انڊيانا ۾ اختيارين کي مهينو ڊوڙائيندڙ چالاڪ ڪڪڙ نيٺ پڪڙجي پيو

چالاڪ نالي ڪڪڙ انڊيا سٽي ۾ رولو چالاڪ ڪڪڙ طور سڃاتو ويندو هو

جانور جي سينٽر مان فرار ٿيل ڪڪڙ هڪ مهيني جي ڀڄ ڊڪ کانپوءِ هٿ

(دلچسپ) آمريڪي رياست انڊيانا ۾ هڪ شرارتي ڪڪڙ جانورن جي سينٽر جي اختيارين کي هڪ مهينو ڊوڙائڻ کانپوءِ نيٺ پڪڙجي پيو آهي. نيو الباني فلائيڊ ڪائونٽي اينيمل شيلٽر جي آفيسر ڪيري موزر جو چوڻ هو ته اهو ڪڪڙ مهينو اڳ جانورن جي گهر مان ڀڄي ويو هو، جيڪو ڪيتري ئي وقت تائين انڊيانا شهر ۾ گهمندو رهيو. شهر جا رهواسي ڪڪڙ کي چالاڪ ڪڪڙ جي نالي سان سڏيندا آهن، جيڪو شهر جي مختلف هنڌن تي رلندو وتندو هو. ڪيري موزر چيو ته ڪڪڙ کي پڪڙڻ لاءِ سنيٽر اختيارين توڙي شهرين وڏي ڪوشش ڪئي پر هو هٿ نه ايندو هو. ڪڪڙ کي روزانو کاڌو ڏيندڙ هڪ خاندان جي مدد سان نيٺ پڪڙيو ويو.

اصلي زندگي جو “بيٽ مين” ڌاڙيل نڪتو

آمريڪي ۾ بيٽمين جو لباس پائي همراهه اسٽور ۾ ڌاڙو هنيو

بيٽمين پنهنجي دوست سان گڏجي اسٽور مالڪ کي يرغمال بڻايو

آئيوا (دلچسپ) آمريڪي رياست آئيوا ۾ بيٽمين جا ڪپڙا پهريل همراهه اسٽور ۾ گهڙي ڌاڙو هنيو. آمريڪي ميڊيا موجب آئيوا رياست ۾ هڪ همراهه مشهور فنٽسي فلمي هيرو بيٽمين جو ڪپڙا پائي اسٽور ۾ داخل ٿيو. بيٽمين جي هٿ ۾ پسٽل ۽ تلوار هئي، جنهن جي زور تي هن اسٽور مالڪ کي يرغمال بڻائي روڪ رقم سميت ٻيو سامان ڦري فرار ٿي ويو. پوليس موجب بيٽمين جا ڪپڙا پهريل همراهه سان گڏ سندس دوست به گڏ هو. ٻنهي ڦر دوران روڪ رقم ۽ ٻيو سامان کڻي ويا.

ڪي ڪي ايف مني لانڊرنگ: دھشتگردي ٽوڙ عدالت ايف آءِ اي کي دستاويزن جي جائزي لاءِ مهلت ڏئي ڇڏي

متحده جي اڳوڻي سينيٽر احمد علي ٽرانزيڪشن جو مڪمل ريڪارڊ پيش ڪيو

عدالت ايف آءِ اي کي 17 جنوري تائين احمد علي کي گرفتار ڪرڻ کان روڪي ڇڏيو

ڪراچي (رپورٽر) دهشتگردي ٽوڙ عدالت خدمت خلق فائونڊيشن مني لانڊرنگ بابت ايف آءِ اي کي دستاويزن جو جائزو وٺڻ جي مهلت ڏئي ڇڏي، دهشتگردي ٽوڙ عدالت ۾ ٻڌڻي دوران ايم ڪيو ايم جي اڳوڻي سينيٽر احمد علي پيش ٿي ٽرانزيڪشن جو مڪمل رڪارڊ عدالت ۾ پيش ڪيو، ايف آءِ اي اختيارين دستاويزن جو جائزو وٺڻ لاءِ مهلت طلب ڪئي، عدالت ايف آءِ اي کي دستاويزن جي جائزي لاءِ مهلت ڏئي ڇڏي ۽ ايف آءِ اي کي اڳوڻي سينيٽر احمد علي کي 17 جنوري تائين گرفتار ڪرڻ کان روڪي ڇڏيو ۽ کيس جاچ ۾ ايف آءِ اي سان مڪمل سهڪار ڪرڻ جو حڪم ڏنو، ايم ڪيو ايم جي اڳوڻي سينيٽر احمد علي تي الزام آهي ته هن ڪروڙين رپين جي مني لانڊرنگ ڪئي، ڪيس ۾ ايم ڪيو ايم باني، اڳوڻو سينيٽر بابر غور ۽ ٻيا روپوش آه

حيدرآباد ۾ شيخ اياز ميلو شروع ،ناميارا دانشور مها ڪوي کي ڀيٽا پيش ڪندا

خانابدوش ڪيفي سنڌ ميوزيم ۾ اڄ شام 4 وڳي نور الهديٰ شاهه ،آصف فرخي، زاهده حنا ۽ مونس اياز افتتاح ڪندا

صنم ماروي ، اريب اظهر، ذوالفقار فقير لنڊ ۽ ريشما پروين سرن جي ورکا ڪندا ، احمد سونلي اياز جي شاعري پڙهندو

حيدرآباد (رپورٽر )چوٿون اياز ميلو اڄ کان حيدرآباد ۾ شروع ٿي رهيو آهي جنهن جو افتتاح نامياري ليکڪه نورالهديٰ شاهه ،زاهده حنا ، آصف فرخي ۽ شيخ اياز جو فرزند مونس اياز ڪندا .اياز ميلو 25 ڊسمبر تائين جاري رهندو .جنهن دوران ترقي پسند ۽ ادب دوست ڌريون سنڌ جي مها ڪوي شيخ اياز کي ڀيٽا پيش ڪنديون .ميلي دوران مختلف سيشن ٿيندا جن ۾ وسعت الله خان ، مجاهد بريلوي ، تاج جويو ، آصف فرخي ،انيس هارون ،روحي اياز، مونس اياز ۽ ٻيا شريڪ ٿيندا ،.ميلي جو افتتاح اڄ شام جو 4 وڳي ٿيندو .جڏهن ته شام ڌاري محفل موسيقي ٿيندي جنهن ۾ صنم ماروي ، اريب اظهر، ذوالفقار فقير لنڊ، ۽ ريشما پروين فن جو مظاهره ڪندا . ناليوارو شاعر احمد سولنگي شيخ اياز جي شاعري پڙهندو .هي ميلو 25 ڊسمبر تائين جاري رهندو جنهن ۾ روزاني جي بنيادن تي سيشن به ٿيندا ۽ روز رات جو ۾هفل موسيقي به ٿيندي .

”دلي دور آهي“ پ پ اڳواڻن طرفان ويجهاڻي ۾ آصف جي گرفتاري وارو امڪان رد

ڪس زماني ڪي بات ڪرتي هو، دل جلاني ڪي بات ڪرتي هو: لطيف کوسه

ميڊيا معاملي کي وڌائي چڙهائي پيش ڪيو (سعيد غني) ڪارڪن محبت ۾ آيا آهن: قائم شاهه

ڪراچي (رپورٽر) پيپلز پارٽي جي اڳواڻن چيو آهي ته آصف زرداري گرفتار نه ٿيندو، ميڊيا عدالتي معاملي کي وڌائي چڙهائي پيش ڪيو آهي. آصف زرداري ۽ فريال ٽالپر جي پيشيءَ وقت پ پ جي مرڪزي اڳواڻن سوڌو سنڌ حڪومت جا وزير به بئنڪنگ ڪورٽ ڪراچي پهچي ويا. بئڪنگ ڪورٽ ٻاهران صحافين پاران آصف زرداري جي گرفتاري بابت پُڇيل سوال جو دلچسپ جواب ڏنو ۽ چيو ته دلي دور است، ڪِس زماني ڪي بات ڪرتي هو، دل جلاني ڪي بات ڪرتي هو.
لطيف کوسه چيو ته آصف زرداري گرفتار نه ٿيندو. مڪاني کاتن جي وزير سعيد غني ڪارڪنن جي پهچڻ بابت سوال جو جواب ڏيندي چيو ته عدالتي معاملي کي ميڊيا وڌائي چڙهائي پيش ڪيو آهي، پيپلز پارٽي هائيپ ڪريئيٽ نه ڪئي آهي. اسان کي به ميڊيا ذريعي ئي خبر پئي ته اڄ احتجاج ڪيو ويندو. اڳوڻي وڏي وزير قائم علي شاهه چيو ته پيپلز پارٽي جا ڪارڪن توڙي وڪيل آصف زرداري سان محبت ۾ آيا آهن. قائم علي شاهه صحافين پاران وڪيلن کي ڪمانڊو سڏڻ تي ڪاوڙجي پيو ۽ چيو ته وڪيلن کي توهان ڪمانڊو ٿا سڏيو، شابس هجي توهان کي.

هاڻي لباس کي بستر طور به استعمال ڪري سگهبو

لباس ۾ وهاڻو به موجود، ويٺي هنڌ به سڪون سان ننڊ ڪري سگهجي ٿي

لنڊن (دلچسپ) برطانوي ڪمپني پاران اهڙو لباس تيار ڪري ورتو آهي، جيڪو بستري طور به استعمال ڪري سگهبو. اهو لباس ويٺي هنڌ ئي سمهڻ جي سهولت به فراهم ڪندو. لباس ۾ برطانيا ۾ ماڻهن پاران ننڊ پوري نه ڪرڻ جي شڪايت تي ڪمپني پاران اهڙو لباس تيار ڪيو آهي، جنهن سان هر هنڌ ننڊ ڪرڻ آسان هوندو. سو ويٽ نالي اهو لباس ٿڪل ۽ ننڊ جي گهٽتائي جو شڪار ماڻهن جي مدد ڪندو. ان انوکي لباس جو ڪالر به وڏو آهي، جيڪو آرام جي سهولت فراهم ڪري ٿو، اهو لباس خاص ڪري سياري کي نظر ۾ رکندي تيار ڪيو ويو آهي.

افغانستان مان آمريڪي فوج جلد نڪري ويندي: آمريڪي ميڊيا

ٽرمپ انتظاميا افغانستان مان 7 هزار آمريڪي فوجي واپس گهرائيندي: ميڊيا جي دعويٰ

ٽرمپ انتظاميا فوج کي واپسي لاءِ حڪمت عملي جوڙڻ جو حڪم ڏنو آهي: سي اين اين

واشنگٽن (ا ڊ) آمريڪي ميڊيا سرڪاري ذريعن جو حوالو ڏيندي چيو آهي ته شام مان آمريڪي فوج جي نيڪالي کانپوءِ افغانستان مان به ايندڙ ڇهه مهينن دوران فوج واپس گهرائڻ جو اعلان ڪيو ويندو. آمريڪي ميڊيا نيويارڪ ٽائمز توڙي سي اين اين جي رپورٽ موجب ٽرمپ انتظاميا فوج کي افغانستان مان واپسي لاءِ حڪمت عملي تيار ڪرڻ جو حڪم ڏنو آهي. ميڊيا پاران سرڪاري ذريعن جو حوالو ڏيندي چيو ته افغانستان مان 7 هزار آمريڪي فوجي واپس گهرايا ويندا. اهي خبرون شام مان آمريڪي فوجين جي نيڪالي جي خبرن کانپوءِ اچي رهيون آهن. ياد رهي ته ڊونلڊ ٽرمپ افغانستان مان فوجي واپس گهرائڻ جو واعدو ڪيو هو. آمريڪي ميڊيا موجب صدر ٽرمپ ايندڙ سال جنوري جي آخر ۾ آمريڪي فوجن کي افغانستان مان ڪڍڻ جو اعلان ڪري سگهي ٿو.

خاشقجي قتل کانپوءِ سعودي ڳجهي ادارن ۾ سڌارا آڻيندو

سعودي بادشاهه پاران انٽيليجنس ادارن ۾ وڏين تبديلين جو حڪم

جمال خاشقجي قتل کانپوءِ محمد سلمان جي اڳواڻي ۾ ڳجهي ادارن ۾سڌارا آندو ويندا

رياض (ا ڊ) سعودي عرب صحافي جمال خاشقجي قتل جي الزام هيٺ سخت تنقيد کي منهن ڏيڻ کانپوءِ پنهنجي ڳجهن ادارن ۾ سڌارا آڻڻ جو اعلان ڪيو آهي. سعودي ميڊيا موجب خاشقجي قتل کانپوءِ ڳجهن ادارن جي ڪم ڪرڻ جي انداز کي تبديل ڪري سگهجي ٿو. سعودي بادشاهه شاهه سلمان جمال خاشقجي کي استنبول ۾ سعودي قونصل خاني ۾ قتل ڪرڻ واري معاملي کي مڃيندي انٽيليجنس جي ساخت ۾ تبديلي آندي ويندي. سعودي بادشاهه پاران ولي عهد محمد بن سلمان جي سربراهي هيٺ ڳجهي اداري کي ٻيهر جوڙڻ جو حڪم ڏنو آهي. سعودي عرب جي سرڪاري ميڊيا پاران جاري ڪيل بيان ۾ چيو ويو آهي ته سعودي بادشاهه ترجيحي بنيادن تي ڳجهي اداري کي قومي سلامتي ۽ عالمي انساني حقن کي نظر ۾ رکندي جوڙڻ جو حڪم ڏنو آهي.

مني لانڊرنگ ڪيس: حسين لوائي کي بئنڪگن ڪورٽ آڏو پيش نه ڪيو ويو، طلحه کي ڊاڪٽرن روڪي ڇڏيو

بئڪنگ ڪورٽ ۾ مني لانڊرنگ ڪيس جي ٻڌڻي، اڊيالا انتظاميا حڪمن تي عمل نه ڪيو: وڪيل

اڊيالا جيل انتظاميه حسين لوائي کي پيش نه ڪيو ،ڪورٽ عدالت حڪمن تي عمل ڪرائي : وڪيل

ڪراچي (رپورٽر) مني لانڊرنگ ڪيس ۾ گرفتار اڳوڻي صدر آصف علي زرداري جي ويجهي دوست حسين لوائي کي اڄ به اڊيالا جيل انتظاميه ڪراچي جي بينڪنگ ڪورٽ ۾ پيش نه ڪيو جنهن تي سندس وڪيل درخواست داخل ڪرائيندي موقف اختيار ڪيو ته عدالت حڪم ڏنو هو ته حسين لوائي کي عدالت ۾ پيش ڪيو وڃي پر اڊيالا جيل انتظاميه کيس پيش نه ڪيو جيڪا عدالتي حڪمن جي توهين آهي ،ڪورٽ کي ان جو نوٽيس وٺڻ گهرجي . ٻئي پاسي مني لانڊرنگ ڪيس ۾ گرفتار طلحه رضا کي لانڊي جيل انتظاميه عدالت ۾ پيش نه ڪيو ، پوليس عدالت ۾ رپورٽ جمع ڪرائيندي موقف اختيار ڪيو ته طلحه رضا جي ٽنگ جو آپريشن ٿيو آهي ، ڊاڪٽرن کيس هلڻ کان منع ڪيو آهي ان ڪري اڄوڪي پيشي تي کيس پيش نه ڪري سگهيا آهيون . پوليس طرفان سندس ميڊيڪل رپورٽ به جمع ڪرائي وئي .

بالي ووڊ ڊانس ماسٽر گووندا 55 سالن جو ٿي ويو

گووندا راجا بابو، ڪولي نمبر ون، هيرو نمبر ون جهڙيون شاندار فلمون ڏنيون

بالي ووڊ ڊانس ماسٽر گووندا سندرين کان به بهترين ڊانس ڪرڻ ۾ مشهور

ممبئي (شوبز نيوز) بالي ووڊ جو ڊانس ماسٽر ۽ ڀلوڙ اداڪار گووندا 55 هين سالگرهه ملهائي رهيو آهي. بالي ۾ 90ع جي ڏهاڪي دوران هيرو نمبر ون طور مشهور گووندا سوين فلمن ۾ ڪم ڪيو آهي، جنهن ۾ ڪيتريون ئي فلمون بالي ووڊ جون مشهور سپر هٽ فلمون شامل آهن. گووندا جو ڊانس اسٽائل بالي ووڊ توڙي ننڍي کنڊ ۾ مشهور آهي، جڏهن ته سندس اظهار ڪرڻ جو طريقو به پرفيڪٽ طور مڃيو ويو. گووندا هر ڪردار ۾ سمائجي ويندو هو، جڏهن ته سندس ڪامياب فلمن ۾ هيرو نمبر، راجا بابو ۽ ٻيون ڪيتريون ئي فلمون شامل آهن. گووندا جي نئين فلم رنگيلا راجا هلندڙ سال ريليز ٿيندي.

بئڪنگ ڪورٽ ٻاهران آصف جي حمايت ۾ نعريبازي، جج ڪاوڙجي پيو

عدالتي احاطو جلسي جو ڏيک ڏيڻ لڳو، گوڙ ختم ڪرايو، جوابدارن کي اندر اچڻ ڏيو: جج

ڪراچي (رپورٽر) ڪراچي جي بئنڪنگ ڪورٽ ۾ اڳوڻي صدر آصف زرداري ۽ فريال ٽالپر جي پيشيءَ دوران پيپلز پارٽي جا وڏي تعداد ۾ ڪارڪن توڙي حامي وڪيل عدالت ٻاهران پهچي ويا. عدالتي احاطي ٻاهران ڪارڪنن “زنده هي بيبي زنده هي، آصف تيري جان نثار بي مثال” جي نعريبازي ڪندا رهيا. وڏي تعداد ۾ ڪارڪنن جي پهچڻ سبب بئنڪنگ ڪورٽ جي احاطي جلسي جا منظر اچي رهيا هئا. عدالتي احاطي ۾ گوڙ ٿيڻ تي بئنڪنگ ڪورٽ جي جج ڪاوڙ جو اظهار ڪيو ۽ چيو ته عدالت ۾ گوڙ ختم ڪرايو وڃي. جج چيو ته جوابدارن کي اندر اچڻ ڏنو وڃي، جنهن بعد آصف زرداري ۽ فريال ٽالپر اندر اچي حاضري لڳائي.

عدالت لياقت جتوئي کي هڪ ڀيرو دبئي وڃڻ جي اجازت ڏئي ڇڏي

لياقت جتوئي جو نالو اي سي ايل ۾ وجهڻ خلاف سنڌ هاءِ ڪورٽ ۾ درخواست تي ٻڌڻي

لياقت جتوئي جي ڌيءُ بيمار آهي، کيس دبئي وڃڻو آهي: وڪيل

ڪراچي ( رپورٽر ) سنڌ هاءِ ڪورٽ لياقت جتوئي کي هڪ ڀيرو دبئي وڃڻ جي اجازت ڏئي ڇڏي، اڳوڻي وفاقي وزير ۽ پي ٽي آءِ اڳواڻ لياقت جتوئي جو نالو اي سي ايل ۾ شامل ڪرڻ خلاف درخواست تي ٻڌڻي ٿي، ايڊووڪيٽ محمود عالم چيو ته لياقت جتوئي خلاف نيب راولپنڊي ۾ ريفرنس هلي رهيو آهي، کانئس متبادل توانائي لاءِ بشارت حسن جي ڪنسلٽنٽ طور مقرري بابت تفصيل گهريا ويا هئا، هن چيو ته ايئرپورٽ تي ايف آءِ اي اختيارين لياقت جتوئي کي دبئي وڃڻ کان روڪيو ۽ کيس چيو ويو ته سندس نالو اي سي ايل ۾ آهي، وڪيل چيو ته لياقت جتوئي جي ڌيءُ بيمار آهي، کيس دبئي وڃڻ جي اجازت ڏني وڃي، اهڙي استدعا تي عدالت لياقت جتوئي کي هڪ ڀيرو دبئي وڃڻ جي اجازت ڏئي ڇڏي

سٺا ۽ خراب ڏينهن ڏٺا آهن، اسان تيار آهيون: خورشيد شاهه

جي آءِ ٽي وٽ ثبوت ناهن، رڳو غلط ڳالهيون گهڙيون ويون آهن: پ پ اڳواڻ

عدالتي ٽرائل کان اڳ ميڊيا ٽرائل شروع ڪيو ويندو آهي: خورشيد شاهه

پ پ اڳواڻ خورشيد شاهه چيو آهي ته جي آءِ ٽي وٽ ڪي به ثبوت ناهن، رڳو غلط ڳالهيون گهڙيون پيون وڃن، عدالتي ٽرائل کان اڳ ميڊيا ٽرائل شروع ڪيو وڃي ٿو ۽ ميڊيا ٽرائل عدالتي ٽرائل کي ٽيڪ اوور ڪري ويندو آهي پر پيمرا خاموش تماشائي بڻيل آهي، مختلف وقتن تي جي آءِ ٽي رپورٽ ليڪ ٿيندي رهي آهي، ڪراچي ۾ آصف زرداري جي پيشي جي موقعي تي بينڪنگ ڪورٽ آيل خورشيد شاهه ميڊيا سان غير رسمي ڳالهه ٻولهه ڪئي، پ پ اڳواڻ چيو ته جي آءِ ٽي رپورٽ اسان ناهي ڏٺي، پر پيپلزپارٽي لاءِ هي سڀ ڪجهه نئون ناهي، اسان آمرن جا تجربا ڪيا، فردِ واحد جي تجربن مان به گذريا آهيون ۽ جسٽس منير کان وٺي جسٽس ثاقب نثار تائين سمورن ججز کي ڏٺو آهي، عدليه جا سٺا ۽ خراب فيصلا به ڏٺا آهن، افتخار چوڌري کي به ڏسي چڪا آهيون، جنهن وردي ۾ ڊڪٽيٽر کي آئين ۾ ترميم جي اجازت ڏني، خپرشيد شاهه چيو ته ميڊيا ٽرائل اسان جي وڏي بدقسمتي آهي، جيڪو ماڻهن جو ذهن ٺاهي ڇڏيندو آهي ۽ ميڊيا ٽرائل عدالتي ٽرائل کي ٽيڪ اوور ڪري ڇڏيندو آهي، پر پيمرا خاموش تماشائي بڻيل آهي، خورشيد شاهه چيو ته عدالتي ٽرائل کان اڳ ميڊيا ٽرائل شروع ڪيو ويندو آهي، پابندي باوجود هلندڙ ڪيسز تي تبصرا ٿيندا آهن

ميان صاحب:مزدا،ڪوچ ۽ٽرڪ ۾ٽڪر.3 ڄڻا زخمي

ميان صاحب(رپورٽر)ھمايون گرڊ اسٽيشن لڳ تيز رفتار مزدا ۽ ڪوچ جي ٽڪر ٿي پئي وئي جنھن سبب ڪوچ سامھون ايندڙ ٽرڪ سان ٽڪرائجي ڪلٽي ٿي. ٽرڪ ڊرائيور سميت 3 ڄڻا زخمي ٿي پيا.ھمايون پوليس موجب زخمين جي حالت خطري کان ٻاھر آھي زخمين کي علاج لاء سلطان ڪوٽ اسپتال موڪليو ويو..

گڏيل قومن جي اداري فلسطين جي امداد بند ڪري ڇڏي

خوراڪ نه ملڻ ڪري هڪ لک 90 هزار هزار فلسطيني سڌي ريت متاثر ٿيندا

غزه (ا ڊ) گڏيل قومن جي خوراڪ واري اداري فلسطينين جي امداد بند ڪري ڇڏي آهي. گڏيل قومن جي انتظام هيٺ ڪم ڪندڙ خوراڪ جي اداري لڳ ڀڳ ٻه لک فلسطينين کي ملندڙ امداد بند ڪري ڇڏي آهي، جنهن ۾ خوراڪ پڻ شامل آهي، اها امداد غزه پٽي توڙي والاريل اولهه بيت المقدس ۾ رهندڙ فلسطينين کي ڏني ويندي هئي. عالمي فوڊ پروگرام جي فيصلي سان هڪ لک 90 هزار فلسطيني متاثر ٿيندا. گڏيل قومن جي اداري پاران جاري ڪيل بيان ۾ چيو آهي ته جنوري 2019ع کان فلسطين کي ملندڙ امداد ۾ تبديلي ڪئي ويندي، جنهن ذريعي اولهه ڪناري تي رهندڙ 27 هزار فلسطيني متاثر ٿيندا.

پويون 1 … 96 97 98 99 اڳيون