ڪراچي (تجزيو: دودو چانڊيو) پي ٽي آءِ پاران سنڌ ۾ مراد علي شاهه جي سرڪار ختم ڪري پنهنجي سرڪار ٺاهڻ وارو خواب آساني سان ساڀيان ٿيندي نظر نه اچي رهيو آهي. ڇاڪاڻ ته 18هين ترميم ۾ فاروڊ بلاڪ جي ٺهڻ ۾ رڪاوٽون، اپوزيشن وٽ عددي تعداد تمام گهٽ ۽ پاڻ ۾ اتحاد نه هئڻ سبب خرم شير زمان جي دعويٰ عملي حوالي سان آسان نه پئي لڳي.
پي ٽي آءِ کي سنڌ ۾ سرڪار ٺاهڻ لاءِ مخالف ڌر جي سمورن پارٽين جي سهڪار کانپوءِ به پي پي پي جي 21 منحرف ميمبرن جو ساٿ لازمي کپي، ڇاڪاڻ ته سنڌ اسيمبلي جي 168 جي ايوان ۾ پي ٽي آءِ وٽ عددي تعداد صرف 30 آهي، سندن مقابلي ۾ حڪمران جماعت پي پي پي وٽ سنڌ اسيمبلي ۾ 99 ميمبر موجود آهن. پي ٽي آءِ کانسواءِ سنڌ اسيمبلي ۾ مخالف ڌر جي ٻين جماعتن جي ڊي اي وٽ 14، ايم ڪيو ايم پاڪستان وٽ 20، ايم ايم اي وٽ هڪ ۽ لبيڪ پاڪستان وٽ سنڌ اسيمبلي ۾ 3 ميمبر موجود آهن. سنڌ اسيمبلي جي گڏيل ايوان ۾ مخالف ڌر وٽ ٽوٽل 68 ميمبر موجود آهن، مخالف ڌر جي انهن ميمبرن ۾ لبيڪ پاڪستان ۽ ايم ايم اي هن وقت پي ٽي آءِ کان ناراض جماعتون آهن، تنهنڪري سنڌ اسيمبلي ۾ “اِن هائوس” تبديلي لاءِ اهي ٻئي پارٽيون پي ٽي آءِ جو ساٿ ڏين،اهو مشڪل نظر اچي رهيو آهي، پي ٽي آءِ کي سنڌ اسيمبلي ۾ ايم ڪيو ايم ۽ جي ڊي اي جي مڪمل ساٿ کانپوءِ مراد علي شاهه جي سرڪار ڪيرائڻ ۽ نئين حڪومت قائم ڪرڻ لاءِ گهٽ ۾ گهٽ 21 ميمبر کپن، جيڪي پي پي پي جي ناراض ميمبرن کانسواءِ ممڪن ناهي. ان لاءِ به انهن ميمبرن کي پارٽي وفاداريون تبديل ڪري پي ٽي آءِ جو ساٿ ڏيڻ سو به کليل راءِ شماري جي صورت ۾ 18هين ترميم جي ڪري ڏکيو هوندو. پي ٽي آءِ جي سنڌ حڪومت ڪيرائڻ واري دعويٰ بابت “پنهنجي اخبار” سان ڳالهائيندي ايم ڪيو ايم جي اڳواڻ خواجه اظهار الحسن چيو ته 18هين ترميم بعد فارورڊ بلاڪ ٺهڻ سولو ڪم ناهي، پي ٽي آءِ کي حڪومت ٺاهڻ لاءِ سڀني مخالف ڌر جي جماعتن جي ساٿ کانسواءِ پي پي پي جي فاروڊ بلاڪ جي ضرورت آهي، اگر عدم اعتماد جي رٿ جمع ٿي ۽ راءِ شماري ٿي، ان دوران پي پي پي ميمبر غير حاضر رهن، پوءِ اهو ممڪن ٿي سگهي ٿو، پر سڄي عمل بنهه ڏکيو هوندو. اپوزيشن جي ٽئين وڏي جماعت جي ڊي اي اڳواڻ نند ڪمار گوڪلاڻي چيو ته اڃا پي ٽي آءِ ڪو رابطو نه ڪيو آهي، اسان جو فيصلو پاڳارو ڪندو، پر پي ٽي آءِ لاءِ سنڌ حڪومت ڪيرائڻ ايترو آسان نه هوندو، جيترو هو سمجهن ٿا.

گهوٽڪي (م ڊ) پ پ چيئرمين بلاول ڀٽو زرداري اي سي ايل ۾ نالا شامل ٿيڻ واري معاملي تي ردعمل ظاهر ڪندي چيو ته ايس اي ايل ۽ نوٽيسز کان نٿا ڊڄون، اسان نه پر گُجر خان جلد ڀڄي ويندو. گهوٽڪي ۾ ميڊيا سان ڳالهائيندي بلاول ڀٽو زرداري چيو ته اسان ڪٺ پتلي حڪمرانن کان نه ڀڄنداسين، اسان ڀڄڻ وارن مان نه آهيون، پر گُجر خان جلد ڀڄي ويندو. هن چيو ته اي سي ايل ۽ نوٽيسز کان نٿا ڊڄون، احتساب ڪرڻو آهي ته سڀني جو ڪرڻ گهرجي، عليم خان ۽ عليمه خان جو به احتساب ڪيو وڃي، ڪير به مقدس ڳئون نه آهي. هڪ سوال جي جواب ۾ بلاول ڀٽو زرداري چيو ته سنڌ جي وڏي وزير مراد علي شاهه تي مون کي سئو سيڪڙو اعتماد آهي، پيپلز پارٽي ۾ ڪوبه فارورڊ بلاڪ نه ٺهي رهيو آهي، پر ماڻهن جا اجايو دماغ ٺهي رهيا آهن.