تعلق پ پ سان ناهي هوندو ته چيو ويندو آهي اُهي ٽريڊنگ اڪائونٽس آهن. هڪ سوال جي جواب ۾ هن چيو ته وڏي وزير خلاف ميڊيا تي بيان اچي رهيا آهن ته هن جو اومني گروپ مٿان هٿ آهي.

چونڊڪو: شهر ۾ صفائي نه ٿيڻ خلاف شهرين سريچند مل.وجيش.۽ ٻين هندو محله جي مک چونڪ تي احتجاجي مظاهرو ڪندي چيو ته هڪ مهيني کان صفائي عملو شهر ۾ صفائي ڪرڻ لاء تيار ناهي ملازمن کي صفائي لاء چئون ٿا ته هو چون ٿا اسان کي پئسا ڏيو اسان جون ٽن مهينن کان پگهارون بند آهن ٻچا بکون ڪاٽي رهيا آهن آفيس ۾ شڪايت کڻي وڃون ٿا ته آفيس ۾ ڪير ملي نٿو هنن ڪمشنر سکر.ڊي سي خيرپور کي اپيل ڪئي ته هن مسئلي جو نوٽيس ورتو وڃي. ان سلسلي ۾ ٽائون ڪاميٽي چونڊڪو جي چيئرمين ممتاز علي آرادين سان رابطي ڪرڻ جي ڪوشش ڪئي وئي پر سندس موبائل نمبر تي ڪوڊ لڳل هو ۽ رابطو نه ٿي سگهيو

ميهڙ: تعلقه اسپتال ميهڙ ، اريگيشن آفيس ۽ ريوينيو آفيس ڀرسان ايس ڊي ايم جي پراڻي رهائش گاه تعليم کاتي في ميل جي ايس ڊي او آفيس جي سامهون ايريگيشن کاتي جي انجنيئر ايس ڊي او جي پراڻي رهائشي عمارتن ۽ راڌڻ روڊ دان روڊس کاتي جي آفيسرن جي آفيسن ۽ رهائشي عمارتن پلاٽن ۽ گهاڙي روڊ سان ڊرينيج جي مين نالن تي ببااثرن ڌرين جا قبضا برقرار آهن.

ميهڙ: قبضن هٽائڻ واري ڪاروائي دوران شهرين نظير جانوري ۽ ٻين الزام هنيو آهي ته ميونسپل ميهڙ، مارڪيٽ ڪاميٽي وارا پئسا وٺي قبضا خورن سان مليل آھن انهن پئسن عيوض قبضا ڪرايا آھن ۽ قبضن هٽائڻ واري ڪاروائي صرف ڏيکاءُ آهي بااثر حڪومتي جماعت سان واسطور رکندڙ قبضا خورن جا قبضا نه پيا هٽايا وڃن. صرف ريڙهي گاڏنن وارن کي هٽائڻ سان گڏ دوڪانن جي اڳيان ٺھيل منهن ڊاهيا پيا وڃن، هنن گهر ڪئي آهي ته شهر ۾ ٿيل سمورا ٿيل قبضا نا جائز حددخليون بنا سياسي فرق جي هٽايا وڃن ءِ قبضا خورن خلاف ڪاروائي ڪئي وڃي مخصوص ماڻھن خلاف ڪاروائي ٿي ته شهر جا دوڪاندار واپاري احتجاج ڪندا.

ميهڙ(ن پ ا)ميهڙ پي ايس فريدآباد ڳوٺ قائم جتوئي ۾ ٻارن جي معمولي ڳالھ تان جتوئي برادري جي ٻن ڌرين ۾ جهيڙو ٿي پيو، جنهن ۾ هڪ ڌر جو عاشق پٽ عبدالرسول جتوئي لٺيون ڏنڊا لڳڻ سبب سخت زخمي ٿي پيو زخمي کي ميهڙ اسپتال کان لاڙڪاڻو منتقل ڪيو ويو آھي جڏهن ته فريد آباد ٿاڻي تي جوابدار امير علي پٽ حاجي خان جتوئي تي جهيڙي جي رپورٽ درج ڪئي وئي آھي.

سکر(رپورٽ: ممتاز بخاري) سکر بيراج وٽان سالياني بندي سبب ڪوٽڙي بئراج ڏانهن ويندڙ پاڻي مڪمل طور بند ڪيو ويو آھي. سکر بيراج جي واهن کي گھرج 26 ھزار ڪيوسڪ بجاءِ 17940 ڪيوسڪ فراھم ٿي رھيو آهي، ٻئي پاسي آبپاشي کاتي سنڌ پاران نارا ۽ روھڙي ڪئنالن مان پنج پنج سئو ڪيوسڪ پاڻي گھٽائي دادو ۽ کيرٿر ڪئنالن ۾ واڌارو پاڻي ڇڏيو ويو آهي. ھوڏانھن اڄ ڪوٽڙي بئراج جي بندي شروع ڪئي پئي وڃي. سکر ڪنٽرول موجب ھر سال جيان 6 جنوري تي ڪوٽڙي ڏانھن پاڻي ڇڏيو ويندو. تربيلا ڊيم مان به کڻت گھٽائڻ بعد پاڻي ذخيرن ۾ معمولي واڌارو ٿيو آهي. پاڻي جي سطح 1416.70 ريڪارڊ ڪئي وئي آهي. پاڻي آمد 16000 ڪيوسڪ مان he10000 ڪيوسڪس جاري ڪيو پيو وڃي. گڊو بيراج وٽ پاڻي جي کوٽ وڌي 25 سيڪڙو کان مٿي ٿي وٿي آهي، جتي پاڻي جي آمد گھٽجي 26504 ٿي وٿي آهي.