لنڊن (ا ڊ) برطانيا جي گادي واري هنڌ لنڊن جي ايئرپورٽ گيٽ وڪ تي اربع رات شڪي ڊرون اڏامڻ کانپوءِ فلائيٽس آپريشن معطل ڪيون ويون هيون، برطانوي هوائي فوج پاران ايئرپورٽ کي سڪيورٽي ڪليئرنس ڏيڻ کانپوءِ اڏامون شروع ڪيون ويون آهن. برطانوي پوليس پاران ڊرون اڏائيندڙن کي پڪڙي ناهي سگهي، جڏهن ته ٽئين ڏينهن به ڊرون توڙي ان کي اڏائيندڙ جي ڳولا جاري آهي. گيٽ وڪ ايئرپورٽ انتظاميا موجب 765 ٻن ڏينهن دوران 765 اڏامون معطل ٿيون، جيڪي هاڻي بحال ٿينديون. ٻن ڏينهن دوران هزارين مسافر ايئرپورٽ تي ڦاٿل رهيا، جڏهن ته ٻاهران ايندڙ فلائيٽس کي هيٿرو ايئرپورٽ توڙي ٻين شهرن ڏانهن منتقل ڪيو ويو. انتظاميا موجب صرف جمعي جي ڏينهن 140 اڏامون شروع ڪيون وينديون، جيڪي هڪ لک 40 هزار مسافرن کي پنهنجي منزلن ڏانهن کڻي توڙي ڇڏي اينديون.
“شڪي ڊرون ٻڙڌڪ مچائي ڇڏيو” لنڊن ۾ ملتوي ڪيل اڏامون ٻن ڏينهن کانپوءِ بحال
“شڪي ڊرون” ڏسڻ کانپوءِ گيٽ وڪ ايئرپورٽ تي اڏامون معطل ٿيل هيون
ٻن ڏينهن جي جاچ باوجود برطانوي پوليس ڊرون اڏائيندڙ کي هٿ نه ڪري سگهي
پريانڪا ۽ نڪ جونس شادي: آخري آجياڻي ۾ فلمي ستارن جا جلوا
ممبئي( شوبز نيوز ) بالي ووڊ توڙي هالي ووڊ اڪارا پريانڪا چوپڙا ۽آمريڪي گلوڪار نڪ جونس جي شادي تقريبون اڃان جاري آهن. ممبئي جي تاج لينڊز هوٽل ۾ پريانڪا ۽ نڪ جونس جي شادي جي آخري آجياڻي واري تقريب ڪوٺائي وئي جنهن ۾ بالي ووڊ ستارن سميت مشهور شخصيتن شرڪت ڪئي. تقريب ۾ ڪاجول، روينا ٽنڊن، سلمان خان، اي آر رحمان، ريکا، سارا علي خان، وديا بالن، عائشا تاڪيا، آشا ڀوسلي، انوشڪا شرما ۽ ٻين ستارن شرڪت ڪري تقريب کي چار چنڊ لڳائي ڇڏيا، جڏهن ته پريانڪا پنهنجي مشهور گيت ”ديسي گرل“ پنهنجي جيون ساٿي نڪ جونس سان گڏ رقص پڻ ڪيو. تقريب ۾ نئين شادي شده جوڙي دپيڪا پڊوڪون ۽ رنوير سنگهه هڪ جهڙا لباس پهريي تقريب ۾ شرڪت ڪئي ۽ سڀني جي توجهه جو مرڪز بڻيل رهيا.
ڏيپارچا:مرضي سان شادي ڪندڙ جوڙو پنھنجي تحفظ لاءِ پريس ڪلب پھچي ويو
ڏيپارچا(رپورٽر)پنھنجي رضا خوشي سان پرڻو ڪندڙ ڏيپارجا جي رھواسڻ مسمات شڪيلا ۽ ڳوٺ درياخان جلباڻي جو رھواسي نوجوان حاجي امير بخش ڏيٿو پريس ڪلب نوشھروفيروز پهتا جتي ميڊيا سان ڳالهائيندي شڪيلا خاصخيلي چيو ته مون پنهنجي خوشيءَ سان حيدرآباد ۾ حاجي امير بخش ڏيٿي سان نڪاح ڪيو آھي. مون کي اغوا ناهي ڪيو ويو. ھاڻي شادي ڪرڻ بعد ماما محمد صديق، امداد علي، الهداد ۽ ھڪ بااثر الياس عالماڻي اسان کي مارڻ جون ڌمڪيون ڏيئي رھيا آھن جنهن ڪري تحفظ لاءِ دربدر آهيون. هن چيو ته سندس مڙس ۽ سندس مائٽن کي ڪوڙن ڪيسن ۾ ڦاسائڻ لاءِ ڌمڪيون ڏنيون پيون وڃن.حاجي امير بخش ڏيٿو چيو ته هنن پنھنجي مرضي سان نڪاح ڪيو آھي جنھن بعد شڪيلا جا مائٽ ويري بڻجي ويا آھن جنهن ڪري سندن زندگين کي سخت خطرو آھي.ھنن آءِ جي سنڌ، ايس ايس پي نوشھروفيروز سميت ٻين کان مطالبو ڪندي چيو آھي ته کين موتمار ڌمڪيون ڏيندڙن خلاف ڪارروائي ڪئي وڃي ۽ کين تحفظ فراھم ڪيو وڃي.)
چورن کان لُٽيل پئسو واپس ڪرائي تعليم تي خرچ ڪنداسين: وزيراعظم
اسلام آباد (رپورٽر) وزيراعظم عمران خان چيو آهي ته ملڪ جو لٽيل پيسو چورن کان واپس ڪرائي تعيلم تي لڳائينداسين، ملڪ جي آزادي کانپوءِ ڪنهن به تعليم تي ڌيان ناهي ڏنو، پيغام ڏئي رهيا آهيون ته حڪومت جي ترجيح تعليم آهي، وزيراعظم هائوس کي يونيورسٽي بڻائڻ واري تقريب کي خطاب ڪندي وزيراعظم چيو ته ملڪ جي سڀ کان قيمتي ملڪيت کي يونيورسٽي بڻائڻ جو مقصد قوم کي ٻڌائڻو آهي ته پنهنجو قلبو درست ڪرڻو آهي، پيغام ڏئي رهيا آهيون ته قوم ۽ حڪومت جي ترجيح تعليم آهي، هن چيو ته جڏهن شوڪت خانم اسپتال ٺاهي ته ماڻهن چيو اهو ڪيئن ممڪن آهي ته غريبن جو مفت علاج ٿئي، تڏهن ايمان هو ته جيڪڏهن سينٽر آف ايڪسيلنس هوندو ته ماڻهو به سهڪار ڪندا، وزيراعظم هائوس ۾ به يونيورسٽي کي سينٽر آف ايڪسيلنس بڻائينداسين، هن چيو ته جنهن به معاشري ترقي ڪئي آهي، ان تعليم ۽ انساني ترقي تي زور ڏنو، پر جڏهن رڳو هڪ مخصوص ۽ ننڍو طبقو پيسا ٺاهيندو ته ملڪ ڪيئن ترقي ڪندو، عمران خان چيو ته ٽوني بليئر جو گهر ٽين ڊائوننگ اسٽريٽ ۾ سادي عمارت ۾ هو، پر اسان جا حڪمران عاليشان محلن ۾ رهندا رهيا، مون ۾ تبديلي برطانيه ۾ ماڻهن جي زندگي ڏسڻ بعد آئي، ڪالوني ازم جي ڪري افغانستان ۾ ترقي نه ٿي سگهي
ڌاٻيجي ۾ محمد علي شاهه فٽبال گرائونڊ تباهي جو شڪار
ڌاٻيجي پوليس جي سهڪار سان فٽبال گرائونڊ ٺيڪي تي ڏنل
فٽبال گرائونڊ ۾ راندين بدران مختلف بازارون لڳن ٿيون، رانديگر رلي ويا
ڌاٻيجي (رپورٽ پنهون چانگ) ڌاٻيجي شهر ۾ قائم مرحوم سعيد محمد علي شاهه فٽبال گرائونڊ تباهي حالي جو شڪار آھي. فٽبال گرائونڊ کي شهر ۾ لڳندڙ مخلتف بازارن جهڙوڪ اربع بازار، آچار بازار، جمع بازار ۽ سومر بازار لڳن ٿيون. فٽبال ڪلب ھفتي ۾ چار ڏينهن ڌاٻيجي پوليس جي سهڪار سان ٺيڪي ۾ ڏنل آھي. گرائونڊ ۾ ڪچري جا ڍير لڳل آهن، جڏهن ته انتظاميا ملي ڀڳت ڪري فٽبال گرائونڊ تباهي جو شڪار آھي. فٽبال گرائونڊ ۾ لڳندڙ بازارن ۾ مختلف سياسي پارٽيون ڀتو پڻ وصول ڪن ٿيون، جنهنڪري گرائونڊ جي بحالي لاءِ ڪير به آواز اٿارڻ لاءِ تيار ناهي. ڌاٻيجي واسين مهتاب اعواڻ، ابيد راڻو ۽ محمد اختر آرائين ۽ ٻين روزاني پنهنجي اخبار سان ڳالهائيندي چيو ته هي گرائونڊ سندن ٻارن جو مستقبل آھي، تنهنڪري هو اعليٰ اختيارن کان مطالبو ڪن ٿا ته مرحوم محمد علي شاهه فٽبال گرائونڊ جي مالڪي ڪئي وڃي ته جيئن گرائونڊ کي راندين جي مقصد لاءِ استعمال ڪري سگهجي.
نائجيريا ۾ غريب مريضن جا بل ڀريندڙ مسيحا
زيل اڪاروي علاج ڪرائڻ جي سگهه نه رکندڙ غريبن جا بل ڀري ٿو
زيل اڪاروي هڪ مالي صلاحڪار آهي پر مسيحا طور مشهور آهي
ابوجا (دلچسپ) نائيجيريا ۾ هڪ اهڙو مسيحا موجود آهي، جيڪو پنهنجو علاج نه ڪرائي سگهندڙ غريب مريضن جو ڳجهي طريقي سان بل ادا ڪري ٿو. زيل اڪاروي هڪ مالي صلاحڪار طور وڏين ڪمپنين سان ڪم ڪندو آهي، هو سرڪاري اسپتالن ۾ علاج نه ڪرائي سگهندڙن وٽ پهچي وڃي ٿو. اسپتالن ۾ سوشل ويلفيئر جي اداري اندر هو پهچندي ئي صرف علاج نه ڪرائي سگهندڙ ماڻهن جي فهرست گهري ٿو، جنهن کانپوءِ هو سمورن ماڻهن جو بل ادا ڪري ڇڏي ٿو. زيل خاص ڪري انهن مريضن جي مدد ڪندو آهي، جيڪي علاج کانپوءِ بل ادا نٿا ڪري سگهندا آهن ۽ اسپتال انتظاميا کين ڊسچارج ناهي ڪندي. زيل اڪاروي جن ماڻهن جي مدد ڪري ٿو ان کانپوءِ هو ساڻن ڪڏهن به رابطي ۾ ناهي ايندو. زيل پاران ان کي هو مسيحائي منصوبو سڏي ٿو. ياد رهي ته نائجيريا ۾ عام ماڻهن لاءِ صحت جون سهولتون پهچ کان ٻاهر آهن.
چين آمريڪي الزامن کي رد ڪري ڇڏيو
آمريڪا جا ڪي به صنعتي راز ناهن چورايا، الزام هٿ ٺوڪيا آهن: بيجنگ
چين پاران آمريڪا ۾ جاسوسي الزام هيٺ گرفتار ٻن چيني شهرين جي آزادي جو مطالبو
بيجنگ (ا ڊ) چين آمريڪا پاران لڳايل سمورن الزامن کي رد ڪري ڇڏيو آهي، سندس چوڻ آهي ته هن معاشي جاسوسي ناهي ڪئي، نه ئي ڪي صنعتي راز چورايا آهن. آمريڪا ۽ سندس اتحادي هٿ ٺوڪيل الزام لڳائڻ بند ڪن. ڪالهه آمريڪا، برطانيا، نيوزيلينڊ ۽ آسٽريليا پاران چين مٿان وڏي سطح تي صنعتي راز چورائڻ جا الزام مڙهڻ سان گڏ سائبر سڪيورٽي ذريعي جاسوسي ڪرڻ جو الزام مڙهيو هو. چيني پرڏيهي وزارت پاران جاري ڪيل بيان ۾ آمريڪا ۽ سندس اتحادين جي الزامن کي رد ڪندي ٻه چيني شهرين کي آزاد ڪرڻ جي اپيل ڪئي آهي. بيان ۾ چيو ويو آهي ته چيني حڪومت ڪنهن به طريقي سان واپاري يا صنعتي راز چورائڻ ۾ ملوث ناهي رهي، الزام هٿ ٺوڪيا آهن، جن جو حقيقيت سان ڪو به واسطو ناهي. چيني پرڏيهي وزارت جي ترجمان هئوا چنينگ جو چوڻ هو ته چين آمريڪا جي ان رويي تي احتجاج رڪارڊ ڪرائيندي چيو آهي ته پنهنجي غلط بياني کي فوري بند ڪيو وڃي، جڏهن ته چين کي سائبر سڪيورٽي ۾ ملوث ڏيکارڻ کان پڻ پاسو ڪيو وڃي. آمريڪا ۽ چين پاران وينزويلا ۾ جي 20 اجلاس دوران ٻنهي ملڪڻ ۾ لاڳاپا بهتر ڪرڻ تي اتفاق ڪيو هو پر ان کانپوءِ آمريڪا ۽ سندس اتحادين پاران چين مٿان الزام مڙهيا آهن ۽ ٻنهي ملڪن ۾ لاڳاپا هڪ ڀيرو ٻيهر خراب ٿي ويا آهن.
جيڪب آباد فٽبال گرائونڊ تي قبضو: رانديگرن جو فٽبال راند کيڏي انوکو احتجاج
رانديگرن گرائونڊ تي قبضي خلاف ڊي سي چوڪ ڌرڻو ھڻي روڊ بلاڪ ڪري ڇڏيو
بااثر ماڻهو فٽبال گرائونڊ تي قبضو ڪيو آهي، ضلعي انتظاميا اگھور ننڊ ۾ آهي: رانديگر
جيڪب آباد (اسپورٽس نيوز) جيڪب آباد جي ڳوٺ عبدالعزيز خاراني جي رانديگرن فٽبال گرائونڊ تي قبضي خلاف احتجاجي مظاهرو ڪندي ڊي سي چوڪ پھتا، جتي رانديگرن ڌرڻو ھڻي روڊ بلاڪ ڪري ڇڏيو، جنهن سبب ٽريفڪ جي رواني معطل ٿي وئي. ان موقعي تي رانديگرن ڊي سي جيڪب آباد خلاف نعري بازي ڪئي. ڊي سي چوڪ تي رانديگرن انوکو احتجاج ڪندي فٽبال راند جو مظاهرو پڻ ڪيو. ان موقعي تي رانديگرن احتجاج ڪندي چيو ته بااثر ماڻهو فٽبال گرائونڊ تي قبضو ڪري رھيا آھن پر ضلعي انتظاميا اگھور ننڊ ۾ پيل آهي. هنن چيو ته ڊي سي جيڪب آباد نوٽس وٺڻ لاءِ تيار ناهي. رانديگرن مطالبو ڪيو ته فٽبال گرائونڊ تان قبضو ختم ڪرائي سڀ سهولتون فراهم ڪيون وڃن ٻي صورت ۾ هو احتجاجي تحريڪ هلائيندا.
”ڀاڳ کُلي ويو“ حيدرآباد ۾ قتل ڪيس عمر قيد جي سزا ڀوڳيندڙ شخص جي 8 سالن کانپوءِ ضمانت ٿي وئي
حيدرآباد: قتل ڪيس ۾ عمر قيد جي سزا ڀوڳيندڙ شخص جي 8 سالن بعد ضمانت ٿي وئي، سنڌ هاءِ ڪورٽ سرڪٽ بينچ الهه ڏتو کوسو جي سزا خلاف اپيل تي 6 سالن بعد ٻڌڻي ڪئي، عدالت هڪ لک رپين عيوض سندس ضمانت منظور ڪري ورتي، قتل ڪيس ۾ عمر قيد جي سزا ماڻيندڙ شخص جي اپيل تي 6 سالن کانپوءِ ٻڌڻي ٿي، سامارو ۾ 2011ع ۾ ممتاز نالي شخص جي قتل ڪيس ۾ ڏوهه ثابت ٿيڻ تي عدالت جوابدار الهه ڏتو کوسو کي عمر قيد جي سزا ڏني هئي
پرڏيهي پاليسي پِنڊي کان پارليامينٽ منتقل ڪئي وڃي: رضا رباني
اسلام آباد(رپورٽر) اڳوڻي سينيٽ چيئرمين ۽ پيپيلزپارٽي اڳواڻ ميان رضا رباني جو چوڻ آهي ته قانون صرف سولين تي لاڳو ڇو ٿو ٿيئي .؟ جيڪڏهن ڪجهه ادارن وٽ احتساب جو پنهنجو نظام آهي ته پوءِ سياستدانن جو احتساب به سندن ساٿي ڪري سگهن ٿا .خبر آهي ته ملڪي پرڏيهي پاليس ڪٿي ٺهندي آهي، پرڏيهي پاليس کي پنڊي کان پارليامينٽ منتقل ٿيڻ گهرجي .هن اهڙن خيالن جو اظهار سينيٽ اجلاس دوران خطاب ڪندي ڪيو .سندس چوڻ هو ته ملٽري ،عدليه سميت سمورن ادارن جو احتساب ٿيڻ گهرجي ،ٻڌايو وڃي ته رياست مشرف جي مامري تي ڇو ڪمزور ٿي وڃي ٿي ،کيس ڪورٽ يا ملڪ ڇو نٿو آندو وڃي .؟ ڇا ڏهاري ۽ ڪرپٽ رڳو سياستدان آهن .؟ هن چيو ته ملڪي ادارا پنهنجن حدن ۾ رهڻ بدران هڪٻئي جي اختيارين کي اورانگهين ٿا جنهن سبب مسئلا پيدا ٿي رهيا آهن .هن چيو ته نيب کي مخالفن خلاف هٿيار طور استعمال ڪيو پيو وڃي .هن گهر ڪئي ته نيب چيئرمين جا اختيار گهٽ ڪيا وڃن .هن چيو ته وفاقي وزير چيو ته ڪجهه مسئلا اهرا آهن جيڪي پارليامينٽ ۾ نٿا ٻڌائي سگهجن ته پوءَ ڇا اسين موسم جو احوال ٻڌڻ لاءِ هتي ويٺا آهيون ،پارليامينٽ کي مان ملڻ گهرجي ،پارليامينٽ سمورن ادارن جي ماءُ آهي .هن چيو ته سياسي پارٽين کي ريموٽ ڪنٽرول ذريعي هلايو پيو وڃي ۽ فاروڊ بلاڪ ٺاهڻ جا ماضي ۾ به ڀيانڪ نتيجا نڪتا آهن .هن جو چوڻ هو ته ماضي ۾ جيڪي به زيادتيون ٿيون آهن انهن جي ازالي ۽ مستقبل ۾ انهن کي نه دهرائڻ لاءِ ٽرٿ ريڪنسليشن ڪميشن جڻن گهرجي .
ٺل:ٻارڙو تلاءُ ۾ ڪري فوت ٿي ويو
ڳوٺ خاوند ڏنو مھر ۾3 سالن جو رازق ڏنوراند ڪندي تلاءُ ۾ ڪري پيو
ٺل(رپورٽر)ٺل ويجهو ڳوٺ خاوند ڏنو مهر ۾ ٽن سالن جو ٻارڙو رازق ڏنو پٽ سعيد مهر ڳوٺ جي تلاءُ ۾ ٻڏي ويو.لاش ملڻ تي گهر ۾ڪهرام مچي ويو.نينگر جي وارثن موجب نينگر راند ڪندي تلاء ۾ڪرڻ سبب فوت ٿيو. نينگر جو لاش مقامي قبرستان ۾دفنايو ويو.
شهباز شريف پي اي سي جو بنا مقابلي چيئرمين چونڊجي ويو، ميمبرز جون شهباز شريف کي واڌايون
اميد ته جڏهن به اوهان جي خاندان جو نالو ايندو، منصب ڪنهن ٻئي جي حوالي ڪندئو: پي ٽي آءِ
مان اهڙو موقعو ئي نه ڏيندس: شهبازشريف جو نور علي خان کي مرڪندي جواب
اسلام آباد ( م ڊ ) قومي اسيمبلي ۾ اپوزيشن ليڊر شهبازشريف پبلڪ اڪائونٽس ڪميٽي جو بنا مقابلي چيئرمين چونڊجي ويو، اسپيڪر اسد قيصر شهبازشريف کي واڌايون ڏنيون، پبلڪ اڪائونٽس ڪميٽي جي اجلاس دوران شيخ روحيل اصغر چيئرمين لاءِ شهبازشريف جو نالو تجويز ڪيو، جڏهن ته مشاهد حسين سيد ان جي حمايت ڪئي، شهبازشريف کانسواءِ ڪنهن جو به نالو سامهون نه آيو، جنهن بعد کيس بنا مقابلي چيئرمين چونڊيو ويو، شهبازشريف بنا مقابلي چيئرمين چونڊجڻ تي پي اي سي جي سمورن ميمبرن جا ٿورا مڃيا ۽ چيو ته سڀني کي گڏ کڻي هلندس، احتساب جو عمل شفاف هوندو ۽ احتساب جي عمل کي بهتر بڻائڻ ضروري آهي، جنهن لاءِ پي اي سي هڪ اثرائتو فورم آهي، پي ٽي آءِ جي شبلي فراز چيو ته سمورن اختلافن باوجود متحد ٿيڻ تي واڌايون ڏيان ٿو، پارليامينٽ کي عوام جي اعتماد تي پورو لهڻو آهي، اميد آهي ته ڪميٽي عوام جي اميدن تي پورو لهندي، ان اموقعي تي پي ٽي آءِ ايم اين اي نور علي خان چيو ته جمهوريت لاءِ ميثاقِ جمهوريت پيپلزپارٽي ۽ ن ليگ وچ ۾ ٿيو، جمهوري روايتن کي برقرار رکندي تحريڪ انصاف اوهان کي چونڊيو، اميد آهي ته جڏهن اوهان جي خاندان جو نالو ايندو، اوهان اهو منصب ڪنهن ٻئي حوالي ڪندئو، جنهن تي شهبازشريف مرڪندي کيس جواب ڏنو ته مان اهڙو موقعو ئي نه ڏيندس، اختر مينگل چيو ته پي اي سي اهم فورم آهي، اسان جو واسطو جنهن به جماعت سان هجي، پر احتساب شفاف ٿيڻ گهرجي، پ پ جي راجا پرويز اشرف چيو ته اڄ هڪ ڀيرو ٻيهر سٺي روايت قائم ٿي آهي، پي اي سي جو چيئرمين اپوزيشن ليڊر آهي، اسان کي سياست کان مٿانهون ٿي احتسابي عمل کي اڳتي وڌائڻو آهي، شهبازشريف جي قيادت ۾ پي اي سي مثالي ڪارڪردگي ڏيکاريندي
گڏيل قومن جي اداري پاران فلسطين جي امداد بند ڪرڻ جو اعلان ڪري ڇڏيو
خوراڪ نه ملڻ ڪري هڪ لک 90 هزار کان وڌيڪ فلسطيني سڌي ريت متاثر ٿيندا
امداد غزه پٽي توڙي والاريل اولهه بيت المقدس ۾ رهندڙ فلسطينين کي ملندي هئي
غزه (ا ڊ) گڏيل قومن جي خوراڪ واري اداري فلسطينين جي امداد بند ڪري ڇڏي آهي. گڏيل قومن جي انتظام هيٺ ڪم ڪندڙ خوراڪ جي اداري لڳ ڀڳ ٻه لک فلسطينين کي ملندڙ امداد بند ڪري ڇڏي آهي، جنهن ۾ خوراڪ پڻ شامل آهي، اها امداد غزه پٽي توڙي والاريل اولهه بيت المقدس ۾ رهندڙ فلسطينين کي ڏني ويندي هئي. عالمي فوڊ پروگرام جي فيصلي سان هڪ لک 90 هزار فلسطيني متاثر ٿيندا. گڏيل قومن جي اداري پاران جاري ڪيل بيان ۾ چيو آهي ته جنوري 2019ع کان فلسطين کي ملندڙ امداد ۾ تبديلي ڪئي ويندي، جنهن ذريعي اولهه ڪناري تي رهندڙ 27 هزار فلسطيني متاثر ٿيندا.
اسٽيٽ بينڪ پاران ڊيٽا هيڪ ڪري رقم ڪڍڻ واريون رپورٽس رد
ڪنهن به بينڪ ڊيٽا هيڪ ٿيڻ بابت رپورٽ ناهي ڪيو : سينيٽ ۾ جواب جمع
اسٽيٽ بينڪ سيڪيورٽي ڪنٽرول روڊ ميپ تيار ڪري ورتو،بينڪن کي سائيبر حملن کان بچڻ جي هدايت
اسلام آباد (رپورٽر) سينيٽ جي اجلاس دوران ناڻي واري وزارت سوالن جوابن دوران ٻڌايو ته پاڪستان جي ڪنهن به بينڪ جي ڊيٽا هيڪ ناهي ٿي ۽ نه ئي ڪنهن جي اڪائونٽ مان پئسا چوري ٿيا آهن ، اسٽيٽ بينڪ اهڙين نرپورٽن کي رد ڪري ڇڏيو آهي .ناڻي واري وزارت لکت ۾ جمع ڪرايل جواب ۾ چيو ته ڪنهن به بينڪ اسٽيت بينڪ يا ملڪ جي ڪنهن به اداري وٽ ڊيٽا چوري ٿيڻ يا وري اڪائونٽ مان پئسا نڪري وڃڻ جي حوالي سان ڪا شڪايت ناهي ڪئي ،هنن ٻڌايو ته اسٽيت بينڪ ڊيٽا کي وڌيڪ محفوظ بڻائڻ لاءِ مناسب سيڪيورٽي ڪنٽرول روڊ ميپ تيار ڪري ورتو آهي ۽ بينڪن کي به اهڙيون هدايتون ڪيون ويون آهن .اجلاس دوران اهو به ٻڌايو ويو ته اسلامي بينڪ جي 4 هزار اڪائونٽ جي ڊيٽا چوري ٿي پر پئسا نه نڪتا ۽ اهو ڪمرشل بينڪ ۽ هڪ انشورنس ڪمپني جو پنهنجو مامرو هو .ناڻي واري وزارت چيو ته بينڪن کي هدايتون جاري ڪيون ويون آهن ته هو سائيبر حملن کي منهن ڏيڻ لاءِ حفاظتي اپاءُ وٺن .
مني لانڊرنگ:سپريم ڪورٽ لاھور رجسٽري ۾ 24 ڊسمبر تي ٻڌڻِي
چيف جسٽس جي سربراهي ۾ سپريم ڪورٽ جي 2 رڪني بينچ ٻڌڻي ڪندي
اسلام آباد ( رپورٽر) سپريم ڪورٽ لاهور رجسٽري ۾ چيف جسٽس جي سربراهي ۾ 2 رڪني بينچ جعلي بينڪ اڪائونٽس ڪيس جي ٻڌڻي 24 ڊسمبر تي ٻڌڻي ڪندي، سپريم ڪورٽ پاران جاري ڪيل روسٽر موجب جعلي بينڪ اڪائونٽس ڪيس جي ٻڌڻي 24 ڊسمبر تي سپريم ڪورٽ لاهور رجسٽري ۾ ٿيندي، چيف جسٽس ثاقب نثار ۽ جسٽس اعجاز الاحسن جي سربراهي ۾ 2 رڪني بينچ ٻڌڻي ڪندي، سپريم ڪورٽ پاران جوڙيل جي آءِ ٽي پنهنجي حتمي رپورٽ گذريل ڏينهن لاهور رجسٽري ۾ جمع ڪرائي ڇڏي هئي، جيڪا 8 واليمز تي ٻڌل آهي