قاضي احمد (رپورٽر)قاضي احمد شھر ۾لاڙڪاڻي ڏانھن ويندڙ ڪار روڊ جي ديوار سان ٽڪرائجي وئي جنھن سبب ڪار سوار ريشم گلي لاڙڪاڻو جو رھواسي لطف اللھ شيخ موقعي تي فوت ٿي ويو.قاضي احمد پوليس پھچي لاش ڪڍرائي اسپتال منتقل ڪيو.
قاضي احمد:روڊ حادثي ۾لاڙڪاڻي واسي فوت
للطف اللھ شيخ جي ڪار روڊ جي ديوار سان ٽڪرائجن سبب حادثو پيش آيو
ٽرمپ سان اختلاف، آمريڪي دفاعي وزير استعيفيٰ ڏئي ڇڏي
جيمز ميٽس شام مان فوجون ڪڍڻ جي فيصلي تي استعيفيٰ ڏني: آمريڪي ميڊيا
آمريڪي صدر جيمز ميٽس جي استعيفيٰ منظور ڪندي جلد نئون وزير دفاع مقرر ڪندو
واشنگٽن (ا ڊ) آمريڪي صدر ڊونلڊ ٽرمپ جي هڪ ٻي وزير استعيفيٰ ڏئي ڇڏي آهي. آمريڪي دفاعي وزير جيمز ميٽس استعيفيٰ ڏيندي صدر ٽرمپ کي لکيو ته توهان کي پنهنجي خيال جو دفاع وارو وزير رکڻ جو پورو حق حاصل آهي، منهنجي لاءِ بهتر آهي ته مان عهدي تان استعيفيٰ ڏيان. صدر ٽرمپ نالي موڪليل استعيفيٰ ۾ جيمز ميٽس اتحادين جي احترام بابت لکيو ۽ عام دفاع جي لاءِ سڀ آمريڪي طاقت جا وسيلا استعمال ڪرڻ جو ذڪر به ڪيو. آمريڪي صدر جيمز ميٽس پاران جي عهدي ڇڏڻ جو اعلان ڪندي چيو ته جيمز ميٽس ايندڙ سال اعزاز سان رٽائر ٿي ويندو. آمريڪي صدر پاران شام مان 2 هزار فوجي ڪڍڻ جو اعلان ڪيو آهي، جڏهن ته دفاع واري وزير چيو هو ته وقت کان اڳ فوجين جي نيڪالي وڏي غلطي آهي.
اين آءِ سي ايل ڪرپشن: اڳوڻي چيئرمين سوڌو 11 جوابدارن جي ضمانت منظور
سنڌ هاءِ ڪورٽ جوابدارن کي 10-10 لک رُپين جا مچلڪا جمع ڪرائڻ جو به حڪم ڏنو آهي
جوابدارن اين آءِ سي ايل کي ڪروڙن جو نقصان ڏنو، احتساب عدالت ۾ ريفرنس هلندڙ آهي: نيب
ڪراچي (رپورٽر) سنڌ هاءِ ڪورٽ اين آءِ سي ايل اسڪينڊل ۾ اڳوڻي چيئرمين سوڌو 11 جوابدارن جي ضمانت منظور ڪري ورتي آهي. سنڌ هاءِ ڪورٽ ۾ اين آءِ سي ايل ڪرپشن اسڪينڊل ۾ نامزد جوابدارن جي ضمانت واري درخواست تي ٻڌڻيءَ دوران نيب اختيارين چيو ته ڄاڻايل جوابدارن جي دور ۾ اين آءِ سي ايل دائود ڪريسنٽ انويسٽمينٽ ڪمپني ۾ سيڙپڪاري ڪئي، جنهن سان اداري کي ڪروڙين رُپين جو نقصان ٿيو. جوابدارن خلاف احتساب عدالت ۾ ريفرنس هلندڙ آهي. عدالت اين آءِ سي ايل جي اڳوڻي چيئرمين اياز خان نيازي سوڌو 11 جوابدارن جي ضمانت منظور ڪري ورتي آهي، جڏهن ته جوابدارن کي 10-10 لک رُپين جا مُچلڪا جمع ڪرائڻ جو حڪم پڻ ڏنو ويو آهي.
پنگريو: گهر سڙي وڃڻ سبب سيءُ ۾ رات گذاريندڙ غريبن جي واهر نه ٿي
باهه لڳڻ سبب پورهيت ڪٽنبن جا 8 گهر الهه تلهه سميت سڙي ويا
ڪالهه کان بي يارو مددگار ويٺل مسڪينن پاران مالي مدد جي اپيل
پنگريو: باهه سبب گهر سڙي وڃڻ بعد کليل آسمان هيٺ سڄي رات گذاريندڙ پورهيتن جي ڪنهن به واهر نه ڪئي، ڳوٺ ابرھيم خاصخيلي ۾ گذريل ڏينهن پورهيتن جي ڪکاون گهرن کي باهه لڳي وئي، جنهن جي نتيجي ۾ 8 گهر ۽ انهن ۾ پيل 20 مڻ ساريون، نياڻين جو ڏاج ۽ ٻيو سامان سڙي رک ٿي ويو، متاثر بي يارو مددگار سڄي رات کليل آسمان هيٺ سخت سيءُ ۾ گذاري، متاثرن سرڪار کان مالي مدد جي گھر ڪئي
محرومين جي چڪر ۾ اسان جيئڻ وساري ڇڏيندا آهيون: شاهه رخ خان
ڪجهه جهلڪيون کانپوءِ پنهنجون فلمون ڪڏهن به ناهيان ڏسندو: ڪنگ خان
ممبئي (شوبز نيوز) بالي ووڊ ڪنگ شاهه رخ خان چيو آ هي ته سندس نئين فلم زيرو اهڙن ماڻهن جي ڪهاڻي آهي جيڪي ظاهري طور ته محرومين جو شڪار آهن پر هو زندگي کي ڀرپور طريقي سان جيئڻ سيکارين ٿا. برطانوي خابرو اداري بي بي سي کي انٽرويو ڏيندي بالي ڪنگ خان چيو ته شاهه رخ خان چيو ته فلم جي ڪهاڻي تمام گهڻي منفرد آهي. هن چيو ته هو پنهنجو فلمون ڪڏهن به ناهي ڏسندو، فلم جون ڪجهه جهلڪيون فلم يونٽ سان ڏسندو آهيان، ان کانپوءِ فلم ڪڏهن به ناهيان ڏسندو. زيرو ابتدا کان شروع ڪرڻ جي ڳالهه آهي.
ٺل: آپگهات جي ڪوشش دوران زخمي ٿيل نوجوان فوت
ٺل ( رپورٽر) گذريل ڏينهن آپگهات جي ڪوشش ڪندي زخمي ٿيل نوجوان لاڙڪاڻي جي اسپتال ۾ فوت ٿي ويو، ڳوٺ ٻيلو ڪٽو ۾ نوجوان عبدالهادي بنگلاڻي پاڻ تي پسٽل جو فائر ڪري آپگهات جي ڪوشش ڪئي ۽ گولي لڳڻ سبب سخت زخمي ٿي پيو، کيس فوري طور لاڙڪاڻي جي اسپتال منتقل ڪيو ويو، جتي هو اڄ زخمن جي سٽ نه سهندي فوت ٿي ويو
پنوعاقل: زميني تڪرار تان ٻن ڌرين وچ ۾ جهيڙو، هڪ ڄڻو زخمي
پنوعاقل( رپورٽر) زميني تڪرار تان ٻن ڌرين وچ ۾ جهيڙي جي نتيجي ۾ هڪ ڄڻو زخمي ٿي پيو، سلطان پور ٿاڻي جي حد ۾ ڳوٺ خيرو ۾ زميني تڪرار تان انڍڙ برادري جي ٻن ڌرين وچ ۾ جهيڙو ٿيو، جنهن دوران لٺيون لڳڻ جي نتيجي ۾ محمد اسماعيل انڍڙ زخمي ٿي پيو، زخمي کي اسپتال منتقل ڪيو ويو، جڏهن ته واقعي بعد ڌرين ۾ ڇڪتاڻ سبب علائقي ۾ خوف پکڙجي ويو
سکر: دڪانن جي چوري ۽ گاڏيون ڦر ڪندڙ ٽولي جا 2 اهم جوابدار گرفتار
جوابدارن وٽان پسٽل، 3 ڪلو چرس ۽ جعلي نمبر پليٽس هٿ آيون: ايس ايس پي سکر
ٻئي ڏوهارين ٻين ضلعن جي پوليس کي به گهربل هئا: ايس ايس پي اسد رضا شاهه
سکر( رپورٽر) سکر پوليس تالا ٽوڙ چوري ۽ گاڏيون ڦر ڪرڻ ۾ ملوث گينگ جي اهم جوابدار سميت ٻن ڏوهارين کي مقابلي بعد گرفتار جي دعويٰ ڪئي آهي، جاري ڪيل پڌرائي ۾ ايس ايس پي سکر اسد رضا شاهه چيو ته اي سيڪشن ٿاڻي جي حد ۾ 2 ڦورو فرار ٿيڻ جي ڪوشش ڪري رهيا هئا ته پوليس مقابلي بعد ٻنهي کي گرفتار ڪري ورتو، جن وٽان پسٽل، 3 ڪلو چرس ۽ جعلي نمبر پليٽس هٿ آيون، ايس ايس پي دعويٰ ڪئي ته گرفتار ٻئي ڏوهاري تالا ٽوڙ چوري ۽ گاڏيون ڦر ڪرڻ واري ٽولي جا اهم جوابدار آهن، ٻنهي ڏوهارين شبير ڌاريجو ۽ وحيد ناپر کان وڌيڪ پڇاڳاڇا جاري آهي، جنهن بعد ڪيس داخل ڪيو ويندو، جوابدار دڪانن جا تالا ٽوڙي چوريون ڪرڻ کانسواءِ گاڏيون ڦر ڪرڻ جي به ڪيترن واقعن ۾ سکر سميت مختلف ضلعن جي پوليس کي گهربل هئا