ڄامشورو: ڊپٽي ڪمشنر ڄامشورو فريد الدين مصطفيٰ رابطو ڪرڻ تي ٻڌايو ته ڪوهستان مان ايتري لڏپلاڻ ناهي ٿي برساتون نه پوڻ ڪري ڏڪار پيدا ٿيو آھي پر اڪثر علائقن ۾ سولر ٽيوب ويل لڳل آھن اسان دراوت ڊيم مان ست ڳوٺن لاء واٽر سپلا جي اسڪيم لاء پي سي ون تيار ڪئي آھي ان کان علاو ڪوهستان جي ڏڪار سبب متاثر ڳوٺن ۾ سولر ٽيوب ويل لڳرائڻ لاء سنڌ سرڪار کي لکيو آھي، هن چيو ته 29 هزار ماڻهن کي ڪڻڪ ڏينداسين في الحال 10 هزار ماڻهن کي ڏني آھي.

ڄامشورو: ٿاڻي بولا خان جي تڪ تان جنرل سيٽ تان ڪامياب ٿيل ايم پي اي گيانچند ايسراڻيءَ جو چوڻ آهي ته ڪوهستان ۾ برساتون نه پوڻ ڪري وڏي انساني الميي جي جنم وٺڻ جو انديشو آهي. روزاني پنهنجي اخبار سان ڳالهائيندي هن چيو ته اسان لکت ۾ توڙي زباني سنڌ جي وڏي وزير کي سڄي صورتحال کان آگاهه ڪري ڇڏيو آهي جڏھن ته آئون سنڌ اسميبليءَ ۾ پڻ آواز اٿاري چڪو آهيان ۽ هاڻ هڪ دفعو ٻيهر سنڌ اسيمبليءَ جي فلور تي حڪومت آڏو ڪوهستان ۾ ڏڪار واري صورتحال کان آگاهي ڏئي ڪوهستان لاءِ خاص پئڪيج ڏيڻ لاءِ قرارداد پيش ڪندس.

ڄامشورو: ڪوهستان جي سياسي، سماجي اڳواڻ محمد بخش لهراڻي، خادم خاصخيلي، اللھ بخش شيهڻو ۽ ٻين جو چوڻ هو ته ڪڻڪ جو ڪٽو ڏئي ڪوهستان واسين سان جٺ ڪئي وئي مال جو چارو ڪيڏانهن ويو اسان سان واعدا ڪيا ويا ته موبائل اسپتال شروع ڪنداسين گهر گهر ڪڻڪ ڏينداسين پر ٿيو ائين ڪو نه. ڪڻڪ جو سينٽر بولاخان ۾ هو پري پري جا ماڻهو ڀاڙو نه هجڻ ڪري ڪڻڪ لاء پهتا ئي ڪونه، ڪيترن جا نالا لسٽن ۾ ئي نه هئا . ڏڪار سٽيل قرار ڏئي ڪوهستان واسين جي واهر نه ڪري خالي پنهنجا پيٽ ڀريا ويا. هنن چيو ته هر سياري ۾ ڪوهستان ۾ مچ ڪچهريون ٿينديون هيون مورا، سرندا ۽ ٻيا ساز ٻڌبا هئا پر هاڻ ته ڏڪاريل ڏيھ ۾ سڃ پئي واڪا ڪري .هنن مطالبو ڪيو ته ڪوهستان جي ماڻهن جي واهر ڪئي وڃي.

ڄامشورو: برساتون نه پوڻ جي ڪري ڏڪار سٽيل ڏيھ ڪوهستان واسين جي سرڪار ڪابه پرگهور نه لڌي آهي. علائقي جي هڪ لک 45 هزار جي آبادي مان هزارين ماڻهو لڏي ويا آهن. ڪوهستان جا 40 هزار ماڻهو متاثر ٿيا آهن پر انتظاميه صرف 10 هزار ماڻھن کي پنجاھ ڪلو ڪڻڪ ڏئي وڌيڪ امداد بند ڪري ڇڏي آهي. جڏهن ته چوپائي مال جو چارو اڻ لڀ ٿي ويو آهي ۽ اندازي موجب ڪوهستان واسين جو 40 سيڪڙو چوپايو مال بک سبب مري چڪو آهي. تعلقي ٿاڻي بولاخان جون 28 ديهون رني ڪوٽ، ديھ ڀال، ديھ ڪوه تراش، ديھ پوکڻ، ديھ مول، ديھ عارب خان، ديھ باني، ٻٻر بند، اٺ پلاڻ، ٽڪو ٻاڙائي، تونگ، ٻيلي ٺپ، کئيجي، ٻٽاڙو ڪرچات، ديھ ڌماچ ۽ ٻين ديهن سميت مختلف علائقن جا ڏڪار سٽيل ڪوهستاني ڏڪار سبب سخت متاثر آهن. سوين خاندان لڏپلاڻ ڪري دريائي علائقن ۾ رهائش اختيار ڪئي آهي. جڏهن ته ديھ ٻيلي ٺٺ، ديھ ٽڪو بارائڻ مان گبول، باريجا، ڇٽا، سهتا ۽ ٻين برادرين سان تعلق رکندڙ ڪوهستان واسي بلوچستان جي تعلقي دريجي، لسٻيلي ۽ ڪراچي ڏانهن لڏپلاڻ ڪري هليا ويا آهن. ڪوهستان ۾ سخت ڏڪار بعد سنڌ سرڪار جي هدايتن تي ضلعي انتظاميه ڄامشورو پاران ڪوهستان جي متاثر علائقن جي سروي جو ڪم ڪوهستان جي 7 يونين ڪائونسلن ۾ شروع ٿيو جنهن ۾ يوسي تونگ، يوسي موندر خان، يوسي مول، يوسي عارب خان، يوسي سري، يوسي ڌماچ ۽ يوسي احمد خان شامل آهن، سروي مطابق متاثر قرار ڏنل 75 هزار ماڻھن واري رپورٽ به رد ڪري ضلع انتظاميه نادرا جي رپورٽ جي آڌار 10هزار ماڻھن کي متاثر قرار ڏنو. جنهن کانپوءِ ڪوٽڙي جي ڪڻڪ گودام مان 10 هزار ڪڻڪ جون ٻوريون گهرائيون ويون. هيل تائين 9 هزار 8 سو 80 ماڻهن کي ڪڻڪ جا پنجاھ ڪلو وارا ڪٽا ڏنا ويا آهن، باقي 120ڪڻڪ جا ڪٽا ٿاڻي بولاخان جي گودام ۾ پيل آھن. ڪوهستان جي تعلقي ٿاڻي بولاخان کي ڏڪار سٽيل قرار ڏيڻ باوجود انتظاميه متاثر علائقن ۾ هيلٿ موبائل سروس شروع نه ڪئي ۽ نه وري غذائي کوٽ جي شڪار ٻارن کي ڪا طبي امداد ڏني وئي. نه ئي وري ڳورهارين عورتن لاء ڪوهستان ۾ ڪو ويم گهر جڙي سگهيو. بيسڪ هيلٿ سينٽر تونگ، هيلٿ ڊسپينسري ريڪ، هيلٿ ڊيسپينسري مول سميت ڪوهستاني علائقي ٽڪوبارڻ جي هيلٿ سينٽرن ۾ عورتن لاء ليڊي ڊاڪٽرياڻي ۽ ايل ايچ وي به مقرر ناهي ٿي سگهي. جنهن ڪري ڪوهستان جون عورتون ڊليوري دوران مختلف تڪليفن کي منھن ڏئي رهيون آھن. ڪوهستان جي ديھ ٻيلي ٺپ ، ديھ ڀال ، ديھ پوکڻ جي جر جو پاڻي سڪي ويو آھي، جڏهن ته ديھ ٻيلي ۾ جر جو پاڻي کارو هئڻ ڪري پيئڻ جي لائق ناهي جنهن سبب ديھ ٻيلي ٺپ مان 70 سيڪڙو رهواسي لڏپلاڻ ڪري ويا آھن، جڏهن ته ڪوهستان جي جبلن، ويرو جبل، ڪانڀو جبل، کيرٿر جبل، سجاتي جبل، سورجهاڻ جبل، دنبار جبل ۽ ٻين بٺين مان مال جو چارو مڪمل ختم ٿي ويو آھي جنهن جو وڏو سبب 10 سالن کان برسات نه پوڻ آهي.گاھ ختم ٿيڻ ڪري ڪوهستانين جو مال بکن سبب ڏٻرو ٿي ويو آھي گاھ جي کوٽ سبب مالوند ماڻهو چوپايو مال، ٻڪريون، رڍون ۽ ڳئون پاڻ سان گڏڪاهي ويا آهن.

ڪوٽڙي)ن پ ا)سنڌ يونائيٽيڊ پارٽي جو سربراھ سيد جلال محمود شاھ چيو آھي ته سنڌ مان ڪرپشن جو خاتمو چاهيون ٿا جن ماڻهن به پنهنجن اختيارن جو ناجائز استعمال ڪري سنڌ جي ادارن مان ڪرپشن ڪئي آھي انهن جو احتساب ٿيڻ گهرجي هن اهڙو اظهار ڪوٽڙي ۾ سينئر صحافي دلدار جانوري جي امڙ جي لاڏاڻي بعد ڳالهائيندي چيو،سيد جلال محمود شاھ وڌيڪ چيو ته سنڌ جي وسيلن تي لٽ مارڪندڙ جو احتساب ٿيڻ لازمي آھي،اقتدار عوام جي حقن جي ترجماني ڪرڻ لاء ملندو آھي لٽ مار لاءِ نه، پر هتي سدائين ڪرپشن ڪندڙ بچيو وڃن پر هاڻ لڳي پيو ته ڪير ڪرپشن ڪرڻ کان پوءِ آساني سان نه بچندو، هن چيو ته اهل علم ،دانشورتوڙي سياسي اڳواڻ هاڻ سياست کي صاف ۽ شفاف ڪرڻ لاء ڪردار ادا ڪن ته جيئن نيڪ صالح عوام دوست سٺا ماڻهو اڳيان اچي سگهن .

ڪوٽڙي (ن پ ا) پ پ ايم پي اي ملڪ اسد چيو آهي ته سنڌ ۾پ پ خلاف جوڙيل اتحاد ٽٽي ڀورا ٿي ويا آهن، شهيد بينظير ڀٽو جمهوريت لاءِ جان قربان ڪري ڇڏي، عوام شهيدن جي پارٽي سان گڏ آهي. ڪوٽڙي ۾ ايس يو پي سان واسطو رکندڙ ضلعي ڪائونسل ميمبر حسين بخش ڇڇر ملڪ اسد سان ملاقات ڪري پ پ ۾ شموليت اختيار ڪئي. ان موقعي تي صحافين سان ڳالهائيندي ملڪ اسد چيو ته ڄامشورو ۾ پ پ خلاف ٺهندڙ اتحاد ڀورا ٿي ويو، مخالفن وٽ عوامي منصوبو ناهي، ايس يو پي ۽ ڄامشورو اتحاد جي تڏا ويڙھ ٿي رهي آھي.

ڪوٽڙي (ن پ ا) ڪوٽڙي سائيٽ جي علائقي جي خدا جي بستي مان 22 ورهيه ثنا مرزا پر اسرار نموني گم ٿي وئي، ڪوٽڙي سائيٽ جي علائقي خدا جي بستي جي رهواسڻ 22 ورهيه ثنا مرزا ولد سهيل مرزا پراسرار نموني گم ٿي وئي،سندس وارثن پاران ناري جو پيءُ سھيل مرزا ڪوٽڙي سائيٽ ٿاڻي تي ناري جي اغوا ڪرڻ واري اين سي داخل ڪرائي ڇڏي آهي،سندس والد موجب ثنا کي ٻه ڄڻا اغوا ڪري ويا آهن ، رابطو ڪرڻ تي ايس ايڇ او سائيٽ آدم ابڙو موجب ناري جي والد سهيل مرزا جي پاران ثنا کي اغوا ڪرڻ جي اين سي داخل ڪرائي وئي آهي،جاچ ڪري رهيا آهيون.

ڪوٽڙي)رپورٽر)سنڌ يونيورسٽي ڄامشورو سوسائٽي فيز 2 جي رهواسڻ عورت فاطمه لنڊ پنهنجي ماءُ ۽ ڀاءُ سان گڏجي اڳوڻي مڙس حسن علي لنڊ پاران موتمار ڌمڪيون ڏيڻ ۽ گهر خالي ڪرڻ ۽ ڄامشورو پوليس جي زيادتي خلاف احتجاج ڪيو، ڄامشورو واسڻ فاطمه ڪوٽڙي ۾ پريس ڪانفرنس ڪندي الزام هنيو ته مون سعودي عرب ۾ حسن لنڊ سان 2007 شادي ڪئي هئي جيڪو مسلسل مونکي هڪ ڪمري ۾ بند ڪري وحشياڻو تشدد ڪري مونکي 2017 سيپٽمبر تي سعودي عرب ۾ طلاق ڏئي پاڪستان موڪلي ڇڏيو آهي، ان باوجود منهنجو اڳوڻو مڙس حسن لنڊ ۽ ان جو ڀاءُ غلام حسين لنڊ ،فواز لنڊ مونکي ۽ منهنجي ما۽ ڀائرن ۽ پيءُ کي موتمار ڌمڪيون ڏئي رهيو آهي، انهن مان جان جو خطرو آهي ،فاطمه لنڊ وڌيڪ چيو ته هي گهر مون 2015 ۾ خريد ڪيو ھو منهنجي گهر تي منهنجي اڳوڻو مڙس حسن علي لنڊ هٿياربند مقرر ڪري ڇڏيا هئا ، مان جڏهن ايس ايس پي ڄامشورو توقير محمد نعيم سان ملياسين ته ان وقت ايس ايس پي ڄامشورو اسان کي گهر جو قبضو وٺي اسان جي حوالي ڪيو ويو هن، سنڌ حڪومت ۽ آءِ جي سنڌ ۽ ڊي آئي جي حيدرآباد کان مطالبو ڪيو ته اڳوڻي مڙس حسن لنڊ خلاف ڪاروائي ڪري انصاف فراهم ڪيو وڃي نه ته ٻئي صورت ۾ مان پاڻ کي باه ڏئي ساڙي ڇڏيندس.

ڪوٽڙي(ن پ ا)ڪوٽڙي ۾ چور سرگرم،هڪ مهيني اندر 20 کان وڌيڪ موٽر سائيڪلون چوري ٿي ويون، ڪوٽڙي ۽ آس پاس وارن علائقن ۾ چورن تر تپائي ڇڏيو آھي درياءَ بند تان منظور احمد يوسفزئي جي موٽر سائيڪل چوري ٿي وئي،تعلقه اسپتال لڳ هڪ بئنڪ ڀرسان علي حيدر ڪانڌڙو جي موٽر سائيڪل چور چوري ڪري ويا،درياء بند تان قاضي محلي ۾ اويس عالم جي موٽر سائيڪل چوري ڪري ويا،مهاجر ڪالوني لڳ محمدي مسجد مرزا رضوان بيگ جي موٽر سائيڪل چوري ٿي وئي
مريم گارڊن مان رضوان جوڻيجو جي موٽر سائيڪل چور چوري ڪري ويا،سبحان الله ڪالوني مان رفيق جوڻيجو جو چور موٽر سائيڪل چوري ڪري ويا،هڏي مل ڀرسان بلوچ ڪالوني مان عبدالحميد مگسي کان هٿياربند رڪشا ڦر ڪري ويا،مريم گارڊن مان منصور بلوچ جي موٽر سائيڪل چوري ڪري ويا ،ملڪ گرائونڊ مان ماستر وجود علي شر جي موٽر سائيڪل چوري ڪري ويا،پٽاڻ ڪالوني مان آصف انصاري جي موٽر سائيڪل چور چوري ڪري ويا ,المدينه اليڪٽرڪ جي مالڪ فهيم عباسي جا چار وڏا ايڪو سائونڊ چوري ڪري ويا
پريس ڪلب ڀرسان حيدر ميڊيڪل اسٽور جا تالا ڀڃي پنجاھ هزار ڪيش ۽ 30 هزار جو سامان چور چوري ڪري ويا,ٿاڻي جي سامهون شاهجان نالي شهري جي گهر ۾ هٿياربندن داخل ٿي روڪ رقم ۽ سون جي چين ڦر ڪري ويا ،ڄاڻايل ڏوهن جي رپورٽ به ڪوٽڙي ٿاڻي تي داخل ٿيل آھي پر پوليس واقعن کي روڪڻ ۽ چورن جو گهيرو تنگ ناهي ڪري سگهي جنهن سبب ڪوٽڙي ۾ ڏوهي سرگرميون وڌي رهيون آھن ،متاثر شهرين رفيق احمد ،علي حيدر،رضوان جوڻيجو ۽ ٻين جو چوڻ هو ته ڪوٽڙي ۾ موٽر سائيڪل ڦر ڪندڙن شايد پنهنجي طريقو مٽائي ڇڏيو آھي جو موٽر سائيڪلون گهرن،دڪانن،هوٽلن سامهون بيهڻ شرط چوري ڪري وڃن ٿا.
رابطو ڪرڻ تي ايس ايچ او ڪوٽڙي طارق خانزاده ٻڌايو ته منهنجي علم ۾ 6 موٽر سائيڪلون چوري ٿيون آھن ان تي ڪم ڪريون پيا نشاندهي ٿي آھي چور هتي جا آھن جلد گرفتار ڪري چوري ٿيل موٽر سائيڪلون واپس ڪرائينداسين.

ڪوٽڙي(رپورٽ: ڌڻي بخش باريجو) گذريل سال جا ٽينڊر جاري نه ٿي سگھيا آهن، ڄامشورو ضلعي ڪائونسل پاران 18 ڪروڙ جون نيون اسڪيمون منظورڪيون ويون آهن. ڄامشورو ضلعي ڪائونسل جو اجلاس ضلع چئيرمين ملڪ شاهنواز جي صدارت هيٺ شروع ٿي ويو آھي، اجلاس ۾ 27 ميمبرن شرڪت ڪئي، جڏهن ته اجلاس ۾ ضلعي ڪائونسل جو وائيس چئيرمين صادق شورو پهچي نه سگهيو. اجلاس ۾ گذريل سال جي اجلاس جي ڪاروائي جي بحالي، هلندڙ مالي سال 2018.19 ۾ ميمبرن پاران ڏنل اسڪيمن جي بحالي ۽ ٻين مسئلن بابت ڏنل ايجنڊا تي غور ڪيو ويو، اجلاس ۾ اسڪيمن تي خرچ جو ڪاٿو 18 ڪروڙ 36 لک 79 هزار رکيو ويو آھي اجلاس ۾ ضلع ڪائونسل جي چئيرمين ملڪ شاهنواز ميمبرن کي بريفنگ ڏيندي ٻڌايو ته اسڪيمن ۾ ضلعي جي سڀني ميمبرن کي برابري جي بنياد تي اسڪيمون ڏنيون آھن ٿاڻي بولاخان تعلقي لاء 4 ڪروڙ ،69.لک،63 هزار رکيا آھن اهڙي طرح ڪوٽڙي تعلقي لاء 4 ڪروڙ 76 لک 29 هزار ،مانجهند تعلقي لاء 4 ڪروڙ 88 لک ،78 هزار،سيوهڻ تعلقي لاء 4 ڪروڙ ،2 لک ،80 هزار مختص ڪيا آھن ميمبرن اسڪيمون فائنل ڪري ڏنيون آھن انهن تي جلد ڪم شروع ڪيو ويندو،اجلاس ۾،ميمبرن سلطانه گنڀير،پير بخش ڇڇر،سسئي راجپر،زمان کوسو ،۽ ٻين ميمبرن اجلاس ۾ گذريل ٽن سالن ۾ ڪم ڪار نه ٿيڻ توڙي پنهنجي تڪن ۾ پيئڻ پاڻي جي کوٽ،اسپتالن ۾ دوائن جي کوٽ ،گندگي توڙي ترقياتي اسڪيمون نه ڏيڻ ۽ آفيسرن پاران نظر انداز ڪرڻ جون دانهون ڪيون ويون ،اجلاس ۾ ميمبرن آفيسرن جي غيرموجودگي تي دانهيدي چيو ته جڏهن اجلاس ۾ آفيسر ناهن ته پنهنجا مسئلا ڪنهن آڏو پيش ڪيو آفيسر ضلعي ۾ پنهنجي من ماني هلائن پيا خالي پنهنجا ڪم ڪن ٿا باقي عوام جو ڪجھ به نٿو ٿئي. اجلاس ۾ ميمبرن سلطان کنڀير،سسئي راجپر،پير بخش ڇڇر،زمان کوسو ۽ ٻين ڳالهائيندي چيو گذريل ٽن سالن جو اسڪيمون اسان جو ڪيڏانهن ويون ان تي توج ڇو نه ڏني وئي اسان کي عوام ووٽ ڏئي ڪائونسل ۾ پنهنجا مسئلا حل ڪرڻ لاء موڪليو آھي اسان هڪ به عوام جو هن نظام ذريعي ڪم ناهي ڪيو ووٽرن کي ڪهڙو جواب ڏينداسين ،اجلاس ۾ ميمبر ڊاڪٽر ڀون مل اسڪيمون نه ملڻ واري معامري تي ايوان جي ميمبرن کي آگاھ ڪرڻ جي ڪوشش ڪئي ته ڄاڻايل ميمبرن ڊاڪٽر ڀون مل کي مداخلت ڪرڻ کان روڪيندي ضلع چئيرمين کان اسڪيمون نه ملڻ تي جواب گهريو ، اجلاس ۾ ميمبرن پاران گذريل سال واري اسڪيمن جا ٽينڊر نه ٿيڻ تي دانهون پڻ ڪيون. ميمبر نبي بخش بوزدار ڳالهائيندي چيو ته چار سال مڪمل ٿيڻ وارا آھن اڳ به اسڪميون ورتيون ويون پر انهن تي عمل نه ٿيو . هن چيو ته گذريل وقت ۾ ڪو به ڪم نه ٿيو آهي، سال کان پوء عوام ڏانهن وڃڻو آهي، هن دفي ٽينڊر نه ٿيا ته استعفا ڏئي ڇڏيندس. ،جنهن بعد ضلع ڪائونسل جي چئيرمين ملڪ شاهنواز ايوان کي ٻڌايو ته گذريل ٽن سالن ۾ اسان جو اسڪيمون سرڪار منظور نه ڪيون جنهن ڪري اسڪيمن تي ڪم ٿي نه سگهيو اسان جي ڪائونسل کي مسلسل نظر انداز ڪيو ويو. هن اجلاس ۾ اسان ترقياتي اسڪيمن لاء 18.ڪروڙ ،36لک،79 هزار منظور ڪيا آھن ايندڙ اجلاس ۾ هيلٿ لاء رکيل بجٽ به خرچ ڪري ضلع ڪائونسل جي ماتحت هلندڙ ڊسپينسرين کي دوائون فراهم ڪنداسين.
سنڌ حڪومت ۾ اسڪيمون نه ملڻ ڪري مشڪلاتون پيدا ٿيون: ميمبر
ڪوٽڙي: ضلعي ڪائونسل اجلاس ۾ ميمبر ڊاڪٽر ڀون مل،محمد علي سمون ،محسن عاقلاڻي،جوجي خاصخيلي ۽ ٻين ڳالهائيندي چيو ته ضلع ڪائونسل جي چئيرمين جي ڪارڪردگي مان مطمن آھيون اسان کي جيڪي اسڪيمون مليون آھن ان جي سروي ڪري ضلع ڪائونسل جي چئيرمين حوالي ڪئي آھي اميد ته جلد انهن اسڪيمن تي ڪم ٿيندو ميمبرن چيو ته اسان جي ڪائونسل کي اڳوڻي سنڌ حڪومت ۾ اسڪيمون نه ملڻ ڪري مشڪلاتون پيدا ٿيون پر هاڻ اميد آھي ته هن ڀيري ڪم ٿيندا.