ڪوٽڙي (ن پ ا) ڪوٽڙي ۾ ضلعي ڄامشورو جي تعلقه وائيس اسڪيمن جي منظوري لاء ڊسٽرڪٽ ڪائونسل جي حال ۾ ضلعي چيئرمين ملڪ شاهنواز خان جي صدارت ٿي گذريو ، اجلاس ۾ ساليانه اسڪيمن جي منظوري ڏني وئي ، جنهن ۾ تعلقه وائيس تعلقه ڪوٽڙي لاء 4 ڪروڙ 76 لک ٿاڻو بولا خان لاء 4 ڪروڙ 69 لک ، مانجهند لاء 4 ڪروڙ 88 لک ، جڏهن ته تعلقي سيوهڻ لاء 4 ڪروڙ 20 لک روپين جون اسڪيمون منظور ڪرايون ويون ، اجلاس ۾ ميمبرن پاران گذريل سال واري اسڪيمن جا ٽينڊر نه ٿيڻ تي دانهون پڻ ڪيون ، اجلاس ۾ ميمبر نبي بخش بوزدار ضلعي چيئرمين اڳيان داهنيدي چيو ته گذريل وقت ۾ ڪو به ڪم نه ٿيو آهي ، ڪيترائي ڀيرا ٽينڊر پاس ڪرايا آهن ، پر ڪم نه ٿا ڪرايا وڃن ، هن چيو ته سال کان پوء واپس عوام ڏانهن وڃڻون آهي ،اگر هن دفي ٽينڊر نه ٿيا ته استعفا ڏئي ڇڏيندس ، ميمبرن سسئي راجپر ، نريش ڪمار ، سلطانه ، پير بخش ڇڇر ، ٻين پاران ترقياتي اسڪيمون نه ملڻ ۽ ڪم نه ڪرائڻ تي شڪايتون ڪيون ويون ان موقعي تي ضلعي چيئرمين ملڪ شاهنواز خان ميمبرن کي يقين ڏياريون ته جلد کان جلد اسڪيمن جو ڪم شروع ڪرايو ويندو ، ڇاڪاڻ ته اسين عوام جي خدمت ڪرڻ آيا آهيون ، اسان عوامي خدمت تي يقين رکون ٿا ، ، ضلعو ڄامشورو پ پ پ جو قلعو آهي ، سموري ضلعي ۾ ترقياتي ڪمن جو ڄار وڇايو ويندو ، جيڪي اسڪيمون منظور ٿيون آهن انهن سان ڪافي مسئلا حل ٿي ويندا ،هن چيو ته تازو ئي ڄامشورو ڦاٽڪ ۽ ڪوٽڙي ڦاٽڪ تي تعمير ڪرايل اوور هيڊ برج پاڪستان پيپلزپارٽي جي حڪومت جوڙايون، آهن، جنهن سان هتان جي عوام کي سهولت ٿي آهي ، آيندا به هنن ترقياتي ڪم ڪرايا ويندا .

ڄامشورو (رپورٽ: رحمان ميمڻ)مهراڻ يونيورسٽي جي سينٽر آف ايڪسيلنس ان آرٽ اينڊ ڊزائن ۾ ليپ ٽاپ ورهائڻ جي تقريب ٿي گذري جنهن ۾ 60 شاگردن ۽ شاگردياڻين کي وزيراعظم ليپ ٽاپ اسڪيم تحت ليپ ٽاپ ڏنا ويا. ليپ ٽاپ اسڪيم جي فوڪل پرسن عبدالمالڪ چني چونڊ ٿيل شاگردياڻين ۽ شاگردن ۾ ليپ ٽاپ ورهايا. تقريب کي خطاب ڪندي عبدالمالڪ چني چيو ته جن شاگردن ۽ شاگردياڻين کي ليپ ٽاپ ڏنا ويا آهن اهي ان جا حقدار آهن ۽ ان کي هو اعزاز سمجهن. هن چيو حڪومت پاران ليپ ٽاپ ڏيڻ واري اسڪيم ساراهه جوڳي آهي جنهن سان ملڪ جي هزارين شاگردن ۽ شاگردياڻين کي فائدو ٿيو آهي ۽ شاگردن جي تعليم طرف دلچسپي وڌڻ لڳي آهي. تقريب بعد شاگردن ۽ شاگردياڻين ليپ ٽاپ ملڻ تي خوشيءَ جو اظهار ڪيو.

ڳڙهي خيرو(ن پ ا)ڳڙهي خيرو ٿاڻي جي حد جيڪب آباد،ڳڙهي خيرو روڊ تي سردار واھ لڳ ايريگيشن ڊپارٽمينٽ بلوچستان جي ڊبل ڪئبن گاڏي ۽ موٽر سائيڪل وچ ۾ آمهون سامهون ٽڪر ٿي پيو جنهن جي نتيجي ۾ ٽي ڄڻا سخت زخمي ٿي پيا.زخمين ۾ نويد احمد مغيري،گل محمد مغيري ۽ خادم حسين مغيري شامل آهن.حادثي بعد سردار واھ جا ڳوٺاڻا پهچي زخمين کي تعلقه اسپتال پهچايو جتي زخمين جي حالت ڳڻتي جوڳي هئڻ سبب کين لاڙڪاڻي منتقل ڪيو ويو آهي.ڳڙهي خيرو پوليس گاڏي ۽ ڊرائيور اياز احمد لاشاري کي تحويل ۾ وٺي لاڪ اپ ڪري ڇڏيو آهي جڏهن ته آخري اطلاعن تائين واقعي جو ڪيس درج نه ٿي سگهيو هو.

ڪوٽڙي(رپورٽ: ڌڻي بخش باريجو) ڪوٽڙي جي بلاول ميڊيڪل اسپتال جي ايمرجنسي شعبي ۾ ڊاڪٽر ۽ مريضن ۾ جهيڙو ٿي پيو، جنهن دوران ڊاڪٽر سراج احمد انصاري ۽ مريض هٿين پئجي ويا. ڊاڪٽر ۽ اسٽاف مريضن پاران بداخلاقي جو الزام هڻندي ايمرجنسي شعبي جو بائيڪاٽ جي ڌمڪي ڏئي ڇڏي. بلاول ميڊيڪل اسپتال ۾ شام واري شفٽ ۾ ڊيوٽي تي مقرر ڊاڪٽر ۽ اسٽاف جي ٻن ڪلاڪن تائين غير موجودگي سبب ايمرجنسي شعبي ۾ مريضن جي رش ٿي وئي. مريضن ڊاڪٽرن جي غيرموجودگي خلاف احتجاج ڪندي نعريبازي ڪئي. ان موقعي تي مريضن ڪوٽڙي نانگولائين واسي الياس بلوچ، سائيٽ ڪوٽڙي واسي گلشير چانڊيو ۽ ٻين احتجاج ڪندي دانهيو ته شام 6 کان 8 وڳي رات ٻن ڪلاڪن تائين مسلسل ويٺا آهيون پر ڊاڪٽر اسٽاف اسپتال جي ايمرجنسي شعبي ۾ ناهن مريض لاوارث بڻيل آھن. هوڏانهن مريض ميڊيا آڏو دانهي رهيا هئا ته ڊيوٽي تي موجود ڊاڪٽر سراج انصاري ۽ مريض هٿين پئجي ويا، جنهن دوران اسپتال مڇي مارڪيٽ بڻجي وئي. ڊاڪٽرن چتاءُ ڏنو آهي ته مريضن جي بداخلاقي خلاف ڪم ڇڏ هڙتال ڪري احتجاج ڪيو ويندو.